Vaikhānasamantrapraśna, 5-8 · Chapter 8.1.202

śáṃ no vā́taḥ pavatāṃ mātaríśvā[*953] śáṃ nas tapatu sū́ryaḥ

áhāni śáṃ bhavantu naś śá(g)ṃ rā́triḥ práti dhīyatām

śám uṣā́ no vyucchatu śám ādityá údetu naḥ

śivā́ naś śántamā bhava sumr̥ḍīkā́ sárasvatī
mā́ te vyoma saṃdŕ̥śi

íḍāyai vā́stv asi vā́stumád vāstumánto bhūyāsma mā́ vā́stoś cith sma hy avāstús sá bhuyād yo 'smān dveṣṭi yáñ ca vayáṃ dviṣmáḥ

pratiṣṭhā́si pratiṣṭhā́vanto bhūyāsma mā́ pratiṣṭhā́yāś cith sma hy apratiṣṭhás sá bhūyād yo 'smān dveṣṭi yáñ ca vayáṃ dviṣmáḥ

ā́ vāta vāhi bheṣajáṃ ví vāta vāhi yád rápaḥ
tvá(g)ṃ hí viśvá-bheṣajo devā́nāṃ dūtá ī́yase

dvā́v imaú vā́tau vāta ā́ síndhor ā́ parāvátaḥ
dákṣaṃ me[*954] anyá ā vā́tu párānyó vātu yád rápaḥ[*955]
[*953] VS omits
[*954] RV: te
[*955] VMP divides this verse making the second line the first line of chapter 203. The numbering is adjusted so that the complete verse comes at the end of chapter 202.