Vaikhānasamantrapraśna, 5-8 · Chapter 5.1.133

sá te jānāti sumatíṃ yaviṣṭha yá ī́vate bráhmaṇe gātúm aírat
víśvāny asmai sudínāni rāyó dyumnā́ny aryó ví dúro abhí dyaut

séd agne astu subhágas sudā́nur yás tvā nítyena havíṣā yá ukthaíḥ
píprīṣati svá ā́yuṣi duroṇé víśvéd asmai sudínā sā́sad iṣṭíḥ

árcāmi te sumatíṃ ghóṣy arvā́k sáṃ te vāvā́tā jaratām iyáṃ gī́ḥ
sváśvās tvā suráthā marjayemāsmé kṣatrā́ṇi dhārayer ánu dyū́n

ihá tvā bhū́ry ā cared úpa tmán dóṣā-vastar dīdivā́(g)ṃsam ánu dyū́n
krī́ḍantas tvā sumánasas sapemābhí dyumnā́ tasthivā́(g)ṃso jánānām

yás tvā sváśvas suhiraṇyó agna upayāti vásumatā ráthena
tásya trātā́ bhavasi tásya sákhā yás ta ātithyám ānuṣág jújoṣat[*196]
[*196] The VMP text divides this verse between two sections, making the second line of this verse the first line of chapter 134. The numbering has been adjusted so that the complete verse now comes at the end of chapter 133.