Tripura Rahasya · Chapter p1

tripurārahasyam (jñānakhaṇḍam)
śrīnivāsabhaṭṭaviracitatātparyadīpikāvyākhyāsaṃvalitam
oṃ namaḥ kāraṇānandarūpiṇī paracinmayī /
virājate jagaccitracitradarpaṇarūpiṇī

jayatyeṣā parā śrīmattripurā sarvasākṣiṇī /
yā sevakānuddharati saṃsṛtergururūpiṇī //
natvā vighneśvaraṃ devaṃ tripurāyā rahasyake /
jñānakhaṇḍasya tātparyadīpikeyaṃ pratanyate //
jñānakhaṇḍamahāmbhodhiṃ guruvākplavamāśritaḥ /
titīrṣurasmi śrīdevīpadanāvikasaṅgateḥ //
iha khalu hāritāyano bhagavān duḥkhapaṅkanimagnajanoddidhīrṣayā
tripurārahasyamitihāsottamaṃ padyarūpaṃ saṃdṛbdhavān / tatra ca mukhyaṃ
vivakṣitaṃ paramapuruṣārthasādhanameva [k, kh: para-]
vijñānam / tadādau ca tatsādhanāgryabhaktinidānaṃ māhātmyakhaṇḍamāracayaya
samprati māhātmyaśrutyādipariṇatādhikārāṇāṃ [kh: kāriṇāṃ]
jijñāsūnāṃ svātmatattvāvagamāya prāripsitaṃ jñānakhaṇḍaṃ nirvighnena
samāpayituṃ prakaraṇapratipādyasvātmadevatānamanarūpaṃ maṅgalaṃ
sampradāyapravartanāya granthato racayati - oṃ nama iti / kāraṇātmako ya
ānandaḥ aviśeṣāt sarvakāraṇabrahmānandaḥ / sa eva rūpamasyāḥ / evaṃvidhā
parā anavacchinna yā cit tanmayī tadekarūpā / tathā [g: tathā ca]
jagadevādabhutacitraṃ tasya darpaṇavat pratibimbāśrayaṃ rūpamasyāḥ /
evaṃrūpā oṃkāranirdeśyā yā virājate viśeṣatastattadrūpeṇa sāmānyarūpeṇa ca
prakāśate / tasyai namaḥ / anavacchinnacittattvaṃ śāstraprameyaṃ
tadevānandamayaṃ jagatkāraṇaṃ na prakṛtyādidarpaṇe pratibimbavattasyāmeva
jagaccitrabhāsanamiti samastaśāstrārthagarbhitaṃ ślokatātparyam / atra
khaṇḍatrayamapi [māhātmya-jñāna-caryātmakaṃ
khaṇḍatrayam] śivaśaktipraṇavasampuṭitam oṃ nama ityārabhya tripuraiva
hrīmiti samāpanāt / tasyedaṃ tātparyam - śivaśaktirūpamakhilaṃ jagat
svātmacittattvamātramiti bodhanārthamidaṃ prakaraṇamiti

p. २)
śrutaṃ kaccinnāradaitat sāvadhānena cetasā /
māhātmyaṃ tripurākhyāyā yacchruti parasādhanam

ādye'dhyāye sūtamitapadyaiḥ [ka-ṭa-pa-yavargabhavairiha
piṇḍāntyairakṣarairaṅkāḥ / netre śūnyaṃ jñeyaṃ tathā svare kevale kathite // iti
bhāskararāyeṇa svakīyanāthanavaratnamālāmañjūṣāyāmuddhṛtaślokasya
prāmāṇyena sa ta iti varṇābhyāṃ ७ ६ aṅkayorgrahaṇam aṅkānāṃ vāmato gatiḥ
iti kṛtvā ६७ ślokātmaka ādyo'dhyāya iti sūcyate sa ta iti saṃketākṣarābhyā /
evamevānyatrāpyadhyāyaṭīkārambhaślokeṣu jñeyam /] pūjādyupāsanaiḥ /
śuddhacittasya rāmasya vicārodaya ucyate //
śrotāramabhimukhayituṃ śrutamityādi

atha te kathayāmyadya jñānakhaṇḍaṃ mahādbhutam /
yacchrutvā na punaḥ kvāpi manuṣyaḥ śokamṛcchati

mahādbhutatvamevāha - yacchrutveti

vaidikaṃ vaiṣṇavaṃ śaivaṃ śāktaṃ pāśupataṃ tathā /
vijñānaṃ samyagālocya yadetat praviniścitam

prakṛtajñānasya sarvottamatvaṃ vaktumāha - vaidikamiti /
vaidikamaupaniṣadam / vaiṣṇavaṃ pāñcarātroktam / śaivaṃ ṣaḍarddhaśāstrīyam
/ śāktaṃ mahocchuṣmādyuktam / pāśupataṃ kāmokoktam / vijñānam
ātmatattvaniścāyakopapattijālam [k: tattvaṃ niścā-]

p. ३)
naitadvijñānasadṛśamanyad mānasamāruhet /
mayā śrīdattaguruṇā bhārgavāya nirūpitam

sarvottamatvādevāha - naitaditi / dattagurunirūpitaṃ yathā mānasamāruhenna
tathānyadityarthaḥ

upapattyupalabdhibhyāṃ sametaṃ bahu citritam /
atroktenāpi no veda yadi kaścidvimūḍhadhīḥ

kuta evam? tadāha - upapattiti / upapattiryuktiḥ / upalabdhranubhavaḥ /
bahukathācitritam / atroktaṃ [k: atrokta] jñānaṃ cittamāruhedeveti
vyatirekamukhena draḍhayati - atreti

sa kevalaṃ daivahataḥ sthāṇureva na saṃśayaḥ /
na tasya syādapi jñānaṃ sākṣācchivanirūpitam

tatte śṛṇu samākhyāsye jñānakhaṇḍātmanā sthitam /
aho satāmadbhutaṃ [k: sattam-] hi vṛttaṃ sarvaguṇottaram

tad jñānakhaṇḍātmanā sthitaṃ śāstram / sarvajñakalpaṃ nāradaṃ
svasmādākhyānaṃ śuśrūṣantaṃ stauti - aho iti / sarvaguṇairuttaraṃ
śreṣṭham

yanmatto'pyeṣa devarṣiḥ śuśruṣatyapi kiñcana /
anugrāhakatā caiṣā satāṃ sahajasambhavā

eṣā śuśruṣā

yathā grāṇollāsakatā mṛganābheḥ svataḥ sthitā /
evaṃ dattātreyamukhācchrutvā māhātmyavaibhavam

evaṃ māhatmyakhaṇḍoktavat [tripurārahasya māhātmyakhaṇḍaṃ १९३२ ī०
varṣe vārāṇasīsthakāśīsaṃskṛtagranthamālāyāṃ mudritamatra
draṣṭavyam]

rāmaḥ sarvajanārāmo jāmadagnyaḥ śubhāśayaḥ /
bhaktyāpahṛtasaccittastūṣṇīṃ kiñcid babhūva ha

bhaktyā apahṛtaṃ nilīnaṃ sat śuddhaṃ cittaṃ yasya

p. ४)
athasādya bahirvṛttiṃ [k: vṛtti] bharitānandalocanaḥ /
romāñcapīvaravapuḥ svāntarānandanirbharaḥ

ānanda ānandāśruḥ / svīyaḥ āntro [k: antaro] bhaktijanito ya ānandaḥ
tena nirbharaḥ pūrṇaḥ

harṣo'māyan [k: harṣo nā-] romakūpavibhedānnirgamanniva /
praṇanāma dattaguruṃ daṇḍavaccaraṇāntike

svāntaramāyan yo harṣaḥ sa romakūpavibhedānnirgamanniva
romāñcapīvaravapuriti sambandhaḥ

utthāya harṣabharitaḥ prāha gadgadasusvaraḥ /
dhanyo'haṃ kṛtakṛtyo'haṃ śrīguro tvatprasādataḥ

yatprāha - tadevāha - dhanya iti

yasya me karuṇāsindhustuṣṭaḥ sākṣād guruḥ śivaḥ /
yasmiṃstuṣṭe brahmapadamapi syāt tṛṇasammitam

mṛtyurapyātmatāṃ yāti yasmāttuṣṭād gurornanu /
mamākāṇḍādeva guruḥ so'dya tuṣṭo maheśvaraḥ

gurutoṣahetuko mṛtyurātmatāṃ yātīti / akāṇḍād animittena / sa bahuprayāsena
toṣaṇīyaḥ

manye sarvaṃ mayā prāptamityeva kṛpayā guroḥ /
nātha māhātmyamakhilaṃ śrutaṃ tvatkṛpayādhunā

guruṃ pratyāha - nāthetyādi

tāmupāsitumicchāmi tripurāṃ parameśvarīm /
tadupāstikramaṃ brūhi mahyaṃ sukṛpayā guro

iti saṃprārthito dattagururālakṣya bhārgave /
yogyatāṃ tripuropāstau sacchraddhābhaktibṛṃhitām

krameṇa dīkṣyāmāsa tripuropāstihetave /
jāmadagnyo'pi saṃprāpya traipuraṃ dīkṣaṇaṃ śubham [k: śubhe]

p. ५)
sarvadīkṣāsamadhikaṃ pūrṇatattvaprabodhanam /
mantrayantravāsanābhiranvitaṃ [k: tama] nikhilaṃ kramam

mantrayantrayorvāsanā bhāvanābhedāḥ / kramaḥ paddhatiḥ [k:
kramapaddhatiḥ]

prāpya śrīguruvaktrābjādrasaṃ madhukaro yathā /
tṛptāntaraṅga ānandamādito [kh, g: modito] bhārgavastadā

upāstikramajijñāsānivṛttistṛptiḥ tajjanitānandapūrṇatvānmādito [k:
māditottamaḥ] mattaḥ

śrīnāthenābhyanujñātastripurāsādhanodyataḥ /
parikramya guruṃ natvā mahendrādrimupāyayau

tatra nirmāya vasatiṃ śubhāmatisukhāvahām /
abhūdupāsanaparo varṣadvādaśakaṃ tadā

nityanaimittikaparaḥ pūjājapaparāyaṇaḥ /
sadā śrītripureśānyā mūrtidhyānaikatatparaḥ

evaṃ tasyātyāgāt kālo dvādaśābdo nimeṣavat /
athaikadā [gh: tatha-] sukhāsīno nāmadagnyo'nucintayat

purā yatprāha saṃvarto mayā svabhyarthitaḥ pathi /
tanmayā naiva viditamaṃśenāpi tadā nanu

purā rāmātparājayānantaram / etacca māhātmyakhaṇḍe jñeyam / tat saṃvartoktaṃ
jñānam

vismṛtaṃ ca mayā yasmāt prāṅna pṛṣṭaṃ guruṃ prati /
māhātmyaṃ tripurāśakteḥ śrutaṃ śrīguruvaktrataḥ

praṣṭuṃ vismṛtam

parantu tatra viditaṃ yatsaṃvartaḥ purā'bravīt /
mayā sṛṣṭiprasaṅgena pṛṣṭaṃ kiñcid guruṃ prati

mayā sṛṣṭītyādyapi prathamakhaṇḍe [māhātmyakhaṇḍe daśamādhyāye
४९-६२ ślokeṣu] jñeyam

p. ६)
tadā kaṭakṛdākhyānaṃ varṇayitvā ca me guruḥ /
nābravīdaprakṛtatastanme tattādṛśaṃ sthitam

kuto nābravīttadāha - aprakṛtata iti / tādṛśam aviditam

lokasya gatimetāṃ tu na jānāmyapi leśataḥ /
kasmādidaṃ samuditaṃ jagadāḍambaraṃ mahat

kutra vā gacchati punaḥ kutra saṃsthānamṛcchati /
asthiraṃ tu prapaśyāmi sarvaṃ sarvatra kiñcana

asthiraṃ pratikṣaṇapariṇāmi

vyavahāraḥ sthiraprāyaḥ kasmādetadapīdṛśam /
citrāṃ jagadvyavahṛtiṃ prapaśyāmyavimarśinīm

viṣayasyāsthiratve kathaṃ tadviṣayakavyavahāro'yaṃ grāmo matputrārthaṃ
sampādita iti sthiraprāyo bhavatīti vismayannāha - vyavahāra iti /
avimarśinīmavicāravatīm

aho yathāndhānugato hyandhaśceṣṭati tādṛśaḥ /
lokasya vyavahāro vai sarvasyāpyabhilakṣitaḥ

andhaparamparayaiva vyavahāra ityāha - aho iti

nidarśanaṃ hyātmakṛtiratra me sarvathā bhavet /
nūnaṃ mama śaiśave kiṃ jātaṃ tanme na bhāvitam

atra dṛṣṭāntaḥ svasyācāraṇamevetyāha - nidarśanamiti / ātmanaḥ
kṛtirvyavahāraḥ / tadevāha - nūnamiti / me mayā

kaumāre cānyathā vṛttaṃ tāruṇye'pi tato'nyathā /
idānīmanyathaivāti vyāpāro mama sarvathā

kimabhūt phalameteṣāṃ tanna vedmi kathañcana /
yadyatkāle yacca yacca kriyate yena yena vai

p. ७)
samyageveti tadbuddhvā phalāvaṣṭambhapūrvakam /
phalaṃ kiṃ tatra saṃprāptaṃ kena vā sukhamātmanaḥ

phalāvaṣṭambhaḥ phalaprāptiniścayaḥ

yaccāpi loke phalavadavimṛśya phalaṃ hi tat /
na phalaṃ tadahaṃ manye punaryasmāt karoti saḥ

yacca phalaṃ dhanādi tasyāvicāreṇaiva phalatvamityāha - yacceti

prāpte phale phalecchāvān punarbhūyāt kathaṃ vada /
yasmānnityaṃ karotyeva janaḥ sarvaḥ phelehayā

phalābhimataprāptyanantaraṃ pravṛttikāraṇecchāyā evodayaḥ kathamityāha ##-
phalaṃ tadeva saṃproktaṃ duḥkhahāniḥ sukhaṃ ca vā /
kartavyaśeṣe no duḥkhanāśo vā sukhameva vā

nanu kiñcitphalaprāptāvapi phalāntaraprāptyarthaṃ karaṇaṃ
yuktamevetyāśaṅkya neti vaktuṃ phalasvarūpaṃ nirūpayati - phalamiti /
abhāvasyāsato na phalatvaṃ yuktamityāha - sukhaṃ ca veti

kartavyataiva duḥkhānāṃ paramaṃ duḥkhamucyate /
tatsattve tu kathaṃ te sto duḥkhābhāvaḥ sukhaṃ ca vā

duḥkhānāṃ madhye kartavyataiva paramaṃ mahad duḥkham / te duḥkhābhāvaḥ
sukhaṃ ceti dve

yathā dagdhākhilāṅgasya pāde pāṭīralepanam /
tathā kartavyaśeṣasya sukhalābha ihocyate

etadeva dṛṣṭāntairupapādayati - yathetyādi

yathā śarāviddhahṛdaḥ pariṣvaṅgo'psarogaṇaiḥ /
tathā kartavyaśeṣasya sukhalābha ihocyate

yathā kṣayāmayāviṣṭanarasya gītasaṃśrutiḥ /
tathā kartavyaśeṣasya sukhalābha ihocyate

sukhanaste hi lokeṣu ye'kartavyatayā sthitāḥ /
pūrṇāśayā mahātmānaḥ sarvadehasuśītalāḥ

tarhi kaḥ sukhītyākāṅkṣāyāmāha - sukhina iti / na kartavyaṃ yasya
tadbhāvo'kartavyatā / idameva sukhināṃ [k: sukhinām / na kṣaṇa]
lakṣaṇamiti bhavaḥ / sukhinamitarasmādvivecayitumāha - pūrṇetyādi /
anyeṣāṃ prāptavyaśeṣādapūrṇaḥ kāmitāprāptyā rikta āśayaścittam / tathānye
mahātmānaḥ svātmānaṃ nyūnaṃ manyamānāḥ / spaṣṭaṃ caitat /
sārvabhaumo'pīndrāt svātmānaṃ nyūnaṃ manyata iti / mūrdhni mukuṭasattve'pi
kaṇṭhe [kh: kaṇṭhe nāsti] hārābhāvena duḥkhānuvṛtteḥ na te
sarvāṅgaśītalāśca

p. ८)
yadi kartavyaśeṣe'pi sukhaṃ syāt kenacit kvacit /
śūlaprote'pi ca nare syāt sukhaṃ gandhamālyajam

kenacid vastramālyādinā

aho mahaccitrametat kartavyaśatasaṃkule /
sukhamastīha yasyārthe karotyeva sadā janaḥ

aho vicāramāhātmyaṃ kiṃ vadāmi nṛṇāmaham /
anantakartavyaśailākrāntāḥ suakhyaṃ labhanti ca

yathā [k: tathā] saukhyāya yatate sārvabhaumastu sarvadā /
tathaiva yatate nityamapi bhikṣāṭane rataḥ

pṛthak tau prāpnutaḥ saukhyaṃ manyete kṛtakṛtyatām /
tadyena yānti sarve'pi yāmyahaṃ tānanukramāt

yenāvicāritena mārgeṇa kramād yānti tānahamanuyāmi

anālocya phalaṃ cāpi yathāndho'ndhānugastathā /
tadalaṃ medhayānena bhūyo gatvā dayānidhim

atra hetuḥ - phalamanālocyeti / medhayā avicārajanitaniścayena / anena
vicāreṇa saha gatvā / yāvadvicāro na naśyettāvaditi tātparyam

vijijñāsitajijñāsyo vicikitsāmbudheḥ param /
pāraṃ prapatsye suśubhaṃ guruvākplavamāśritaḥ

vicikitsā sandehaḥ / guruvāgeva plavo nauḥ tamāśritaḥ [k: tāmāśritaḥ]

p. ९)
iti vyavasya sahasā jāmadagnyaḥ śubhāśayaḥ /
pratasthe tadgirivarād gurudarśanakāṅkṣyā

gandhamādanaśailendraṃ prāpya śīghramapaśyata /
guruṃ padmāsanāsīnaṃ bhūbhāsvantamiva sthitam

praṇanāma pādapīṭhapurato bhuvi daṇḍavat /
śirasā'pīḍayat pādapadmaṃ nijakarāśritam

athaivaṃ praṇataṃ rāmaṃ dattātreyaḥ prasannadhiḥ /
āśirbhiryojayāmāsa samutthāpayadādarāt

vatsottiṣṭha cirādadya tvāṃ paśyāmi samāgatam /
brūhi svātmabhavaṃ vṛttaṃ nirāmayatayā [k: nirāmayāsthitam]
sthitam

ātmabhavaṃ śarīrādau bhavamutpannam

athotthāya gurūktyā sa gurvādiṣṭāgnyaviṣṭaraḥ /
upaviśya prasannātmā baddhāñjalipuṭo'bravīt

śrīguro karuṇāsindho tvatkṛpāmṛta āplutaḥ /
kathaṃ sa paribhūyeta vidhisṛṣṭairathāmayaiḥ

atheti apyarthaḥ / vidhisṛṣṭairapītyarthaḥ

tvatkṛpātmāmṛtakaramaṇḍalāntaḥ sthitaṃ tu mām /
santāpayet kathaṃ vyādhiścaṇḍāṃśuratibhīṣaṇaḥ

āntaraṃ bāhyamapi te kṛpayānanditaṃ mama /
sadā sthitaṃ kintu bhavatpādābjaviyutiṃ vinā

āntaraṃ manaḥ / bāhyaṃ śarīram / bhavatpādābjayorviyutirviyogaḥ

nānyadrujāvahaṃ kiñcidāsīnme leśataḥ kvacit /
tadbhavaccaraṇāmbhojadarśanādadya vai punaḥ

p. १०)
sampūrṇatā samāpanā sarvathā śrīguro nanu /
tat kiñciccirasaṃvṛttaṃ hṛdi me parivartate

ānandasya sampūrṇatā / cirakālāddhṛdi saṃvṛttam utpannaṃ praṣṭavyamiti

tatpraṣṭuṃ tvābhivāñchāmi cirasaṃśayitāntaraḥ /
ājñapto bhavatādyāhaṃ pṛcchāmi vicikitsitam

praṣṭavyārthe cirāt saṃśayitam āntaraṃ mano yasya

saṃśrutyaivaṃ bhārgavoktiṃ dattātreyo dayānidhiḥ /
samprahṛṣṭamanā rāmamūce prītyātha bhārgavam

pṛccha bhārgava yatte'dya praṣṭavyaṃ cirasambhṛtam /
tava bhaktyā prasanno'smi prabravīmi tavepsitam

iti śrīmaditihāsottame tripurārahasye jñānakhaṇḍe bhārgavapraśne
prathamo'dhyāyaḥ //
iti śrītripurārahasyajñānakhaṇḍavyākhyāyāṃ [g, gh:
śrītripurārahasye-] tātparyadīpikāyāṃ prathamo'dhyāyaḥ //
p. ११)
atha dvitīyo'dhyāyaḥ
ityājñapto [k, g: asya ślokasya pūrvārdhottarārdhayoḥ
pustakayorviparyastaḥ pāṭhaḥ] jāmadagnyaḥ praṇamyā'trisutaṃ munim /
praśrayāvanato bhūtvā saṃpraṣṭumupacakrame

atrādhyāye vedamitaiḥ padyaiḥ kartavyadūṣaṇam /
kriyate suvicārasya janistutirapīryate //
pṛcchetyājñaptaḥ / praśrayaḥ vinayaḥ

bhagavan gurunāthārya sarvajña karuṇānidhe /
purā me nṛpavaṃśeṣu krodhaḥ kāraṇato hyabhūt

svasya nirvedapāptiprakāramāha - pureti

tadbhūyo nihitaṃ kṣātraṃ sagarbhaṃ sastanandhayam /
mayā triḥsaptakṛtvo vai kṣatrāsṛgbharite hrade

tat krodhāddhetoḥ

santarpitāḥ pitṛgaṇāstuṣṭā madbhaktigauravāt /
matkrodhaṃ śāmayāmāsuḥ śāntaḥ pitrājñayāpyaham

sampratyayodhyāmadhyāste yaḥ śrīrāmo hariḥ svayam /
krodhāndhastena bhūyo'haṃ saṅgato baladarpitaḥ

tena darpādbhagavatā cyāvitaśca parājitaḥ /
jīvan kathañcinnryāto brahmaṇyenānukampinā

atha māmupasaṃprāpto nirvedaḥ paribhāvitam [gh: paribhāvitaḥ] /
tato'tyantaṃ pathi mayā bahudhā paridevitam

paridevitaṃ pralapitam

saṃvartamavadhūtendraṃ mārge'kasmāt samāsadam /
bhasmacchannāgnivad gūḍhaṃ kathañcidavidaṃ tadā

samāsadamāsāditavān

p. १२)
santapta iva nīhāraṃ taṃ sarvāṅgasuśītalam /
saṅgamyaivātiśiśirabhāvamāsādayaṃ tadā

kīdṛśaṃ saṃvartaṃ kathaṃvidho rāma āsāditavān? tadāha - santapteti /
saṅgamaphalamāha - saṅgamyeti

mayā svasthitimāpṛṣṭaḥ prāhāmṛtasupeśalam /
susārapiṇḍavat sarvaṃ niṣkṛṣya pratyapādayat

peśalaṃ sundaram / sarvaṃ praśnārtham

nāhaṃ tadaśakaṃ spraṣṭuṃ raṅko rājñīṃ yathā tathā /
bhūyaḥ saṃprārthitaḥ so'tha bhavantaṃ me vinirdiśat

tat saṃvartoktam / raṅkaḥ daridrī

tadbhavaccaraṇadvandvaṃ [gh: tanme andho tadbhava iti
paṅktikramaḥ] tata āsāditaṃ mayā /
andho janasamāyogamivātyantasukhāvaham

tanme na viditaṃ kiñcit saṃvartamunirāha yat /
śrutaṃ māhātmyamakhilaṃ tripurābhaktikārakam

tat saṃvartoktaṃ śravaṇādhikāraṃ svasminnāha - śrutamiti

sā bhavadrūpiṇī devī hṛdi nityaṃ samāhitā /
evaṃ me vartamānasya kiṃ phalaṃ samavāpyate

bhavadrūpiṇī gururūpiṇī / phalasya devatākāracittavṛtteḥ prāptatvāt
punarupāsanaṃ piṣṭapeṣaṇavadityāha - evamiti

bhagavan kṛpayā brūhi yatsaṃvartaḥ purāvadat /
aviditvā ca tannāsti kvacīcca kṛtakṛtyatā

kiṃ saṃvartoktena upāsanameva kurviti cedāha - aviditveti

taduktamaviditvā tu yadyacca kriyate mayā /
tadvālakrīḍanamiva pratibhāti samantataḥ

tadaviditvopāsanamanyadvā karma sarvaṃ vyarthamityāha - taduktamiti

p. १३)
purā mayā hi bahuśaḥ kratubhirdakṣiṇocchrayaiḥ /
prabhūtānnagaṇairiṣṭā devāḥ śakramukhā nanu

nanu na vyarthaṃ karmādīnāṃ phalasattvāditi cennetyāha - pureti /
dakṣiṇānām ucchraya ādhikyaṃ yeṣu

tadalpaphalameveti śrutaṃ saṃvartavaktrataḥ /
manye tadahamalpaṃ yat duḥkhameveti sarvathā

tadalpeti / evaṃvidhottamakarmaṇāmalpaphalatve kimanyeṣāmiti bhāvaḥ /
alpaphalatve'pi na phalābhāva ityāśaṅkyālpaphalasya duḥkhātmataivetyāha -
manya iti

asukhaṃ nahi duḥkhaṃ syād duḥkhamalpaṃ sukhaṃ smṛtam /
yataḥ sukhātyaye duḥkhaṃ bhaved gurutaraṃ kila

etadeva nirūpayati - asukhamiti / tatra hetuḥ - yata iti

naitāvadeva caitasmādadhikaṃ cāsti vaibhavam /
mṛtyūpayogo yadbhūyo na tatra syāt kadācana

nanu kṛtakarmadhārayālpasukhadhārā [kh: sukhādhāra] prāpteḥ kiṃ
jñāneneti cedāha - naitāvadeveti / bhayamevāha - mṛtyūpeti /
mṛtyugrasanaṃ karmabhirdurnivāramiti bhāvaḥ

evameva bhavedyanme kriyate tripurāvidhau /
bālakrīḍeva me bhāti sarvaṃ tanmānasaṃ yataḥ

nanu karmaivaṃvidhameva / upāsanaṃ tu
paradevatāsambandhānnaivamityāśaṅkyopāsanamapi śuṣkakarmatulyameva
phalata ityāha - evamiti / me mayā tripuropāsanavidhau kriyamāṇaṃ
karmavadevetyarthaḥ / ata eva bālakrīḍeveti / tatra hetuḥ - mānasaṃ yata iti

etadyaduktaṃ bhavatā kartuṃ tat [k: tasyā] syādito'nyathā /
niyataṃ cāpyanyathā tad vacobhedasamāśrayāt

upāsanasya karmatulyatāmāha - etaditi / yad upāsanam / vacobhedaḥ
śāstrabhedaḥ / śāstrāṇāṃ vividhatvena bhavaduktaprakāreṇānyathā vā
niyamenāniyamena vā kartuṃ śakyamityarthaḥ

p. १४)
ālambabhedataścāpi vividhaṃ pratipadyate /
kathametat kratusamamasatyaphalasammitam

