Varaha Purana · Chapter 179

dharaṇyuvāca //
tavāparādhāddeveśa varjyo'yaṃ vaiṣṇavena ca //
vināparādho manujaḥ sāparādhaśca jāyate

karmaṇācaraṇenaiva karaṇena jugupsitaḥ //
tacca pūjāphalaṃ sarvaṃ jñāyate tadvadasva me

śrīvarāha uvāca //
karmaṇā manasā vācā ye pāparucayo janāḥ //
bhakṣaṇaṃ dantakāṣṭhasya rājānnasya tu bhojanam

maithunaṃ śavasaṃsparśaṃ purīṣotsargameva ca //
sūtakyudakyāprekṣā ca sparśanaṃ mehanaṃ tathā

abhāṣya bhāṣaṇaṃ caiva piṇyākasya ca bhakṣaṇam //
raktapārakyamalinavastradhāritvanīlijam

guroścālīkanirbandhaḥ patitānnasya bhakṣaṇam //
abhakṣya bhakṣaṇaṃ caiva taṇḍulīyavibhītakam

adānaṃ tuvarānnasya jālapādavarākayoḥ //
bhakṣaṇaṃ devatāgāre sopānatkopasarpaṇam

tathaiva deva pūjāyāṃ niṣiddhakusumārccanam //
anuttārya ca nirmālyaṃ pūjā kṣīṇāndhakārayoḥ

pānaṃ surāyā devasya andhakāre prabodhanam //
tāvatkarmārccane viṣṇoranamaskaraṇaṃ tathā

aparādhāstrayastriṃśatsamākhyātā mayā dhare //
ebhiryuktastu puruṣo viṣṇuṃ naiva prapaśyati

dūrastho na namaskāraṃ kuryātpūjā tu rākṣasī//
ekarātraṃ dvirātraṃ vā trirātraṃ snānameva ca //
savāsāḥ paṃcagavyāśī malasaṃvastrakaṃ kramāt //////
nīlīrakṣāpanodārthaṃ gomayena pragharṣaṇam //
prājāpatyena śuddhiḥ syānnīlīvastrasya dhāraṇāt

cāndrāyaṇadvayaṃ kuryādguroḥ kṣayitamuttamam //
cāndrāyaṇaṃ parākaṃ ca patitānnasya bhakṣaṇāt

cāndrāyaṇaṃ parākaṃ ca prājāpatyaṃ tathaiva ca //
gopradānaṃ ca bhojyaṃ ca abhakṣasya ca bhakṣaṇe

upavāsastu paṃcāhaṃ paṃcagavyena śuddhyati//
sopānatkaścaretpāda kṛcchrasya dvirabhojanam

puṣpābhāve'rccanaṃ snānaṃ devasparśaṃ ca kārayan //
anirmālyanamaskāraṃ snānaṃ paṃcāmṛtena tu // १६ /
surāpāne dvijātīnāṃ cāndrāyaṇacatuṣṭayam //
tathaiva dvādaśābdaṃ tu prājāpatyatrayaṃ caret

brahmakūrccena śuddhiḥ syādgopradānatrayeṇa ca //
trayāṇāmekarātreṇa paṃcāmṛtaniṣevaṇāt

mucyate tvaparādhaistu tathā viṣṇoḥ stavaṃ paṭhan //
etatte kathitaṃ guhyaṃ kimanyacchrotumicchasi

punaḥ punaruvācedaṃ devadevo janārdanaḥ //
mohaṅgatā tu śṛṇute naṣṭasaṃjñeva lakṣyate

muhurttamātre sā devī saṃjñāṃ prāpyedamabravīt //
aparādhe kṛte deva sūtakī hi prajāyate

prāyaścittāni bhūrīṇi kṛtāni tu naraiḥ sadā //
tena me manaso mohaḥ duḥkhado yaḥ samabhyayāt

asti kaścidupāyo'tra yena tvaṃ nṛṣu tuṣyasi //
pūjitaḥ saphalaścāsi aparādhaviśodhanam

śrīvarāha uvāca //
saṃvatsarasya madhye tu tīrthe saukarave mama //
kṛtopavāsaḥ snānena gaṃgāyāṃ śuddhimāpnuyāt

mathurāyāṃ tathāpyevaṃ sāparādhaḥ śucirbhavet //
anayostīrthayorevaṃ yaḥ seveta sakṛnnaraḥ

sahasrajanmasu kṛtānaparādhāñjahāti saḥ //
snānātpānāttathā dhyānātkīrttanāddhāraṇāttathā //२६/
śravaṇānmananāccaiva darśanādyāti pātakam //
pṛthivyuvāca //
mathurā sūkaraṃ caiva dvāvetau tava vallabhau

viśiṣṭamanayoḥ kiṃ ca satyaṃ brūhi sureśvara //
śrīvarāha uvāca //
pṛthivyāṃ yāni tīrthāni āsamudrasarāṃsi ca

kubjāmrakaṃ praśaṃsanti sadā madbhāvabhāvitāḥ //
tasmātkoṭiguṇaṃ guhyaṃ saukaratīrthamuttamam

ekāhaṃ mārgaśīrṣyāṃ ca dvādaśyāṃ sitavaiṣṇavam //
gaṃgāsāgarikaṃ nāma purāṇeṣu ca paṭhyate

guhyādguhyataraṃ puṇyaṃ māthuraṃ mama maṇḍalam //
phalaṃ parārddhaguṇitaṃ sitatīrthānna saṃśayaḥ

aṭitvā sarvatīrthāni kubjāmrādīni nityaśaḥ //
aghaṃ vinaśyate kṣipraṃ mathurāmāgatasya ca

viśramaṇācca viśrāntistena saṃjñā varā mama //
sārātsārataraṃ snānaṃ guhyānāṃ guhyamuttamam

gatiranveṣaṇīyānāṃ mathurā paramā gatiḥ //
kubjāmrake saukare ca mathurāyāṃ viśeṣataḥ

vinā sāṃkhyena yogena mucyate nātra saṃśayaḥ //
yā gatiryogayuktasya brāhmaṇasya manīṣiṇaḥ

sā gatistyajataḥ prāṇānmathurāyāṃ na saṃśayaḥ //
etatte kathitaṃ sāraṃ mayā satyena suvrate //
na tīrthaṃ mathurāyā hi na devaḥ keśavātparaḥ

iti śrīvarāhapurāṇe mathurāmāhātmye aparādhaprāyaścittamāhātmyaṃ nāma ūnāśītyadhikaśatatamo'dhyāyaḥ