Vīṇāśikhatantra · Verses 1-20

kailāsaśikhare ramye nānāratnopaśobhite
nānādrumalatākīrṇe siddhacāraṇasevite //

tatra devaḥ suraśreṣṭhaḥ krīḍate umayā saha
stūyamāno mahāsiddhair mahākālādibhir gaṇaiḥ //

ṛṣibhiś ca mahābhāgair bhṛgvādyaiḥ surasattamaiḥ
teṣāṃ madhye samutthāya devī vacanam abravīt //

śrutaṃ sammohanaṃ tantraṃ tathā nayottaraṃ mahat
śiraśchedaṃ ca deveśa tvatprasādāt sudurlabham //

vratasādhyāni caitāni yāgasādhyāni vai punaḥ
anyasārā yato loke prāyo draviṇavarjitāḥ //

ebhyo 'pi cottaraṃ yasmāt kevalaṃ jñānasiddhidam
sarvakāmapradaṃ deva yathāvad bījapañcakaṃ //

uttaraṃ hṛdayaṃ hy eṣāṃ bhaktāya dātum arhasi //

yan na kasyacid ākhyātaṃ śukrādīnāṃ ca yoginām
subhaktasya vinītasya gopitaṃ vai guhasya ca //

catuḥṣaṣṭiḥ samākhyātāḥ śiṣyās tantreṣu ye mayā
teṣām api na cākhyātaṃ brahmaviṣṇupuraḥsaraiḥ //

tad ahaṃ sampravakṣyāmi cintāratnam ivāparam
tantraṃ vīṇāśikhaṃ nāma nirvyājenāśusiddhidam //

devītumburusaṃyuktaṃ vīṇādhārasusaṃsthitam
śikhāyogena iṣyante tena vīṇāśikhā smṛtā //

yāgam ādau pravakṣyāmi tantrasāraṃ sudurlabham
tenaiva varadā devyo nityaṃ devi bhavanti hi //

gṛhayāgam idaṃ devi yo jānātīha sādhakaḥ
vratahomād ṛte cāsmin susiddhiṃ labhate param //

śiṣyāṇām āditaḥ kuryād yāgaṃ kṛtvā parigraham
nānyathā darśayet tantraṃ na cāsau siddhim āpnuyāt //

caturthyām atha pañcamyāṃ navamyām ekādaśīṣu ca
grahaṇe vāpi kartavyā sarvadā cārkasomayoḥ //

caturthyāṃ yajanaṃ śreṣṭhaṃ saubhāgyakaraṇaṃ mahat
śrīkāmo yajanaṃ kuryāt pañcamyāṃ susamāhitaḥ //

saṃgrāme vijayārthī vā pararāṣṭravimardanam
navamyāṃ pārthivaṃ yāgaṃ kurvīta bhaginīpriyam //

ekādaśyāṃ yajed yas tu śivaloke mahīyate
sugupte nirjane deśe saridvāpītaṭe 'pi vā //

kṛtvādau bhūmisaṃśuddhiṃ sāvitryā deśikottamaḥ
kṛtvā pūjāṃ prakurvīta śiṣyāṇām adhivāsanam //

carukaṃ sādhane paścāt sāvitryā dāpayed budhaḥ
śiṣyāṇāṃ dantakāṣṭhaṃ ca sakṣīraṃdvādaśāṅgulam //