śāligrāmanārmadādyālambanabhedena cānyathā kartuṃ śakyam / evamanekathā
pratipadyamānatvāt kratvādikarmasamametadupāsanamasatyaphalatvena sammitaṃ
niścitam / kratusamaṃ kathaṃ na bhavediti śeṣaḥ

apyasatyātmakaṃ yasmāt kathaṃ satyasamaṃ bhavet /
athāpi nityaṃ [k: nitya] kartavyametannāsyāvadhiḥ kvacit

mānasatvāt svarūpato'pyasatyaṃ yasmāttasmāt kathaṃ satyaphalajanakaṃ bhavet /
nāstyakṛtaḥ kṛtena (muṇḍa० १/२/१२) iti vacanāditi bhāvaḥ /
śāstrasyeśvarasaṅkalparūpatvenācintyatvānnaivaṃ vaktuṃ yuktamiti cedāha ##-
lakṣito me sa bhagavān [k, gh: bhagavan] saṃvartaḥ sarvaśītalaḥ
/
kartavyaleśaviṣamaviṣajvālāvinirgataḥ

nanu yāvajjīvaṃ kurvata eva paraśreyaḥprāptiriti cedāha - lakṣita iti / me mayā
/ na tena śreyaḥ prāptamiti cedāha - sarvaśītala iti / na pratyakṣadṛṣṭe
vipratipattirityāśayaḥ / kuta evaṃ sa sarvaśītalastvayā jñātaḥ / tadāha -
kartavyeti / yato vinirgataḥ tataḥ śītalaḥ

hasanniva lokatantramabhayaṃ mārgamāśritaḥ /
vane dāvāgnisaṅkīrṇe himāmbusthagajopamaḥ

na ca sa kevalaṃ mūḍhaḥ pāpaphalabhāk yato'bhayaṃ mārgamāśrito
lokavyavahāraṃ hasannivāste / tasya sarvaśītalatve dṛṣṭāntaḥ - vana iti

sarvakartavyavaikalyāmṛtasaṃsvādananditaḥ /
kathametāṃ daśāṃ prāpto yacca māmāha tatpurā

kartavyavaidhuryamātreṇa kathaṃ sa mahāsukhī ? tadāha - sarveti /
kartavyataiva mahāduḥkhahetuḥ / vyavahāre śrāntidarśanāt tadabhāvādeva
sukham / suṣuptau sukhadarśanāditi bhāvaḥ / etāṃ daśāṃ
karmatyāgādabhayadaśāṃ saṃvartaḥ prāptaḥ

p. १५)
sarvametat sukṛpayā guro me vaktumarhasi /
kartavyakālabhujaganigīrṇaṃ māṃ vimocaya

kimetena te prayojanamiti cedāha - kartavyeti

ityuktvā caraṇau mūrdhnā gṛhītvā daṇḍavannataḥ /
atha dṛṣṭvā tathābhūtaṃ bhārgavaṃ muktibhājanam [gh: bhakti]

tathābhūtam ārtaṃ mumukṣum

dayamānasvabhāvo'tha datto vaktumupākramat /
vatsa bhārgava dhanyo'si yasya te buddhirīdṛśī

kartavyasya duḥkhahetutvabuddhiḥ

abdhau nimajjato naukāsamprāptiriva saṅgatā /
etāvadeva sukṛtiḥ kriyābhirupasaṅgataḥ

buddhiṃ stauti - abdhāviti / te saṅgatetyanvayaḥ / upāsanaṃ bālakrīḍanavad
vyarthamiti rāmeṇoktaṃ phalapradarśanena pratyāha - etāvaditi /
buddhiprāptimityarthaḥ

svātmānamārohayati pade paramapāvane /
sā devī tripurā sarvahṛdayākāśarūpiṇī

upasaṅgata ārohayatīti sambandhaḥ / paramapāvane nirdoṣe mokṣākhye / kathaṃ
kriyābhirbuddhiprāptyā padārohastadāha - seti / hṛdayākāśe'bhivyaktyā
tadrūpiṇī

ananyaśaraṇaṃ bhaktaṃ pratyevaṃrūpiṇī drutam /
hṛdayāntaḥ pariṇatā mocayed mṛtyujālataḥ

evaṃrūpiṇī proktabuddhirūpiṇī / proktabuddhyādirūpeṇa [k, kh, g:
buddhyā rūpeṇa] pariṇatā saiva mocayediti bhāvaḥ

yāvat kartavyavetālānna bibheti dṛḍhaṃ naraḥ /
na tāvat sukhamāpnoti vetālāviṣṭavat sadā

asyā buddhervyatirekamukhena padasādhanatāmāha - yāvaditi

p. १६)
nṛṇāṃ kartavyakālāhisandaṣṭānāṃ kathaṃ śubham /
karālagaralajvālākrāntāṅgānāmiva kvacit

sarpadaṣṭānāmiva kartavyayutānāṃ na sukhamityāha - nṛṇāmiti

kartavyaviṣasaṃsargamūrcchitaṃ paśya vai jagat /
andhībhūtaṃ na jānāti kriyāṃ svasya hitātmikām

na jānāti / evaṃrūpaṃ jagat paśya

anyathā ceṣṭate bhūyo mohamāpadyate punaḥ /
evaṃvidho hi lokoayaṃ kartavyaviṣamūrcchitaḥ

anyatheti / hitasādhanāya [k, kh, g: nāyatsā] tatsādhanaṃ
vihāyānyathā ceṣṭate / atra heturviṣamūrcchita iti

anādikālato bhīme pacyate viṣasāgare /
yathā hi kecit pathikāḥ prāptā vindhyamahānagam [k: vindhyaṃ
mahā]

evaṃ moho jīvasya kadāprabhṛti [k, g: bhṛtisampanna] sampanna iti
cedāha - anādīti / atra dṛṣṭāntatvenākhyāyikāmupakramate - yatheti

kṣudhābharasamākrāntāḥ phalāni dadṛśurvane /
viṣamuṣṭiphalānyāśu tindukasya phalehayā

bhakṣayāmāsuratyantakṣudhānaṣṭarasendriyāḥ /
atha te tadviṣajvālājvalitāṅgāḥ supīḍitāḥ

nanu viṣamuṣṭitindukaphalayorākṛtisāmye'pi na rasasāmyamityata āha -
naṣṭarasendriyā iti

andhībhūtā vicinvantastadviṣoṣṇapraśāntaye /
aviditvā muṣṭiphalaṃ tindūphalaniṣevaṇāt

muṣṭiphalaṃ bhakṣitamityaviditvā

matvā jvālāṃ nije dehe dhatturaphalamāsaduḥ /
bhrāntyā jambīrabuddhyā tat sarvirāsīt subhakṣitam

tindūphalajāmevāṅge jvālāṃ matva āsaduḥ prāptāḥ / tad dhatturaphalam

p. १७)
unmattāśca tato'bhūvan mārgād bhraṣṭāśca te tadā /
andhībhūtātigahane patanto nimnabhūmiṣu

kaṇṭakaiśchinnasarvāṅgā [k, gh: ścit-]
bhagnabāhūrupādakāḥ /
adhikṣipantaścānyonyaṃ kalahaṃ cakruruccakaiḥ

muṣṭibhiśca śilābhiśca kāṣṭhairjaghnuḥ parasparam /
atha te dīrṇasarvāṅgāḥ puraṃ kañcit samāsaduḥ

niśīthe daivavaśataḥ puradvāramupāyayuḥ /
puradvārādhipālaiste pratiruddhāḥ praveśane

deśakālānabhijñānāt kalahaṃ cakruruccakaiḥ /
atha te prahṛtā dvārapālairatitarāṃ yadā

dvārādhipaiḥ kalahaṃ cakruḥ

tadā palāyanaparā babhūvuḥ paritastu te /
patitāḥ parikhe kecid bhakṣitā makarādibhiḥ

parikhājalasthamakarādibhiḥ

kecit khāteṣu kūpeṣu patitāḥ prāṇamutsṛjuḥ /
apare tairvinihatāḥ kecijjīvagrahaṃ gatāḥ

evaṃ janā hitecchābhiḥ kartavyaviṣamūrcchitāḥ /
aho vināśaṃ yāntyuccairmohenāndhīkṛtāḥ khalu

dārṣṭāntike yojayati - evamiti

dhanyo'si bhārgava tvaṃ tu yasmādabhyudayaṃ gataḥ /
vicāraḥ sarvamūlaṃ hi sopānaṃ prathamaṃ bhavet

mohasāgarottīrṇatvād dhanyo'si / ko'sāvabhyudayastadāha - vicāra iti / mūlaṃ
bhavet

paraśreyomahāsaudhaprāptau jānīhi sarvathā /
suvicāramṛte kṣemaprāptiḥ kasya kathaṃ bhavet

yata evamataḥ saudhaprāptau prathamaṃ sopānaṃ jānīhi / ata evāha - suvicāreti

p. १८)
avicāraḥ paro mṛtyuravicārahatā janāḥ /
vimṛśyakarī jayati sarvatrābhīṣṭasaṅgamāt

avicārahatā daityā yātudhānāśca sarvaśaḥ /
vicāraparamā devāḥ sarvataḥ sukhabhāginaḥ

avicāreṇa ke hatāḥ ke vā vicāreṇa sukhinastadāha - avicāreti

vicārādviṣṇumāśritya jayanti pratyarīn sadā /
vicāraḥ sukhavṛkṣasya bījamaṅkuraśaktikam

devāḥ pratyarīn daityādīn jayanti / aṅkuraśaktikamiti / na niṣphalaṃ bījamiti
bhāvaḥ

virājate vicāreṇa puruṣaḥ sarvato'dhikaḥ /
vicārādvidhirutkṛṣṭo vicārāt pūjyate hariḥ

sarvajñastu vicāreṇa śiva āsīnmaheśvaraḥ /
avicārānmṛgāsakto rāmo buddhimatāṃvaraḥ

paramāmāpadaṃ prāpto vicārādatha vāridhim /
baddhvā laṅkāpurīṃ rakṣogaṇākīrṇāṃ samākramat

avicārādvidhirapi mūḍho bhūtvā'bhimānataḥ /
śiraśchedaṃ samagamaditi saṃśrutameva te

mahādevo'vicāreṇa varaṃ datvā'surāya vai /
bhasmībhāvāt svasya bhītaḥ palāyanaparo'bhavat

avicārāddhariḥ pūrvaṃ bhṛgupatnīṃ nihatya tu /
śāpena paramaṃ duḥkhamāptam(mavāpā)tyantaduḥsaham

evamanye surā devā yātudhānā narā mṛgāḥ /
avicāravaśādeva vipadaṃ prāpnuvanti hi

mahābhāgāste hi dhīrā yān kutrāpi ca bhārgava /
vijahāti vicāro no namastebhyo nirantaram

vicāraparān stauti - maheti

p. १९)
kartavyamavicāreṇa prāpya muhyanti sarvataḥ /
vicārya kṛtvā sarvebhyo mucyate'pārasaṅkaṭaiḥ

akartavyameva duḥkhadamavicārāt kartavyatvena prāpya sarvato muhyanti /
apārasaṅkaṭaiḥ aparihāryaduḥkhaprāpakaiḥ saha sarvebhyo duḥkhebhyaḥ

evaṃ lokāṃścirādeṣo'vicāraḥ saṅgato'bhavat /
yasyāvicāro yāvat syāt kutastāvadvimarśanam

vicārāvicārayorvirodhaṃ sadṛṣṭāntamāha - yasyeti

grīṣmabhīṣmakarātapte marau kva śiśiraṃ jalam /
evaṃ cirāvicārāgnijvālāmālāparīvṛte

nanu grīṣme'pyakasmād vṛṣṭyāgama iva vicāraḥ svayamevodeṣyatīti cennetyāha
- evamiti

vicāraśītalasparśaḥ kathaṃ syāt sādhanaṃ vinā /
sādhanaṃ tvekamevātra paramaṃ sarvato'dhikam

sādhanaṃ prasiddhaṃ karma syāditi cennetyāha - ekameveti / sarvataḥ
itaraphalasādhakebhyaḥ sādhanebhyo'dhikam / avaśyaphalaparyavasānāditi bhāvaḥ

sarvahṛtpadmanilayadevatāyāḥ parā kṛptā /
tāṃ vinā syāt kathaṃ kasya mahāśreyaḥ susādhanaḥ

tat kim ? tadāha - parā kṛpeti

vicārārko'vicārāndhamahādhvāntanibarhaṇaḥ /
tatra mūlaṃ bhavedbhaktyā devatāparirādhanam

andhasya janmāndhasya yanmahādhvāntaṃ sūryādyairanivāryam / tatra kṛpāyām

rādhitā paramā devī samyak tuṣṭā satī tadā /
vicārarūpatāṃ yāti cittākāśe raviryathā

devatārādhanād vicārodayaprakāramāha - rādhiteti / kṛpayā svayameva
vicārarūpā bhavatītyarthaḥ / kṛpotpatteḥ pūrvaṃ saivāvicārarūpā cāsīditi
tātparyam / ata evoktaṃ caṇḍīstave - saṃsārabandhahetuśca saiva
sarveśvareśvarī (१/५८) iti

p. २०)
tasmānnijātmarūpāṃ tāṃ tripurāṃ parameśvarīm /
sarvāntaraniketāṃ śrīmaheśīṃ cinmayīṃ śivām

tadapyārādhanaṃ nendracandrādirūpāyāḥ kintvantaryābhirūpāyā ityāha -
nijātmeti

ārādhayedakāpaṭyāt sadgurudvārataḥ kramāt /
ārādhane'pi mūlaṃ syādbhaktiḥ śraddhā ca nirmalā

ārādhanaprakāramāha - akāpaṭyāditi / kāpaṭyam phalābhisandhiḥ

tatrāpi mūlaṃ māhātmyaśravaṇaṃ parikīrtitam /
ataste prathamaṃ rāma māhātmyaṃ sampravartitam

tatrāpi bhaktyādau / sampravartitaṃ śrāvitam

tena śrutenādhunā tvaṃ prāptavānasi maṅgalam /
vicāraḥ [k, g, gh: vicāraṃ] śreyaso mūlaṃ yasmātte nahi
bhīritaḥ

vicārodayaparyantaṃ bhayamasti mahattaram /
avicārātmadoṣeṇa grastasya prativāsaram

yathā hi sannipātena grastasyauṣadhasevanāt /
api tāvadbhaved bhītiryāvaddhātoraśuddhatā

atra dṛṣṭāntaḥ - yatheti / sannipātamahādoṣavato mahauṣadhasevanādapi
yāvad dhātuśuddhirna bhavati tāvad bhayamastyeva kvacidviparyayadarśanāt evaṃ
devatārādhanaparasyāpi vicārodayaparyantamavicāreṇa bhayamastīti bhāvaḥ

prāpte vicāre parame phalitaṃ jīvitaṃ nṛṇām /
yāvatsu janmasu nṛṇāṃ vicāro na bhavet paraḥ

paro mokṣasādhanaḥ

p. २१)
tāvanto janmataravo vandhyā viphalahetutaḥ /
sa eva saphalo janmavṛkṣo yatra vimarśanam

kūpamaṇḍūkasadṛśā ye narā nirvimarśanāḥ /
yathā kūpe samutpanno bheko no veda kiñcana

te kūpamaṇḍukasadṛśaḥ

śubhaṃ vāpyaśubhaṃ vāpi kūpe eva vinaśyati /
tathā janā api vṛthotpannā brahmāṇḍakūpake

śubhaṃ vāpyaśubhaṃ vāpi na viduḥ svātmanaḥ kvacit /
utpadyotpadya naśyanti na jānanti svakaṃ hitam

sukhabuddhiṃ ca duḥkheṣu sukhe duḥkhaviniścayam /
prāpyāvicāramāhātmyāt pacyante sṛtipāvake

duḥkhasādhaneṣu putrādiṣu sukhasādhanatvabuddhim / sukhasādhane [k:
sādhanavairā-] vairāgyādau duḥkhasādhanatvaviniścayam /
sṛtirjanmādirūpaḥ saṃsāraḥ

duḥkhena kliśyamānāśca na kathañcit tyajanti tat /
yathā pādaśatāghātaistāḍito'pi mahākharaḥ

tad dhanādirūpaṃ duḥkhasādhanam / atra dṛṣṭāntaḥ - yatheti

rāsabhīmanuyātyeva tathā saṃsaraṇaṃ janaḥ /
tvaṃ tu rāma vicārātmā pāraṃ duḥkhasya saṅgataḥ

tatheti / saṃsaraṇaṃ ghorasaṃsārapravṛttim [k: ghoraṃ saṃsāre] /
bhūyaḥ kliśyamāno'pi na tyajatītyarthaḥ

iti śrītripurārahasye jñānakhaṇḍe vicāramāhātmye dvitīyo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
dvitīyo'dhyāyaḥ //
p. २२)
atha tṛtīyo'dhyāyaḥ
dattātreyaproktavacaḥ śrutvā'tyantasukautukī /
jāmadagnyaḥ punarapi papraccha vinayānvitaḥ

pūrvādhyāye māhātmyaśravaṇād bhaktistata upāsanaṃ tato vicārodaya ityuktam /
tatra māhātmyaśravaṇa eva kiṃ kāraṇamiti papracchetyāha hāritāyanaḥ [k:
tāya namaḥ] dattātreyeti

bhagavan gurunāthoktaṃ bhavatā yattathaiva tat /
avicārāt paro nāśaḥ saṃprāptaḥ sarvathā janaiḥ

vicāreṇa bhavecchreyastannidānamapi śrutam /
māhātmyaśrutirityevaṃ [k: rityeva; kh: riveyam] tatra me saṃśayo
mahān

tatra māhātmyaśrutau

kathaṃ vā tadapi prāpyaṃ sādhanaṃ tatra kiṃ bhavet /
svābhāvikaṃ tadyadi syāttatsarvairna kutaḥ śrutam

tadapi māhātmyaśravaṇamapi / prāṇimātrasyāśanāyāpipāsādivat
svābhāvikamevaitaditi cedāha - tatsarvairiti

ahaṃ vādyāvadhi kutaḥ pravṛttiṃ nāptavāniha /
duḥkhaṃ matto'dhikaṃ prāptā vihatāśca pade pade

śauryavīryādivat tvādṛśānāmevāyaṃ svabhāva iti cedāha - ahaṃ veti / iha
māhātmyaśravaṇe / duḥkhaprāptirevātra mūlamiti cedāha - duḥkhamiti

na kutaḥ sādhanaṃ prāptā etanme kṛpayā vada /
ityāpṛṣṭaḥ prāha bhūyo hṛṣṭo datto dayānidhiḥ

ahaṃ yathā rāmeṇa vihataḥ parājita evamanye pade pade vihatā api kuto na
māhātmyaṃ śrutavantaḥ etadvadetyarthaḥ

p. २३)
śṛṇu rāma pravakṣyāmi nidānaṃ śreyasaḥ param /
sadbhiḥ saṅgaḥ paraṃ mūlaṃ sarvaduḥkhanibarhaṇam

nidānamādikāraṇam / paraṃ mūlamādikāraṇam

paramārthaphalaprāptau bījaṃ satsaṅga ucyate /
tvaṃ cāpi tena hi satā saṃvartena mahātmanā

saṅgataḥ sannimāṃ prāpto daśāṃ śreyaḥphalodayām /
santa eva hi saṃyātā diśanti paramaṃ sukham

tacca rāma eva nidarśayati - tvaṃ ceti / satsaṅgaṃ stauti - santa iti

vinā satsaṅgataḥ kena prāptaṃ śreyaḥ paraṃ kadā /
loke'pi yādṛśaṃ saṅgaṃ yo yaḥ prāpnoti mānavaḥ

tatphalaṃ sa samāpnoti sarvathā nahi saṃśayaḥ /
atra [k: atreti] te kīrtayiṣyāmi śṛṇu rāma kathāmimām

tatphalaṃ saṅgānurūpaṃ sadasadvā / pūrvādhyāye saṃvartopadiṣṭaṃ vijñānaṃ
saṃvartasya tādṛśasthitiṃ ca vadetyuktam / tatsarvaṃ satsaṅgaphalatvena
vaktumākhyāyikāmupakramate - atreti

purā daśārṇādhipatirmuktācūḍa itīritaḥ /
tasya putrau hemacūḍamaṇicūḍau babhūvatuḥ

surūpau suguṇau cobhau sarvavidyāviśāradau /
kadācinmṛgayotsāhāt senābhiḥ parivāritau

sahyācalavanaṃ bhīmaṃ siṃhavyāghrādisaṅkulam /
mahābalau viviśaturdhanurbāṇadharau kila

atha tatra mṛgān siṃhān varāhān mahiṣān vṛkān /
jaghanturniśitairbāṇairlāghavāt kārmukacyutaiḥ

p. २४)
pāṃśubhirnabha ākrāntamabhūd darśaniśopamam /
na dṛśyate tatra śilā vṛkṣaḥ puruṣa eva vā

kuto nīcoccatāṃ paśyedevaṃ dhvāntāvṛto giriḥ /
nihatā śarkarāvarṣaiḥ senātyantaṃ palāyitā

vṛkṣān kecicchilāḥ kecid guhāḥ kecidupāsaduḥ /
aśvārūḍhau rājaputrāvapi dūraṃ palāyitau

upāsaduḥ saṃśritā babhūvuḥ

hemacūḍaḥ kvacittatra prapede [gh: pradeśe] tāpasāśramam /
kadalīkharjūravanairākrāntamatisundaram

tatrāpaśyacchubhāṃ kāñcit kanyāmagniśikhāmiva /
pradyotamānāṃ vapuṣā taptahemasuvarcasā

tāṃ dṛṣṭvā rājaputro'pi padmāmiva surūpiṇīm /
smayamāna ivā'pṛcchat kā tvaṃ padmānane vane

nirjane bhītijanane nirbhayeva [k: nirbhaye vaśa] samāsthitā /
kasya tvamapi kenātra nivasasyekalā katham

kena hetornivasasi ? kathamekalā nivasasīti sambandhaḥ

pṛṣṭaivaṃ prāha sā kanyā rājaputramaninditā /
svāgataṃ te rājaputra viṣṭaraṃ pratipadyatām

viṣṭaram āsanam

tapasvināmayaṃ dharmaḥ pūjanaṃ hyatithestu yat /
śrāntaṃ tvāmabhipaśyāmi vyathitaṃ caṇḍavāyunā

matpraśnasyottaramanuktvā kuta ādau pūjanaṃ kriyata iti cedāha -
tapasvināmiti / tatraiva [k: tatraiva] hetvantaramāha - śrāntaṃ tvāmiti

evaṃ vinighnatorvanyān mṛgān rājakumārayoḥ /
caṇḍavāyuḥ prādurāsīccharkarāśmapravarṣaṇaḥ

[atra sthāpitaḥ
ṣoḍaśaḥ ślokaḥ २-३ paṅktyoḥ sthāpanīyaḥ /]
p. २५)
badhvā kharjūravṛkṣe'śvamatrāsīno gataśramaḥ /
madvṛttamarhasi śrotumityuktaḥ sa tathā'karot

phalāni bhojayāmāsa pāyayāmāsa sadrasam /
evaṃ taṃ viśramaṃ prāptaṃ rājaputramaninditā

sadrasaṃ svādūdakam

prāha sā madhusaṃsrāvapeśalākārayā girā /
rājaputra vyāghrapādo muniḥ śivapadāśrayaḥ

peśalākārayā śobhanayā

yena lokāḥ puṇyatamā jitāḥ svatapaso balāt /
parāvarajño hyaniśaṃ pūjito munināyakaiḥ

parāvarajño brahmajñaḥ

tasyāhaṃ dharmataḥ putrī hemalekheti viśrutā /
vidyutprabhākhyā vidyādhrī sā sarvāṅgamanoharā

svasya dharmaputrītvameva nirūpayitumāha - dharmata iti / na tanujetyarthaḥ /
vidyuditi

imāṃ veṇāmanu nadīṃ snātumabhyāyayau kvacit /
tadhā tatrājagāmārthāt suṣeṇo vaṅgabhūpatiḥ

sa dadarśa vigāhantīṃ nadīṃ tāṃ lokasundarīm /
klinnāṃśukāntaratyantavyaktapīnakucadvayīm

kāmabāṇahatastatra tāṃ prārthayadathāpi sā /
saundaryamohitā tasya taduktiṃ samamaṃsata

atha sāpītyanvayaḥ / samamaṃsata aṅgīcakāra

saṅgamyātha tayā rājā yayau svanagaraṃ pratiṃ /
dadhāra sāpi vidyādhrī garbhaṃ rājarṣivīryataḥ

bhītā'pacārāt patyuḥ sā garbhaṃ tyaktvātra saṃyayau /
amoghavīryād rājarṣerjātāhaṃ kanyakā tataḥ

atra [k: atra ...... ramogha nāsti] veṇātīre / amogheti /
rājarṣeramoghavīryatvādahaṃ garbhe paripākaṃ vinaiva tadvīryāt kanyakā jāteti
bhāvaḥ

p. २६)
māṃ dadarśa vyāghrapādaḥ sandhyopāstyarthamāgataḥ /
dayayā māmupādāyā'pālayajjananī yathā

dharmeṇa yaḥ pālayitā procyate hi pitaiva saḥ /
ahaṃ tasya dharmaputrī pitṛsevāparāyaṇā

tasya māhātmyato me'tra bhayaṃ nāstyeva kutracit /
nāyaṃ surāsurairvāpi kadācid duṣṭabuddhibhiḥ

kathamekalā nivasasītyasyottaramāha - tasyeti

praveṣṭumāśramo'rhaḥ syāt praviśannāśamāpnuyāt /
etanme'bhihitaṃ vṛttaṃ tiṣṭha kiñcinnṛpātmaja

āyāsyati sa bhagavān pitā me taṃ niśāmaya /
praṇamya taṃ prāpya ceṣṭaṃ tataḥ kalye prayāsyasi

rājaputrasya svasminnabhiprāyamālakṣya svāṅgīkāraṃ [k: svāṅgīkāre]
dyotayantyāha - prāpya ceṣṭamiti / āvayoranurūpatvād māṃ tubhyaṃ
dāsyatyevetyāśayaḥ / kalye uṣasi

hemalekhāvacaḥ śrutvā tatsaundaryeṇa mohitaḥ /
bhitaḥ kiñcit pravaktuṃ tāṃ vimanā iva cābhavat

munimāhātmyādbhītaḥ / kiñcit svābhiprāyam

athālakṣya rājaputraṃ kāmasya vaśamāgatam /
prāha sā viduṣī bhūyo rājaputra dhṛtiṃ bhaja

āgacchati pitā sadyastato'bhilaṣitaṃ bhaja /
evaṃ vadantyāṃ tasyāṃ sa vyāghapādo mahāmuniḥ

ājagāma vanāt [k: vanādyatra puṣpā] patrapuṣpādeḥ
kṛtasañcayaḥ /
muniṃ samāgataṃ dṛṣṭvā rājaputraḥ samutthitaḥ

p. २७)
praṇamya nāma saṃśrāvyopaviṣṭastena deśitaḥ /
atha dṛṣṭvā rājaputraṃ kāmena vikṛtākṛtim

deśita ājñaptaḥ

jñātvā yogadṛśā sarvaṃ matvā yuktaṃ ca tattadā /
dārakriyārthaṃ tasmai tāṃ hemalekhāṃ dadau muniḥ

sarvaṃ tayorabhiprāyam / tat tasmai kanyādānam

tuṣṭo rājakumāro'pi tāmādāya puraṃ yayau /
muktācūḍo'tisantuṣṭo mahotsavavidhānataḥ

vivāhamakarottasya vidhānena kṣitīśvaraḥ /
atha rājakumāro'pi tayā krīḍāparaḥ sadā

saudheṣu vanarājīṣu pulinādiṣu saṃbabhau /
hemalekhāṃ rājaputro bhogeṣvanatikāminīm

udāsīnāṃ sadad dṛṣṭvā papraccha rahasi kvacit /
kiṃ priye nānuraktāsi priye mayayanurāgiṇi

kuto bhogeṣu nātyantamāsaktāsi śucismite /
kiṃ bhogāste manoyogyā na santyatra kutastvidam

kutaḥ kasmāddhetoḥ / bhogāḥ bhogasādhanāni / kuta idamaudāsīnyam

atyuttameṣu bhogeṣu nāsakteva vibhāsi me /
tvayayāsaktivihīnāyāṃ kathaṃ me sukhadā ratiḥ

bhogā anuttamā evetyāśayenāha - atyuttameṣviti / atyuttame'labhye'pi bhoge
āsakteva na vibhāsi / kiṃ madāsaktyā taveti cedāha - tvayīti /
parasparāsaktyatiśayenaiva ratiḥ sukhadetyāśayaḥ

