વરાહ પુરાણ · અધ્યાય 108

અથ લવણધેનુદાનમાહાત્મ્યમ્ ॥
હોતોવાચ ॥
લવણધેનું પ્રવક્ષ્યામિ તાં નિબોધ નૃપોત્તમ ॥
ષોડશપ્રસ્થસંયુક્તાં ધેનું કૃત્વા તુ માનવઃ

અનુલિપ્તે મહીપૃષ્ઠે કૃષ્ણાજિનકુશોત્તરે ॥
ધેનું લવણમયીં કૃત્વા ષોડશપ્રસ્થસંયુતામ્

વત્સં ચતુર્ભી રાજેન્દ્ર ઇક્ષુપાદાંશ્ચ કારયેત્ ॥
સુવર્ણમુખશૃઙ્ગાણિ ખુરા રૌપ્યમયાસ્તથા

મુખં ગુડમયં તસ્યા દન્તાઃ ફલમયા નૃપ ॥
જિહ્વાં શર્કરયા રાજન્ઘ્રાણં ગન્ધમયં તથા ॥
નેત્રે રત્નમયે કુર્યાત્કર્ણૌ પત્રમયૌ તથા ॥
શ્રીખણ્ડમયકોષ્ઠૌ ચ નવનીતમયાઃ સ્તનાઃ

સૂત્રપુચ્છાં તામ્રપૃષ્ઠાં દર્ભરોમાં પયસ્વિનીમ્ ॥
કાંસ્યોપદોહાં રાજેન્દ્ર ઘંટાભરણભૂષિતામ્

સુગન્ધપુષ્પધૂપૈશ્ચ પૂજયિત્વા વિધાનતઃ ॥
આચ્છાદ્ય વસ્ત્રયુગ્મેન બ્રાહ્મણાય નિવેદયેત્

નક્ષત્રગ્રહપીડાં ચ સર્વકાલં પ્રદાપયેત્ ॥
ગ્રહણે વાથ સંક્રાન્તૌ વ્યતીપાતે તથાયને

દ્વિજાય સાધુવૃત્તાય વેદવેદાઙ્ગવેદિને ॥
દ્વિજાય સાધુવૃત્તાય કુલીનાય ચ ધીમતે

વેદવેદાઙ્ગવિદુષે શ્રોત્રિયાયાહિતાગ્નયે ॥
ઈદૃશાય પ્રદાતવ્યા તથાઽમત્સરિણે નૃપ

ઇષ્ટ્વા ચૈવં ચ મન્ત્રં તુ પુચ્છદેશોપવિશ્ય ચ ॥
છત્રકોપાનહૌ દેયે મુદ્રિકાકર્ણમાત્રકૈઃ

આચ્છાદ્ય વસ્ત્રયુગ્મેન દક્ષિણાં કમ્બલં દદેત્ ॥
પૂર્વોક્તેન વિધાનેન સ્વશક્ત્યા કનકેન તુ

બ્રાહ્મણં પૂજ્ય વિધિવત્પૂર્વોક્તવિધિના નૃપ ॥
સદક્ષિણં ચ ગોપુચ્છં દત્ત્વા બ્રાહ્મણહસ્તકે

ઇમં મન્ત્રં સમુચ્ચાર્ય તતસ્તાં પ્રતિપાદયેત્ ॥
ઇમાં ગૃહાણ ભો વિપ્ર રુદ્રરૂપાં નમોઽસ્તુ તે

રસજ્ઞા સર્વભૂતાનાં સર્વદેવનમસ્કૃતા ॥
કામં પૂરય મે દેવિ રુદ્રરૂપે નમોઽસ્તુ તે

દત્ત્વા ધેનું તુ લવણેનૈકાહં ચૈવ તિષ્ઠતિ ॥
સ્વયં ત્રિરાત્રં વિપ્રેણ તથૈવ લવણાશિના

સહસ્રેણ શતેનાથ સ્વશક્ત્યા કનકેન તુ ॥
દત્ત્વેમાં સ્વર્ગમાપ્નોતિ યત્ર દેવો વૃષધ્વજઃ

ય ઇદં શૃણુયાદ્ભક્ત્યા શ્રાવયેદ્વાપિ માનવઃ ॥
મુચ્યતે સર્વપાપેભ્યો રુદ્રલોકં ચ ગચ્છતિ

ઇતિ શ્રીવરાહપુરાણે શ્વેતવિનીતાશ્વોપાખ્યાને લવણધેનુમાહાત્મ્યં નામ અષ્ટાધિકશત તમોઽધ્યાયઃ