Scripture Library
Viṣṇusmṛti · Chapter 11
11.8
yo hastayoḥ kvacid dagdhas tam aśuddhaṃ vinirdiṣet
na dagdhaḥ sarvathā yas tu sa viśuddho bhaven naraḥ //
11.9
bhayād vā pātayed yas tu dagdho vā na vibhāvyate
punas taṃ hārayel lohaṃ samayasyāviśodhanāt //
11.10
karau vimṛditavrīhes tasyādāv eva lakṣayet
abhimantryāsya karayor lohapiṇḍaṃ tato nyaset //
11.11
tvam agne sarvabhūtānām antaś carasi sākṣivat
tvam evāgne vijānīṣe na vidur yāni mānavāḥ //
11.12
vyavahārābhiśasto 'yaṃ mānuṣaḥ śuddhim icchati
tad enaṃ saṃśayād asmād dharmatas trātum arhasi //
Original text: Viṣṇusmṛti · Edition: V. Krishnamacharya Viṣṇusmṛti with the commentary of Keśavavaijayantī of Nandapaṇḍita Madras The Adyar Library and Research Centre 2 The Adyar Library Series 93,1-2 · Data entry I. Shima · GRETIL (Göttingen) · CC BY-NC-SA 4.0