āsakte mayi cāpi tvaṃ bhāsyanyagatamānasā /
bhāṣitāpi mayā bhūyo na śṛṇoṣyeva kiñcana

kathamanāsaktirmayi tvayā niścitā tadāha - āsakta iti / mayi [k: api]
āsakte tvadekabhāve satyapi tvamanyagatamānaseva bhāsīti śeṣaḥ /
anyagatamānasatvaṃ vā kathaṃ tvayā'vagatamiti cedāha - bhāṣiteti

p. २८)
āgataṃ kaṇṭhasaṃlagnaṃ cirādapi vibhāvya ca /
kadā nāthāgataṃ ceti pṛcchasyaviditā yathā

cirāt kaṇṭhasaṃlagnamapi kadā āgatamiti pṛcchasi

peśaleṣūpabhogeṣu durlabheṣu kvacinna te /
mana āsajjate kasmānna kiñcidanumodasi

peśaleṣu sundareṣu mano nāsajjata [k: na sajjata] ityapi kathaṃ viditamiti
cedāha - na kiñciditi / yato na kiñcidalabhyamapi bhogyamaho atisundaramiti
nā(a)numodasi

mayā virahitāṃ tvāṃ vai nimīlya nayane sthitām /
yadā yadopagacchāmi paśyāmi ca tadā tadā

vimukhyāṃ tvayi bhogeṣu viṣayeṣu sukhaṃ mama /
kathaṃ bhaveddāruyoṣāsaṅgatasyeva tadvada

na tavābhimataṃ tyaktvā kiñcinmama samīhitam /
sarvathā tvāmanugato jyotsnāṃ kumudavat kila

na ca tvāmananugato'smītyāha - na taveti

tadevaṃ te kutaścittaṃ brūhi prāṇādhikapriye /
yena śuddhyettu maccittaṃ śāpitāsi mayā priye

evaṃ viṣayavimukham

iti śrītripurārahasye jñānakhaṇḍe satsaṅgamāhātmye tṛtīyo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
tṛtīyo'dhyāyaḥ //
p. २९)
atha caturtho'dhyāyaḥ
priyasya kaṇṭhāsaktasya niśamyaivaṃ vaco hi sā /
īṣatsmitānanā prāha rājaputramaninditā

adhyāye mānapamite'sminnākhyānena susphuṭam /
vairasyaṃ bhogajāleṣu vairāgyāya nirūpyate //
aninditeti / na tasyā viditavedyāyā viṣayavaimukhyaṃ mauḍhyādineti bhāvaḥ

bubodhayiṣatī rājaputraṃ yuktyā'bravīdidam /
rājaputra śṛṇu vaco nāhaṃ tvayi virāgiṇī

bubodhayiṣatī enaṃ bodhayiṣyāmītīcchāyutā [k: ṣyatī] yuktyeti /
kevalasvavacasi tasyānāśvāsasambhavāditi bhāvaḥ / idaṃ vakṣyamāṇam

kiṃ syāt priyatamaṃ loke kinnu syādapriyaṃ tviti /
vicāraparamā nityaṃ nāntametyatra me matiḥ

yadi nāsi virāgiṇī tarhi kuta evamiti cedāha - kiṃ syāditi / vicāra eva paramo
mukhyadhyeyo yasyāḥ / antaṃ niścayam

dhyāyāmyetaccirānnityaṃ strīsvabhāvavaśādaham /
naitajjānāmi tattvaṃ me vaktumarhasi tattvataḥ

kimetaddhyānena te phalamiti cedāha - strīsvabhāveti / tattvamiti /
priyāpriyasvarūpasya tattvaṃ yāthārthyam

evaṃ prokto hemacūḍaḥ prahasya prāha tāṃ priyām /
nūnaṃ striyo mūḍhadhiya iti satyaṃ na saṃśayaḥ

priyāpriye hi jānanti paśupakṣisarīsṛpāḥ /
yatasteṣāṃ dṛśyate hi priyeṣvapriyakeṣu ca

kuto mūḍhadhiya iti cedāha - priyeti / yattiryañco'pi jānanti tatra ko.āṃ vicāra
iti bhāvaḥ

p. ३०)
pravṛttiśca nivṛttiśca kimatra bahu cintanam /
sukhaṃ yasmāt tat priyaṃ syāt duḥkhaṃ yasmāttadapriyam

kathaṃ tvayaitat paśvādijñānaṃ vijñātamiti cedāha - pravṛttīti /
priyāpriyayoḥ pravṛttinivṛttibhyāmanumīyata ityarthaḥ / atra tiraścāmapi
prasiddhe'rthaṃ / nanu tarhi priyāpriyayorlakṣaṇaṃ vadeti cedāha - sukhamiti

kimatra mugdhabhāvena nityaṃ cintayasi priye /
śrutvā priyavacaḥ prāha hemalekhā punaḥ priyam

atra prasiddhe'rthe

satyaṃ striyo mugdhabhāvā nāstyāsāṃ sadvimarśanam /
tathāpyahaṃ bodhanīyā tvayā samyagvimarśinā

sadvimarśanaṃ samyagvicāraḥ

subodhitā tvayā cāhaṃ cintāmetāṃ visṛjya tu /
tvayā bhogeṣu satataṃ bhavāmyanudinaṃ tataḥ

bhogeṣvāsaktā bhavāmi / tataḥ bodhanānantaram

rājan sukhañca duḥkhañca yābhyāṃ bhavati te nanu /
priyāpriye vinirdiṣṭe tvayā sūkṣmavimarśinā

tallakṣaṇaṃ dūṣayitumanuvadati - rājannityādi

ekameva sukhaṃ duḥkhaṃ kāladeśākṛterbhidā /
janayedatra tat kasmāt pratiṣṭhā'dhyavasāyinī

bhidā bhedena / ekameva vastu kālādibhedena sukhaṃ duḥkhañca janayet / atra
evambhūte vastuni / pratiṣṭhā sukhasādhanamevetyavyabhicāripratiṣṭhitasvarūpatā /
adhyavasāyinī niścayavatī

yato vahniḥ kālabhedāt pṛthageva phalapradaḥ /
tathā deśavibhedenāpyākārasya vibhedataḥ

tadeva nirūpayati - yata iti / pṛthakphalasya sukhādeḥ prada eva

p. ३१)
śītakāle priyo vahnirūṣme tvapriya eva hi /
himoṣṇadeśabhedena priyaścāpriya eva ca

etadeva vivicyāha - śīteti

śītaprakṛtijīvānāṃ priyoaṇyeṣāṃ tathetaraḥ /
athāpyadhikabhāvenālpabhāvenaivamīritaḥ

prakṛtirūpākārabhede'pi tathetyāha - śīteti /
vahneralpānalparūpākārabhede'pi tathetyāha - atheti / evaṃ sukhāsukhayoḥ
sādhakatvena priyo'priyaśca

evaṃ śītaṃ dhanaṃ dārāḥ putrā rājyaṃ tathetarat /
athāpyevaṃ mahārājo dāraputradhanairvṛtaḥ

uktamarthamanyatrātidiśati - evamiti / itarat paśvādi / evaṃ na kasyacit
sukhamātrasādhanatvamityuktvā sukhasādhanatvaṃ nāstyevetyāha - athāpīti /
sarvasukhasādhane satyapītyarthaḥ / mahārājo muktācūḍaḥ

śocatyanudinaṃ kasmānna śocantītare kutaḥ /
yo'yaṃ bhogaḥ sukhārtho'sti so'pyananto bhavennanu [k, kh: na tu]

dārādyakhilasukhasādhanayukto'pi kasmādanudinaṃ śocati / itare
sukhasādhanarahitā virāgiṇaḥ / nanu matpiturakhilaviṣayāprāptyā śokaḥ /
ato'khilaviṣayāṇāṃ sambhūya sukhasādhanatvamiti cedāha - yo'yamiti

na kenacittadakhilaṃ prāptaṃ yasmāt sukhaṃ bhavet /
yatkiñcillābhato yatsyāt [k: yasmāt] sukhaṃ tatrāpi saṃśṛṇu

tasyānantyena prāptyasambhavānnetyāha - na kenaciditi /
māstvakhilalābhastathāpi kadācit kiñcillābhe kasyacit sukhaṃ bhavatyeveti cedāha
- tatrāpīti / tatsukhaviṣaye'pītyarthaḥ

na tat sukhaṃ bhavennātha yato duḥkhavimiśritam /
duḥkhaṃ tu dividhaṃ proktaṃ bāhyamāntaramityapi

duḥkhavimiśritamiti / prakāśāndhakārayoriva
sukhaduḥkhayorviruddhasvabhāvatvānnaikadā sambhavaḥ / atastatkāle
duḥkhasyānubhūyamānatvānna tvadabhimataṃ sukhamiti bhāvaḥ / nanu na [k:
na nāsti] tatkāle duḥkhānubhavo'stītyāśaṅkya tadduḥkhamupapādayituṃ
vibhajati - duḥkhaṃ tviti

p. ३२)
bāhyaṃ śarīrasambhūtaṃ dhātudoṣādisambhavam /
āntaraṃ mānasaṃ proktaṃ tacca vāñchāsamudbhavam

dhātavo vātapittādayaḥ / ādinā sphoṭābhighātādiḥ

mahattaraṃ mānasaṃ syādyena grastamidaṃ jagat /
vāñchaiva duḥkhaviṭapibījaṃ sudṛḍhaśaktikam

śarīrānmānasaṃ mahattaram / kuto mahattaratvaṃ tadāha - yeneti /
bījasvabhāvādapi tasya mahattaratvamāha - vāñchaiveti / sudṛḍhaśaktikam
avaśyaphalaparyavasāyīti bhāvaḥ / naivaṃ dhātudoṣādiḥ tasya supratīkāryatvāt

yayā kiṅkaratāṃ prāptāḥ kurvantyeva divāniśam /
indrādayo'pi vibudhāḥ svarnivāsāḥ sadoditāḥ

ata evāmṛtāśināmapi sā dṛśyata ityāha - yayeti / vāñchayetyarthaḥ /
svargātmakaguṇottaradeśasevanena sadodayanimittāmṛtapānena vā tāṃ
pratīkartumasamarthā eva devā ityāśayaḥ

sukhaṃ vāñchāvaśeṣe'pi yadasti nṛpasambhava /
tad duḥkhameva jānīhi yat kṛmiṣvapi sambhavet

nanu mandāndhakāre prakāśāndhakārayoraviruddhayoriva vāñchākāle
sukhaduḥkhayoḥ sahabhāva iṣyata iti cedāha - sukhamiti / duḥkhamiśritasya
sukhasya kṛmiṣvapi duḥkhaprakṛtikeṣu sambhavānna tanmukhyaṃ sukham / kintu
mandāndhakārasthaprakāśābhāsavat [k: madā-; g, gh: mahā##-
p. ३३)
varaṃ tiryakkīṭakṛmiprabhṛtīnāṃ sukhaṃ tu yat /
svalpavāñchāsammilitaṃ nṛṇāṃ kiṃ syāt sukhaṃ vada

nanu tatsukhābhāsamapi itarajantubhyo martyasyottamameveti cennetyāha -
varamiti / tiryak paśuḥ / kīṭāḥ sapakṣāḥ / kṛmayo'pakṣāḥ / prabhṛtinā
[k, kh: tatprabhṛtīnāṃ] vayāṃsi [kh: vayāṃsi nāsti] /
tiryagādīnāṃ svalpavāñcāsammilitatvāt
prabhātāndhakāramilitaprakāśābhāsavat sukhābhāsam / nṛṇāṃ tu
anantavāñchāmilitatvād gāḍhāndhakārasthakhadyotaprakāśavat
kāryākṣamatvāt tanna sukhābhāsamapīti bhāvaḥ

vāñchāśatasamāviṣto yadi kiñcidupetya tu /
sukhī bhavediha tadā ko hi na syāt sukhī vada

yadyevaṃvidhasukhenāpi sukhitve na ko'pi duḥkhī bhavedityāha - vāñcheti /
kiñcit srakcandanādi

akhilāṅge vahnidagdhe sūkṣmapāṭīrabindunā /
yadi śītaladehaḥ syāttadā so'pi sukhī bhavet

evaṃ tarhi mahāduḥkhe'pi sukhī syādityāha - akhileti /
pāṭīrabinduścandanabinduḥ

priyāyāḥ sampariṣvaṅgāt sukhaṃ prāpnoti vai naraḥ /
tatraivāṅgasya vis'mabandhād duḥkhaṃ bhavennanu

nanu priyāparisvaṅge hi bāhyasarvavismṛteḥ kevalaṃ sukhamastīti cedāha -
priyāyā iti / tatraiva pariṣvaṅgakāla eva / viṣamaḥ pīḍākaro bandhaḥ
parasparāṅgasaṃśleṣaḥ / tadduḥkhayutatvānna tadapi kevalaṃ sukhamiti bhāvaḥ

ratyāveśāt pariśrāntiḥ sarveṣāṃ jāyate kila /
anantaraṃ bhāravāhapaśoriva pariśramaḥ

pariṣvaṅgādau duḥkhamastītyatra sarveṣāmanubhavaṃ nidarśayati - ratīti /
ratyāveśādanantaram / iyaṃ pariśrāntirduḥkhamūletyatra dṛṣṭāntaḥ -
bhāreti / iyaṃ pariśrāntirduḥkhajanyā pariśrāntitvāt
bhāravāhapaśupariśrāntivat

p. ३४)
kathaṃ paśyasi tat saukhyaṃ nāthaitanme samucyatām /
yāvat sukhaṃ priyāsaṅge nāḍīsaṃghaṭṭasambhavam

evamasya duḥkhayuktatvāttatsaukhyaṃ kathaṃ paśyasi

tavāsti [k: tadāsti] tāvanna kimu śunāmastīha tadvada /
yattato hyatiriktaṃ te dṛṣṭasaundaryasambhavam

nāḍīsaṃghaṭṭaḥ ānandendriyasaṃgharṣaḥ tajjanitaṃ sukhaṃ śunāmapyastīti na
tatsukhaṃ budhairabhilaṣaṇīyamiti bhāvaḥ / tataḥ nāḍīsaṃghaṭṭajāt / atiriktam
adhikam / dṛṣṭasaundaryasambhavaṃ saundaryadarśanajam

tat kevalābhimānotthaṃ svāpnastrīsaṅgame yathā /
purā kaścidrājasuto manmathādhikasundaraḥ

saundaryadarśanādijasukhasyābhimānotthatve ākhyāyikāmāha - pureti

kāñcit surūpiṇīṃ prāptaḥ striyaṃ sarvamanoharām /
atyantamanuraktaḥ sa tasyāṃ rājakumārakaḥ

sā tvanyasmin rājasuta bhṛtye saṃsaktamānasā /
sa bhṛtyo rājaputraṃ taṃ vañcayāmāsa yuktitaḥ

madirāṃ mohanārthāya tasmai datvātimātrakam /
tato madāndhāya ceṭīṃ kāñcit preṣya kurūpiṇīm

yuktimevāha - madirāmiti / atimātraṃ puṣkalam

bubhuje tāṃ tasya patnīṃ sarvalokaikasundarīm /
evameva ciraṃ tatra madāndho nṛpateḥ sutaḥ

svasmai madāndhāya preṣitāṃ ceṭīṃ dāsīṃ rājakumāro bubhuje / tasya
rājakumārasya patnīm / sa bhṛtyo bubhuja iti tātparyam

p. ३५)
pratyahaṃ ceṭikāṃ gacchan svātmānaṃ samamaṃsata /
dhanyo'hamīdṛśīṃ lokasundarīṃ prāṇapreyasīm

rājakumāro dhanyo'hamityādyātmānamabhimanute

upagacchāmyahaṃ nityaṃ na me'sti sadṛśaḥ kvacit /
evaṃ vṛtte cire kāle kadācid daivayogataḥ

bhṛtyo nidhāya pānaṃ sa kārye cātyantike yayau /
atha rājakumārastatpānaṃ nātyantikaṃ papau

sa bhṛtyaḥ / ātyantike āvaśyake kārye sati / ātyantikaṃ puṣkalam

nimittato yayau śīghraṃ ratyutsukitamānasaḥ /
śayanīyaṃ manaḥkāntaṃ sarvabhogarddhisaṃyutam

nimittataḥ kenacinnimittena / na papau

śacīgṛhaṃ devapatiriva nandanasaṃsthitam /
parārddhyaparyaṅkagatāṃ tāṃ ceṭīmupasaṅgataḥ

nandanavana [k, kh, g: vana nāsti] saṃsthitaṃ śacīgṛham /
parārddhyamuttamam / tāṃ bhṛtyapreṣitām

kāmavegena vivaśo bubhuje'tyantaharṣataḥ /
upalabhyātha ratyante ceṭīṃ tāṃ vikṛtākṛtim

kāmavegena tāmaparīkṣyaiva

śaṅkito'marṣitaścāpi kimetaditi cintayan /
kva sā mama priyatametyevaṃ tāmanvapṛcchata

keyamiti śaṅkitaḥ / anayā pratārito'hamiti marṣitaḥ / neyaṃ māṃ pratārayituṃ
sumarthā ataḥ kimetaditi cintayan kva setyādyanvapṛcchat

pṛṣṭaivaṃ tena sā ceṭī vimadaṃ taṃ niśāmya [k, kh:
niśamya] tu /
bhītā na kiñcittaṃ prāha vepamānā tadā tataḥ

taṃ kumāram / tataḥ ceṭīvṛttāt / ālakṣyeti sambandhaḥ

p. ३६)
ālakṣya rājaputro'pi vaiṣamyaṃ cātmavañcanam /
vāmena jagrāha kace ceṭīṃ krodhāruṇekṣaṇaḥ

vaiṣamyamanarhaṃ vacanam

kṛpāṇimādade [kh: kṛpāṇa] dakṣahastena nṛpasambhavaḥ /
tarjayaṃstāṃ pratyuvāca vada vṛttaṃ yathātatham

kṛpāṇiṃ khaḍgam

no cenna syājjīvitaṃ te kṣaṇamātramapi drutam /
saivaṃ niśamya tadvākyaṃ bhītā prāṇaparīpsayā

ato drutaṃ vadeti yojanā

jagau yathāvattat sarvaṃ cirād vṛttaṃ samāsthitam /
prādarśayaccāpi tasmai tāṃ bhṛtyena susaṅgatām

tat priyāvṛttam / vṛttam atītam / samāsthitaṃ tayā samācaritam

kvacidbhūmau kaṭe bhṛtyaṃ kṛṣṇaṃ piṅgalalocanam /
prāṃśuṃ malinasarvāṅgaṃ rūkṣavaktraṃ jugupsitam

prāṃśum uccam

samāśliṣya ratiśrāntāṃ sarvāṅgaiḥ premabhāvataḥ /
mṛdubāhulatāvṛttagrīvasya vadane svakam

sarvāṅgaiḥ samāśliṣya / latayā vṛtā veṣṭitā grīvā yasya

niveśya vaktrakamalaṃ padbhyāmāśliṣya gāḍhataḥ /
tasyoruyugmaṃ taddhastasaṃsaktagurusustanīm

vāsantikāmiva latāṃ vṛtāṃ kusumakorakaiḥ /
rohiṇīṃ rāhuṇopetāmivāpaśyannṛpātmajaḥ

evaṃvidhāṃ samālokya nidrayā'pagatasmṛtim /
momuhyamānaścātyantaṃ kṣaṇaṃ paścād dhṛtiṃ bhajan

kṣaṇamatyantaṃ mohaṃ prāptaḥ

yat prāha rājatanayastanmattaḥ śrūyatāṃ nanu /
dhiṅmāmanāryamatyantaṃ mūḍhaṃ madavimohitam

p. ३७)
dhig ye strīṣvabhisaṃprītā dhik tāṃśca puruṣādhamān /
na kāminyaḥ kasyacit syurvṛkṣasyeva ca śārikāḥ

puruṣādhamān dhik [kh, g: dhig dhik; gh: dhik dhig mām] / śārikā iti /
yatrepsitaṃ phalaṃ tatra gacchantīti bhāvaḥ

kimahaṃ māṃ pravakṣyāmi mugdhaṃ mahiṣapotavat /
jānantamenāṃ prāṇebhyaḥ preṣṭhāṃ sucirakālataḥ

mahiṣapotaḥ sadyojāta [k: jāto] mahiṣaḥ tadvanmugdham atijaḍamiti
tātparyam

na striyaḥ kasyacidvā syurveśyā iva viṭasya hi /
yaḥ strīṣu viśrabdhamanāḥ sa eva vanagardabhaḥ

evameva sarvāḥ striya ityāha - neti / vanagardabha iti / puragardabho hi
janasaṅgāt kiñcidanyabhāvajñaḥ kadācit syāditi tātparyam

yā sthitiḥ śāradābhrasya kṣaṇikā hyanavasthitā /
tato'pi pelavā strīṇāṃ sthitiratyantacañcalā

pelavā laghutarā

nāhamadyāvadhi hyevaṃ strīsvabhāvamaho'vidam /
yanmāṃ sarvātmanāsaktaṃ tyaktvā bhṛtyamanuvratā

anyāsaktā gūḍhabhāvā mayi chadmānurāgiṇī /
pradarśayantī bhaktiṃ svāṃ naṭīva viṭamaṇḍale

chadmānurāge dṛṣṭāntaḥ - naṭīveti

nāvidaṃ leśato'pyenāṃ madirāmattamānasaḥ /
chāyeva māṃ saṅgateti matvā viśrabdhamānasaḥ

aprekṣaṇīyāṃ ceṭīṃ tāṃ vañcitaścirasaṅgataḥ /
nūnaṃ matto mūḍhatamaḥ ko bhavejjagatītale

anayā vañcito'haṃ ceṭīṃ saṅgataḥ

ya evaṃ visrambhapūrvamanayā ciravañcitaḥ /
aho'yaṃ bhṛtyahatakaḥ sarvāṅgavikṛtākṛtiḥ

tatra hetuḥ - ya evamiti / hatakaḥ atininditaḥ

p. ३८)
kimasminnanayā dṛṣṭaṃ saundaryaṃ sarvato'dhikam /
yato māṃ nijasaundaryāhṛtalokāvalokanam

saundaryeṇa āhṛtaṃ lokānāmavalokanaṃ nirīkṣaṇaṃ yena

anuraktaṃ sarvathaiva tyaktvainamupasaṅgatā /
evaṃ pralapya bahudhā nirviṇṇo'titarāṃ tadā

sarvathā'nuraktam / nirviṇṇo viraktaḥ

rājaputro vanaṃ prāgāt sarvasaṅgavivarjitaḥ /
tasmād rājakumāraitatsaundaryaṃ manasotthitam

yasmāttena rājakumāreṇa mohitenātibībhatsarūpāṃ ceṭīṃ ciraṃ saṃgacchatā
[k, kh, g: gacchatā] iyaṃ saiva lokasundarītyabhimānamātreṇa tat
sukhaṃ ciraṃ prāptaṃ tasmādityarthaḥ / manasotthitaṃ manasā parikalpitam

yathā tvaṃ mayi cātyantasaubhagekṣaṇapūrvakam /
ratiṃ vindasyatitarāṃ tathā vā tadviśeṣataḥ

etadeva dṛṣṭāntena draḍhayati - yatheti / tadviśeṣataḥ tato'pyadhikarūpeṇa

vindanti ratimatyantaṃ yoṣitsu vikṛtāsvapi /
atra te pratyayaṃ vakṣye śṛṇu priya samāhitaḥ

atra saundaryasya mānasatve / pratyayaṃ niścayānukūlāṃ prakriyām

vilokyate yā hi yoṣit sā bahiḥ suvyavasthitā /
yā ca tatpratibimbātmarūpiṇī cittasaṃśrayā

bahiḥ cittādanyatra

saṅkalparūpiṇī tasyāḥ sauṣṭhavaṃ manasollikhan /
paunaḥpunyena tadanu vāñchāmupasamāgataḥ

tasyāḥ sauṣṭhavaṃ saundaryaṃ paunaḥpunyenollikhan / tadanu
samyagullekhānantaram / tadviṣayavāñchām

p. ३९)
kṣubdhendriyo narastasyāṃ ratimāpnoti sarvataḥ /
akṣubdhe tvindriye na syāt sundaryāmapi vai ratiḥ

kṣubdham upasthendriyaṃ yasya / sarvato'nyavāñchābhyo nivṛtta iti śeṣaḥ /
puruṣasya vāñchāsahasrasamākrāntasya strīsaundaryādyullekhanena dṛḍhataraḥ
strīrativāñchodayo yadā tadā anyavāñchā nyagbhavantīti [k, kh:
bhavatī] bhāvaḥ / evaṃ kṣobhābhāve na kvacidratirityāha - akṣubdheti

tatra mūlaṃ samullekhaḥ sauṣṭhavasya punaḥ punaḥ /
ataḥ kṣobho naiva dṛṣṭo bālānāṃ yogināmapi

tatra kṣobhe / etadvyatirekamukhena draḍhayati - ata iti

tathā ca yo yo yasyāṃ tu ratiṃ vindati mānavaḥ /
sundaryāṃ vāpi cānyasyāṃ tatra sauṣṭhavamullikhet

saundaryollekha eva kṣobhaheturna saundaryaminyāha - tathā ceti / sauṣṭavaṃ
sthitamasthitaṃ vā

dṛśyante yoṣito'tyantabībhatsākāravigrahāḥ /
taruṇaiḥ saṅgatāstāśca dṛśyante'patyahetutaḥ

atra nidarśanamāha - dṛśyanta iti / bībhatsākāro vigraho'vayavasaṃsthānaṃ
yāsāṃ tāḥ / evaṃvidhā jagati yā dṛśyante tāstaruṇaiḥ saṃgatāśca
dṛśyante / nanu saṃgateḥ rahasi sambhavāt kathamanyaiḥ saṃgatā dṛśyanta iti
cedāha - apatyahetuta iti

virūpatollekhanaṃ vāpyanullekhastu sauṣṭhave /
yadi syāttat kathaṃ nṝṇāṃ ratistāsu hi sambhavet

nanu tatra sauṣṭhavollekhanaṃ vināpi saṅgatiḥ syāditi cedāha - virūpeti /
sauṣṭhave'nullekhaḥ sauṣṭhavaviṣayakānullekhaḥ / tāsu virūpāsu

kiṃ vaktavyamaho nṝṇāṃ kāmināṃ kṣiptacetasām /
jaghanyāṅge'pi saundaryaṃ bhāsate sarvato'dhikam

nanu virūpāyāṃ kathaṃ saundaryollekhanamityāśaṅkya naitat kāmināṃ
citramityāha - kimiti / kṣiptaṃ vikṣiptaṃ ceto yeṣām / jaghanye
nikṛṣṭe'pānodgāradhūpite mūtrādiklinne klinnanāḍīvraṇasuṣiratulye
yonyādyaṅge'pi / sarvato mukhādibhyo'dhikam

p. ४०)
malamūtrapariklinnaṃ yadaṅgaṃ tatra saubhagam /
paśyeccet kutra no paśyet saundaryaṃ tanmameraya

tasmāt saundaryametadvai rājaputra niśāmaya /
abhimānamṛte naiṣa sukhaheturbhavet kvacit

tasmāt saundaryasya manaḥkalpitamātratvāt

kṣaudramādhuryavad dehe saundaryaṃ sahajaṃ yadi /
tadbālānāṃ kumārāṇāṃ kuto no bhāti tadvada

na kṣaudramādhuryavat saundaryaṃ svābhāvikamiti prakārāntareṇa saundaryasya
mānasatvaṃ sādhayati - kṣaudreti

deśabhedeṣu dṛśyante vividhākṛtayo narāḥ /
ekapādaikanayanā lambakarṇā hayānanāḥ

nāsti virūpāsu kāmināṃ ratiḥ / kvacid dṛśyamānāpi na
pūrṇasukhāvahetyāśaṅkya deśāntarasthityākhyānena pariharati - deśeti

karṇaprāvaraṇāḥ phālavaktrā nirgatadaṃṣṭrakāḥ /
vinasā dīrghanāsāśca lomacchannā vilomakāḥ

piṅgakeśāḥ śvetakeśā vikeśāḥ sthūlakeśakāḥ /
śvitravarṇāḥ kākavarṇāḥ piṅgalā lohitāṅgakāḥ

evaṃ bahuvidhā martyāḥ sajātivanitāsu te /
ratiṃ vindanti tvamiva rājaputra niśāmaya

niśāmaya paśya

sukhasādhanabhūteṣu mukhyaṃ yat strīvapuḥ sthitam /
sarvapriyaṃ yatra sarve muhyanti vibudhā api

