Vishnu Purana · Chapter 4.20

iti śrīviṣṇumahāpurāṇe caturthāṃśa ekonaviṃśo 'dhyāyaḥ (19)
śrīparāśara uvāca
parīkṣitaś ca janamejayaśrutasenograsenabhīmasenāścātvāraḥ putrāḥ

jahnostu surathonāmātmajo babhūva

tasyāpi vidūrathaḥ

tasmātsārvabhomaḥsārvabhaumājjayatsenastasmādārādhitastataścāyutāyurayutāyorakrodhanaḥ

tasmāddevātithiḥ

tataś ca ṛkṣo 'nyobhavat

ṛkṣādbhīmasenastataś ca dilīpaḥ

dilīpāt pratīpaḥ

tasyāpi devāpiśantanubāhlīkasaṃjñāstrayaḥ putrā babhūvuḥ

devāpirbāla evāraṇyaṃ viveśa

śantanustu mahīpālo 'bhūt

ayaṃ ca tasya ślokaḥ pṛthivyāṃ gīyate

yaṃyaṃ karābhyāṃ spṛśati vīrṇaṃ yauvanameti saḥ /
śāntiṃ cāpnoti yenāgryāṃ karmaṇā tena śantanuḥ

tasya ca śantano hāṣṭre dvādaśavarṣāṇi devo na vavarṣa

tataścāśeṣarāṣṭravināśamavekṣyāsau rājā brāhmaṇānapṛcchat kasmādasmākaṃ rāṣṭre devo na varṣati ko mamāparādha iti

tataś ca tamūcurbrāhmaṇāḥ

agrajasya te hīyamavanistvayā saṃbhujyate ataḥ parivettā tvamityuktaḥsa rājā punastānapṛcchat

kiṃ mayātra vidheyamiti

tataste punarapyūcuḥ

yāvaddevāpirna patanādibhir deṣair abhibhūyate tāvadetattasyārhaṃ rājyam

tadalametena tu tasmaidīyatāmityukte tasyaṃ mantripravareṇāśmarāviṇā tatrāraṇye tapasvino vedavādavirodhavaktāraḥ prayuktāḥ

tair asyāpy atiṛjumater mahīpatiputrasya buddhir vedavādavirodhamārgānusāriṇyakriyata

rājā ca śantanurdvijavacanotpannaparidevanaśokastān brāhmaṇānagrataḥ kṛtvāgrajasya pradānāyāraṇyaṃ jagāma

tadāśramamupagatāś ca tamavanatamavanīpatiputraṃ devāpimupatasthuḥ

te brāhmaṇā vedavādānubandhīni vacāṃsi rājyamagrajena kartavyamityarthavanti tamūcuḥ

asāvapi devāpirvedavādavirodhayuktidūṣitamanekaprakāraṃ tānāha

tataste brāhmaṇāḥ śantanumūcuḥ

āgaccha he rājannalamatrātinirbadhena praśānta evāsāvanā vṛṣṭidoṣaḥ patitoyamanādikālamabhihitavedavacanadūṣaṇoccaraṇāt

patite cāgraje naiva te parivetṛtvaṃ bhavatītyuktaḥ śantanuḥsvapuramāgamya rājyamakarot

vedavādavirodhavacanoccāraṇadūṣite ca tasmindevāpau tiṣṭhatyapi jyeṣṭhabhrātaryakhilasasyaniṣpattaye vavarṣa bhagavānparjanyaḥ

bāhlīkātsomadattaḥ putro 'bhūt

somadattasyāpi bhūribhūriśravaśalyasaṃjñāstrayaḥ putrā babhūvuḥ

śantanorapyamaranadyāṃ jāhnavyāmudārakīrtiraśeṣaśāstrarthavidbhīṣmaḥ putro 'bhūt

satyavatyāṃ ca citrāṅgadavicitravīryau dvau putrāvutpādayāmāsa śantanuḥ

citrāṅgadastu bāla eva citrāṅgadenaiva gandharvoṇāhave nihataḥ

vicitravīryo 'pi kāśīrājatanaye aṃbāṃvālike upayeme

tadupabhogātikhedācca yakṣmaṇā gṛhītaḥ sa pañcatvamagamat

satyavatīniyogācca matputraḥ kṛṣṇadvaipāyano māturvacanamanatikramaṇīyamiti kṛtvā vicitravīryakṣetre dhṛtarāṣṭrapāṇḍutatprahitabhujiṣyāyāṃ viduraṃ cotpādayāmāsa

dhatarāṣṭropi gāndhāryāṃ duryodhanaduḥ śāsanapradhānaṃ putraśatamutpādayāmāsa

pāṇḍhorapyaraṇye mṛgayāyāmṛṣiśāpopahataprajājananasāmarthyasya dharmavāyuśakrair yudhiṣṭhirabhīmasenārjunāḥ kuntyāṃ nakulasahadevau cāśvibhyāṃ mādrayāṃ pañcaputrāḥsamutpāditāḥ

teṣāṃ ca draupadyāṃ pañcaiva babhūvuḥ

yudhiṣṭhirātprativindhyaḥ bhīmasenācchutasenaḥ śrutakīrtirarjunācchutānīko nakulācchutakarmā sahadevāt

kāśī ca bhīmasenādeva sarvagaṃ sutamavāpa

yaudheyī yudhiṣchirāddevakaṃ putramavāpa

hiḍiṃbā ghaṭotkacaṃ bhīmasenātputraṃ lebhe

kāśī ca bhīmasenādeva sarvagaṃ sutamavāpa

sahadevācca vijayī kuhotraṃ putramavāpa

reṇumatyāṃ ca nakulopi niramitramajījanat

arjunasyāpyulūpyāṃ nāgakanyāyāmirāvānnāma putro 'bhavat

maṇīpurapatiputryāṃ putrikādharmeṇa babruvāhanaṃ nāma putramarjuno 'janayat

subhadrāyāṃ cārbhakatvepi yosāvatibalaparākramaḥsamastārātirathajetā so 'bhimanyurajāyata

abhimanyoruttarāyāṃ parikṣīṇeṣu kuruṣvaśvatthāmaprayuktabrahmastreṇa garbha eva bhasmīkṛto bhagavataḥsakalasurāsuravanditacaraṇayugalasyātmecchayā kāramamānuṣarūpadhārīṇonubhāvātpunarjīvitamavāpya parīkṣijjajñe

yo 'yaṃ sāṃpratamedadbhūmaṇḍalamakhaṇḍitāyatidharmeṇa pālayatīti