Vaikhānasamantrapraśna, 5-8 · Chapter 5.1.132

dhārāsu saptásu

kr̥ṇuṣvá pā́jaḥ prásitiṃ ná pr̥thvī́ṃ yāhí rā́jevā́mavā(g)ṃ íbhena
tr̥ṣvī́m ánu prásitiṃ drūṇānó 'stāsi vídhya rakṣásas tápiṣṭhaiḥ

táva bhramā́sa āśuyā́ patanty ánu spr̥śa dhr̥ṣatā́ śóśucānaḥ
tápū́(g)ṃṣy agne juhvā pataṅgā́n ásaṃdito ví sr̥ja víṣvag ulkā́ḥ

práti spáśo ví śr̥ja tū́rṇitamo bhávā pāyúr viśó asyā́ ádabdhaḥ
yó no dūré agháśa(g)ṃso yó ánty ágne mā́kiṣ ṭe vyáthir ā dadharṣīt

úd agne tiṣṭha práty ā́ tanuṣva ny amitrā(g)ṃ oṣatāt tigmahete
yó no árāti(g)ṃ samidhāna cakré nīcā́ táṃ dhakṣy atasáṃ ná śúṣkam

ūrdhvó bhava práti vidhyā́dhy asmád āvíṣ kr̥ṇuṣva daívyāny agne
áva sthirā́ tánuhi yātujū́nāṃ jāmím ájāmiṃ prá mr̥ṇīhi śátrū́n[*195]
[*195] The VMP text divides this verse between two sections, making the second line of this verse the first line of chapter 133. The numbering has been adjusted so that the complete verse now comes at the end of chapter 132.