śarīraprakṛtiṃ varṇayitumāha - sukheti

p. ४१)
puṃsāṃ vapustathā strīṇāṃ priyamatyantasundaram /
vimarśaya subuddhyā tvaṃ rājaputra yathāsthitam

māṃsaliptamasṛkklinnaṃ śirābaddhaṃ tvagātatam /
asthipañjarakaṃ lomacchannaṃ pittakaphāhitam

pittakaphābhyām āhitaṃ yuktam

malamūtrakusūlaṃ tacchukraśoṇitasambhavam /
mūtradvārasamudbhūtamaho priyamiheṣyate

ya evamatibībhatse vitanvanti ratiṃ narāḥ /
viṭkṛmibhyaḥ kutasteṣāṃ bhavedantaramīraya

rājaputra tanuriyaṃ priyā hi nitarāṃ tava /
vibhāvaya vivekena dhātūnāṃ ca pṛthaksthitim

dhātūnāṃ tvagasṛgādīnāṃ pṛthaksthitim / vivekena vicāradṛṣṭyā [k:
dṛśā] / vibhāvaya / evaṃ vibhāvane kva saundaryādikamiti bhāvaḥ

evamanyatropayojye madhurāmlādiṣaḍrase /
pariṇāmasvabhāvaṃ tu sūkṣmadṛṣṭyā vibhāvaya

evaṃ śarīre priyatvaṃ sukhasādhanatvarūpamapāsya bhojye nirākaroti -
evamiti / śarīrādanyatra / upayojye bhojye

bhakṣitasyāpi sarvasya viḍbhāvaḥ pariṇāmake /
sarvathā nātra sandehaḥ sarvaireva vibhāvitaḥ

pariṇāmasvabhāvamevāha - bhakṣiteti

vadaivaṃ saṃsthite loke kiṃ priyaṃ syāt kimapriyam /
ityukto hemacūḍo'tha vairasyaṃ viṣaye vidan

śrutvā'pūrvaṃ vākyajālaṃ vismito'bhavadañjasā /
vicārya bhūyastatsarvaṃ yaduktaṃ hemalekhayā

apūrvaṃ kadāpyaśrutam

p. ४२)
bhogeṣu jātanirvedaḥ paraṃ vairāgyamāptavān /
atha krameṇa pṛṣṭvā tāṃ priyāṃ jñātvā ca tatpadam

jāto nirvedaḥ alaṃbuddhiryasya / paraṃ tīvram / tatpadam ātmapadam

kevalāṃ citimātmasthāṃ tripurāmātmarūpiṇīm /
budhvā'bhavad vimuktātmā svātmabhūtākhilekṣaṇaḥ

ātmasthāṃ sarvāntarām / ātmarūpiṇīm pratyagrūpām /
svātmabhūtamakhilekṣaṇaṃ yasya

jīvanmuktaḥ samabhavat tatastasyānujo'pi hi /
maṇicūḍo'vidad bhrāturmuktācūḍo'pi putrataḥ

muktācūḍapriyā cāpi snuṣayā jñānamāsadat /
mantriṇaścāpi paurāśca babhūvurjñānaśālinaḥ

muktācūḍapriyā hemacūḍamātā / snuṣayā hemalekhayā / upadiṣṭamiti śeṣaḥ /
parasparopadeśena jñānaśālinaḥ

na tatra nagare kaścidavidvān samajāyata /
āsīd brahmapuraprakhyaṃ śāntasaṃsṛtivāsanam

brahmapuraprakhyaṃ satyalokatulyam / saṃsṛtervāsanā kāmakrodhādi

viśālanagaraṃ tacca jagatyatyuttamaṃ babhau /
yatra kīrāḥ śārikāśca pañjarasthāḥ paṭhanti vai

atyuttamatve hetuḥ - yatreti

citirūpaṃ svamātmānaṃ bhajadhvaṃ cetyavarjitam /
nāsti cetyaṃ citeranyad darpaṇapratibimbavat

yat paṭhanti tadāha - citirūpamiti / he janāḥ ! viṣayabhajanaṃ tyaktvā
svamātmānaṃ bhajadhvam / viṣayabhajanasya duḥkhamūlatvāditi tātparyam /
kathaṃvidhamātmānaṃ tadāha - citirūpam / citiḥ prajñānaṃ tadeva rūpaṃ
yasya / nātra bhajanaṃ bāhyapūjanādikam kintu tasya pūjanamahantayā sthiti
[matiḥ iti mudritacidvilāsastavapāṭhaḥ
yoginīhṛdayadīpikāyāmuddhṛte'smin śloke'pi matiḥ ityeva pāṭhaḥ /
draṣṭavyam - pṛ० २५०] (ci० sta० ५) iti nītyā so'hamasmīti
niṣprakampa [k, kh: kampatvani] niścayavattvameva / taccāsmākaṃ
dehādisaṃghātāntarbhāve [k, kh: rbhāvo] nāstyeveti cedāha -
cetyavarjitamiti / cetyairdehādyaiścitprakāśyairvarjitam / kuta evamiti cedāha -
nāstīti / cetyaṃ dehādyaṃ śaśaśṛṅgādivannāstyeveti bhāvaḥ /
śaśaśṛṅgādivannāsti cet kathaṃ prakāśata iti cet ? citireva prakāśate
nānyadityāha - citeranyaditi / citireva cet kathaṃ dehādyātmanā bhānamiti
cedāha - darpaṇapratibimbavat /
p. ४३)
atredamāgamatattvam - citirevātmatattvam idampratyayāviṣayatvāt /
anyadanātmarūpam idaṃpratyayaviṣayatvāt / tadātmatattvaṃ [k, kh:
yattadā] smṛtyanusandhānānurodhenaikamanekāvasthāsvanugatam / tasya
citimātrarūpatvena bhedakadharmāprasiddhyā [k, gh: prasiddhāsurā]
surāsuranṛdehādiṣvapyekatvameva / kāladeśādīnāṃ tadantaḥ sarvātmanā
nimagnānāmanyathā naraśṛṅgakalpānāṃ na tadbhedakatvaśaṅkāpi yuktā /
evaṃvidhamanavacchinnacidekarasamātmatattvameva śāstraprasiddhaḥ
paramaśivaḥ / tatsvātantryaśaktyā māyābhidhayā'ghaṭitaghaṭanācaturayā
svasvarūpagopanaparayā avidyātmakamalāvabhāsanapūrvakamidaṃ
dvaitāvabhāsanam / tacca bhāsamānaṃ dvaitaṃ dṛśyaṃ na bījādaṅkuravat
kāraṇācchivādārabdham / nāpi mṛtpiṇḍapariṇāmaghaṭavat
kāraṇapariṇāmātmakam avikṛtakāraṇasvarūpānugamāt / nāpi rajjau sarpa iva
vivartitam citicetyayordvitvagrahāt / ato darpaṇasya nairmalyaśaktyā avikṛte
svasmin pratibimāvabhāsanavacciti svaśaktyā cetyāvabhāsanam / na ca bimbasya
svasamānākārasya darpaṇapratibimbe'pekṣaṇādatrāpi citi
pratibimbadṛśyāpekṣitasva[kh, g, gh:
samākāra]samānākārabāhyadṛśyasiddhiriti śaṅkyam yato
darpaṇapratibimbe bāhyaṃ bimbaṃ nopādānam kārye'nanugamāt kintu nimittam /
nimittañca ghaṭādau daṇḍādiḥ / tacca vyabhicaritam karaparāvartitacakrādinā
ghaṭotpatteḥ / tathā ca citi dṛśyapratibimbane māyākhyā
svātantryaśaktirnimittatvenābhyupagataiveti nānupapattiḥ / nahi pratibimbavidhāṃ
vinā'nyathā dṛśyāvabhāsanaṃ yujyate dṛśyasya cidbāhyatve
prakāśānupapatteḥ citsambandhānupapatteḥ [k, kh:
citsaṃbandhānupapatteḥ nāsti] sambandhasyāpi dṛśyatvenānavasthādinā
tadasiddheḥ [gh: siddhiḥ] / citsambandhānapekṣaṇe sadā
dṛśyasyāvabhāso'navabhāso vā syāt / itthameva
prakaṭatādyakhilapakṣapratikṣepaḥ [jñātatāparaparyāyāḥ prakaṭatāyāḥ
svarūpaṃ kumārilabhaṭṭapratipāditaṃ taddarśanapratipādakagrantheṣu
draṣṭavyam /] etadvistāraḥ pratyabhijñādau [ādinā
abhinavaguptaviracitatantrālokādīnāṃ grahaṇaṃ kartavyam] draṣṭavyaḥ /
tasmāt [gh: tasmāttat] pratibimbavidhayaiva dṛśyāvabhāsanamiti

p. ४४)
citiścetyaṃ citirahaṃ citiḥ sarvaṃ carācaram /
yataḥ sarvaṃ citimanu bhāti sā tu svatantrataḥ

bahuvidho'pi pratibimbo darpaṇa evetyata āha - citiriti / cetyaṃ dṛśyam /
carācaraṃ matto'nye [kh: ato] pramātāraḥ / sarvaṃ citirityatra hetuḥ -
yata iti / yathā darpaṇamanugataṃ gṛhītvaiva sarve pratibimbāḥ prakāśanta iti
pratibimbā darpaṇātmakāḥ evaṃ sarvamidaṃ cetyādi citimanugatāṃ gṛhītvaiva
bhātīti cettasyāścidātmatvādeva nānyā'nugatyapekṣetyāha - sā tviti / yataḥ
svatantraprakāśattvameva cittvamiti bhāvaḥ

p. ४५)
ataścitiṃ janāḥ sarve bhāsinīṃ sarvasaṃśrayām /
bhajadhvaṃ bhrāntimutsṛjya citimātrasudṛṣṭayaḥ

yataḥ pratibimbātma jagacciternānyadasti ato darpaṇācciteradhikaṃ sāmarthyamāha
- sarvabhāsinīmiti / darpaṇaḥ kevalaṃ pratibimbāśraya eva na bhāsaka iti
bhāvaḥ / bhrānterutsarjanamaprāmāṇyagrahaḥ / ata eva citimātrasudṛṣṭaya iti /
sudṛṣṭiḥ satyadṛṣṭiḥ / sarvaṃ jñānaṃ dharmiṇyabhrāntamiti nyāyāt

kadācidevaṃ kīrāṇāṃ śrutvā vākyaṃ mahodayam /
brāhmaṇā vāmadevādyā nāmācakhyuḥ purasya tu

mahato mokṣasyodayo yasmāt

yato'tra vidyāṃ tiryañco'pyāhustasmādidaṃ puram /
prasiddhavidyānagaramiti nāmnā prasiddhyatu

tadadyāpi ca tenaiva nāmnā tannagaraṃ sthitam /
rāma tasmāttu satsaṅgo mūlaṃ sarvaśubhodaye

tat tasmānnāmakaraṇāddhetoḥ

saṅgena hemalekhāyāḥ sarve vidyāvido'bhavan /
tasmāt saṅgaḥ paraṃ mūlaṃ rāma jānīhi śreyasaḥ

upasaṃharati - tasmāditi

iti śrītripurārahasye jñānakhaṇḍe hemacūḍopākhyāne satsaṅgaphalaṃ
caturtho'dhyāyaḥ //
iti tripurārahasye jñānakhaṇḍavyākhyāyāṃ tātparyadīpikāyāṃ caturtho'dhyāyaḥ
//
atha pañcamo'dhyāyaḥ
evaṃ satsaṅgamāhātmyaṃ śrutvā'trisutabhāṣitam /
prahṛṣṭamānaso bhūyaḥ praṣṭumevopacakrame

atra rāvāyapadyaistu hemalekhā'tmasaṃsthitam /
bandhaṃ mokṣaṃ cāha gūḍhavākyaiḥ priyahitepsayā //
rāmaḥ śrutvā

satyaṃ proktamidaṃ nātha bhavatā śubhakāraṇam /
satsaṅgarūpametacca pratyakṣeṇaiva bhāvitam

bhāvitamanubhūtaṃ saṃvartasaṅgāt

yo yathā saṅgamāpnoti phalaṃ tasya tathā bhavet /
striyo'pi hemalekhāyāḥ saṅgāt sarve mahāphalāḥ

sarve viśālanagaravāsinaḥ

bhūya icchamyahaṃ śrotuṃ hemacūḍastayā katham /
bodhitastanmamācakṣva vistareṇa dayānidhe

evaṃ rāmeṇānuyukto dattātreya uvāca tam /
śṛṇu bhārgava vakṣyāmi kathāṃ paramapāvanīm

anuyuktaḥ pṛṣṭaḥ / saṃsṛtidoṣaśāmakatvāt paramapāvanīm

evaṃ tasyā vacaḥ śrutvā viṣayān virasān vidan /
teṣu sañjātanirvedo vimanā iva saṃbabhau

evaṃ viṣayavairasyapratipādakam / saṃjāto nirvedo viṣayabhoge'laṃbuddhiryasya /
evaṃ san / vimanā iva khinna iva

cirasthitaviṣayajavāsanānāṃ vaśaṃ gataḥ /
tyaktuṃ vā saṃgrahītuṃvā nāśakat sahasā hi saḥ

vaimanasye hetumāha - cireti / viṣayān tyaktuṃ saṃgrahītuṃ bhoktuṃ vā

p. ४७)
priyāṃ na kiñcit provāca rājaputro'tilajjitaḥ /
kāṃścicca divasānevamanayaccintayākulaḥ

priyāvacanaṃ śrutvā na kiñcit provāca / atilajjitaḥ striyā niruttarīkṛtatvāt / evaṃ
tyāgabhogayoraśaktaḥ san

viṣayeṣu prasakteṣu smṛtvā tat priyayoditam /
vigarhanneva svātmānaṃ bubhuje vāsanāvaśaḥ

kathamubhayatrāśaktiḥ ekatarapakṣasyāvaśyakatvāditi cedāha - viṣayeṣviti /
prasakteṣu upasthiteṣu / yat priyayoktaṃ vairasyakāraṇaṃ tat smṛtvā /
dhiḍyāmīdṛśaṃ viṣayaṃ svīkaromīti svātmānaṃ vigarhanneva bubhuje / nanu
kuto na pariharati ? tadāha - vāsanāvaśa iti

vāsanāvegavaśato viṣayānanugacchati /
dṛṣṭvaiva viṣayān doṣān priyāproktān vicintayan

upasthitaviṣayabhogaprakāramuktvā'nupasthitaviṣayeṣvāha - vāsaneti /
anugacchati viṣayasamīpaṃ prāpnoti / priyāproktān viṣayadoṣān

śokasaṃvignahṛdayo viṣīdati muhurmuhuḥ /
evaṃ tasyābhavaccittaṃ caladdolāsthitaṃ yathā

śokena saṃvignaṃ prakṣubhitaṃ hṛdayaṃ mano yasya / viṣīdati duḥkhaṃ
prāpnoti / caladdolāsthitaṃ vāsanayā viṣayeṣu patati viṣayaprāptau
taddoṣasmṛtyā tata uccalati

bhojyaṃ vastraṃ bhūṣaṇaṃ vā yoṣid vāhanameva vā /
mitrāṇi vāpi suhṛdo neṣattaṃ [k, kh: naitattaṃ; g: naiva taṃ]
sukhayanti vai

evaṃ vāsanādoṣadṛṣṭibhyāṃ yutaṃ hemacūḍaṃ bhojyādīni neṣadapi
[naiṣat iti sārvatrikaḥ pāṭhaḥ] sukhayantītyāha - bhojyamiti

naṣṭākhilārtha iva sa śocatyeva nirantaram /
vāsanāvivaśaḥ sarvaṃ tyaktuṃ nāśakadañjasā

nopabhoktuṃ tathā śakto doṣadṛṣṭiyutastataḥ /
evaṃ taṃ śokavaśato vivarṇavadanekṣaṇam

vāsanayā doṣadṛṣṭyā ca yukta iti tyaktuṃ bhoktuṃ vā na śaktaḥ
parasparapratibandhāditi bhāvaḥ

p. ४८)
hemalekhā samālakṣya kadācit saṅgatā rahaḥ /
kiṃ nātha pūrvavattvaṃ no lakṣyase'tyantaharṣitaḥ

rahaḥ vivikte / taṃ parīkṣituṃ pṛcchati - kiṃ nātheti

śocantamiva paśyāmi kuta evaṃ tava sthitiḥ /
kaccicchārīra ātmā [k, kh: ccharīramātmā] te
nāmayairbādhyate sadā

śārīreti / śarīratādātmyāpanna ātmā / kevalayoḥ śarīrātmanorduḥkhābhāvāditi
bhāvaḥ

bhogeṣu rogabhīti vai pravadanti manīṣiṇaḥ /
tridoṣasambhave dehe doṣavaiṣamyasambhavāḥ

mama mahārājakumārasya bhiṣakśreṣṭhaiḥ sevitasya kuta āmayasambhāvaneti
cedāha - bhogeṣviti / śubhabhogeṣvityarthaḥ / trayāṇāṃ
vātapittakaphadoṣāṇāṃ samyag bhavaḥ sthitiryatra

āmayāḥ prāyaśaḥ sarvadehān vyāpyaiva saṃsthitāḥ /
sarvathā hyapratīkāryaṃ vaiṣamyaṃ doṣajaṃ nanu

viṣamāśanādibhirdoṣavaiṣamyasyoktabhogavatāmāvaśyakatvena
taddeheṣvavaśyaṃ rogavyāptiriti bhāvaḥ / nanu mādṛśāṃ kathaṃ
doṣavaiṣamyaṃ tatpratīkāraparāṇāmiti cedāha - sarvatheti / doṣavaiṣamyajanito
rogaḥ pratīkāryaḥ na tu kevalaṃ doṣavaiṣamyam
rogaprāgavasthāsthakevaladoṣavaiṣamyasya prāyo durlakṣyatvāditi bhāvaḥ

aśanād vasanād vāco darśanāt sparśanādapi /
kālād deśāt karmataśca doṣā vaiṣamyamāpnuyuḥ

doṣeṣu jāyamānavaiṣamyanimittānyāha - aśanādityādi / aśanasya
śītoṣṇādiguṇaḥ prasiddhaḥ / evaṃ paṭṭorṇādivasanasya / vāco bahulasya
prayuktasyoṣṇaguṇaḥ [k, kh: prayuktasya yo guṇaḥ] /
vahnijalādidarśanasparśanayoḥ grīṣmahemantādikālasya jāṅgalā
nūpādideśasya [k, kh: lārūpā] ca śītoṣṇādi prasiddham / karmato'pi
[kh, g, gh: karmaṇo] khananāditaśca yadvā pāpakarmato
[kh, g, gh: karmaṇo] dos'vaiṣamyam

p. ४९)
atastasyodbhavo loke sarvathā'lakṣyatāṃ gataḥ /
ityataḥ sati vaiṣamye cikitsā samprakīrtitā

ato doṣavaiṣamyahetoranekatvāt / tasya vaiṣamyasya / nanu
sūkṣmadṛgbhirvaiṣamyodbhavo jñātuṃiti cennetyāha - ityata iti / yato
vaiṣamyodbhava ādāvalakṣyaḥ ato hetoḥ cikitsā śāstre saṃprakīrtitā

noktā cikitsā'nutpattau vaiṣamye kenacit kvacit /
tadvada priya kasmāddhi śokasya tava sambhavaḥ

vaiṣamyaviṣayānutpattau cikitsā noktā

iti śrutvā hemalekhāṃ prāha rājasutastataḥ /
priye śṛṇu pravakṣyāmi yanme śokasya kāraṇam

tataḥ praśnānantaram

tvaduktyā yat purā me'bhūt sukhadaṃ taddhataṃ nanu /
na paśyāmyadhunā kiñcidapi me sukhavarddhanam

tat samprati tvaduktyā hatam / kuta iti cedāha - neti

rājñā vitīrṇo viṣayaḥ sukhado'pi samantataḥ /
vadhyaṃ na sukhayed yadvattathā tasmānna me sukham

naṣṭaṃ cedanyat sukhasādhanaṃ sampādayeti cedāha - rājñeti / na tat
svarūpato naṣṭam / api tu vadhyāya rājñā dattaviṣayādyathā tasya sukhaṃ na evaṃ
sādhanaṃ sadapi na tasmānme sukham

viṣayān sevamāno'haṃ sadā viṣṭigṛhītavat /
tat pṛcchāmi priye brūhi kiṃ kṛtvā sukhamemyaham

nanu viṣayairna te sukhaṃ cettān parityajeti cenmayā na parityaktuṃ śakyata ityāha
- viṣayāniti / viṣṭigṛhītavat / rājakāryārthaṃ rājabhaṭairgṛhītā
janāstatkāryaṃ tyaktumasamarthāḥ kurvanti yathā evaṃ vāsanābhirgṛhīto'haṃ
sadā viṣayān sevamāno duḥkhaṃ prāpta [prāptavānityarthe kartari ktaḥ]
iti śeṣaḥ

p. ५०)
evaṃ tena samāpṛṣṭā hemalekhā tadā'bravīt /
nūnameṣa sunirvedamāgato madvacaḥśruteḥ

svamanasyabravīt / śruteḥ śravaṇāt

asti bījaṃ śreyaso'smin yata evaṃvidho bhavān /
yeṣu śreyo hyasambhāvyaṃ ta evaṃ vākyagumphanaiḥ

evaṃvidhaḥ prāptaviṣayavairasyaḥ / evaṃ maduktasadṛśairvācāṃ
gumphanairnibiḍasamudāyaiḥ

nahyaṇvapi viśeṣeṇa viśiṣyante kadācana /
ciraṃ saṃrādhitā hṛtsthā prasannā svātmadevatā

aṇvapi svalpamapi pūrvasthitiṃ leśato'pi na parityajantīti bhāvaḥ / evaṃ
vacaḥśrutireva vairasye kāraṇaṃ cet kuto na sarveṣāṃ vairasyotpattiriti
cenmūlakāraṇābhāvādityāha - ciramiti

tripurā yena tasyaiva [k, kh: teṣveva] bhavedevaṃvidhā sthitiḥ /
ityālocyātividuṣī bubodhayiṣatī priyam

evaṃvidhā viṣayavairasyavatī / devatārādhanarūpamūlakāraṇābhāvānna
sarveṣāmiyaṃ sthitiriti bhāvaḥ

gopayantī svavaiduṣyaṃ prāhānyavyapadeśataḥ /
śṛṇu rājakumāredaṃ yanme vṛttaṃ purātanam

gopayantīti / svavaiduṣyaprakaṭane vidvattābhimānaśaṅkā'pyasya bhavettato
madvākye nāśvāso bhavediti / ataḥ svavaiduṣyagopanamiti bhāvaḥ /
atrānyavyapadeśena svasyāḥ saṃsārabandhanānmuktiprakāramāha -
śṛṇviti / purātanaṃ bandhasyānādikālatvāt [anādiḥ kālo yasyeti
bahubrīhigarbhitaṃ vākyam / bandhasyānādikālikatvādityarthaḥ]

p. ५१)
purā me jananī kāñcit krīḍanāya sakhīṃ dadau /
sā svabhāvasatī kāñcidasatīmanusaṅgatā

pureti / kasyāścit sṛṣṭerādikāle bandhasyānāditvena sarvādikālāsambhavāt /
jananī svaprakāśaśuddhacitiḥ / sakhīṃ buddhim / kāñciditi / ajñātakulagotreva
nirūpaṇālliṅgadehāvayavatvenānāditvaṃ buddherdyotitam /
śuddhaciterjananītvaṃ svasyā jīvacitestadaṃśabhūtatvāt /
sukhaduḥkhādyanubhavakrīḍāyā buddhyadhīnatvāt krīḍanāya sakhīṃ
dadāvityuktam / pralaye buddherlīnatvāt sṛṣṭyādau
karmaparipākanimittakabuddhyāvirbhāvādapūrvavat [g, gh: pūrveva]
prāptatvāduktaṃ dadāviti / sā buddhiḥ / sattvaguṇapradhānatvāt prakāśarūpatvāt
svabhāvena satī / svasattāyāṃ vṛttyantarānapekṣaṇāt svataḥ satī / bāhyapakṣe
svabhāvataḥ satī sādhvītyarthaḥ / asatīmavidyām / anusaṅgatā / ātmākāratāṃ
kevalāṃ parityajyāvidyākāryadṛśyātmatāṃ prāptetyarthaḥ / kāñciditi tasyā
anirvacanīyatādyotakaṃ viśeṣaṇam / āgamapakṣe tu citeḥ
paricchinnatvajñānamevājñānam / etacca ajñānaṃ [g, gh:
jñānaṃ] bandhaḥ (१/२) iti śivasūtre vṛttikṛtā spaṣṭaṃ
nirūpitam / etatpakṣe'nirvacanīyatvābhāvena
kāñcidityajñānasyāparicchedyaśaktitvaṃ jñeyam / taduktam -
bhrāntermahatī [rajjvāṃ nāsti bhujaṅgastrāsaṃ kurute ca mṛtyuparyantam /
ityayaṃ ślokasya pūrvārddhaḥ] śaktirna vivektuṃ śakyate nāma (pa०
sā० २८) iti / pakṣadvaye'pyasatītyasatyātmakatvājjñeyam

sā vicitravidhāścaryasṛṣṭisāmarthyasaṃyutā /
alakṣitā me jananyā sakhyā me saṅgatā'bhavat

sā avidyā / me jananyā śuddhacitā alakṣitā satī me sakhyā buddhyā / manmātuḥ
parokṣe eva sā asatī matsakhyā saṅgatā'bhavadityarthaḥ /
vidyāvidyayorvirodhādavidyā kāryaviṣayā buddhiḥ kevalaśuddhacidviṣayiṇīti
tātparyam / āgamapakṣe tu śuddhacinmātrasphūrtidaśā śaktitattvam /
cidacidoridaṃ sarvamahamiti sāmānādhikaraṇyasphūrtidaśā śuddhavidyātattvam /
paricchinnacinmātrasphūrtidaśā avidyātattvam / paricchinnacitaścetyasya ca
sphūrtidaśā buddhitattvamiti prakriyā / tathā ca buddheḥ
śuddhacidaviṣayakatvādalakṣiteti jñeyam

p. ५२)
asaccāritrayā'tyantaṃ saṅgatā mama sā sakhī /
prāṇebhyo'pi priyatamā sadā tadvaśagā hyaham

buddhirdṛśyaparā sadā'bhavadityāha - asaditi / asad mithyārūpaṃ cāritraṃ
[k: caritraṃ] yasyāḥ sā avidyā / mama prāṇebhyo'pi priyatamā /
atastadvaśagā'hamabhavam parasparatādātmyādhyāsāt

na tāṃ vihāya me saṃsthā kṣaṇārddhaṃ vā kvacidbhavet /
sā nirmalasvabhāvena māṃ vaśīkṛtya saṃsthitā

na tāmiti / tāṃ buddhim / saṃsthā sthitiḥ / buddhyasattve buddhyavacchinno
[buddhyavacchinno jīvaḥ iti vācaspatimiśrasya bhāmatīprasthānamāśritya
buddhipratibimbo jīvaḥ iti ca svayaṃprakāśayatino vivaraṇaprasthānamāśrityoktam
/ asya vistaraḥ siddhāntaleśasaṃgrahe'ppayadīkṣitaviracite draṣṭavyaḥ /] jīvo
buddhipratibimbo jīva ityubhayapakṣe'pi jīvasya sthitirna bhavediti spaṣṭameva /
āgamapakṣe tu vyādhakulasaṃvarddhitarājakumāravat
svasvātantryasamācchāditamāhaiśvaryo maheśvara eva jīvaḥ / tasya buddhiṃ vinā
saṃsthā samyaksthitiḥ bhedavyavahāro na bhavediti tātparyam / sā buddhiḥ /
nirmalasvabhāvena sattvapradhānarūpeṇa yutā / māṃ jīvākhyāṃ paricchinnāṃ
pratibimbabhūtāṃ vā tādātmyāpannāṃ vā / bāhyapakṣe tu māṃ
śuddhakulaprasūtim / sā nirmalasvabhāvena tulyaśīlatvādvaśīkṛtya saṃsthiteti
yuktameveti bhāvaḥ

nirantaraṃ tadgatātmasvabhāvā'bhavamañjasā /
sā tayā duṣṭayā yuktā naṭyā citrasvabhāvayā

tadgatātmasvabhāvā buddhisammilitasvarūpā / bāhyapakṣe tu tadgatacittetyarthaḥ /
sā matsakhī buddhiḥ / tayā avidyayā / duṣṭayeti / svanāśahetutvāt / citram
āścaryamayamaghaṭamānaṃ [k, kh: maghaṭitajñānaṃ] svabhāvaḥ
svarūpaṃ yasyāḥ / svalīlāpradarśanenārthaharatvānnaṭyeti

