Varaha Purana · Chapter 81

rudra uvāca /
ataḥ paraṃ parvateṣu devānāmavakāśā varṇyante /
tatra yo'sau śāntākhyaḥ parvatastasyopari mahendrasya krīḍāsthānam /
tatra devarājasya pārijātakavṛkṣavanam /
tasya pūrvapārśve kuñjaro nāma giriḥ /
tasyopari dānavānāmaṣṭau purāṇi ca

tathā vajrake parvatavare rākṣasānāmanekāni purāṇi /
te ca nāmnā nīlakāḥ kāmarūpiṇaḥ /
mahānīle'pi śailendrapurāṇi /
pañcadaśasahastrāṇi kinnarāṇāṃ khyātāni /
tatra devadattacandrādayo rājānaḥ /
pañcadaśakinnarāṇāṃ garvitāḥ /
tāni sauvarṇāni bilapraveśanāni ca purāṇi /
candrodaye ca parvatavare nāgānāmadhivāsaḥ /
te ca bilapraveśāḥ bileṣu vainateyaviṣayāvarttino vyavasthitānurāge ca dānavendrā vyavasthitāḥ /
veṇumatyapi vidyādharapuratrayaṃ /
triṃśadyojanaśatavistīrṇamekaikaṃ tāvadāyatam /
ulūkaromaśamahāvetrādayaśca rājāno vidyādharāṇām

ekaike ca śailarājani svayameva garuḍo vyavasthitaḥ /
kuñjare tu parvatavare nityaṃ paśupatiḥ sthitaḥ /
vṛṣabhāṅko mahādevaḥ śaṃkaro yogināṃ varaḥ anekagaṇabhūtakoṭisahastravāro bhagavān anādipuruṣo vyavasthitaḥ /
vasudhāre ca puṣpavatāṃ vasūnāṃ ca samāvāsaḥ

vasudhāraratnadhārayormūrdhni aṣṭau sapta ca saṃkhyayā / purāṇi vasusaptarṣīṇāṃ ceti /
ekaśrṛṅge ca parvatottame prajāpateḥ sthānaṃ caturvaktrasya brahmaṇaḥ/
gajaparvate ca mahābhūtaparivṛtā svayameva bhagavatī tiṣṭhati

vasudhāre ca parvatavare munisiddhavidyādharāṇāmāyatanam /
caturāśītyaparapuryo mahāprākāratoraṇāḥ /
tatra cānekaparvatā nāma gandharvā yuddhaśālino vasanti /
teṣāṃ cādhipatirdevo rājarājaikapiṅgalaḥ /
surarākṣasāḥ pañcakūṭedānavāḥ śataśrṛṅgeyakṣāṇāṃ puraśatam

