Vaikhānasamantrapraśna, 5-8 · Chapter 8.1.203

yád adó vāta te gr̥he 'mr̥tasya nidhír hitáḥ
táto no dehi jīváse táto no dhehi bheṣajám

táto no máha ā́vaha vā́ta ā́ vātu bheṣajám
śaṃbhū́r mayobhū́r nó hr̥dé prá ṇa ā́yū(g)ṃṣi tāriṣat

índrasya gr̥ho 'si táṃ tvā prápadye ságus sā́śvaḥ
sahá yán me ásti téna

bhū́ḥ prápadye bhuvaḥ prápadye súvaḥ prápadye bhū́r bhúvas súvaḥ prápadye vāyúṃ prápadyé ínārtāṃ devátāṃ prápadyé 'śmānam ākhaṇáṃ prápadye prajā́-pater brahma-kośáṃ bráhma prápadya óṃ prápadye

antárikṣaṃ ma urv antaraṃ br̥hád agnáyaḥ párvatāś ca yáyā vā́tas svastyā́ svastimā́n táyā svastyā́ svastimā́n asāni

prā́ṇāpānau mr̥tyór mā pātaṃ prā́ṇāpānau mā́ mā hāsiṣṭaṃ

máyi medhā́ṃ máyi[*956] prajā́ṃ máyy agnís téjo dadhātu máyi medhā́ṃ máyi prajā́ṃ máyī́ndra indriyáṃ dadhātu máyi medhā́ṃ máyi prajā́ṃ máyi sū́ryo bhrā́jo dadhātu
[*956] TS omits