Viṃśikāvṛtti · Verses 1-20

Viṃśikāvṛttiḥ (Vvṛ)
vijñaptimātramevedamasadarthāvabhāsanāt /
yadvat taimirikasyāsatkeśoṇḍrakādidarśanaṃ

na deśakālaniyamaḥ santānāniyamo na ca /
na ca kṛtyakriyā yuktā vijñaptiryadi nārthataḥ

deśādiniyamaḥ siddhaḥ svapnavat pretavatpunaḥ /
santānāniyamaḥ sarvaiḥ pūyanadyādidarśane

svapnopaghātavatkṛtyakriyā narakavatpunaḥ /
sarvaṃ narakapālādidarśane taiśca bādhane

tiraścāṃ sambhavaḥ svarge yathā ca narake tathā /
na pretānāṃ yatastajjaṃ duḥkhaṃ nānubhavanti te

yadi tatkarmabhistatra bhūtānāṃ sambhavastathā
iṣyate pariṇāmaśca kiṃ vijñānasya neṣyate

karmaṇo vāsanānyatra phalamanyatra kalpyate /
tatraiva neṣyate yatra vāsanā kiṃ nu kāraṇaṃ

rūpādyāyatanāstitvaṃ tadvineyajanaṃ prati /
abhiprāyavaśāduktamupapādukasattvavat

nāstīha satva ātmā vā dharmāstvete sahetukāḥ
yataḥ svabījādvijñaptiryadābhāsā pravartate /
dvividhāyatanatvena te tasyā munirabravīt

tathā pudgalanairātmyapraveśo hi anyathā punaḥ /
deśanā dharmanairātmyapraveśaḥ kalpitātmanā

na tadekaṃ na cānekaṃ viṣayaḥ paramāṇuśaḥ /
na ca te saṃhatā yasmātparamāṇurna sidhyati

ṣaṭkena yugapadyogātparamāṇoḥ ṣaḍaṃśatā /
ṣaṇṇāṃ samānadeśatvātpiṇḍaḥ syādaṇumātrakaḥ

paramāṇorasaṃyoge tatsaṅghāte 'sti kasya saḥ /
na cānavayavatvena tatsaṃyogād na sidhyati

dibhāgabhedo yasyāsti tasyaikatvaṃ na yujyate /
chāyāvṛtī kathaṃ vā anyo na piṇḍaścenna tasya te

ekatve na krameṇetiryugapanna grahāgrahau /
vicchinnānekavṛttiśca sūkṣmānīkṣā ca no bhavet

pratyakṣabuddhiḥ svapnādau yathā sa ca yadā tadā /
na so 'rtho dṛśyate tasya pratyakṣatvaṃ kathaṃ mataṃ

uktaṃ yathā tadābhāsā vijñaptiḥ smaraṇaṃ tataḥ /
svapnadṛgviṣayābhāvaṃ nāprabuddho 'vagacchati

anyonyādhipatitvena vijñaptiniyamo mithaḥ /
middhenopahataṃ cittaṃ svapne tenāsamaṃ phalaṃ

maraṇaṃ paravijñaptiviśeṣādvikriyā yathā /
smṛtilopādikānyeṣāṃ piśācādimanovaśāt

kathaṃ vā daṇḍakāraṇyaśūnyatvamṛṣikopataḥ /
manodaṇḍo mahāvadyaḥ kathaṃ vā tena sidhyati