p. ५३)
parokṣavṛttimānītā svaputreṇābhiyojitā /
tasyāḥ putro'timūḍhātmā madirāghūrṇitekṣaṇaḥ

parokṣavṛttiṃ svargādiparokṣakāmyaikarūpatām / ānītā prāpitā / tayā asatyā /
matsakhī buddhiḥ / avidyayā svargādikāmyatatparā buddhirāsīditi bhāvaḥ /
bāhyapakṣe asatyā parokṣavṛttiṃ rahasi sthitim ānītā svaputreṇābhiyojitā
matsakhī jāteti / svasyā avidyāyāḥ putro mohaḥ tenābhiyojitā / avidyayā
kāmyatatparatāyāṃ sadvicārapratibandhakamohātmakavṛttiviśeṣaṃ prāptā
buddhiriti bhāvaḥ / tasyā avidyāyā mauḍhye [kh: maurkhyaṃ] hetuḥ
madiretyādi // etadviśeṣaṇaṃ mohitā me buddhiḥ pāpācārā'bhavaditi dyotanāya

bubhuje tāṃ samākramya sarvadā matsamakṣataḥ /
sā tenākrāntasarvāṅgī bhujyamānānuvāsaram

tāṃ matsakhīṃ buddhim / pāpācaraṇena mohapracurā buddhirjātetyāha -
samākramyeti / matsamakṣata iti / buddheścitprakāśādhīnaprakāśatvāditi
tātparyam / sā buddhiḥ / tena mohena

na māṃ jahau kadācicca tatspṛṣṭā tena cāpyaham /
tataḥ putraḥ samutpanno mūḍhasya sadṛśākṛtiḥ

sā sakhī māṃ kadācidapi priyasaṅgamakāle'pi na jahau / citprakāśāśrayeṇaiva
buddhivṛttīnāmavabhāsanāditi tātparyam / yasmānmāṃ na jahau tat
tasmāddhetoḥ / tena sakhīpriyeṇa mūḍhātmanā / spṛṣṭā jātā /
ghaṭāvacchinnākāśasyāyaḥpiṇḍatādātmyāpannavahnervā vartulādyākāra iva
buddhyā paricchinnāyā vā tādātmyāpannāyā vā citermohādirūpeteti bhāvaḥ /
tataḥ cirasaṅgānantaram / mūḍhasya mohasya svasadṛśākāro manorūpaḥ putro
jātaḥ / yadyapi manaḥ pūrvamevāsti tathāpi vīryātmanā pitṛdehe sthitaputra iva
prāk sūkṣmarūpaṃ manaḥ / buddhau mohasambandhānantarameva
vikalpādyādhikyāt pituḥ prasūtaḥ putra iva manaḥ puṣṭamāsīditi tātparyam /
asattvarūpatvena sadṛśākṛtirjñeyā

p. ५४)
taruṇaḥ so'bhavattūrṇamaticañcalasaṃsthitiḥ /
piturmauḍhyena saṃyuktaḥ pitāmahyā guṇena ca

taruṇo vyavahārakṣamaḥ piturmohasya mauḍhyena jaḍatvaguṇena / pitāmahyā
avidyāyā anekanirmāṇe upādānaṃ svātiriktamanapekṣya yat sāmarthyaṃ tena
guṇena ca samāvṛtaḥ

anekacitranirmāṇasāmarthyena samāvṛtaḥ /
pitāmahyā śūnyanāmnyā pitrā mūḍhābhidhena ca

eteṣāṃ nāmakathanapūrvakaṃ manaso guṇānāha - pitāmahyā iti / manasaḥ
pitāmahī avidyā / vicāre kṛte tatsvarūpavilayācchūnyanāmnī sā / pitā mohaḥ /
mūḍhatāprayojaka iti mūḍhābhidhaḥ saḥ / ābhyāmasthirāhvaḥ śikṣito'bhūditi
sambandhaḥ

asthirāhvaḥ śikṣito'bhūt svayaṃ cātiviśāradaḥ /
gatimapratibaddhāṃ vai śīghrācchighrāṃ samāsadat

pitṛśikṣayā mūḍhatāṃ prāptaḥ pitāmahīśikṣayā vicitranirmāṇasāmarthyaṃ
prāptaḥ / svayamaticaturo'pratibaddhāṃ gatiṃ prāptavān / śīghrācchīghrām
atiśīghrāmityarthaḥ / evaṃ buddhermohavaśānmanaḥ prarūḍhaṃ
sadaticañcalatvāt kvacidasthiram anantavicitrakalpanāparaṃ
mūḍhatvādvicāravimukhaṃ cāsīditi viśiṣṭagranthatātātparyam [k: śiṣṭa; g:
vaśiṣṭa]

evaṃ mama sakhī svacchasvabhāvā janmataḥ satī /
asatīsaṅgato'tyantaṃ mālinyaṃ samupāgatā

p. ५५)
sakhyā priyeṇa putreṇāsatsvabhāvayutena sā /
cirasaṅgātteṣu dṛḍhānurāgeṇa samāyutā

evamuktaprakāreṇa / mama sakhī buddhiḥ / asatīsaṅgataḥ avidyāsaṅgena /
atyantamālinyaṃ sattvasvabhāvāvarakaṃ tāmasaṃ mohaṃ samupāgatā / sakhyā
avidyayā / asatsvabhāvena priyeṇa mohena putreṇa manasā ca / dṛḍhasaṅgāt
sadā tadrūpeṇa pariṇatatvāt / buddhiḥ svīyaṃ satsvarūpaṃ parityajya mohātmanā
manaḥkalpitavastusaundaryādivyavasāyātmanā ca sadā sthiteti bhāvaḥ

jahau mayayanurāgaṃ tu sarvathā kramataḥ sakhī /
ahaṃ svabhāvasaralā hātuṃ tatsaṅgamañjasā

jahāviti / kālakramato mūḍhādiṣu dṛḍhānurāgānmayayanurāgaṃ prītiṃ jahau /
paricchinnacitirūpakartṛbhoktrātmakajīvasvarūpavicāro'pi buddhernāsīditi
tātparyam / nanvevaṃ sati tvayāpi tadanurāgastyaktaḥ [k, kh: tadānu]
syāditi cennetyāha - ahamiti / svabhāvataḥ saralā / nisarga##-
saralānāmanyaprītyādyanimittaiva prītiriti tātparyam

anīśā tatparaivāsaṃ sarvathā tāmanuvratā /
atha tasyāḥ priyo mūḍho bhuñjānastāṃ tu sarvadā

matprīteranimittatvāt prītiṃ tyaktumanīśā ata eva tatparā satī sarvathā tāmanuvratā
/ tatsamānaśīlāabhavamityarthaḥ / mama cinmātrarūpatvāt
pratibimbabhūtairbuddhidharmairyogād buddhyanukṛtiṃ prāpteti bhāvaḥ / atha
evaṃ buddhyanukāraprāptyanantaram

prasahya māṃ samākrāntumudyuktaḥ sarvathā'bhavat /
nāhaṃ svabhāvasaṃśuddhā vastutastadvaśaṃ gatā

matpriyāmanugateyamiti matvā māmapi haṭhena bhogāyākrāntuṃ sa mūḍha
udyukto'bhavat / evaṃ jāte'pi svabhāvaśuddhā ahaṃ na tadvaśaṃ gatā /
buddherviṣayavāsanānibiḍatve'pi na jīvatādātmyamapa gacchati / evaṃ
buddhitādātmyāpannaciterbuddhivṛttirūpamohasamparkābhāse'pi darpaṇasya
pratibimbeneva [k, kh: darpaṇapratibimbanyānena / asmin pāṭhe
pūrvatanaṃ darpaṇasya iti padamanāvaśyakam /] na vastuto mohasamparka iti
bhāvaḥ

p. ५६)
tathāpi loke me'tyantaṃ parīvādo mahānabhūt /
mūḍhena sarvatheyaṃ ca bhujyate iti sarvataḥ

parīvādo'pavādaḥ / parīvādasvarūpamevāha - mūḍheneti / sarvataḥ sarvatra /
avivekino buddhidharmānātmanyāropayantīti tātparyam

asthirākhyaṃ svaputraṃ sā mayi nyasya sakhī mama /
priyeṇa saṃpariṣvaktā sarvathā tatparā'bhavat

sā buddhiḥ sakhī / tatparā mūḍhaparā / manaḥkalpitamapi niścetumasamarthā
[k: niśceṣṭu] buddhirmohaikarūpā'bhavaditi bhāvaḥ

athāsthiro mayā samyag lālitaḥ poṣitastataḥ /
prauḍhastriyaṃ pitāmahyā anumatyopasaṅgataḥ

atha mayi putranyāsānantaram / pitāmahyā mūḍhamātuḥ avidyāyā iti yāvat /
striyaṃ kalpanām / buddheratimohātmatāprāptyanantaraṃ cittādātmyāpannaṃ
manaḥ kalpanāyāṃ samarthaṃ sat kalpanaikaparamabhavadityāśayaḥ /
kalpane'vidyānukūleti tadanumatirjñaṃyā

sā priyā tasya capalābhidhānā hi pratikṣaṇam /
priyasya sammataṃ rūpaṃ bhinnaṃ bhinnaṃ manoharam

kalpanāyāścapaleti nāma / priyasya manasaḥ

gṛhṇātyāścaryajananaṃ priyamevaṃ svake vaśe /
cakre sā'tyantanipuṇā svanaipuṇyavaśāt khalu

svanaipuṇyavaśādvaśe cakre / mano vicitrakalpanāparaṃ
pratikṣaṇamabhavadityāśayaḥ

p. ५७)
asthiro'pi kṣaṇenaiva tvasaṃkhyaśatayojanam /
prayātyāyāti ca sadā na śrāntimupagacchati

asthiro manaḥ

samīhate yatra gantumasthiraśca yadā yadā /
tasyeṣṭaṃ ca svarūpaṃ tu kṛtvā sā capalāpi hi

samīhata iti / yatra yatra mano gacchati tatra tatra vicitrānekakalpanāṃ karotyeveti
bhāvaḥ

tatra tatra sthitā bhūtvā ramayatyeva svaṃ priyam /
evaṃ sā capalā samyagasthireṇa yutā satī

ramayatyeveti / svayameva manorājyādikamantaḥsaṅkalpya
tatprayuktasukhābhāsaṃ prāpnotīti bhāvaḥ / yutā satī tanayān suṣuve iti yojanā

suṣuve pañcatanayān mātāpitṛparāyaṇān /
te samarthāḥ pañcavidhā mayi sakhyā niveśitāḥ

suṣuva iti / tanayān jñānendriyāṇi / manaso nirvikalpatve indriyavṛttyanudayād
manasā vikalpanāyāmindriyaprasṛtiḥ [kh, g, gh: prasūtiḥ] /
indriyaprasarasya manaḥkalpanopayuktatvānmātāpitṛparāyaṇāniti jñeyam /
sakhyā mayi niveśitā iti cittādātmyāpattiruktā

ahaṃ sakhyanuraktā tānakurvaṃ balavattarān /
atha te pañcatanayāścapalāyāḥ pṛthak pṛthak

tān putrān balavattarān / cittādātmyaprakarṣeṇa svatantraprakāśatulyāniti bhāvaḥ

cakrurāyatanaṃ śreṣṭhaṃ vicitramativistṛtam /
pitaraṃ svavaśe cakrurmātrā samyag vibhāvitāḥ

vicitraṃ vividhagandhādyupalabdhisthānam [k: vividhaṃ] / ativistṛtam
asaṃkhyaviṣayagrahaṇe'pi tadudarāpūrteḥ / sarvavyavahārasya tadadhīnatvāt
śreṣṭham āyatanaṃ cakruriti / tattadgolakādhiṣṭhitā babhūvurityāśayaḥ / mātrā
kalpanayā vibhāvitāḥ poṣitāḥ / vikalpaparaṃ manaḥ sadendriyadvāreṇa
bahirmukhamabhavditi tātparyam

p. ५८)
ānayanti svāyatanaṃ pitaraṃ taṃ kṣaṇe kṣaṇe /
tatrāsthiro jyeṣṭhasutāyatanaṃ viniviśya tu

piturvaśīkaraṇameva vivicya darśayati - ānayantīti / jyeṣṭhasutaḥ
śrotrendriyam

aśṛṇodvividhān śabdān susvarānitarānapi /
kvacinmadhurasaṅgītaṃ kvacidvādyaṃ sumañjulam [k, g, gh:
sumaṅgalam]

itarān visvarān / etadevāha - kvaciditi

ṛco yajūṃṣi sāmāni mantrānātharvaṇānapi /
śāstrāgametihāsāṃśca bhūṣaṇānāṃ ca siñjitam

bhṛṅgasaṅghasya gītaṃ ca pikapañcamasusvaram /
evaṃ manoharān śabdān śṛṇvan putranideśataḥ

manaḥ śrotrendriyamāviśya śrotradvārā tattacchabdākāreṇa pariṇatamiti
bhāvaḥ

prītaḥ putravaśaṃ prāgādatha putro'nyathā'diśat /
viruddhān karṇakaṭukānaśṛṇod bhairavān ravān

putravaśaṃ śrotre dṛḍhaniveśam / anyathā'diśaditi / manaso
bāhyaviṣayagrahaṇasyendriyādhīnatvādindriyādeśenā'śṛṇoditi

siṃhādigarjitaṃ meghanirghoṣamaśanestathā /
brahmāṇḍabhedanaṃ garbhasrāvaṇaṃ subhayaṅkaram

aśaninirghoṣaviśeṣaṇaṃ brahmāṇḍetyādi

evaṃ [k: atra śloke pūrvāddhottarārddhayorviparyastaḥ pāṭhaḥ]
śrutvā sucakitaścānyatrāpyaśṛṇottathā /
ruditaṃ vipralapitaṃ śocitādivicitritam

dvitīyasutanīto'thāsthirastadbhavanaṃ yayau /
tatrāpaśyad mṛdusparśānyāsanāni śubhāni ca

dvitīyasutastvagindriyam

p. ५९)
śayanāni ca vāsāṃsi kaṭhinasparśakānyapi /
śītasparśāni vastūni tathoṣṇasparśakāni ca

anuṣṇāśītasparśāni vicitrāṇyabhivīkṣya tu /
hitān dṛṣṭvā pramudito viṣaṇṇastvahitānapi

atha tṛtīyatanayabhavanaṃ prāpya so'sthiraḥ /
apaśyadrucirākārān bhāvān vividhavarṇakān

tṛtīyaścakṣuḥ

raktān śvetān pītanīlān haritān pāṭalānapi /
dhūmrān kaḍārān kapiśān mecakān karburāṃstathā

sthūlān kṛśānaṇūn dīrghānāyatān vartulāṃstathā /
arddhavṛttān dīrghavṛttān sundarāṃśca vibhīṣaṇān

netrasya rūpānyaparimāṇādiviṣayatvādāha - sthūlānityādi

bībhatsān bhāsvarān raudrānanālokāṃśca dṛṅmuṣaḥ /
kvaciddhitaṃ tato'nyacca paśyantaṃ pitaraṃ punaḥ

anālokānandhakārān / kīdṛśān ? dṛṅmuṣaḥ

anayatturyatanayo bhavanaṃ svaṃ vicitritam /
tatrāsasāda puṣpāṇi phalānyannāni [k, kh: phalānyanyā] ca
kramāt

turyo rāsanaṃ rasānumitaṃ puṣpādi jñeyam

peyāni lehyacoṣyāṇi bhakṣyāṇi rasavanti vai /
sudhāsvādūni madhurāṇyanyānyamlarasāni ca

kaṭukāni ca tiktāni kaṣāyāṇyapi kānicit /
kṣārāṇi madhurāmlāni kaṭvamlalavaṇāni ca

madhurāmlānītyādi miśrarasaḥ

kaṭutiktāni citrātmarasāni vividhānyapi /
āsvādayannātmajena sameto'thāntimaḥ sutaḥ

antimo ghrāṇam

p. ६०)
nināya pitaraṃ sthāne svīye'tyantavicitrite /
tatropālabhatānekapuṣpāṇi ca phalāni ca

tṛṇānyannānyoṣadhīśca [k: tṛṇānyanyā] bhāvānanyāṃśca
sarvataḥ /
sugandhān pūtigandhāṃśca mṛdugandhogragandhakān

bhāvān arthān / tānevāha - sugandhānityādi

mohagandhān jñānagandhān mūrchāgandhān vicitritān /
putrāṇāṃ bhavane caivaṃ praviśan niviśannapi

mohajanako mohagandhaḥ / evamagre'pi

hiteṣu ramate kvāpi viṣīdatyahite kvacit /
sadā gamāgamaparaḥ putrāṇāṃ bhavane babhau

te putrāḥ pitṛvātsalyāt pitṛhīnā na ca kvacit /
spṛśanti viṣayāṃścitrān svalpaṃ vāpi kadācana

te putrā iti / mano vihāya svātantryeṇendriyāṇāṃ viṣayagrahaṇāsāmarthyamiti
bhāvaḥ

asthirastu putragṛhe bhuktvā tān viṣayān bahūn /
muṣitvānyāṃśca viṣayān guptyā nayati svaṃ padam

mana indriyābhiniviṣṭaṃ bāhyaviṣayamāsādya tatkṛtasukhādikaṃ tatkāla
evānubhavati / kāṃścicca viṣayān saṃskāradvāreṇāntarguptyā'prakaṭarūpeṇa
gṛhītvā svapade hṛdi sthitvā taṃ viṣayaṃ smṛtyādinā vikalpya
tatsukhamanubhavatītyāha - asthira iti

patnyā capalayā sākaṃ rahaḥ putrairvinā svayam /
bhunaktyatitarāṃ nityamathānyā capalā svasā

rahaḥ svapnādau / anyā āśā

p. ६१)
mahāśanā patiṃ vavre manaḥkāntaṃ tamasthiram /
tasyāmatitarāṃ sakto yadā'bhūdasthiro'pi vai

tam asthiram / nityaṃ [k: nitya] viṣayabhogenāśā pravṛddheti bhāvaḥ

tadā tasyāḥ prītaye sa bhogāharaṇatatparaḥ /
tenānītaṃ bahvapi ca bhakṣitvā kṣaṇamātrataḥ

tasyāṃ mahāśanāyāmatyantāsaktihetunā tasyāḥ prītaye sadā
bhogāharaṇatatparo'bhavat

punarbubhukṣayākrāntā bhogāharaṇahetave /
sadā priyaṃ sandiśati so'pyāhartuṃ sadekṣate

duṣpūrāśāviṣṭaṃ manaḥ sarvadā viṣayasādhanaparamabhavaditi tātparyam

putraiḥ pañcabhirānītaṃ priyeṇāpi susaṃbhṛtam /
bhuktvā kṣaṇena bhūyo'pi sā bubhukṣāprapīḍitā

sapatnyāḥ putrairindriyaiḥ

bhogāhṛtau sandiśati priyaṃ putrāṃśca sarvadā /
tataḥ sā svalpakālena suṣuve putrayoryugam

bhogānām āhṛtau āharaṇaviṣaye

jvālāmukhastayorjyeṣṭho nindyavṛttastathāparaḥ /
sadā mātuḥ priyatamau tau putrau saṃbabhūvatuḥ

tayoḥ putrayormadhye jyeṣṭho jvālāmukhaḥ krodhaḥ / paro nindyavṛtto lobhaḥ /
māturāśāyāḥ / āśādhikyāt krodhalobhayoḥ prābalyamabhavadityāśayaḥ

mahāśanāyāmāsaktaḥ saṃśliṣyati yadā'sthiraḥ /
tadā jvālāmukhajvālālīḍhasarvakalevaraḥ

yadā yadā āśāparavaśastadā tadā krodhalobhakṛtaṃ mahāduḥkhaṃ prāpnotīti
tātparyam

asthiraḥ pīḍito'tyantaṃ gāḍhamūrchāmupaiti hi /
kadācinnindyavṛttena saṅgataḥ priyasūnunā

sarvairvinindyatāmeti mṛtatulyo hi jāyate /
evaṃ yadā'sthiro jāto duḥkhabhogaikatatparaḥ

lobhena nindyatā tato mṛtatulyatā ca spaṣṭā

p. ६२)
tadā sakhī me svabhāvasatī putre'sthirāhvaye /
ativātsalyatastena saṅgatā tasya duḥkhataḥ

evaṃ manaso'tiduḥkhaprāptau manobuddhyoraikātmyād buddherapi
duḥkhaprāptirityāha - tadeti / sakhī buddhiḥ / putre manasi

duḥkhabhārasamākrāntā nindyavṛttena saṅgatā /
jvālāmukhena ca tathā pautreṇāśleṣitā satī

sudagdhā ninditā lokairmṛtaprāyā babhūva ha /
tāṃ sadānugatā cāhaṃ luptaprāyā'bhavaṃ priya

tāṃ sakhīm / svopādherbuddheḥ rajastamovyāptatvena
svarūpasyānavabhāsālluptaprāyatvaṃ jñeyam

evaṃ bahūni varṣāṇi sakhyā duḥkhena duḥkhitā /
asthiro'bhūdasvatantro mahāśanāparigrahāt

duḥkhitā'bhavamiti sambandhaḥ

puraṃ prāpa daśadvāraṃ kenacit karmaṇā kvacit /
tasmin mahāśanāyukto putrairmātrādibhiryutaḥ

puraṃ śarīraṃ brahmarandhreṇa saha daśadvāram / kenacid prārabdhena karmaṇā /
bāhyapakṣe tu yuddhādikarmaṇā / kvacit pralyānantaraṃ sṛṣṭikāle

nyavasat sa sukhaprepsurduḥkhaṃ bhuñjan divāniśam /
putrābhyāṃ dagdhasarvāṅgo ninditaścānuvāsaram

sukhaprepsuriti / sukhasyecchāmātram duḥkhameva prāpyata iti bhāvaḥ

itastataḥ samākṛṣṭaḥ priyābhyāṃ sarvadā hi saḥ /
putrāṇāṃ pañcabhavanaṃ praviśan niviśannapi

priyābhyāṃ vikalpāśābhyām / putrāṇām indriyāṇām

atyantaṃ śrāntimāyāti na sukhaṃ labhate kvacit /
evaṃ putrasya duḥkhena sakhī me'tyantaduḥkhitā

putrasya manasaḥ / sakhī buddhiḥ

p. ६३)
abhūnmūrcchitakalpā sā evaṃ tatpura āvasat /
jvālāmukhanindyavṛttayutā yā sā mahāśanā

sāttvikāṃśāpagamānmūrcchitakalpā / tatpure dehe / mahāśanā āśā

śūnyākhyayā poṣitā ca mūḍhena śvaśureṇa ca /
tathā sapatnyā capalākhyayā'tyantaṃ samedhitā

śūnyākhyayā bhartuḥ pitāmahyā avidyayā

asthiraṃ svavaśe cakre patiṃ tatpurasaṃsthitā [gh: yat] /
sakhīprītyā tatra cāhamavasaṃ tatparā satī

avidyāmohakalpanābhiḥ prarūḍhayā āśayā manaḥ samākrāntamityetadāha -
asthiramiti / sakhīti / buddhitādātmyāpannāyāścito buddhyanukṛtirniyataiveti
bhāvaḥ

sakhīduḥkhāddhataprāyā sarveṣāṃ rakṣaṇodyatā /
yadyahaṃ tatra na syāṃ vai kṣaṇamātramapi priya

yadyahamiti / darpaṇaṃ vinā pratibimbavad adhiṣṭhānamantarā na kiñcidāropitaṃ
bhavediti bhāvaḥ

na bhavettatra caiko'pi mayā sarvaṃ hi rakṣitam /
śūnyayā śunyatāṃ prāptā mūḍhena mūḍhatāmapi

sarvādhiṣṭhānatvāt svasya sarvānukṛtimāha [sarvasya anukṛtim
anusṛtim sarvarūpatayā pratibhāsamityarthaḥ /] - śūnyayetyādi /
śūnyayā yutā

asthireṇāsthiratvaṃ ca cāpalyaṃ capalāyutā /
jvālāmukhājjvalattāṃ ca nindyavṛttāttadātmatām

sakhīsaṃyogataścaivamabhavaṃ tattadākṛtiḥ /
sakhīṃ yadi vimuñcāmi sā naśyet kṣaṇamātrataḥ

mama cidrūpāyā anekarūpatā buddhitādātmyādevetyāha - sakhīsaṃyogata iti /
sakhīmiti / ahaṃ buddherapyadhiṣṭhānamiti māṃ vinā buddhirapi na
bhavedityāśayaḥ

p. ६४)
māṃ saṅgatena teṣāṃ vai samāhurvyabhicāriṇīm /
janā mūḍhāḥ sarva eva kuśalā nirmalāṃ viduḥ

teṣāṃ buddhyādīnāṃ saṅgatena sahabhāvena māṃ śuddhāmapi
vyabhicāriṇīmāhuḥ sarve janāḥ / ata eva te mūḍhāḥ /
śuddhākhaṇḍacidrūpamapyātmānaṃ kṣaṇikadṛśyākārānukāramātreṇa
kṣaṇikamāhurbauddhādaya iti tātparyam / kuśalāḥ sūkṣmadhiyastu
smṛtyanusandhānādimūlasarvavyavahārānupapattyā tanmatamupekṣya nirmalāṃ
kāladeśādiparicchedamalanirgatāṃ māṃ viduḥ

mahāsatī me jananī viśuddhā nirmalākṛtiḥ /
ākāśādapi vistīrṇā sūkṣmā ca paramāṇutaḥ

nanu kathaṃ te duṣṭasaṅgatāyā nirmalatvamiti cenmātuḥ sakāśāt
prāptamahāmantramāhātmyāditi vaktumādau mātaraṃ stauti - mahāsatītyādi /
bāhyapakṣe mahāsatī mahāpativratā / ata eva śuddhā mānasadoṣarahitā /
nirmalākṛtiḥ śarīradoṣarahitā [k: śarīra] ca / ākāśādapi vistīrṇā
yaśasā [k,kh: yā sā] / paramāṇutaḥ sūkṣmabuddhyādyupetatvāt
sūkṣmā / āntarapakṣe'navacchinnasattārūpeti mahāsatī / viśuddhā
śuddhacidekarūpatvādekarasetyarthaḥ / nirmalākṛtiḥ
ajñānādisvarūpāvarakamalānākrāntā / kāraṇatvena bhāsakatvena ca
vyāpakatvādākāśādapi vistīrṇā / paramāṇorapyantaranusyūtatvād
durjñeyatvācca paramāṇutaḥ sūkṣmā

sarvajñānāpyakiñcijjñā sarvakartryapi niṣkriyā /
sarvāśrayāpyanādhārā sarvādhārāpyanāśritā

bāhyapakṣe svabhāvataḥ sarvajñānāpi tatprayuktābhimānābhāvādakiñcijjñeva
tiṣṭhatīti / evamagre'pi / sarveṣāṃ poṣakatvenāśrayā / sarvakalānāmādhārāpi /
āntarapakṣe tu sarvajñatvādikaṃ dṛśyakṛtamiti svataḥ kiñcijjñatvādikam /
sarvatra bhāsamānatvāt sarvādhārā

p. ६५)
sarvarūpāpyarūpā sā sarvayuktāpyasaṃyutā /
sarvatra bhāsamānāpi na jñeyā kenacit kvacit

bāhyapakṣe sarvarūpā sarvāvayavasaundaryavatī [k: vat]
sarvairdhanadhānyādibhiryuktā sarvatra kāruṇyasauśīlyādistrīguṇairbhāsamānā
prasiddhāpi kvacit kenacinn jñeyā sadāntaḥpurasthatvāt / āntarapakṣe tu
sarvapratibimbarūpasyāpi darpaṇasya yathā pratibimbarūparāhityamevaṃ neyam /
sarvatra pratibimbāṃśe bhāsamāno'pi darpaṇo na kenacit pratibimbavyatirekeṇa
jñāyate evaṃ bhāveṣu sarvatra bhāsamānā citirbhāvavyatirekeṇa na jñāyate

mahānandāpyanānandā mātāpitṛvivarjitāḥ /
mādṛśyastanayāstasyāḥ santi saṃkhyāvivarjitāḥ

bāhyapakṣe mahānānando vibhavanimitto yasyāḥ /
evaṃvidhāpyānandanimittaharṣānutsekādanyairalakṣyamāṇānandatvādanānandā /
mātāpitarau varjitau yayā / mahāsatītvena patiparāyaṇatvāt tyaktamātāpitṛsneheti
tātparyam / āntara pakṣe mahānandarūpāpi svarūpātiriktānandāyogādanānandā /
nityatvānmātāpitṛvivarjitā / saṃkhyāvivarjitā asaṃkhyāḥ

yathā taraṅgā jaladherasaṃkhyaḥ sodarīgaṇaḥ /
sarvāstā matsamācārā rājaputra bhavanti vai

yathā taraṅgā asaṃkhyāstathā me asaṃkhyaḥ sodarīgaṇaḥ / etaddṛṣṭāntena
vastuto jananyavyatiriktatvaṃ kanyānāmuktaṃ jñeyam / samācārāḥ
sakhīkuṭumbaparāyaṇāḥ

mahāmantravatī cāhaṃ sarvairetaiḥ sakhīgaṇaiḥ /
saṅgatā tatparā cāpi mātṛtulyā svarūpataḥ

evaṃ duṣṭaiḥ saṅgatā tatparā'pyahaṃ teṣāṃ doṣairaspṛṣṭā / kuta evamiti
cedevaṃvidhameva mantrasāmarthyaṃ mamastītyāha - mahāmantreti /
āntarapakṣe tu mahāmantro māyāśaktiḥ / tayā'hamaghaṭitamapi śuddhasvarūpe
saṃsārāvabhāsanaṃ sampādayāmīti tātparyam

p. ६६)
asmin pure sakhīputro yadā śrānto bhavatyalam /
tadā mātuḥ samutsaṅge'sthiraḥ śete sunirbharam

evaṃ prasaṅgāt svavṛttamabhidhāya punaḥ sakhīputrādivṛttaṃ nirūpayati ##-
āntarapakṣe tu paripakvakarmaṇāṃ bhogena kṣayādanyeṣāmaparipākād madhye
māturbuddherutsaṅga manaḥ śete layaṃ prāpnoti

asthirastu yadā suptastadā tasya sutādayaḥ /
svāpaṃ samadhigacchanti nānyo jāgarti kaścanaḥ

sutā indriyāṇi krodhalobhau ca / ādipadena patnī mātā ca / āntarapakṣe tu manasi
vilīne indriyādi sarvaṃ vilīnamiti tāparyam

tadā tadrakṣati puramasthirasya priyaḥ sakhā /
pracārākhyaḥ praticaran pūrvadvārayuge muhuḥ

asthirasyāpi yā mātā sakhī me tanayena sā /
tasyāḥ sakhī ca yā śvaśrūrasatī yā svabhāvataḥ

tadā sarvasvāpakāle suṣuptau / pracāraḥ prāṇaḥ / manaḥprāṇayoranyatararodhe
dvayoḥ rodhasambhavāt priyatvaṃ sakhitvaṃ prāṇasya / pūrvadvārayugaṃ
nāsāpuṭadvayam / me sakhī asthiramātā yā sā tanayena tanayādinā saha yadā
suptā tadeti śeṣaḥ / tasyāḥ asthiramātuḥ yā sakhī śvaśrūśca śūnyanāmnī
avidyā

sā samācchādya tān sarvān putreṇa saha rakṣati /
evaṃ sarveṣu supteṣu prāpya svāṃ mātaraṃ tadā

sarvān asthirādīn suptān / putrena mūḍhākhyena sahitā [k: saha] rakṣati /
āntarapakṣe mohātmikayā avidyayā sarvamāvṛtaṃ bhavatīti tātparyam

p. ६७)
ānanditā'haṃ bhavāmi mātrāśliṣṭā ciraṃ nanu /
punastānutthitān śīghramanusaṃyāmi cānvaham

