વરાહ પુરાણ · અધ્યાય 179

ધરણ્યુવાચ ॥
તવાપરાધાદ્દેવેશ વર્જ્યોઽયં વૈષ્ણવેન ચ ॥
વિનાપરાધો મનુજઃ સાપરાધશ્ચ જાયતે

કર્મણાચરણેનૈવ કરણેન જુગુપ્સિતઃ ॥
તચ્ચ પૂજાફલં સર્વં જ્ઞાયતે તદ્વદસ્વ મે

શ્રીવરાહ ઉવાચ ॥
કર્મણા મનસા વાચા યે પાપરુચયો જનાઃ ॥
ભક્ષણં દન્તકાષ્ઠસ્ય રાજાન્નસ્ય તુ ભોજનમ્

મૈથુનં શવસંસ્પર્શં પુરીષોત્સર્ગમેવ ચ ॥
સૂતક્યુદક્યાપ્રેક્ષા ચ સ્પર્શનં મેહનં તથા

અભાષ્ય ભાષણં ચૈવ પિણ્યાકસ્ય ચ ભક્ષણમ્ ॥
રક્તપારક્યમલિનવસ્ત્રધારિત્વનીલિજમ્

ગુરોશ્ચાલીકનિર્બન્ધઃ પતિતાન્નસ્ય ભક્ષણમ્ ॥
અભક્ષ્ય ભક્ષણં ચૈવ તણ્ડુલીયવિભીતકમ્

અદાનં તુવરાન્નસ્ય જાલપાદવરાકયોઃ ॥
ભક્ષણં દેવતાગારે સોપાનત્કોપસર્પણમ્

તથૈવ દેવ પૂજાયાં નિષિદ્ધકુસુમાર્ચ્ચનમ્ ॥
અનુત્તાર્ય ચ નિર્માલ્યં પૂજા ક્ષીણાન્ધકારયોઃ

પાનં સુરાયા દેવસ્ય અન્ધકારે પ્રબોધનમ્ ॥
તાવત્કર્માર્ચ્ચને વિષ્ણોરનમસ્કરણં તથા

અપરાધાસ્ત્રયસ્ત્રિંશત્સમાખ્યાતા મયા ધરે ॥
એભિર્યુક્તસ્તુ પુરુષો વિષ્ણું નૈવ પ્રપશ્યતિ

દૂરસ્થો ન નમસ્કારં કુર્યાત્પૂજા તુ રાક્ષસી॥
એકરાત્રં દ્વિરાત્રં વા ત્રિરાત્રં સ્નાનમેવ ચ ॥
સવાસાઃ પંચગવ્યાશી મલસંવસ્ત્રકં ક્રમાત્ ॥॥॥
નીલીરક્ષાપનોદાર્થં ગોમયેન પ્રઘર્ષણમ્ ॥
પ્રાજાપત્યેન શુદ્ધિઃ સ્યાન્નીલીવસ્ત્રસ્ય ધારણાત્

ચાન્દ્રાયણદ્વયં કુર્યાદ્ગુરોઃ ક્ષયિતમુત્તમમ્ ॥
ચાન્દ્રાયણં પરાકં ચ પતિતાન્નસ્ય ભક્ષણાત્

ચાન્દ્રાયણં પરાકં ચ પ્રાજાપત્યં તથૈવ ચ ॥
ગોપ્રદાનં ચ ભોજ્યં ચ અભક્ષસ્ય ચ ભક્ષણે

ઉપવાસસ્તુ પંચાહં પંચગવ્યેન શુદ્ધ્યતિ॥
સોપાનત્કશ્ચરેત્પાદ કૃચ્છ્રસ્ય દ્વિરભોજનમ્

પુષ્પાભાવેઽર્ચ્ચનં સ્નાનં દેવસ્પર્શં ચ કારયન્ ॥
અનિર્માલ્યનમસ્કારં સ્નાનં પંચામૃતેન તુ ॥ ૧૬ ।
સુરાપાને દ્વિજાતીનાં ચાન્દ્રાયણચતુષ્ટયમ્ ॥
તથૈવ દ્વાદશાબ્દં તુ પ્રાજાપત્યત્રયં ચરેત્

બ્રહ્મકૂર્ચ્ચેન શુદ્ધિઃ સ્યાદ્ગોપ્રદાનત્રયેણ ચ ॥
ત્રયાણામેકરાત્રેણ પંચામૃતનિષેવણાત્

