Vaikhānasamantrapraśna, 5-8 · Chapter 8.1.181

viśva-jíte dhana-jíte svar-jíte satrā-jíte nr̥-jíta urvarā-jíte
aśva-jíte go-jíte ab-jíte bharéndrāya sómaṃ yajatā́ya haryatám

abhibhúve 'bhibhaṃgā́ya vanvaté 'ṣālhāya sáhamānāya vedháse
tuvigráye váhnaye duṣṭárītave satrā-sā́he náma índrāya vocata

satrā-sāhó jana-bhakṣó janaṃ-saháś cyavano yudhmó ánu jóṣam ukṣitáḥ vr̥taṃ-cayás sáhurir vikṣvāritá[*928] índrasya vocaṃ prá kr̥tā́ni vīryā

anānudó vr̥ṣabhó dódhato vadhó gaṃbhīrá r̥ṣvó ásamaṣṭa-kāvyaḥ
radhra-codáś śnáthano vīlitás pr̥thúr índras suyajñá uṣásas svar janat

yajñéna gātúm aptúro vividrire dhíyo hinvānā́ uśíjo manīṣíṇaḥ
abhisvárā niṣádā gā́ avasyáva índre hinvānā́ dráviṇāny āśata
[*928] Text: ikṣvāritá