āntarapakṣe tu suṣuptau paricchedakopādhilayāt pūrṇarūpatāsampattyā ānanditā
ānandarūpā bhavāmīti tātparyam / anusaṃyāmi tattattādātmyaṃ prāpnomītyarthaḥ

asthirasya sakhā yo'yaṃ pracārākhyo mahābalaḥ /
sa sarvānasthiramukhān poṣayatyanuvāsaram

pracārākhyaḥ prāṇaḥ / asthiramukhān manaḥśrotrādīn / poṣayatīti /
prāṇasamedhitajaṭharāgnipācitānnarasamūlakasāmarthyavattvānmanaḥprabhṛtīn
āmiti bhāvaḥ

sa eko bahudhā bhūtvā puraṃ ca puravāsinaḥ /
vyāpya rakṣatyanudinaṃ sarvān saṃśleṣayatyapi

sa prāṇaḥ / bahudhā prāṇādivṛttibhedena / saṃśleṣayati svasvaviṣayaiḥ
saṃyojayati

taṃ vinā te hi viśliṣṭā naṣṭāḥ syurapi sarvathā /
sūtreṇa hīnā maṇayo mālābaddhā yathā pṛthak

manaḥprabhṛtiṣu kriyāśaktirūpeṇāyameva prota ityāha dṛṣṭāntena - taṃ
vineti / viśliṣṭāḥ viṣayāsaṃvaddhāḥ [k: yasambandhāḥ] / naṣṭāḥ
kāryākṣamatvena naṣṭaprāyāḥ / mālākāratayā baddhā maṇayaḥ / teṣāṃ
pṛthagbhūtānāṃ mālākāratā yathā naśyatīti bhāvaḥ

sa evaṃ [k: eva] māṃ ca saṅgamya sarvaiḥ saṃyojayat param [k:
puram] /
mayā saṃjīvito'tyantaṃ sūtradhāro hi tatpure

saṅgamya mattādātmyaṃ prāpya / sarvairmāṃ saṃyojayati / antaḥkaraṇādīnāṃ
cittādātmyaṃ prāṇadvārakameveti tātparyam / etaccāgre bhaviṣyati
[akṣāntaḥkaraṇādīnāṃ prāṇasūtraṃ yadāntaram (२०/३५) ityādinā /
] / sūtradhāra iti / yathā sūtradhāro nāṭyapravartakaḥ evaṃ prāṇa eva
manaḥprabhṛtivyāpārapravartakaḥ

p. ६८)
jīrṇe tu tatpure cānyatpuraṃ tāṃ nayati drutam /
evaṃ pracāraṃ saṃśritya purāṇāmadhipo'bhavat

tatpure śarīre / tān buddhyādīn / nayatīti / utkramaṇakāle buddhyādīnāṃ prāṇe
layāt prāṇo nayatīti bhāvaḥ / adhipaḥ asthirābhidhaṃ mano'bhavat

bahūnāmasthiro nūnaṃ vicitrāṇāṃ krameṇa vai /
satīputro'pyasthiraḥ sa saṃśrito'pi mahābalam

bahūnāṃ purāṇāmiti pūrveṇa sambandhaḥ / mahābalaṃ prāṇam

mayā ca bhāvito'tyantaṃ sarvathā duḥkhabhāgabhūt /
capalāmahāśanābhyāṃ patnībhyāṃ susamāgamāt [k, kh:
gamat]

tvayā mahāmantravatyā bhāvitasya mahābalasaṃśrayasya satīputrasyāpi
duḥkhabhāktvaṃ [k: duḥkhatvaṃ tu] kuta iti cet
patnyādyasatsamāgamādityāha - capaletyādi

jvālā[gh: mukhā]mukhanindyavṛttābhidhaputrayugena ca /
anyaiḥ putraiḥ pañcabhiḥ sa sarvatrābhivikarṣitaḥ

abhivikarṣita iti / vikalpena āśodayaḥ tata indriyārtheṣu pravṛttiḥ tannimittaḥ
krodhalobhodayaḥ tena duḥkhabhāgabhūdityāśayaḥ

mahākleśaparītātmā sukhaleśavivarjitaḥ /
itastataḥ kvacit putraiḥ pañcabhiḥ sa vikarṣitaḥ

mahākleśaprāptiprakāramāha - ita ityādi

kvaciccapalayā'tyantaṃ cālitaḥ khedamīyivān [g, gh: meyivān] /
kvacinmahāśanāhetoraśanārthaṃ pradhāvati

khedamīyivān [g, gh: meyivān] duḥkhaṃ prāptavān

kvacijjvālāmukhākṣipto nirdagdhāpādamastakaḥ /
mahāmūrcchāṃ samāyāti cāvidaṃstatpratikriyām

tatpratikriyāṃ krodhapratikriyāṃ śāntim

p. ६९)
nindyavṛtaṃ kvacit prāpya garhito bhartsitaḥ paraiḥ /
mṛtatulyaṃ svamātmānaṃ manyate śokasantataḥ

garhaṇabhartsanābhyāṃ mṛtatulyamātmānaṃ manyate tena śokasantapto
[kh, g: santato] bhavati

duṣpatnīputrasahito mohito duṣkulodbhavaḥ /
patnīputraiḥ samākrānto nīyamānastu taiḥ sadā

mūḍhaputratvād duṣkulodbhavatvam

uvāsa tairvicitreṣu pureṣūccāvaceṣu hi /
kvacit kāntārakīrṇeṣu kravyādakulabhūmiṣu

taiḥ sahīvāsa / uccāvaceṣu utkṛṣṭeṣvapakṛṣṭeṣu ca / evaṃvidhasya
narakaprāptimāha - kvaciditi / kāntārairaraṇyaiḥ kīrṇeṣu vyāpteṣu pureṣu /
kravyādakulaṃ māṃsāśikākādisamudāyaḥ tadāśriteṣu [k: sadā] /
mahāraṇyasthaṃ kākādivyāptaṃ ca svadehaṃ paśyatīti tātparyam

kvacidatyantatapteṣu kvacicchitajaḍeṣuca /
kvacit pūtivahāstheṣu kvacid gāḍhatamaḥsu ca

pūtīti / durgandhavahātmakanadīstheṣu / gāḍhatamaḥsu tarvādideheṣu
uvāsetyanvayaḥ

evaṃ bhūyo'tiduḥkhena duḥkhite [k, kh: duhkhitaṃ] tanaye'sthire /
sakhī ca me duḥkhamūḍhā'bhavad duḥsaṅgataḥ sadā

svabhāvasatyapi mudhā tāmanvahamapi priya /
mūḍhevātyantamabhavaṃ tatkuṭumbaparāyaṇā

ahaṃ svabhāvasatī / vastutastatsaṅgābhāvāt svacchasvabhāvāpi / mudhā vyarthaṃ
nirnimittenetyarthaḥ

ko hi duḥsaṅgataḥ saukhyaṃ prāpnuyālleśataḥ kvacit /
gacchan marusthale [k: mahā-] grīṣme tṛṣṇāśāntiṃ yathā
[k, kh: yayau] naraḥ

nanu kimarthaṃ tvayā mūḍhatvaṃ prāptamiti ced duḥsaṅgata ityāha - ko hīti

p. ७०)
evaṃ ciratare kāle saṃvṛtte mama sā sakhī /
mohitā'tyantakhedena mayā rahasi saṅgatā

evaṃ duḥkhabhogena / saṃvṛtte atīte / saṅgateti /
kathañcitprāpteśvarānugraheṇa / rahasi vivikte viṣayānavabhāsadaśāyāṃ mayā
[k: mayā nāsti] saṅgatā śuddhacidākārā'bhavaditi āntarapakṣe jñeyam

madekasaṅgādyuktiṃ sā prāpyāsādya ca satpatim /
jitvā svatanayaṃ hatvā badhvā tattanayādikān

madekasaṅgāt / śuddhamadrūpābhivyakteryuktiṃ vairāgyam
vairāgyātmadarśanayoḥ parasparakāraṇatvāt / taduktaṃ - bhaktiḥ
pareśānubhavo viraktiḥ [kh: vimuktiḥ] (bhā० pu० ११/२/४२) ityādi
paraṃ dṛṣṭvā nivartate (bha० gī० २/५५) iti ca / vairāgyāt satpatiṃ vivekam
/ tanayaṃ manaḥ / krodhalobhau hatvā / indriyāṇi badhvā

mayā saṅgamya manmātṛpuramāsādayad drutam /
manmātaraṃ pariṣvajya muhurmuhurakalmaṣā

mayā saṅgamya samyagekatāṃ nirvikalpasamādhiṃ prāpya / saṅgateti pūrvaṃ
śravaṇena parīkṣajñānamuktam / idānīṃ manananididhyāsanābhyāmaparokṣamiti
[k: bhyāṃ samapa-] vā vivekaḥ / manmātṛpuram
anavacchinnaśuddhacidātmatām / drutamiti [k: udbhūta] jñānottarakṣaṇe
/ muhurmuhurmanmātaraṃ pariṣvajyeti jīvanmuktidaśoktā jñeyā / muhurmuhuriti
buddhermadhye madhye dvaitābhāsarūpatoktā / ata evāha akalmaṣeti /
dagdhapaṭākārasya [k: stha] dvaitābhāsasya na pūrvavat
saṃsāramūlavāsanātmakakalmaṣādhāyakatvamiti bhāvaḥ / etadevoktam -
hatvāpi sa imān lokān na hanti na nivadhyate (bha० gī० १८/१७) iti

p. ७१)
ānandārṇavanirmagnasvabhāvā'bhavadañjasā /
evaṃ tvamapi durvṛttaṃ nigṛhya sakhisambhavam

nanu saṃsāramūlavāsanābhāve'pi dṛṣṭaduḥkhaṃ syādityāśaṅkyāha -
ānandeti / vāsanāhetorabhimānasyaiva duḥkhahetutvāditi tātparyam / abhavaditi
prathamapuruṣeṇa buddhereva bandhamokṣau [k: revaṃvidhamokṣo] na
mametyuktaṃ bhavati / sakhisambhavaṃ manaḥ

prāpya svamātaraṃ nātha sukhaṃ nityaṃ samāpnuhi /
etatte kathitaṃ nātha svānubhūtaṃ sukhāspadam

prāpyeti / buddhyā saha [k: mahā] paricchinnacidekarūpatāṃ
prāpyetyarthaḥ

iti śrītripurārahasye jñānakhaṇḍe hemacūḍopākhyāne bandhākhyāyikā
pañcamo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
pañcamo'dhyāyaḥ //
atha ṣaṣṭho'dhyāyaḥ
evaṃ priyāvacaḥ śrutvā hemacūḍo'tivismitaḥ /
hasan papraccha tāṃ kāntāmavidvān viduṣīṃ tadā

atrādhyāye cetipadyaiḥ śraddhā śreyaḥsusādhanam /
kutarkasyānarthalābha iti samyagnirūpyate //
priye proktaṃ yadetatte khacitramiva bhāti me /
nirālambaṃ vacaste'dya [k: vacaste'dya nāsti] jānāmyetadaśeṣataḥ

khacitramiva / asambhāvitamivetyarthaḥ / nirālambaṃ nirviṣayam

nūnaṃ tvamapsarodbhūtā [k: tada] ṛṣiṇā varddhitā vane /
saṃspṛṣṭayauvanādyāpi [k: saṃsṛṣṭa] na tāruṇyamalaṃ gatā

kuta iti cedāha - nūnamiti / alam atyantam

vakṣyasyanekasāhasravarṣāṇāmiva saṃsthitim /
bhūtagrastoktisadṛśavacasā te'timātrataḥ

atimātrato'timātreṇa bahulena vacasā

asandarbheṇa kimahaṃ vibuddhyāmi yathārthataḥ /
vada te sā sakhī kvāste baddhaśca sakhiputrakaḥ

kuto [madvacasi asandarbhatā iticchedaḥ]madvacasyasandarbhateti
[k, g: castha] cedāha - vadeti

purāṇi tāni vā kutra saṃsthitāni tadīraya /
astu kiṃ tena vṛttena vada me kva ca sā sakhī

p. ७३)
sakhīṃ na prāptavān māturahaṃ tat pravicāraya /
āryāsti me'varodhe sve piturme'nyā nahi priyā

ahaṃ mātrā dattāṃ sakhīṃ na prāptavānasmi / me āryā mātā avarodhe'ntaḥpure'sti
tāṃ vicāraya pṛccha / anyāpi mātā me nāsti yayā [k, kh, g:
yathā] sakhī dattā [k: dattāsthā] syādityāha pituriti

sā vā sakhī me kutrāste tatputro vā vada drutam /
manye'haṃ te vaco loke vandhyāputrasamāśrayam

loke prasiddhaṃ vandhyāputrasamāśrayaṃ vaca iva te vacaḥ

yathāha kaścinnaṭiko [k: naṭīko] vidūṣakavacovidhau /
vandhyāputraḥ samārūḍhaḥ pratibimbamahāratham

tadevāha - yatheti / naṭiko naṭaḥ

śuktyāropitahairaṇyabhūṣaṇairbhūṣitāṅgakaḥ /
āyudhairnaraśṛṅgotthairyudhvā gaganakānane

hatvā bhaviṣyadrājānaṃ jitvā gandharvapattanam /
marīcisrotasi svāpnakāminībhirhi khelati

tathā tava vaco manye sarvathā'saṅgataṃ nanu [kh: na tu] /
śrutvaivaṃ priyavākyaṃ sā caturā prāha taṃ punaḥ

tathā proktavidūṣakavākyavat / asaṅgatam

nātha proktaṃ mayā yatte tat kathaṃ syādapārthakam /
na mādṛśānāṃ vacanaṃ nirālambaṃ kvacidbhavet

mṛṣā hi tapasāṃ hantrī satyaśīleṣu sā kutaḥ /
tapasvināṃ kule kasmācchvitre [gh: kasmi] [śvitre kuṣṭhe
ityarthaḥ] saundaryavadbhavet

kutaste vaco mṛṣā neti cedāha - mṛṣeti / tapasvināṃ madhye viśeṣataḥ
satyaśīleṣvasmāsu sā asambhāvyaiveti sadṛṣṭāntamāha - tapasvināmiti

p. ७४)
yo yojayati jijñāsumanyārthena hyasatyataḥ /
tasya norddhvaṃ na cādhastālloko'sti [k: loke] sukhasādhanam

jijñāsuviṣaye asatyena vacasā puṇyalokanāśa ityāha - ya iti / anyārthena
apārthavacasā asatyāt / na lokaḥ

śṛṇu rājasutoktiṃ [kh, g, gh: ktaṃ] me loke taimirikaḥ
kvacit /
samadṛṣṭiṃ naiti śīghramañjanānāṃ vacogaṇaiḥ

maduktaṃ sakṛcchravaṇamātreṇa tvayā mūḍhena
jñātumaśakyamityāśayenāha - śṛṇviti

asatyameva jānāti hitaproktaṃ ca mūḍhadhīḥ /
tattvāṃ [k: tattvaṃ priyārha] priyā'haṃ jijñāsumasatyairyojayāmi
kim

hitena priyeṇa proktamapi mūḍhadhīrasatyamiti jānāti / tat tasmāt tvayaivaṃ
yadvijñātaṃ tadanucitameva / yadahaṃ tapasvinī satyaśīlā tava priyā ca bhūtvā
tvāṃ [k, kh, g: tvāṃ nāsti] jijñāsum [k, kh, g:
jijñāsuḥ] asatyairyojayāmi kim / na yojayāmyevetyarthaḥ

apyasatyaṃ mayoktaṃ yattadvimarśaya saddhiyā [k, gh:
siddhayā] /
loke hi kuśalo martyaḥ sarvavyavahṛtau nanu

nanu asatyaṃ sāhasaṃ krauryaṃ strīṇāṃ sahajasambhavam iti cettvaṃ
kuśalo'syabhijñātumata [k: kuśalo'bhi] etat parīkṣayetyāha [k:
kṣasve] apīti / saddhiyā sūkṣmatarkayuktabuddhyā / nanvahaṃ
kuśalo'pyatītārthaṃ tvadvacanaṃ kathaṃ parīkṣiṣyāmīti cedāha - loka iti

parīkṣyaikāṃśataḥ sarvāmabhijānāti saṃsthitim /
nidarśanaṃ pradāsyāmi tubhyamatra samīkṣaya [k: samīkṣayā]

loke satyaśīlasaṃsthitim ekāṃśataḥ [k: evāṃśataḥ] kvacid vyavahāre
parīkṣyaiva jānāti / ato mayā prāguktaṃ yattattvayā satyatvenānubhūtamiti
nidarśanaṃ pradāsyāmi anubhūtaṃ smārayāmi / atra madvacanaparīkṣāyām

p. ७५)
yaḥ purā viṣayaḥ sarvo babhūvābhīṣṭasādhanam /
cirānmadvacanāt so'dya kuto na sukhasādhanam

ya iti / yo viṣayaḥ purā sukhasādhanatayā gṛhītaḥ so'dya
madvacasā'nyathaivānubhūyate / evaṃ prāguktasya satyatvādidamapi satyaṃ
bhavedeveti jānīhīti bhāvaḥ

sa evādya sādhayati sukhamanyeṣu vai kutaḥ /
etannidarśanenaiva svamataṃ vettumarhasi

nanu kālabhedānna sa viṣayaḥ sukhasādhanam [k: dhanaṃ matto] ato
naitattvadvacanakṛtamiti cedāha - sa eveti / etannidarśanena
maduktānubhavena / svamataṃ maduktamasatyamiti niścayaṃ
pramāṇamapramāṇaṃ veti vettum

śṛṇu rājan yadbravīmi [k: yaddhavī ṛjyā] ṛjjvyā nirmalayā
dhiyā /
anāśvāso [loke āptoktiṣu anāśvāsaḥ sthiro ripurbhavedityanvayaḥ]
ripurloke [k: ripuloko] bhavedāptoktiṣu sthiraḥ

madvacane śraddhasveti vaktuṃ [k, kh: vākye tu] śraddhāṃ stauti ##-
anāśvāsaḥ aśraddhā

śraddhā mātā prapannaṃ sā vatsaleva sutaṃ sadā /
rakṣati prauḍhabhītibhyaḥ sarvathā nahi saṃśayaḥ

āpteṣvaśraddhinaṃ [k, g: ddhitaṃ] mūḍhaṃ jahāti śrīḥ
sukhaṃ yaśaḥ /
sa bhavet sarvato hīno yaḥ śraddhārahito naraḥ

ata eva sarvato hīno bhavet

p. ७६)
śraddhā hi jagatāṃ dhātrī śraddhā sarvasya jīvanam /
aśraddho mātṛviṣaye bālo jīvet kathaṃ vada

aśraddha iti / mātā me hitameva [k: hīna] kuryāditi śraddhābhāve
taddattāhārādestyājyatvena bālo na jīviṣyatīti bhāvaḥ

aśraddhastaruṇaḥ patnyāṃ kathaṃ sa sukhamedhate /
tathā'patyeṣu sthaviraḥ kathamīyāt satīṃ gatim

mayi nidrite māmiyaṃ na hanyāditi patnyāṃ śraddhāmakurvato
viparītasambhāvanodayāt sukhaṃ na syāt / evaṃsthaviro'pi / satīṃ gatiṃ sukhasthitim

aśraddho vā bhuvaṃ kasmād vikarṣet karṣakaḥ kila /
na pravṛttirbhavet kvāpi tyāge vā saṃgrahe'pi vā

aśraddhasya na kvāpi pravṛttiḥ syāt iṣṭasādhanatvaniścayāsambhavādityāha
- aśraddha iti

śraddhāvaidhuryayogena vinaśyejjagatāṃ sthitiḥ /
ekāntagrahaṇāllokapravṛttiriti cecchṛṇu

pravṛttyabhāve iṣṭāpattiriti cennaivamityāha - śraddheti /
śraddhāvaidhuryaṃ śraddhābhāvaḥ tadyogena tatsattvena hetunā pravṛttyabhāve
sādhite satīti śeṣaḥ / jagatāṃ prāṇināṃ sthitiḥ sukhādyanubhavātmā vyavahāraḥ
/ naśyed nāśaḥ sambhavet [vyavahārapadasaṃnidhānena vyavahārasya
nāśaḥ saṃbhavedityartho vibhaktivipariṇāmena saṃpadyate /] /
pratyakṣasiddhā jagatsthitirapahnotuṃ na śakyā /
atastanmūlabhūtaśraddhāsiddhiriti bhāvaḥ / nanu na
jagatsthitinimittapravṛttyanyathānupapattyā śraddhāsiddhiriti pravṛtteranyathā
siddherityāha - ekānteti / ekāntagrahaṇāt vyāptigrahādityarthaḥ / karṣako
bhūvikarṣaṇe kṛte'kṛte ca dhānyaprāptimaprāptiśca bhūyo gṛhītvā
karṣaṇavyāptiṃ dhānyaprāptau viniścitya karṣaṇe pravartate na śraddhayā
pravartata iti bhāvaḥ / atrāha - śṛṇviti

ekāntagrahaṇe vāpi śraddhā kasmāt pratiṣṭhitā /
tatrāpyekāntaśaraṇaḥ śraddhāśaraṇa eva hi

śraddhānāma sambhāvanātmā niścayaḥ idamitthameva syāditi / evaṃ sati
ekāntagrahaṇe vā śraddhā tava kathaṃ pratiṣṭhitā sthitā /
śraddhāmapahnuvānasya [kh: hnuvataḥ] tava keṣucit sthāneṣu
kāryakāraṇayoḥ sāhacaryānubhavamātreṇa parokṣe bhāvikārye'pi
kāraṇasāhacaryasambhāvanā kuta ityabhiprāyaḥ / yadvā
sukhādyanubhavarūpaphalādapahnotumaśakyāt pravṛttiḥ siddhā / siddhāyāṃ
pravṛttau śraddhāmūlakatvaṃ na bhavedekāntagrahaṇamūlakatvameva bhavediti
vā śraddhā kuta iti - tatrāpīti / ekāntagrahaṇāt pravṛttiriti [g:
pravṛttisvī] svīkāre'pi / evaṃ satyapi śraddhā tvayā'bhyupagateti bhāvaḥ

p. ७७)
tasmācchraddhāmṛte loko'vasīdedaśvasan dhruvam /
tasmācchraddhāṃ dṛḍhāṃ prāpya sukhamātyantikaṃ vraja

yasmācchraddhāṃ vinā pravṛttirna ghaṭate tasmāt śraddhāmṛte
pravṛttyabhāvāllokavyavahāro naśyet / aśvasanniti /
ucchvāsaniśvāsayostannirodhe ca saṃśayādapravṛttiḥ syāditi tātparyam /
yasmācchraddhāṃ vinā vyāvahārikamapi sukhaṃ na bhavettasmāt / maduktau
śraddhāṃ prāpya

