Varaha Purana · Chapter 80

rudra uvāca /
atha dakṣiṇadigvyavasthitāḥ parvatadroṇyaḥ siddhācaritāḥ
kīrtyante / śiśirapataṅgayormadhye śuklabhūmistriyā muktalatāgalitapādapam /
ikṣukṣepe ca śikhare pādapairupaśobhitam /
udumbaravanaṃ ramyaṃ pakṣisaṅghaniṣevitam

phalitaṃ tad vanaṃ bhāti mahākūrmopamaiḥ phalaiḥ //
tad vanaṃ devayonyo'ṣṭau sevante sarvadaiva

tatra prasannasvādusalilā bahūdakā nadyo vahanti / tatrāśramo bhagavataḥ kardamasya prajāpateḥ / nānāmunijanākīrṇastacca śatayojanamekaṃ parimaṇḍalaṃ vanaṃ ca /
tathā ca tāmrābhasya śailasya pataṅgasya cāntare śatayojanavistīrṇaṃ dviguṇāyataṃ bālārkasadṛśarājīvapuṇaण़rīkaiḥ samantataḥ sahastrapatrairaviralairalaṃkṛtaṃ mahat saro'nekasiddhagandharvādhyuṣitam /

tasya ca madhye mahāśikharaḥ śatayojanāyāmastriṃśadyojanavistīrṇo'nekadhāturatnabhūṣitastasya copari mahatī rathyā ratnaprākāratoraṇā /
tasyāṃ mahad vidyādharapuram / tatra pulomanāmā vidyādhararājaḥ śatasahastraparīvāraḥ /
tathā ca vikhākhācalendrasya śvetasya cāntare saraḥ /
tasya ca pūrvatīre mahadāmravanaṃ kanakasaṃkāśaiḥ phalairatisugandhibhirmahākumbhamātraiḥ sarvataścitam /
devagandharvādayaśca tatra nivasanti /

sumulasyācalendrasya vasudhārasya cāntare triṃśadyojanavistīrṇe pañcāśadyojanāyate /

bilvasthalī nāma / tatra phalāni vidrumasaṃkāśāni taiśca patadbhiḥ sthalamṛttikā klinnā / tāṃ ca sthalīṃ suguhyakādayaḥ sevante bilvaphalāśinaḥ /
tathā ca vasudhāraratnadhārayorantare triṃśadyojanavistīrṇaṃ śatayojanamāyataṃ sugandhikiṃśukavanaṃ sadākusumaṃ yasya gandhena vāsyate yojanaśatam /
tatra siddhādhyuṣitaṃ jalopetaṃ ca /

tatra cādityasya devasya mahadāyatanam /
samāse māse ca bhagavānavatarati sūryaḥ prajāpatiḥ /
kālajanakaṃ devādayo namasyanti /
tathā ca pañcakūṭasya kailāsasya cāntare sahastrayojanāyāmaṃ vistīrṇaṃ śatayojanaṃ haṃsapāṇḍuraṃ kṣudrasattvairanādhṛṣyaṃ svargasopānamiva bhūmaṇḍalam /

atha paścimadigbhāge vyavasthitā giridroṇyaḥ kīrtyante / supārśvaśikhiśailayormadhye samantād yojanaśatamekaṃ bhaumaśilātalaṃ nityataptaṃ duḥsparśam /
tasya madhye triṃśadyojanavistīrṇaṃ maṇḍalaṃ vahnisthānam / sa ca sarvakālamanindhano bhagavān lokakṣayakārī saṃvartako jvalate /
antare ca śailavarayoḥ kumudāñjanayoḥ śatayojanavistīrṇāmātuluṅgasthalī sarvasattvānāmagamyā / pītavarṇaiḥ phalairāvṛtā satī sā sthalī śobhate /
tatra ca puṇyo hradaḥ siddhairupetaḥ/ bṛhaspatestadvanam// tathā ca śailayoḥ piñjaragaurayorantareṇa sarodroṇī hyanekaśatayojanāyatā mahadbhiśca ṣaṭpadodghuṣṭaiḥ kumudairupaśobhitā /

tatra ca bhagavato viṣṇoḥ parameśvarasyāyatanam /
tathā ca śuklapāṇḍurayorapi mahāgiryorantare triṃśadyojanavistīrṇo navatyāyata ekaḥ śiloddeśovṛkṣavivarjitaḥ / tatra niṣpaṅkā dīrghikā savṛkṣā ca sthalapadminī anekajātīyaiśca padmaiḥ śobhitā /
tasyāśca madhye pañcayojanapramāṇo mahānyagrodhavṛkṣaḥ / tasmiṃścandraśekharomāpatirnīlavāsāśca devo nivasati yakṣādibhirīḍyamānaḥ /
sahastraśikharasya gireḥ kumudasya cāntare pañcāśadyojanāyāmaṃ viṃśadyojanavistṛtamikṣukṣepoccaśikharamanekapakṣisevitam /
anekavṛkṣaphalairmadhurastravairupaśobhitam /
tatra cendrasya mahānāśramo divyābhiprāyanirmitaḥ /
tathā ca śaṅkhakūṭaṛṣabhayormadhye puruṣasthalīramyā'nekaguṇānekayojanāyatā bilvapramāṇaiḥ kaṅkolakaiḥ sugandhibhirupetā /
tatra puruṣakarasonmattā nāgādyāḥ prativasanti /

tathā kapiñjalanāgaśailayorantare dviśatayojanamāyāmavistīrṇā śatayojanasthalī nānāvanavibhūṣitā drākṣākharjūrakhaṇḍairupetā anekavṛkṣavallībhiranekaiśca sarobhirupetā sā sthalī /
tathā ca puṣkaramahāmeghayorantare ṣaṣṭiyojanavistīrṇā śatāyāmā pāṇitalaprakhyā mahatī sthalī vṛkṣavīrudhavivarjitā /tasyāśca pārśve catvāri mahāvanāni sarāṃsi cānekayojanānām /daśa pañca sapta tathāṣṭau triṃśad viṃśati yojanānāṃ sthalyo droṇyaśca / tatra kāścinmahāghorāḥ parvatakṣayāḥ /

// iti śrīvarāhapurāṇe bhagavacchāstre aśītitamo'dhyāyaḥ