મુચ્યતે ત્વપરાધૈસ્તુ તથા વિષ્ણોઃ સ્તવં પઠન્ ॥
એતત્તે કથિતં ગુહ્યં કિમન્યચ્છ્રોતુમિચ્છસિ

પુનઃ પુનરુવાચેદં દેવદેવો જનાર્દનઃ ॥
મોહઙ્ગતા તુ શૃણુતે નષ્ટસંજ્ઞેવ લક્ષ્યતે

મુહુર્ત્તમાત્રે સા દેવી સંજ્ઞાં પ્રાપ્યેદમબ્રવીત્ ॥
અપરાધે કૃતે દેવ સૂતકી હિ પ્રજાયતે

પ્રાયશ્ચિત્તાનિ ભૂરીણિ કૃતાનિ તુ નરૈઃ સદા ॥
તેન મે મનસો મોહઃ દુઃખદો યઃ સમભ્યયાત્

અસ્તિ કશ્ચિદુપાયોઽત્ર યેન ત્વં નૃષુ તુષ્યસિ ॥
પૂજિતઃ સફલશ્ચાસિ અપરાધવિશોધનમ્

શ્રીવરાહ ઉવાચ ॥
સંવત્સરસ્ય મધ્યે તુ તીર્થે સૌકરવે મમ ॥
કૃતોપવાસઃ સ્નાનેન ગંગાયાં શુદ્ધિમાપ્નુયાત્

મથુરાયાં તથાપ્યેવં સાપરાધઃ શુચિર્ભવેત્ ॥
અનયોસ્તીર્થયોરેવં યઃ સેવેત સકૃન્નરઃ

સહસ્રજન્મસુ કૃતાનપરાધાઞ્જહાતિ સઃ ॥
સ્નાનાત્પાનાત્તથા ધ્યાનાત્કીર્ત્તનાદ્ધારણાત્તથા ॥૨૬।
શ્રવણાન્મનનાચ્ચૈવ દર્શનાદ્યાતિ પાતકમ્ ॥
પૃથિવ્યુવાચ ॥
મથુરા સૂકરં ચૈવ દ્વાવેતૌ તવ વલ્લભૌ

વિશિષ્ટમનયોઃ કિં ચ સત્યં બ્રૂહિ સુરેશ્વર ॥
શ્રીવરાહ ઉવાચ ॥
પૃથિવ્યાં યાનિ તીર્થાનિ આસમુદ્રસરાંસિ ચ

કુબ્જામ્રકં પ્રશંસન્તિ સદા મદ્ભાવભાવિતાઃ ॥
તસ્માત્કોટિગુણં ગુહ્યં સૌકરતીર્થમુત્તમમ્

એકાહં માર્ગશીર્ષ્યાં ચ દ્વાદશ્યાં સિતવૈષ્ણવમ્ ॥
ગંગાસાગરિકં નામ પુરાણેષુ ચ પઠ્યતે

ગુહ્યાદ્ગુહ્યતરં પુણ્યં માથુરં મમ મણ્ડલમ્ ॥
ફલં પરાર્દ્ધગુણિતં સિતતીર્થાન્ન સંશયઃ

અટિત્વા સર્વતીર્થાનિ કુબ્જામ્રાદીનિ નિત્યશઃ ॥
અઘં વિનશ્યતે ક્ષિપ્રં મથુરામાગતસ્ય ચ

વિશ્રમણાચ્ચ વિશ્રાન્તિસ્તેન સંજ્ઞા વરા મમ ॥
સારાત્સારતરં સ્નાનં ગુહ્યાનાં ગુહ્યમુત્તમમ્

ગતિરન્વેષણીયાનાં મથુરા પરમા ગતિઃ ॥
કુબ્જામ્રકે સૌકરે ચ મથુરાયાં વિશેષતઃ

વિના સાંખ્યેન યોગેન મુચ્યતે નાત્ર સંશયઃ ॥
યા ગતિર્યોગયુક્તસ્ય બ્રાહ્મણસ્ય મનીષિણઃ

સા ગતિસ્ત્યજતઃ પ્રાણાન્મથુરાયાં ન સંશયઃ ॥
એતત્તે કથિતં સારં મયા સત્યેન સુવ્રતે ॥
ન તીર્થં મથુરાયા હિ ન દેવઃ કેશવાત્પરઃ

ઇતિ શ્રીવરાહપુરાણે મથુરામાહાત્મ્યે અપરાધપ્રાયશ્ચિત્તમાહાત્મ્યં નામ ઊનાશીત્યધિકશતતમોઽધ્યાયઃ