vilomākṣararāmakṛṣṇakāvyam · Chapter 1

taṃ bhūsutāmuktimudārahāsaṃ vande yato bhavyabhavaṃ dayāśrīḥ /
śrīyādavaṃ bhavyabhatoyadevaṃ saṃhāradāmuktimutāsubhūtam

ciraṃ virañcirna ciraṃ virañciḥ sākāratā satyasatārakā sā /
sākāratā satyasatārakā sā ciraṃ virañcirna ciraṃ virañciḥ

tāmasītyasati satyasīmatā māyayākṣamasamakṣayāyamā /
māyayākṣasamakṣayāyamā tāmasītyasati satyasīmatā

kā tāpaghnī tārakādyā vipāpā tredhā vidyā noṣṇakṛtyaṃ nivāse /
sevā nityaṃ kṛṣṇanodyā vidhātre pāpāvidyākāratāghnī patākā

śrīrāmato madhyamatodi yena dhīro'niśaṃ vaśyavatīvarādvā /
dvārāvatīvaśyavaśaṃ nirodhī nayedito madhyamato'marā śrīḥ

kauśike tritapasi kṣaravratī yo'dadād'dvitanayasvamāturam /
rantumāsvayana tadvidādayo' tīvrarakṣasi patatrikeśikau

lambādharoru trayalambanāse tvaṃ yāhi yāhi kṣaramāgatājñā /
jñātāgamā rakṣa hi yāhi yā tvaṃ senā balaṃ yatra rurodha bālam

laṅkāyanā nityagamā dhavāśā sākaṃ tayānunnayamānukārā /
rākānumā yannanu yātakaṃsā śāvādhamāgatya nināya kālam

gādhijādhvaravairā ye te'tītā rakṣasā matāḥ /
tāmasākṣaratātīte ye rāvairadhvajādhigāḥ

tāvadeva dayā deve yāge yāvadavāsanā /
nāsavādavayā geyā vede yādavadevatā

sabhāsvaye bhagnamanena cāpaṃ kīnāśatānaddharuṣā śilāśaiḥ /
śailāśiṣāruddhanatāśanākī pañcānane magnabhaye svabhāsaḥ

na veda yāmakṣarabhāmasītāṃ kā tārakā viṣṇujite'vivāde /
devāvite jiṣṇuvikāratā kā tāṃ sīmabhārakṣamayādavena

tīvragoranvayatrāryo vaidehīmanaso mataḥ /
tamaso na mahīdevai- ryātrāyanvaragovratī

veda yā padmasadanaṃ sādhārāvatatāra mā /
māratā tava rādhā sā nanda sadmapa yādave

śaivato hanane'rodhī yo deveṣu nṛpotsavaḥ /
vatsapo nṛṣu vede yo dhīro'nena hato'vaśaiḥ

nāgopago'si kṣara me pināke' nāyo'jane dharmadhanena dānam /
nandānane dharmadhane jayo nā kenāpi me rakṣasi gopago naḥ

tatāna dāma pramadā padāya neme rucāmasvanasundarākṣī /
kṣīrādasuṃ na svamacāru mene yadāpa dāma pramadā natātaḥ

tāmito mattasūtrāmā śāpādeṣa vigānatām /
tāṃ nagāviṣade'pāśā mātrāsūttamato mitā

nāsāvadyāpatrapājñāvinodī dhīro'nutyā sasmito'dyāvigītyā /
tyāgī vidyāto'smi sattyānurodhī dīno'vijñā pātrapadyāvasānā

sambhāvitaṃ bhikṣuragādagāraṃ yātādhirāpa svanaghājavaṃśaḥ /
śavaṃ jaghāna svaparādhitāyā raṅgādagārakṣubhitaṃ vibhāsam

tayātitārasvanayāgataṃ mā lokāpavādadvitayaṃ pināke /
kenāpi yaṃ tadvidavāpa kālo mātaṅgayānasvaratātiyātaḥ

śave'vidā citrakuraṅgamālā pañcāvaṭīnarma na rocate vā /
vāte'caro narmanaṭīva cāpaṃ lāmāgaraṃ kutracidāviveśa

neha vā kṣipasi pakṣikandharā mālinī svamatamatta dūyate /
te yadūttamatama svanīlamā- rādhakaṃ kṣipasi pakṣivāhane

vanāntayānasvaṇuvedanāsu yoṣāmṛte'raṇyagatāvirodhī /
dhīro'vitāgaṇyarate mṛṣā yo sunādaveṇusvanayātanāṃ vaḥ

kiṃ nu toyarasā pampā na sevā niyatena vai /
vainateyanivāsena pāpaṃ sārayato nu kim

sa natātapahā tena svaṃ śenāvihitāgasam /
saṅgatāhivināśe svaṃ netehāpa tatāna saḥ

kapitālavibhāgena yoṣādo'nunayena saḥ /
sa naye nanu doṣāyo nage bhāvilatāpikaḥ

te sabhā prakapivarṇamālikā nālpakaprasaramabhrakalpitā /
tālpikabhramarasaprakalpanā kālimarṇava pika prabhāsate

rāvaṇe'kṣipatanatrapānate nālpakabhramaṇamakramāturam /
rantumākramaṇamabhrakalpanā tena pātranatapakṣiṇe varā

daive yoge sevādānaṃ śaṅkā nāye laṅkāyāne /
neyākālaṃ yenākāśaṃ nandāvāse geyo vedaiḥ

śaṅkāvajñānutvanujñāvakāśaṃ yāne nadyāmugramudyānaneyā /
yāne nadyāmugramudyānaneyā śaṅkāvajñānutvanujñāvakāśam

vā dideśa dvisītāyāṃ yaṃ pāthoyanasetave /
vaitasena yathopāyaṃ yantāsīd'viśade divā

vāyujo'numato neme saṅgrāme'ravito'hni vaḥ /
vahnito virame grāsaṃ mene'to'manujo yuvā

kṣatāya mā yatra raghoritāyu- raṅkānugānanyavayo'yanāni /
nināya yo vanyanagānukāraṃ yutārighoratrayamāyatākṣaḥ

tārake ripurāpa śrī- rucā dāsasutānvitaḥ /
tanvitāsu sadācāru śrīpurā puri ke ratā

laṅkā raṅkāṅgarādhyāsaṃ yāne meyā kārāvyāse /
sevyā rākā yāme neyā sandhyārāgākāraṃ kālam

// iti śrīdaivajñapaṇḍita sūryakavi viracitaṃ vilomākṣararāmakṛṣṇakāvyaṃ samāptam //