વરાહ પુરાણ · અધ્યાય 34

મહાતપા ઉવાચ ।
પિતૄણાં સંભવં રાજન્ કથ્યમાનં નિબોધ મે ।
પૂર્વં પ્રજાપતિર્બ્રહ્મા સિસૃક્ષુર્વિવિધાઃ પ્રજાઃ

એકાગ્રમનસા સર્વાસ્તન્માત્રા મનસા બહિઃ ।
કૃત્વા પરમકં બ્રહ્મ ધ્યાયન્ સર્ગેપ્સુરુચ્ચકૈઃ

તસ્યાત્મનિ તદા યોગં ગતસ્ય પરમેષ્ઠિનઃ ।
તન્માત્રા નિર્યયુર્દેહાદ્ ધૂમવર્ણાકૃતિત્વિષઃ

પિબામ ઇતિ ભાષન્તઃ સુરાન્ સોમ ઇતિ સ્મ હ ।
ઊર્ધ્વં જિગમિષન્તો વૈ વિયત્સંસ્થાસ્તપસ્વિનઃ

તાન્ દૃષ્ટ્વા સહસા બ્રહ્મા તિર્યક્સંસ્થાન ઉન્મુખાન્ ।
ભવન્તઃ પિતરઃ સન્તુ સર્વેષાં ગૃહમેધિનામ્

ઊર્ધ્વવક્ત્રાસ્તુ યે તત્ર તે નાન્દીમુખસંજ્ઞિતાઃ ।
વૃદ્ધિશ્રાદ્ધેષુ સતત પૂજ્યા શ્રુતિવિધાનતઃ

અગ્નિં પુરસ્કૃતો યૈસ્તુ તે દ્વિજા અગ્નિહોત્રિણઃ ।
નિત્યૈર્નૈમિત્તિકૈઃ કામ્યૈઃ પાર્વણૈસ્તર્પયન્તુ તાન્

બહિઃપ્રવરણા યે ચ ક્ષત્રિયાસ્તર્પયન્તુ તાન્ ।
આજ્યં પિબન્તિ યે ચાત્ર તાનર્ચયન્તુ વિશઃ સદા

બ્રાહ્મણૈરભ્યનુજ્ઞાતાઃ શૂદ્રાઃ સ્વપિતૃનામતઃ ।
તાનેવાર્ચયતાં સમ્યગ્વિધિમન્ત્રબહિષ્કૃતાઃ

અનાહિતાગ્નયો યે ચ બ્રહ્મક્ષત્રવિશો નરાઃ ।
સ્વકાલિનસ્તેઽર્ચયન્તુ લોકાગ્નિપુરતઃ સદા

ઇત્યેવં પૂજિતા યૂયમિષ્ટાન્ કામાન્ પ્રયચ્છત ।
આયુઃ કીર્તિં ધનં પુત્રાન્ વિદ્યામભિજનં સ્મૃતિમ્

ઇત્યુક્ત્વા તુ તદા બ્રહ્મા તેષાં પન્થાનમાકરોત્ ।
દક્ષિણાયનસંજ્ઞં તુ પિતૄણાં ચ પિતામહઃ

તૂષ્ણીં સસર્જ ભૂતાનિ તમૂચુઃ પિતરસ્તતઃ ।
વૃત્તિં નો દેહિ ભગવન્ યયા વિન્દામહે સુખમ્

બ્રહ્મા ઉવાચ ।
અમાવાસ્યાદિનં વોઽસ્તુ તસ્યાં કુશતિલોદકૈઃ ।
તર્પિતા માનુષૈસ્તૃપ્તિં પરાં ગચ્છથ નાન્યથા

તિલા દેયાસ્તથૈતસ્યામુપોષ્ય પિતૃભક્તિતઃ ।
પરમં તસ્ય સંતુષ્ટા વરં યચ્છત મા ચિરમ્

॥ ઇતિ શ્રીવરાહપુરાણે ભગવચ્છાસ્ત્રે ચતુસ્ત્રિંશોઽધ્યાયઃ