વીણાશિખતન્ત્ર · શ્લોક 1-20

કૈલાસશિખરે રમ્યે નાનારત્નોપશોભિતે
નાનાદ્રુમલતાકીર્ણે સિદ્ધચારણસેવિતે ॥

તત્ર દેવઃ સુરશ્રેષ્ઠઃ ક્રીડતે ઉમયા સહ
સ્તૂયમાનો મહાસિદ્ધૈર્ મહાકાલાદિભિર્ ગણૈઃ ॥

ઋષિભિશ્ ચ મહાભાગૈર્ ભૃગ્વાદ્યૈઃ સુરસત્તમૈઃ
તેષાં મધ્યે સમુત્થાય દેવી વચનમ્ અબ્રવીત્ ॥

શ્રુતં સમ્મોહનં તન્ત્રં તથા નયોત્તરં મહત્
શિરશ્છેદં ચ દેવેશ ત્વત્પ્રસાદાત્ સુદુર્લભમ્ ॥

વ્રતસાધ્યાનિ ચૈતાનિ યાગસાધ્યાનિ વૈ પુનઃ
અન્યસારા યતો લોકે પ્રાયો દ્રવિણવર્જિતાઃ ॥

એભ્યો ઽપિ ચોત્તરં યસ્માત્ કેવલં જ્ઞાનસિદ્ધિદમ્
સર્વકામપ્રદં દેવ યથાવદ્ બીજપઞ્ચકં ॥

ઉત્તરં હૃદયં હ્ય્ એષાં ભક્તાય દાતુમ્ અર્હસિ ॥

યન્ ન કસ્યચિદ્ આખ્યાતં શુક્રાદીનાં ચ યોગિનામ્
સુભક્તસ્ય વિનીતસ્ય ગોપિતં વૈ ગુહસ્ય ચ ॥

ચતુઃષષ્ટિઃ સમાખ્યાતાઃ શિષ્યાસ્ તન્ત્રેષુ યે મયા
તેષામ્ અપિ ન ચાખ્યાતં બ્રહ્મવિષ્ણુપુરઃસરૈઃ ॥

તદ્ અહં સમ્પ્રવક્ષ્યામિ ચિન્તારત્નમ્ ઇવાપરમ્
તન્ત્રં વીણાશિખં નામ નિર્વ્યાજેનાશુસિદ્ધિદમ્ ॥

દેવીતુમ્બુરુસંયુક્તં વીણાધારસુસંસ્થિતમ્
શિખાયોગેન ઇષ્યન્તે તેન વીણાશિખા સ્મૃતા ॥

યાગમ્ આદૌ પ્રવક્ષ્યામિ તન્ત્રસારં સુદુર્લભમ્
તેનૈવ વરદા દેવ્યો નિત્યં દેવિ ભવન્તિ હિ ॥

ગૃહયાગમ્ ઇદં દેવિ યો જાનાતીહ સાધકઃ
વ્રતહોમાદ્ ઋતે ચાસ્મિન્ સુસિદ્ધિં લભતે પરમ્ ॥

શિષ્યાણામ્ આદિતઃ કુર્યાદ્ યાગં કૃત્વા પરિગ્રહમ્
નાન્યથા દર્શયેત્ તન્ત્રં ન ચાસૌ સિદ્ધિમ્ આપ્નુયાત્ ॥

ચતુર્થ્યામ્ અથ પઞ્ચમ્યાં નવમ્યામ્ એકાદશીષુ ચ
ગ્રહણે વાપિ કર્તવ્યા સર્વદા ચાર્કસોમયોઃ ॥

ચતુર્થ્યાં યજનં શ્રેષ્ઠં સૌભાગ્યકરણં મહત્
શ્રીકામો યજનં કુર્યાત્ પઞ્ચમ્યાં સુસમાહિતઃ ॥

સંગ્રામે વિજયાર્થી વા પરરાષ્ટ્રવિમર્દનમ્
નવમ્યાં પાર્થિવં યાગં કુર્વીત ભગિનીપ્રિયમ્ ॥

એકાદશ્યાં યજેદ્ યસ્ તુ શિવલોકે મહીયતે
સુગુપ્તે નિર્જને દેશે સરિદ્વાપીતટે ઽપિ વા ॥

કૃત્વાદૌ ભૂમિસંશુદ્ધિં સાવિત્ર્યા દેશિકોત્તમઃ
કૃત્વા પૂજાં પ્રકુર્વીત શિષ્યાણામ્ અધિવાસનમ્ ॥

ચરુકં સાધને પશ્ચાત્ સાવિત્ર્યા દાપયેદ્ બુધઃ
શિષ્યાણાં દન્તકાષ્ઠં ચ સક્ષીરંદ્વાદશાઙ્ગુલમ્ ॥