tāmrābhe takṣakasyapuraśatam / viśakhaparvate guhasyāyatanam /
śvetodaye girivare mahāgandharvabhavanam /
harikūṭe harirdevaḥ / kumude kinnarāvāsaḥ / añjane mahoragāḥ /
sahastraśikhare ca daityānāmugrakarmiṇāmāvāsaḥ /
purāṇāṃ sahastramekaṃ hemamālinām mukuṭe pannaprapakṣe parvatavare catvāryāyatanāni tu/
evaṃ meruparvateṣu devānāmadhivāsaḥ /
maryādāparvate devakūṭe puravinyāsaḥ kīrtyate /
tasyopari yojanaśataṃ garuḍasya jātaṃ kṣetram /
tasyaiva pārśvatastriṃśadyojanavistīrṇāścatvāriṃśadāyatāḥ saptagandharvanagarāḥ /
āgneyāśca nāmnā gandharvātibalinaḥ /
tatra cānyat triṃśadyojanamaṇḍalaṃ puram saiṃhikeyānām /
tatra ca devarṣicaritāni devakūṭe dṛśyante /
puraṃ ca kālakeyānāṃ tatraiva /
tathā cāntarataṭe'nyesunānnāma tasyaiva dakṣiṇe triṃśadyojanavistṛtaṃ dviṣaṣṭiyojanāyāmaṃ puram kāmarūpiṇāṃ dṛptānāṃ madhyame ca tasya hemakūṭe mahādevasya nyagrodhaḥ /
athātaḥ kailāsavarṇako bhavati/
kailāsasya taṭe yojanaśatamāyāmavastṛtam bhuvanamālābhivyāptam /
tasyāśca madhye sabhā /
tatra ca tatpuṣkaraṃ nāma vimānaṃ tiṣṭhati /
dhanadasya ca tadvimānamadhivāsaśca / tatra padmamahāpadmamakarakacchapakumudaśaṅkhanīlanandamahānidhayaḥ prativasanti /
tatra candrādīnāṃ lokapālānāmāvāsaḥ /
tatra ca mandākinī nāma nadī /
tathā kanakamandā mandā ceti nāmabhiḥ saritaḥ /
tatrānyā api nadyaḥ santi /
pūrvapārśve ca śatayojanamāyāmāstriṃśadyojanavistṛtā daśagandharvapuryaḥ tāsu ca sakubāhuharikeśacitrasenādayo rājānaḥ /
tasyaiva ca paścimakūṭe aśītiyojanāyāmaṃ catvāriṃśadvistṛtamekaikaṃ yakṣanagaram /
teṣu ca mahāmālisunetra cakrādayo nāyakāḥ /
tasyaiva dakṣiṇe pārśve kuñjadarīṣu guhāsu samudrāḥ samudraṃ yāvatkinnarāṇāṃ puraśatam /
teṣu ca drumasugrīvādibhagadattapramukhaṃ rājaśatam /
tatra ca rudrasyomayā sārddhaṃ vivāhassaṃvṛttaḥ /
tapaśca kṛtavatī gaurī / kirātarūpiṇā ca rudreṇa sthitam /
tatraiva tatra sthitena somena śaṃkareṇa jambūdvīpāvalokanaṃ kṛtam /
tatra cānekakinnaragandharvopagītamumāvanaṃ nāmāpsarobhiranekapuṣpalatāvallībhirupetam /
yatra bhagavatā maheśvareṇārddhanārīnaravapuḥ prāptam /
tatra ca kārtikeyasya śaradvanam /
puṣpacitrakrauñcayormadhye kārtikeyābhiṣekaḥ kṛtaḥ tasya ca pūrvataṭe siddhamunigaṇāvāsaḥ kalāpagrāmo nāma /
tathā ca mārkaṇḍeyavasiṣṭhaparāśaranalaviśvāmitroddālakādīnāṃ maharṣīṇāmanekāni sahastrāṇyāśramāṇāṃ hi bhavati /
tathā ca paścimasyācalendrasya niṣadhasya bhāgaṃ śrṛṇuta /
tasya ca madhyamakūṭe viṣṇvāyatanaṃ mahādevasya /
tasyaivottarataṭe triṃśadyojanavistṛtaṃ mahatpuraṃ lambākhyātaṃ rākṣasānām /
tasyaiva dakṣiṇe pārśve bilapraveśanagaram /
prabhedakasya paścimena devadānavasiddhādīnāṃ purāṇi /
tasya girermūrdhni mahatī somaśilā tiṣṭhati /
tasyāṃ ca parvaṇi somaḥ svayamevāvatarati /
tasyaivottarapārśve trikūṭaṃ nāma /
tatra brahmā tiṣṭhati kvacit / tathā ca vahnyāyatanam /
mūrttimān vahnirupāsyate devaiḥ

uttare ca śrṛṅgākhye parvatavare devatānāmāyatanāni /
pūrve nārāyaṇasyāyatanam / madhye brahmaṇaḥ /
śaṃkarasya paścime /
tatra ca yakṣādīnāṃ kecit purāṇi tasya cottaratīre jātuche mahāparvate triṃśadyojanamaṇḍalaṃ nandajalaṃ nāma saras tatra nando nāma nāgarājā vasati śataśīrṣapracaṇḍa iti

ityete'ṣṭau devaparvatā vijñeyāḥ /
tenānukrameṇa hemarajataratnavaidūryamānaḥ śilāhiṅgulādivarṇāḥ /
iyaṃ ca pṛthvī lakṣakoṭiśatānekasaṃkhyātānāṃ pūrṇā teṣu ca siddhavidyādharāṇāṃ nilayāḥ te ca meroḥ pārśvataḥ kesaravalayālavālaṃ siddhaloketi kīrttyate /
iyaṃ pṛthvī padmākāreṇa vyavasthitā /
eṣa ca sarvapurāṇeṣu kramaḥ sāmānyataḥ pratipādyate

// iti śrīvarāhapurāṇe bhagavacchāstre ekāśītitamo'dhyāyaḥ