śraddhā'vare na kāryeti manyase yadi tacchṛṇu /
iyaṃ ca śraddhayaivāste pravṛttirnṛpateḥ suta

nanu śraddhā vidvadvacaneṣu kāryā nāvare nikṛṣṭe srīmūḍhādivacana iti
tadākṣepamanūdya pariharati - śraddheti / iyamiti / avare śraddhā na
kartavyetyabhyupagamarūpā pravṛttirapi śraddhayaiva bhavediti bhāvaḥ

tat kathaṃ te pravṛttiḥ syāditi śrutvā priyāvacaḥ /
hemacūḍaḥ prāha punaḥ priyāṃ kuśalabhāṣiṇīm

yadi śraddhā na syāttadā proktābhyupagamarūpā pravṛttiḥ kathaṃ syādityāha
- taditi

nūnaṃ priye sarvathaiva śraddhātavyaṃ yadā bhavet /
śraddhā satsu vidhātavyā yayā [k, kh: yathā] śreyaḥ
samāpnuyāt

sarvathā varāvaratvavicāraṃ vinā / tadā śraddhā satsvityādi mahājanoktavat
mīnānāmiva nāśamāpnuyāditi vyavahitena sambandhaḥ

p. ७८)
asatsu no vidhātavyā śraddhā śreyo'bhivāñchinā /
anyathāntaḥ suniśite kuṭile baḍiśe yathā

anyathā asati [asati asajjanasthānīye na tvavidyamāne] baḍiśe śraddhayā
mīnā yaṃ nāśamāpnuyustaṃ nāśamāpnuyāt / yato'sati śraddhayā nāśaḥ
tasmāt

bahiḥsame supiṣṭena mīnānāṃ nāśamāpnuyāt /
tasmāt satsveva kartavyā śraddhā nāsatsu kutracit

asatsu kṛtvā śraddhāṃ ye nāśamīyuḥ pare'pi ca /
satsu śreyoyujaḥ śraddhāvaśataste nidarśanam

ye mīnā ivāsatsu śraddhayā naṣṭāḥ ye ca satsu śraddhayā śreyoyuktāste sarve
maduktau nidarśanam udāharaṇam

ataḥ pratītyaiva yuktā kartuṃ śraddhā na cānyathā /
tat kathaṃ te pravṛttiḥ syāditi praśnaḥ kathaṃ tava

saditi pratītyā jñātvaiva śraddhā kartuṃ yuktā / evaṃ sati tat kathaṃ te
pravṛttiriti [g: iti nāsti] prākkṛtaḥ praśna ākṣepaḥ katham ? na
sarvathā'haṃ śraddhāpratiṣedhaparaḥ satsu śraddhā kāryā nānyatreti satāṃ
mahājanānāṃ vākyādevamahaṃ pravṛtta iti bhāvaḥ

ityuktā hemalekhā sā punarāha patiṃ priyam /
śṛṇu rājakumāredaṃ procyamānaṃ mayā vacaḥ

yadāttha tvaṃ kathaṃ praśna iti tatra bravīmi te /
ayaṃ [k: atha] san vā hyasan vāyamiti te niścayaḥ kutaḥ

satsu śraddhā kāryeti yadvākye tava śraddhā so'yaṃ puruṣaḥ sanneveti kathaṃ te
niścayaḥ

p. ७९)
satyasmin niścaye bhūyācchubhaṃ sacchraddhayeha vai /
so'pi lakṣaṇataḥ syāccecchraddhā lakṣaṇasaṅgatā

anyavākyeneti cedanavasthetyabhipretyāha - satyasminniti / ayaṃ niścaya eva na
ghaṭata iti tātparyam / so'pi sanniti niścayo'pi / lakṣaṇataḥ asadvyāvṛttidharmeṇa /
śraddheti / idamastya lakṣaṇamityanyavākyenedaṃ lakṣaṇajñānaṃ bhavitavyaṃ
cedanavasthā tadavasthaiveti bhāvaḥ

pramāṇāllakṣaṇajñānamiti cettatra saṃśṛṇu /
aśraddhasya pramāṇaṃ kiṃ bhavettat sunirūpyatām

pramāṇāditi / anvayavyatirekābhyāmityarthaḥ / aśraddhasya pramāṇaṃ kimiti /
ayamāśayaḥ - pare hyāgame śraddhayaiva pravṛttirupapadyate na
śuṣkatarkeṇa / pārthivatvalohalekhyatvayoḥ sahacārasya bhūyo gṛhītatve'pi hīrake
vyabhicāradarśanānna kevalatarkeṇa kiñcijjñātuṃ śakyata iti

anyathā hi pramātā no visaṃvādyeta kutracit /
tasmācchraddhāṃ samāśritya lokaḥ sarvaḥ pravartate

tasmāt puruṣārthasādhanapravartakamavisaṃvādipramāṇamāgamānnānyadityāha
- anyatheti / sadāgamasyevānyapramāṇānāmapi
duṣṭatvābhāvasambhāvanayā [k, kh: dṛṣṭa-]
sarvathā'visaṃvādakatve pravṛttaḥ pramātā na kvāpi visaṃvādyeta
pravṛttyuddiṣṭaphalāprāptyā [gh: phala] paribhūyata /
yasmādanyapramāṇānāṃ visaṃvādakatvasambhāvanā tasmāt / sadāgame
śraddhāmāśrityaiva kṛṣībalo'pyāgamāśrayeṇa
sumuhūrtavighnanirasanādipūrvakaṃ pravartate / tatra ca dṛśyamānaḥ
kvacidvisaṃvādā na pramāṇadoṣakṛtaḥ kintu sāmagrīvaikalyakṛta eva / ata eva
tasyaiva tatraiva bhūyaḥ sāmagrīsākalyasampādanābhimānena
pravṛttirupapadyata iti bhāvaḥ

tatprakāraṃ pravakṣyāmi śṛṇu niścalacetasā /
anavasthitatarko vā hyatarko vāpi sarvathā

tatprakāraṃ śraddhayā śreyaḥprāptiprakāram / anavasthitatarkaḥ śuṣkatarkavān /
atarko mūḍhaḥ

p. ८०)
śreyo na prāpnuyālloka iha vāpi paratra vā /
tatrātarkasya kālena bhavecchreyaḥ kadācana

śreyo neti / ādyasyānāśvāsenāpravṛtteḥ / dvitīyasya sāmagrīvaikalyasambhavāt
/ andhaprakṣiptaloṣṭāghātena [g, gh: loṣṭa] phalapātavad dvitīyasya
śreyaḥ kadācit sambhāvyata ityāha - tatreti / tayormadhye ityarthaḥ

anavasthitatarkasya na śreyaḥ syāt kathañcana /
purā sahyagirau godāvarītīre hi kauśikaḥ

anavasthitatarkasya śreyo na kathañcidityatretihāsamāha - pureti

nyavasacchāntasumatirjñātalokasatattvakaḥ /
tasya śiṣyāstu śataśaḥ [g: bahuśaḥ] sthitā gurusamāśrayāt

śāntaścāsau sumatiśca / kāmādyanāhatasvabhāvaḥ
śraddhābhaktipracuramatiśca / ata eva jñātalokasatattvakaḥ / lokyate dṛśyate iti
loko dṛśyam / dṛśyasya hi paraṃ tattvaṃ yatprakāśaḥ paraḥ śivaḥ
ityāgamarītyā adhiṣṭhānaprakāśamātraṃ satattvaṃ svarūpaṃ jñātaṃ yena

ta ekadā gurumanu gatā lokasya saṃsthitim /
nirṇetuṃ buddhyanuguṇaṃ tadā procuḥ parasparam

te śiṣyāḥ / gurumanu paścāt / guroḥ parokṣa iti yāvat / lokasya sthitiṃ nirṇetuṃ
gatāḥ saṅgatāḥ santaḥ tadā tannirṇayāya svabuddhyauguṇaṃ yathā tathā
parasparaṃ procuḥ

tatrājagāma śuṅgākhyo vipraḥ kaścinmahābudhaḥ /
sa sarveṣāṃ mataṃ proktaṃ dūṣayadbuddhikauśalāt

tatra kauśikaśiṣyasamāje / mahābudhaḥ śuṣkatarkanipuṇaḥ / yadvā
mahāṃścāsāvabudhaśca ajñātalokasatattva iti bhāvaḥ / sa śuṅgaḥ / sarveṣāṃ
kauśikaśiṣyāṇām / buddhikauśalāt / nāgamānuruddhayuktyā'dūṣayat kintu
kevalaṃ buddhikauśalāt / śuṣkatarkairiti bhāvaḥ

p. ८१)
aśraddhayā hataprajño vivādanipuṇastadā /
pramāṇāt pramitaṃ satyamityukteṣu dvijeṣvatha

kutastasyāgamānādara iti cedāha - aśraddhayeti / ata eva vivādanipuṇaḥ san
vitaṇḍāmāśrityeti yāvat / tadā kauśikaśiṣyāṇāṃ
dṛśyatattvanirṇayopayuktakathākāle / nirduṣṭapramāṇapramitaṃ satyamiti
teṣūkteṣu / athāhetyanvayaḥ

anavasthitatarko vai prāha tarkaikasaṃśrayaḥ /
śuṅgākhya ākṣipan sarvān tatra vādakathāntare

anavasthitatarkaḥ śuṅgākhyaḥ / śuṣkatarkāśrayaḥ / vādakathāntare /
jalpavitaṇḍābhinnakathāmadhye

viprāḥ śṛṇudhvaṃ madvākyaṃ satyaṃ na kvāpi sidhyati /
pramitaṃ yat pramāṇena tat satyamiti hīritam

śuṅgavākyaṃ viprā ityādi / bhavadbhiryat sādhyate satyam na tat kvāpi
kālatraye'pi siddhyatītyākṣepaḥ / pramitamityādi kauśikaśiṣyamatānuvādaḥ / iti hi
bhavadbhirīritam

tatra tena doṣayujā bhavedapramitaṃ nanu [g: na tu] /
niścetavyā tatastvādau pramāṇānāmaduṣṭatā

tatra pramāṇeṣu madhye doṣayuktapramāṇena bhātamapramitamasatyaṃ nanu / ata
ādau satyāsatyaparīkṣakeṇa pramāṇānāmaduṣṭatā niścetavyetyāha -
niścetavyeti / nahi bhāsanamātreṇa satyatvaṃ kasyacit śuktirajatādeḥ
satyatvaprasaṅgāt / ato'duṣṭapramāṇapramitasyaiva satyatvāt /
pramāṇāduṣṭatvaniścayādhīna eva bhāvasatyatvaniścaya iti bhāvaḥ

sā pramāṇāntarakṛtā tatrāpyevaṃ vicintyatām /
ityevamanavasthānād na kiñcit pramitaṃ bhavet

pramāṇāduṣṭatvaniścayo'pi pramāṇāntarādhīna ityanavasthayā mūlakṣatikaryā
na kvacit satyatvaṃ sidhyatītyāha - sā pramāṇeti

p. ८२)
ataḥ pramātā pramitaṃ pramāṇaṃ vā na sidhyati /
tasmācchūnyāśrayo hyeṣa vikalpo vividhaḥ sthitaḥ

ataḥ pramāṇāduṣṭatvāniścayāt / pramitaṃ dṛśyam / satyaṃ na sidhyati / tasmāt
satyatvāsiddheḥ / ahamidaṃ cakṣuṣā paśyāmītyādi vividho vikalpaḥ
śunyālambana eva / na cānumānādipramāṇairabhimatasiddhiḥ uktadoṣagrastatvāt
teṣāṃ pratyakṣopajīvyatvācca / na ca śūnyaṃ vā tava [kh, g: tarkeṇa]
kathaṃ siddhyatīti vācyam śūnyasiddhau pramāṇavyāpārānupayogāt
itarāsiddhimātrātmakatvāt tasyeti

so'pi śūnyātmatā prāptaḥ pramāṇāviṣayatvataḥ /
tasmācchūnyaṃ na kiñcit sadityeṣa [k, kh, gh: syādi]
pravinirṇayaḥ

ata evāha - so'pīti / śūnyapadārtho'pi śūnyatāṃ prāptaḥ
niścitāduṣṭapramāṇāviṣayatvāt / tasmāt śūnyamiti na kiñcidvastu syāt
itarāsiddhimātrātmakatvāt tasya / yadvā nanu
pramātṛpramāṇaprameyasiddhāvapi vikalpadhārāyāḥ svaprakāśāyāḥ
sattvānna śūnyamātraśeṣa iti cedāha - so'pīti / vikalpo'pītyarthaḥ /
tasyānavasthayā pramāṇāntarāviṣayatvāt svaprakāśatve
kartṛkarmabhāvavirodhāt so'pi śūnyātmatāṃ prāptaḥ / tasmādvikalparūpamapi
sanna sidhyatīti śūnyameveti pravinirṇayaḥ

iti śuṅgavacaḥ śrutvā teṣu kecid dvijādhamāḥ /
taṃ śritā niścayābhāsaṃ babhūvuḥ śūnyavādinaḥ

teṣu kauśikaśiṣyeṣu madhye / dvijādhamāḥ asārahṛdayāḥ / taṃ
śuṅgasiddhāntam

vināśamīyustanniṣṭhāḥ śūnyabhāvaṃ paraṃ gatāḥ /
ye dvijāḥ sārahṛdayāste śuṅgasya prabhāṣitam

sarvasya śūnyatāniścayena svātmānamapi śūnyaṃ manyamānāḥ
śūnyabhāvaṃ sthāvaratāṃ prāptāḥ / na tvabhāvarūpatāṃ gatāḥ vastuto
bhāvasyābhāvatvānupapatteḥ / sārahṛdayāḥ sāraṃ vicāraparaṃ hṛdayaṃ
mano yeṣām

p. ८३)
nirūpya kauśike tena samāhitahṛdo'bhavan /
tasmāt sarvātmanā tyaktvā tarkaṃ tamanavasthitam

tena kauśikoktena / śaṅkāyā nāśāt samāhitahṛdaḥ /
yato'navasthitatarkasyānarthasampattiḥ tasmāt

sadā sadāgamāyattatarkaḥ śreyaḥ samāpnuyāt /
iti prokto hemacūḍaḥ priyayā'tyantadhīrayā

sadāgamasyāyatto'nukūlastarko yasya / dhīrayā paṇḍitayā

punaḥ papraccha cātyantavismitastāṃ mahāśayām /
aho priye te vaiduṣyamīdṛśaṃ nāvidaṃ purā

asambhāvyamānāṃ yoṣiti vidvattāṃ dṛṣṭvā vismitaḥ

dhanyāsi tvamahaṃ cāpi dhanyo yastvāmupāgataḥ /
bravīṣi śraddhayā sarvaśreyaḥsiddhiṃ hi tat katham

upāgataḥ saṅgataḥ

kutra śraddhā vidhātavyā kutra vā sā na śasyate /
ānantyādāgamānāṃ vai viruddhārthasamāśrayāt

āgame śraddhā vidheyetyukte āgamānāmapyanaikyāt kutra śraddhā kartavyeti
pṛcchati - kutreti / sā śraddhā / anaikye'pyāgamānāmarthaikyādyatra
kvacicchraddhāṃ kurviti cedāha - viruddheti

ācāryamatabhedācca vyākhyātṛmatabhedataḥ /
svabuddheranavasthānāt kimādeyaṃ na vāpi kim

na viruddhārthatvaṃ baudhārhatavedādyāgamānāmeva parasparam api
tvekaikāgame'pyācāryamatabhedādapi virodha ityāha - ācāryeti / spaṣṭaṃ
caitat / tathāhi - vaidikādyāgamācāryāṇāṃ jaiminipatañjaliprabhṛtīnāṃ
parasparaṃ matavirodha iti / tathā jaiminiśāstravyākhyātṝṇāṃ
śabarakumārilaprabhṛtīnāṃ parasparaṃ vyākhyāvirodhaḥ / nanvevaṃ
parasparavirodhe'pi svabuddhyā vicārya yacchreṣṭhaṃ tacchraddheyamiti cedāha ##-
buddheḥ kālabhedena sthitibhedādekasyaiva puruṣasya kālabhedena
vividhatarkasambhavādanavasthānamiti bhāvaḥ

p. ८४)
yadyasyābhimataṃ tat [kh: tattat sadityeva] sa vadatyeva suniścitam /
anyaccāpyavyavasitaṃ hānipradamapi priye

ācāryādiparasparavirodhamevāha - yaditi / tat sādhanatvena vadati / anyat
anabhimatam / avyavasitaṃ sādhanatvenāniścitam

tatraiva sati naivāntaṃ kaścidatrāpi gacchati /
yaḥ śūnyamāha tattvaṃ so'pyaśūnyaṃ dūṣayet param

tatra āgameṣu / evaṃ sati virodhe sati / antaṃ niścayam / atrāpi vicāre kṛte'pi

aśraddheyaṃ kuto vā tat saṅgataṃ cāgamena hi /
etad brūhi priye samyag nahyetatte'styacintitam

śūnyavādināpi śuṅgena śūnyaṃ [k: śūnyatattva] tattvamuktam /
aśūnyatattvavādo dūṣitaḥ / āgamena ca tanmataṃ saṅgatameva tasmāttanmataṃ
kuto na śraddheyametanme vadetyāha - aśraddheyamiti / yadyapyeṣa
duruddharākṣepaḥ tathāpyetat tvayā cintimastīti sambhāvyate tava
sarvajñakalpatvādityāśayenāha - nahyetaditi

iti śrīmaditihāsottame tripurārahasye jñānakhaṇḍe hemacūḍopākhyāne
śraddhāpraśaṃsanaṃ nāma ṣaṣṭho'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
ṣaṣṭho'dhyāyaḥ

p. ८५)
atha saptamo'dhyāyaḥ
iti pṛṣṭā hemalekhā bhartrā priyatareṇa sā /
provāca viduṣī samyag vijñātalokasaṃsthitiḥ

atrādhyāye veda(dha)padyaiḥ śraddhāpauruṣatarkataḥ /
śivaṃ jñātvārādhya tato labhecchreya itīryate //
vijñātā lokasya saṃsthiriradhiṣṭhānaṃ svarūpaṃ [k: svarūpaṃ nāsti] vā
yayā

śṛṇu vakṣye priyatama sthirasvāntaḥ [k: sthiraśānta] samādarāt /
mano hi markaṭaprāyamasthiraṃ sarvadaiva tat

sthirasvānto'nanyacittaḥ / samādārāt idaṃ mayā śrotavyamevetyabhiniveśāt /
etaddvayasyāpi krameṇa phalamāha - mana iti / na svabhāvato manasaḥ
sthairyamiti bhāvaḥ / yata evaṃ tat tasmāt sthirasvanta iti yojanā

yata evaṃ mahānarthaṃ prāptavān prākṛto janaḥ /
calanmanaḥ sarvaduḥkhānidānaṃ dṛṣṭameva hi

tadasthairyaṇa kiṃ me bhavediti cedāha - yata iti / manasaścalanādityarthaḥ

yataḥ suṣuptau calanābhāvādvindati vai sukham /
tasmānmanaḥ sthirīkṛtya śṛṇu yatte bravīmyaham

manasaścalanādeva duḥkhamiti vyatirekato darśayati - yata iti / sarvo'pi vindati /
tasmāditi / nityaprāptasvarūpasukhaphalavighaṭakasya manaścalanasya
śravaṇaphalavighaṭakatvaṃ sutarāṃ bhavedeveti [k: bhavediti] tātparyam

anādareṇa śrutaṃ ca bhavedaśrutasammitam /
aphalaṃ syāttadatyantaṃ yathā citrataruśrayaḥ

anādareṇa śrutam / aśraddhayā asamāhitamanasā āpātataḥ śrutam / aphalamiti /
nāsti phalaṃ yasya tat / nahyetadvakṣyamāṇaṃ gānamiva śrutimātreṇa
phalāvaham kintu mananādidvāreṇa [kh: mananādvicāreṇa] / tathā
cādarābhāve mananādāvapravṛtteḥ citralikhitavṛkṣāśrayavad vyarthaṃ
śrāṇaṃ syāditi bhāvaḥ / tat śravaṇam

p. ८६)
anavasthitatarkatva(rkaṃ taṃ)mapahāya vināśanam /
sattarkamāśritya janaḥ prāpnuyāt suphalaṃ drutam

sattarkasaṃśrayeṇāśu sādhanaikaparo bhavet /
sattarkajanitāṃ śraddhāṃ prāpyeha phalabhāg naraḥ

nanu mama śuṣkatarkaṃ santyajya tvaduktau viśrabdhasyāpi sattarkaparasya na
phalaprāptirdṛśyate ? iti cedāha - sādhanaikapara iti / nanvalaṃ
sattarkeṇa kutarkayāpi me sādhanaparatvenaiva phalaṃ bhavediti cedāha -
sattarketi / kutarkasya vakṣyamāṇasattarkamūlakeśvarasiddherdurghaṭatvena
tadārādhanaśraddhā dūrato'pāsteti kevalārādhanasya aśraddhayā hutaṃ dattam ....
na ca tat pretya no iha (bh० gī० १७/२८) iti nītyā niṣphalatvamiti [k:
niṣphalamiti] sattarkajanitaśraddhayā sādhanapara eva phalabhāg
bhavatītyāśayaḥ

anavasthitatarkaṃ taṃ vihāyālokaya priya /
pravṛttimetāṃ jagataḥ śraddhayā phalaśālinīm

taṃ prasiddhatvena [k: prasiddhaṃ] tvayi sthitam / anavasthitatarkarahitānāṃ
śraddhāvatāṃ phalaśālinīṃ pravṛttimavalokaya / tatphalasya na parokṣatvamiti
bhāvaḥ

sutarkitena kālena karṣakaḥ kṣmāṃ vikarṣati /
śraddhayaiva tathā rūpyasvarṇaratnauṣadhādikam

tāṃ pravṛttimevāha - sutarkiteneti / āgamāviruddhastarkaḥ sutarkaḥ /
śāstroktahalapravāhaṇayogyastarkitānāvṛṣṭyādisasyapratibandhābhāvavāṃśc
a yaḥ kālaḥ tena nimittena karṣati / na tu tarkānavasthityā sarvatrāśraddhayā
tvamiva tūṣṇīṃ tiṣṭhatīti bhāvaḥ

p. ८७)
vyavasyanti sutarkeṇa tyaktvā tarkānavasthitim /
tasmāt sutarkaśraddhābhyāṃ vyavasya śreya ātmanaḥ

tathā pūrvasmādidamatisūkṣmalakṣaṇamapi
svarṇādikametāvanmaulyārhamevaṃvidhaguṇametadrogaharamiti parīkṣakā
āgamatarkābhyāmeva vyavasyanti prāyo na visaṃvādyante cetyāha -
vyavasyantīti / sutarkaḥ puruṣaḥ kvacidvisaṃvādyate na tvanavasthitatarkavat
sarvaśūnyatvenātmāpahāraṃ prāpnotīti yataḥ tasmāt / ātmanaḥ śreyo vyavasya
niścitya tatsādhanāya yetediti sambandhaḥ

prayatettatsādhanāya [k: prayateta sā] nahi tarkānavasthiteḥ /
viramet pauruṣād yatnācchuṅgānuganarā iva

śuṅgānugatā narā ivāsattarkeṇa sarvaśūnyatvaṃ sambhāvya
pauruṣayatnavimukho na bhavedityāha - nahīti

śraddhayā pauruṣaparo na vihanyeta [k: nyate] sarvathā /
dṛḍhaṃ pauruṣamāśritya na prāpyeta kathaṃ phalam

pauruṣaṃ puruṣayatnaḥ [gh: prayatnaḥ] / phalāprāptyā [k, kh:
phala] na vihanyeta [k: nyate] / keṣāñcit phalābhāvo
hyadṛḍhapauruṣādityāha [gh: hyadṛṣṭa] dṛḍhamiti

pauruṣāt karṣakā dhānyaṃ vaṇijo dhanameva ca /
rājyalakṣmīṃ nṛpā viprā vidyāṃ sarvasukhāśrayām

dṛḍhapauruṣayogānnāphalamiti [k: nna phalamiti; gh: nāṃ phalamiti; kh: nna
phalaṃ kathamiti] sapratyayamāha - pauruṣāditi

śūdrā bhṛtiṃ sudhāṃ devāstāpasā lokamuttamam /
prāpuranye'pyabhimataṃ pauruṣeṇaiva karmaṇā

anavasthitatarkeṇāśraddhena puruṣeṇa kim /
kadā kiñcit kathaṃ prāptaṃ phalaṃ vada vimṛśya tat

kiñcidapi kiṃ phalaṃ kadā kāle sādhanaṃ vinā kathaṃ prāptam

p. ८८)
kvacit phalavisaṃvādāt sarvatrāśvāsavarjane /
vijānīyād daivahataṃ taṃ svātmaripurūpiṇam

nanu karṣakādīnāmapi kvacit phalābhāvo dṛśyata iti
cettāvataivāpravṛttirmarkhyamūlaivetyāha - kvaciditi / āśvāsaḥ śraddhā

ataḥ pauruṣamāśritya śraddhāsattarkapoṣitam /
śreyasāṃ yanmukhyatamaṃ sādhanaṃ tat samāśrayet

śraddhāsattarkābhyāṃ poṣitam / sattarkeṇa śraddhodayaḥ śraddhayā ca
pauruṣasya vṛddhirbhavediti bhāvaḥ / nanu śreyaḥsādhanamapi karmayogādikaṃ
śātreṣu bahuvidhaṃ prasiddham tatra katamaṃ (mat) sādhanaṃ
samāśrayediti cedāha - śreyasāmiti

tatra dṛṣṭaṃ [k: dṛṣṭasādha] sādhanānāṃ vaicitryaṃ ca
pṛthagvidham /
teṣu yat sarvathā sādhyaṃ sādhayettaddhi mukhyakam

nanu [k: nanu nāsti] śreyaḥsādhanasya mukhyatvaṃ kiṃ taditi cedāha ##-
vicitratvena pṛthagdṛṣṭeṣu sādhaneṣu / sādhyaṃ phalaṃ sarvathā yat sādhayet /
nehābhikramanāśo'sti (bha० gī० २/४०) ityādinītyā phalaviparyayo
netyuktam - sarvatheti

tat sutarkānubhūtibhyāṃ vyavasyāśu samārabhet /
tatte sarvaṃ pravakṣyāmi sāvadhānaḥ [kh: dhānaṃ] śṛṇuṣva tat

etadapi vā kathaṃ niścetavyamiti cedāha - taditi / vyavasya niścitya / tatra
nṛdehasya śreyonidānasya durlabhasya mṛtyugrastatvenāha - āśviti /
niścayo vā mama kathaṃ syāditi cedāha - taditi / mukhyaṃ śreyastatsādhanaṃ
cetyarthaḥ

śreyastaddhi vijānīyādyasmād bhūyo na śocati /
śokaḥ sarvata eva [kh: evāsya] syād dṛśyate sūkṣmayā dṛśā

tatrādau mukhyaṃ śreyaḥpadārthamāha - śreya iti / nanu tādṛśaṃ
dhanādikameveti cennetyāha - śoka iti / kathaṃ dhanādeḥ śoka iti cedāha ##-
dṛśyate

p. ८९)
yacchokairanusaṃbhinnaṃ na tacchreyo hi sarvathā /
dhanaṃ putrāstathā dārā rājyaṃ kośo balaṃ yaśaḥ

tadevāha - yaditi / anusaṃbhinnaṃ yutam

vidyā buddhirdarśanaṃ ca dehaḥ saundaryasampadaḥ /
sarvametadasthiratvāt kālasarpamukhasthitam

antaramāha - vidyetyādi / darśanaṃ karaṇam / saundaryasya sampadaḥ
prāptayaḥ / etat sarvaṃ nāśagrastamiti śokāvahatvād duḥkhayutamityāha [g:
yuta nāsti] sarvamiti

śokāṅkuramahāśaktibījātmakatayā sthitam /
kuta ātyantikaśreyaḥsādhanatvaṃ samarhati

śokāṅkurotpādane mahāśaktiyutabījavad aṅkuraśakteḥ
sādhāraṇopāyairanāśyatvamiti bhāvaḥ / tasmādevaṃvidhasya
naivātyantikaśreyaḥsādhanatvamityāha - kuta iti

ataḥ paramakaṃ śreya etadvai mukhyato bhavet /
evaṃ dhanādiviṣaye yadādeyatvavibhramaḥ

ato dhanāderasādhanatvāt [k: deḥ sādha] / śreyaḥ śreyaḥ sādhanam /
etad vakṣyamāṇaṃ devatārādhanam / kathaṃ devatārādhanenaiva śreyolābha
ityetannirūpayitumiha - evamiti / śreyaḥsādhanatvenetyarthaḥ / yaditi / yo
vibhrama ityarthaḥ

mohādeva samudbhūto mohako hi maheśvaraḥ /
yo hi sarvajagatkartā tasmāt sarve hi mohitāḥ

ko'yaṃ mohaka iti cedāha - maheśvara iti / kathambhūto maheśvara iti
cejjagatkartṛtvena siddho nāpahnavanīya ityāha - yo hīti

p. ९०)
mohayatyalpako'pīha vidyābhāgasamāśrayat /
kāṃścideva na sarvān sa yasmādvidyā hi sā mitā

kathamasyaivaṃ sāmarthyamiti cedāha - mohayatīti / alpako dehādiparicchinna
aindrajālikaḥ / asya vidyā miteti na sarvamohakatvam

alpavidyaṃ māyinaṃ cāpyanutkrāntā janā yataḥ /
mahādevaṃ mahāmāyaṃ kaḥ samutkrāntumarhati

māyinamaprasādya tanmohataraṇamaśakyamityāha - alpavidyamiti

yo hi loke'lpamāyāṃ ca jānāti pratividyayā /
sa mohānnirgataḥ svasthaḥ sukhamāpnotyanaśvaram

alpamāyām / niroddhumiti śeṣaḥ / svasthaḥ tannirmitasarpādibhayarahitaḥ /
anaśvaraṃ tanmāyayā'vināśyam

evaṃvidhāpi vidyā tamanāśritya tu māyinam /
na labhyā sarvathā yāvadaprasādya tu sarvathā

evaṃvidhāpi alpamāyāpratirodhrī [k, kh: rodhividyā] vidyāpi / tam
alpamāyinam / yāvat yasmāt / anāśritya sarvathā dhanadānasevanādyairaprasādya
na labhyā / sarvathā tamaprasādyetyagrimeṇa sambandhaḥ

tasmānmahāmāyinaṃ tamaprasādya kathaṃ bhavet /
mahāmohasya taraṇaṃ tasmāttaṃ sarvathā śrayet

tasmāt aprasādane mohataraṇābhāvāt

yastaṃ prasādayet samyak prāpya tasya prasādataḥ /
mahāvidyāṃ sa tanmohād dhruvamutkrāntimeṣyati

samyak akāpaṭyena / mahāvidyām advitīyaśivātmavidyāṃ prāpya
mahāmāyāsvarūpaṃ vedeti śeṣaḥ / tanmohāt mahāmāyākṛtamohāt

anye'pi yogāḥ kathitāḥ śreyaḥsādhanakarmaṇi /
maheśvaraprasādātte vinā na syuḥ phalāptaye

yogāḥ yuktayaḥ praṇāyāmādirūpāḥ / śreyaḥsādhanakarmaṇi hetutveneti śeṣaḥ

p. ९१)
tasmādārādhayedādau maheśaṃ viśvakāraṇam /
bhaktyā sa sādhayedāśu yogānmohavināśanān

tasmāditi / yasmādīśvarārādhanaṃ vinā kimapi sādhanaṃ phalaparyavasāi na
bhavettasmādityarthaḥ / ādāviti / sarvasādhanopakrama ityarthaḥ / kuta evamiti
cedāha - viśvakāraṇamiti / tasya sarvakartṛtvena tadanugrahaṃ vinā na
kiñcit setsyatīti bhāvaḥ

etajjagat kāryabhūtaṃ pratyakṣaṃ paridṛśyate /
sāṃśamevaṃ pṛthivyādyamadṛṣṭārambhamapyalam

kathameṣa īśvaro jagatkartṛtvena sidhyatītyāśaṅkyeśvaraṃ
prasādhayitumupakramate - etaditi / pratyakṣeṇa dṛśyamānamityarthaḥ / tacca
jagat kāryabhūtameva [k: mevaṃ] pratyakṣaṃ yathā tathā [g: tathā
nāsti] paridṛśyate] / nanu ghaṭādīnāṃ kāryabhūtameva [gh: tu
nāsti] pṛthvīsamudragiryādīnāmiti cet teṣāmapi sāṃśatvena hetunā
kāryatvaṃ setsyatītyāha - sāṃśamiti / adṛṣṭārambhamapi
adṛṣṭotpattikamapi pṛthivyādi

kāryaṃ syāditi tarkeṇa bahvāgamadṛḍhena tu /
vyavasyettatra kartāraṃ sarvakartṛvilakṣaṇam

yat sāvayavaṃ tat kāryamiti tarkeṇa pṛthivyādyutpattimaditi bhāvaḥ /
nanvevamapi paramāṇvākāśādīnāṃ niravayavatvenākāryatvānna jaganmātraṃ
kāryabhūtamiti cenna vedyatvena hetunā kāryatvasiddheḥ / na ca niravayatvena
kāryatvābhāvaḥ sādhayituṃ śakyaḥ vedyatvahetukānumānasya [k:
vedyatve] vahvāgamasaṃvādena dṛḍhataratvādityāha - vahvāgameti /
tathā cāgamaḥ - dyāvābhūmī janayan deva ekaḥ (ṛg० १०/८१/३)
ātmana ākāśaḥ sambhūtaḥ (taitti० u० २/१/१) ākāśavāyupramukhaṃ
dṛśyaṃ sarvaṃ sasarja saḥ ityādayaḥ / tathā ca dṛśyamātrasya jagataḥ
kāryatve siddhe tatra jagati kāryatvena kartṛpūrvakatvaṃ sādhayedityāha -
vyavasyediti / tatra pṛthivyādau kartāraṃ niścayaviṣayīkuryādityarthaḥ / nanu
ghaṭāditattatkāryeṣu siddhakulālādibhiḥ siddhasādhanamityāśaṅkyāha -
sarvakartṛvilakṣaṇamiti / nāsadāsīnno sadāsīttadānīm (ṛg० १०/१२९/१)
purā sṛṣṭeridaṃ dṛśyaṃ nāṇumātramapi sthitam
ityādyāgamānurodhenānādisṛṣṭābupādānādyabhāvāttadanapekṣaṇāt
sarvakartṛvilakṣaṇa eṣa kartā sādhita iti bhāvaḥ

p. ९२)
yadyapyakartṛkaṃ lokamāha kaścidihāgamaḥ /
tadanekairāgamaistu tarkarūḍhaiḥ subādhitam

nanvāgamasaṃvādādyathā jagatkāryatvagamakastarko
dṛḍhastathā'kāryatvānumāpakastarko'pi dṛḍhaḥ kuto na bhavet ?
akartṛko hyayaṃ lokaḥ svabhāvaikasamāśrayaḥ
ityādibārhaspatyāgamasaṃvādādityāśaṅkya naiṣa sadāgamaḥ
kintvāgamābhāsa eveti cārvākamataprakṣepāyopakramate yadyapīti /
kaścidāgamaśvārkāgamaḥ / atreyaṃ cārvākaprakriyā -
bhūmirāpo'nalo vāyuriti tattvacatuṣṭayam /
pratyakṣamānasaṃsiddhaṃ pañcamaṃ nahi vidyate //
etatsaṃghātmako lokaḥ pratikṣaṇavibheditaḥ /
pūrvapūrvajagajjālasadṛśaṃ cottarottaram //
evaṃsvabhāva evaiṣa lokaḥ svasmin pratiṣṭhitaḥ /
guḍodakādau svābhāvyād madaśaktiryathodbhavet //
evaṃ strīgarbhanihite śukraśoṇitabudbude /
utpadyate hi caitanyaṃ kriyājñānasamāśrayam //
madaśaktiyutaṃ toyaṃ madyamityucyate yathā /
evaṃ caitanyasaṃyukto dehaḥ puruṣa ucyate //
sukhaṃ pumarthaḥ svargaḥ syād duḥkhaṃ tu narako bhavet /
pravartate [k: rtakadaya] dvayaṃ caitat svabhāvādeva nānyathā //
sukhaduḥkhābhāsa eva [k: evaṃ] saṃsāraḥ praṇigadyate /
madirāmadaśaktestu yathā nāśaḥ svabhāvataḥ //
evaṃ caitanyanāśo hi mokṣa ityucyate budhaiḥ /
mṛtasya nāsti svargo vā narako vāpi kaścana // iti [k: iti nāsti] /
tat cārvākaśāstram anekaiḥ āstikanāstikasambandhibhiḥ āgamaiḥ tarkarūḍhaiḥ
anugatatarkairbādhitam atastyājyameveti sambandhaḥ

p. ९३)
yatrātmanāśa evārthaḥ pratyakṣaikasamāśrayāt /
tadāgamābhāsameva na taddhi mahadāśrayam

anekāgamavirodhādābhāsatvamuktam / samprati sarvānubhavavirodhācca
tathātvamāha - yatreti / jananamaraṇādipravāharūpaḥ saṃsāro
duḥkharūpatvāddheyaḥ / etasya [k: etatsaṃ] saṃsārasya
nimittābhāvasampādanenābhāve [k: bhāvā] sati
mahāsukhasvarūpānubhavo mokṣaḥ paramapuruṣārtharūpo'ta eva sarvairupādeya iti
hi mokṣasya puruṣārthatvavādināṃ mataṃ tarkāgamādyairvyavasthitam / evaṃ sati
pratyakṣaikapramāṇasamāśrayādātmanāśa eva puruṣārtha iti yatra śāstre uktam
tadāgamābhāsameva / ata eva tacchāstraṃ na mahatāṃ
sārāsāravivecakānāmāśrayaṃ puruṣārthaprayojakatvenopādeyam / ātmanāśaḥ
puruṣārtha iti vadan cārvākaḥ praṣṭavyaḥ - kimātmanāśo yaḥ [k:
nāśo'yaṃ] kaścana puruṣārthaḥ ? uta tatsamudāyaḥ ?
āhosvidātmasāmānyanāśaḥ ? nādyaḥ ātmanastava mate kṣaṇikatvena
yatkiñcidātmanāśasya prāptatvāt itarayorasambhavāt / nāpi
svātmasantānanāśaḥ svātmanāśakāle svasyāsattvena
svātmanāśasyāprāptavyatvenāpuruṣārthatvāt / aprāptavyasyāpi
puruṣārthatve'nyātmanāśasyāpi pumarthatvaprasakteḥ / atha ca svātmanāśaḥ
pramāṇena siddho'siddho [k: asiddo ...... pramāṇena siddhaḥ? nāsti]
vā puruṣārtha ityucyate ? asiddha iti cet naraviṣāṇasyāpi tathātvāpatti / siddha
iti cet ? kena pramāṇena siddhaḥ ? pratyakṣaṃ hi sannikarṣanimittakaṃ
nātītānāgatayoḥ sambhavati / na tato'nyat pramāṇamanumānādyabhyupagamyate
tvayā / pratyakṣamātraṃ pramāṇaṃ vadatā tvayā guḍodakādau
madaśaktyudbhavāderdṛṣṭāntatvanirūpaṇena caitanyādyudbhavādisādhanamapi
nāsti [k: tannāsti] me jihveti kathanatulyamityādi jñeyam

p. ९४)
śuṣkatarkaikasaṃkḷptaṃ śāstraṃ tat tyājyameva hi /
anyairapyucyate kaiścid jagadetat sanātanam

na tacchāstraṃ sarvajñapraṇītamityāha - śuṣketi / śuṣkaḥ upapattirahito
yastarkaḥ / tadekasakḷptaṃ tanmātramūlakamityarthaḥ / evaṃ
prakṛtapakṣapratipakṣabhūtaṃ cārvākamataṃ nirasya tathāvidhameva
sāṃkhyamataṃ nirākartumanukramate - anyairiti / sanātanaṃ sadrūpamityarthaḥ
/ te hi pariṇāmavādino jagat kāraṇāntarbhāvena sadevetyāhuḥ

abuddhimatkartṛkaṃ cetyetaccāpyasamañjasam /
kriyāyā buddhipūrvatvādabuddhau tadadarśanāt

abuddhimaditi / guṇasāmyāvasthātmakaṃ prakṛtitattvaṃ jaganmūlakāraṇam /
tacca abuddhimat [k, gh: buddhi] citikriayārahitaṃ jaḍam / yathā hi
mṛtpiṇḍo ghaṭātmanā pariṇamamānaḥ kulālaṃ kartāramapekṣate na tathā
prakṛtitattvaṃ jagadrūpeṇa pariṇamamānaṃ svātiriktaṃ kañcit
kartāramapekṣate / ato jagatkriyāyāṃ svatantramiti jagatkartṛbhūtamityartha
ityetadanīśvaraṃ sāṃkhyamatam / atra hi prakṛtiḥ sattvāṃśena darpaṇatulyena
svāntaḥ śuddhacidrūpaṃ puruṣaṃ svīyatamo'śamayaṃ ca dṛśyaṃ
pratibimbatvena gṛhṇāti / evaṃ pratibimbabhūtadraṣṭṛdṛśyasambandhādeva
prakṛtyavivekamāpannaḥ puruṣo ghaṭamahaṃ jānāmiti mṛṣābhimānena
yujyate / ayameva puruṣasya saṃsāraḥ / yadā hi puruṣo vicāreṇa
prakṛterviviktamātmānaṃ jānāti tadā jñātacora iva tatpuruṣaviṣaye
prakṛteranupasaraṇāt puruṣapratibimbāgrahaṇena
mṛṣābhimānābhāvānmucyata iti tanmatam / atra hi prakṛtau
pratibimbabhūtacitsambandhād dṛśaprakāśo'bhyupagataḥ / tatra pratibimbabhūtā
cit kimāśrayavajjaḍarūpā ? uta svanimittamukhya(cidvaca)cidrūpā
vā? ādye jaḍasya dṛśyaprakāśatvānupapattiḥ / jaḍasya
dṛśyaprakāśatvābhyupagame prakṛtisattvāṃśasambandhenaiva sarvopapattau
citpratibimbakalpanavaiyarthyāpatteḥ / dvitīye'pi dṛśyasya
mukhyacitsambandhopagamāccitpratibimbavaiyarthyameva / na ca darpaṇasya
ghaṭādyaprakāśakatve'pi tatpratibimbitasaurātapasya gauṇasya
ghaṭādiprakāśakatvavaccitipratibimbasyaiva dṛśyaprakāśakatvamiti vācyam
saurātapapratibimbasyālokavad ghaṭādiprakāśasahakāritvenāprakāśakatvāt /
nāpi pratibimbabhūtacitaścijjaḍobhayarūpatvamubhayavilakṣaṇatvaṃ vā [k:
vā nāsti] vaktuṃ yujyate virodhādapasiddhāntācca / atha ca
svabhāvasyānyathābhāvānupapatteḥ puruṣaṃ prati pravṛttisvabhāvāyāḥ
prakṛtervivekajñānānantaraṃ [kh, g, gh: nottaraṃ]
nivṛttisvabhāvatā'nupapattyā bandhasya parihāryatvamityādyabhisandhāyāha ##-
kulālādibuddhipūrvatvāt evambhūtaṃ ghaṭamevaṃ karomīti
buddhimatpūrvakatvād ghaṭādyutpatterabuddhimatprakṛtikartṛkatvaṃ na jagat iti
bhāvaḥ / abuddhāviti / citralikhitakulālādau ghaṭādikriyādarśanāt

p. ९५)
vahvāgamopaṣṭambhācca kartā'tra syāddhi buddhimān /
buddhimatkartṛkaṃ kāryaṃ sarvatraiva hi darśanāt

bahviti / sa īkṣata lokānnu sṛjā (aita० u० १/१) iti nāmarūpe vyākaravāṇi
(chā० u० ६/३/२) iti ādikartā hi bhagavānādāvālocya vai jagat / yogīva
nirupādānaṃ praviviktamakalpayat // ityādi bahvāgamaḥ upaṣṭambha
āśrayabhūto'nukūlo yasyaivaṃvidhād jagad buddhimatkartṛkaṃ kāryatvād
ghaṭādivaditi balavattarkād buddhimāneva jagatkartā bhavennābuddhimato
prakṛtirityarthaḥ / kāryasya buddhimatkartṛkatve dṛṣṭāntadaurlabhyaṃ
pariharati - sarvatraiveti [k: sarvatraiveti] / sāṃkhyamate jaḍasya
prakṛtitattvasya kartṛtvasādhane dṛṣṭāntadaurlabhyavannātreti bhāvaḥ

p. ९६)
evaṃ sattarkāgamābhyāṃ jagadetat sakartṛkam /
sa kartā laukikebhyastu kartṛbhyaḥ syādvilakṣaṇaḥ

sakartṛkaṃ siddhamiti śeṣaḥ / nanu ghaṭādikartā kulālādirivādikartāpi puruṣaḥ
kaścana siddhyatu tasya punarna parameśvaratvaṃ siddhyatītyāśaṅkyāha - sa
karteti

kāryasyācintyarūpatvādacintyānantaśaktikaḥ /
aparicchinnasāmarthyaḥ kāryasyānuguṇatvataḥ

tatra hetuḥ - acintyarūpatvāditi / kathaṃ jale sthitā pṛthvī jalaṃ vāpi kathaṃ
divi ityādirītyā kāryasyācintyatā [k: kāya] jñeyā /
laukikakartṛvailakṣaṇyamevāha - acintyeti / evaṃvidhā etāvatīti tacchaktirna
cintyā nāpi sāntā / etadeva niṣkṛṣyāha - aparicchinneti / loke kāryānuguṇa
[k: kāryaguṇa] jñeyā / laukikakartṛvailakṣaṇyamevāha - acintyeti /
evaṃvidhā etāvatīti tacchaktirna cintyā nāpi sāntā / etadeva niṣkṛṣyāha -
aparicchinneti / loke kāryānuguṇa [k: kāryaguṇa] eva kartā dṛṣṭa
ityaparicchinnajagato'paricchinnasāmarthya eva karteti bhāvaḥ

sa prapannān samuddhartuṃ prabhavatyeva sarvathā /
atastaṃ sarvabhāvena śaraṇīkuru sarvadā

evāvatā grantheneśvaraṃ prasādhya samprati tasya śaraṇyatvamāha - sa
prapannāniti / yata evamatastaṃ jagatkartāram / sarvabhāvena niṣkāmatvenetyarthaḥ /
ye kāminasteṣām ardho bhāvo'rdhaṃ cittaṃ kāmye tiṣṭhati ardhamīśvara iti
bhāvaḥ

nidarśanaṃ te'bhidhāsye śṛṇu pratyayakāraṇam /
miteśvaro'pyatra [g: prīteśvaro; gh: miteśvare] loke cākāpaṭyāt
prasāditaḥ

sarvabhāvena śaraṇīkṛtā te phalaprāptau nidarśanaṃ dṛṣṭāntaḥ / pratyayo
viśvāsaḥ / akāpaṭyāt sarvabhāvena

p. ९७)
sarvātmanā yojayati sveṣṭārthaiḥ śreyase naram /
eṣa lokeśvaro devaḥ samyag yena prasāditaḥ

sarvātmanā kāyavāṅmanobhiḥ prasādita iti sambandhaḥ / śreyase sukhāya

tasmai kiṃ na diśed brūhi bhaktalokaikavatsalaḥ /
puruṣā hīśvarā loke cānavasthā avatsalāḥ

tasmai upāsakāya / iṣṭaṃ na diśet kim? api tu diśedevetyarthaḥ / yadvā
kimiṣṭaṃ na diśedapi tu sarvaṃ diśedeva / nanu miteśvarāṇāṃ svasya
samīhitasevyabhāvasampattyā santoṣādiṣṭārthapradānaṃ yujyate / parameśvarasya
[mitaiśvarasyāprāptakāmatvena kāmāptau saṃtoṣānubhavo yujyate
parameśvarasya tu prāptakāmatvena naiva tatra saṃtoṣasyāsaṃtos'sya vā
saṃbhāvanā saṃtoṣānubhava eva copāsitasyepsitaphaladātṛtve prayojaka iti
nanvityādi cedāhetyantasya granthasyāśayaḥ] prāptakāmatvena [kh,
g, gh: āpta] saṃtoṣābhāvāt kathamupāsitasyepsitadātṛtvamiti cedāha
- bhaktalokaikavatsala iti / tasya bhakteṣu vatsalasvabhāvatvādeva phaladānaṃ
yujyata iti bhāvaḥ / kiñca miteśvarebhyaḥ phalaprāptiraniyatā parameśvarāttu
niyatetyāha - puruṣā iti

nirdayāśca kṛtaghnāśca tasmāt tatphalamasthiram /
parameśo dayāsindhuḥ kṛtajñaḥ [k: kṛtijñaḥ] suvyavasthitaḥ

tasmāt anavasthātvādidharmacatuṣṭayayutatvāt [k: yuktāt] / asthiram
aniyatam / īśvarastu naivaṃvidha ityāha - parameśa iti / yata evamataḥ
phalaprāptirbhavedeveti śeṣaḥ

anyathā'nādisaṃsāre kuto'nindyatvamāpnuyāt /
vyavasthitā jagadyātrā [k: jagaddhātrā] cāpi vā syāt kathaṃ vada

kuta etanniścitamiti cedāha - anyatheti / avatsalatvādisattve'nindyo na bhavet
anavasthaścet tatkṛtā lokayātrā vyavasthitā na bhavediti bhāvaḥ

p. ९८)
anavasthasya rājyaṃ tu naṣṭamālokyate yataḥ /
tasmādeṣa [k: tasmādeva] dayāsindhuḥ suvyavasthaśca kīrtitaḥ

anavastheti / īśvarasyānavasthitatve tatsṛṣṭaḥ saṃsāro'kāla eva naśyediti
bhāvaḥ

tameva sarvabhāvena bhaktyāśu śaraṇīkuru /
śreyasi tvāṃ yojayet sa tvaṃ na tatparatāṃ vraja

sarvabhāvena niṣkāmatvena / śreyasi paraśreyaḥsādhane / tvaṃ na tatparatāṃ
vrajeti / paraśreyaḥsādhanasya durvijñeyatvena tvaṃ na tatparo bhava kintu tvaṃ
sampratīśvaramārādhaya / tvadārādhanena prasanna īśvarastvāṃ tatra yojayediti
bhāvaḥ / etena matabhedeṣu sādhanabhedasattvāt kiṃ sādhanamupādeyamiti
śaṅkā prakṣiptā jñeyā

upāsanaṃ [k: sane] bahuvidhamārttyārthārthitvato'pi ca /
nirhetukaṃ tu kvācitkaṃ tat satyopāsanaṃ bhavet

niṣkāmatveneśvarabhajanameva sarvathā phalapradamiti [k: phalamiti]
vaktumāha - upāsanamiti / ārtyā rogādikṛtapīṭayā arthārthitvataḥ
dhanādilipsayā vā / ābhyāṃ kṛtamupāsanaṃ prasiddhaṃ sarvatra / nirhetukaṃ
niṣkāmopāsanaṃ satyopāsanam satyaphalasahitatvāt

dṛṣṭametat sarvato vai cārtenopāsitaḥ prabhuḥ /
kadācid dayayāviṣṭa vārtti tasya vimocayet

etadeva laukikadṛṣṭāntenopapādayati - dṛṣṭametaditi

upekṣeta kadācidvopāstervai tāratamyataḥ /
evamevārthārthino'pi mitaṃ cāniyataṃ phalam

tāratamyata iti / upāsterādhikye ārti mocayedanyathopekṣeteti bhāvaḥ / evamiti /
upāstitāratamyādarthaprāptiraprāptirvā / evaṃ kāmināmupāsanaphalamaniyataṃ
mitaṃ ca yadarthamupāsanaṃ tasya parimitatvāt upāsyasya kṛtaghnatve
phalāprāpteśceti bhāvaḥ

p. ९९)
nirhetukopāsakasya jñātvā nirhetutāṃ cirāt /
miteśvaro'pyavyavasthastadadhīno bhavatbalam

tadadhīnaḥ upāsakādhīnaḥ

nirhetukatvajñānāya ciraṃ syādajñabhāvataḥ /
eṣa sarveśvaro devo hṛdayeśo'khilasya tu

miteśvarasya svopāsakanirhetukatvajñānāya [k: upā]
kālavilambāpekṣāsti īśvarasya tu na sā'pītyāha - eṣa iti /
antaryāmitvenākhilahṛdayasthitatvād hṛdayeśaḥ

sarvaṃ jānāti tatkāle phalaṃ dadyācca satvaram /
ārtamarthārthinaṃ devastadarthenābhiyojitum

yataḥ sarvamupāsakahṛdgatamapi svabhāvata eva jānāti atastatkāle
upāsanārambhakāle eva / atrārthārthārthinorapi [k, gh: rtārthi] naiva
satvaraṃ phalaṃ prayacchati kintu karmaparipākānantaramityāha - ārtamiti /
tadarthena kāmitārthena

svaniyatyā karmapākaṃ pratīkṣya phalamādiśet /
nirhetukopāsakaṃ svamananyaśaraṇaṃ vibhuḥ

svaniyatiḥ svakṛta [kh: svakṛta] idamitthaṃ bhavediti saṃkalpaḥ / tayā
yutaḥ / tāmanullṅghyeti yāvat / karmapākamiti / atredamavadheyam - karmaṇaḥ
pākaḥ phalapradānasāmarthyam / tacca kvacit karmaṇāṃ kālaviśeṣakṛtam kvacit
karmāntarasahakārakṛtam / karmāntarasahakṛtamevotkaṭaṃ karmetyucyate /
yaduktaṃ śivāgame - karmaṇaḥ paripākastu kālāt karmāntarādapi iti /
anyatrāpi - atyutkaṭaiḥ puṇyapāpairihaiva phalamaśnute iti /
evaṃvidhakarmapākaṃ pratīkṣyetyarthaḥ / svaṃ svīyamityarthaḥ

p. १००)
jñātvā sarvātmanā tasya yogakṣemavaho bhavet /
apratīkṣya [k: apratīkṣyaṃ] karmapākaṃ niyatiṃ svāṃ vidhūya ca

taṃ svīyaṃ jñātvā / sarvātmanā manovāgādibhiḥ / yogakṣemavahaḥ / aprāptasya
prāptiryogaḥ prāptasya rakṣaṇaṃ kṣemaḥ / etadubhayaṃ tasya svayameva karotīti
bhāvaḥ / niyatiriti prārabdhopalakṣakam / niyatiṃ prārabdhaṃ ca vidhūyetyarthaḥ

tatsādhanaṃ samprasādhya drutaṃ saṃyojayet phale /
etadeva maheśatvaṃ svātantryamahataṃ tu yat

tasya niṣkāmino yat sādhanaṃ tad vighnāpanayanena samyak prasādhya / nanu
niyatiḥ sarvathā'nullaṅghanīyeti cedāha - etadeveti /
niyatyāderullaṅghanamevetyarthaḥ

prārabdhaṃ niyatirvāpi maheśavimukhe [k: vimukhaṃ] bhavet /
etanmṛkaṇḍutanaye'tyantamīśvaratatpare [ekā kathā padmapurāṇe
sṛṣṭikhaṇḍe trayastriṃśe'dhyāye draṣṭavyā /]

nanu prārabdhaniyatyorapyullaṅghane prārabdhaṃ no nāśamiyānniyatirnānyathā
bhavet ityāgamavirodha iti cedāha - prārabdhamiti / maheśavimukhe eva
prārabdhaniyatyormāhātmyamityāgamatātparyamiti bhāvaḥ /
naitadāgamaikasiddham kintvaitihyasiddhamapītyāha - etaditi

sarvairjñātaṃ maheśasya niyatyārabdhalaṅghanam /
atropapattiṃ te vakṣye śṛṇu prāṇapriyeritām [k: ritam]

niyatyārabdhayorlaṅghanam / atra anullaṅghyaprārabdhaniyatyullaṅghane /
upapattiṃ yuktim

yadyapyanullaṅghanīye prārabdhaniyatī khalu /
tathāpyapauruṣāṇāṃ tat prārabdhamanapohanam

apauruṣāṇāṃ puruṣayatnarahitānām

ata eva prāṇayamaiḥ prārabdhaṃ parijīyate /
na tān dṛṣṭeṣu duḥkheṣu prārabdhaṃ yojayatyalam

kuta etaditi cedāha - ata eveti / prāṇayamaiḥ prāṇāyāmaparairyogibhiḥ /
kathametajjñātamiti cet pratyakṣeṇetyāha - na tāniti

p. १०१)
prārabdhāhinigīrṇāste ye pauruṣaparāṅmukhāḥ /
etanniyatisaṃkḷptaṃ tathaivānubhavānnanu [kh: na tu]

kuta evaṃ pauruṣāt prārabdhaparābhava iti cettathaiva niyatisvabhāvādityāha -
etaditi / pauruṣeṇa prārabdhāpohanamityarthaḥ / tathaiveti / anubhavānurodhena
niyateḥ kalpanīyatvāditi bhāvaḥ

niyatiḥ syādīśaśaktiḥ saṅkalpaikasvarūpiṇī /
satyasaṅkalpa eveśo'nullaṅghyā hyata eva sā

ata eva satyasaṅkalpatvādeva

kuṇṭhitā sāpi bhavati parameśaparāyaṇe /
akuṇṭhitāpi bhavati yataḥ sā tādṛśī bhavet

sāpi anullaṅghyā niyatyapi / nanvanullaṅghyatvaṃ kuṇṭhitatvamityubhayaṃ
viruddhamiti cedāha - akuṇṭhiteti / yataḥ sā niyatiḥ tādṛśī
parameśaparāyaṇe kuṇṭhitasvabhāvaiva / ayaṃ bhāvaḥ - prārabdhaṃ hi
phalonmukhaṃ karma tacca yoginā jīyata iti tathaiva tanniyatyā niyataṃ parikalpyate /
prakṛte niṣkāyu(mo)pāsako'pi karmayogitvena yogī bhavedityanenāpi
tajjiyate / tathā ca prārabdhamayogina evānullaṅghyam / niyatiśca
bhagavatsaṅkalparūpā sā sarvathānullaṅghyasvabhāvaiva / tathāpi
bhagavatparāyaṇe sā kuṇṭhitā bhavatīti ca tasyāḥ svabhāva eveti sā
sarvatrākuṇṭhitaiveti

tasmāt kutarkaṃ santyajya maheśaṃ śaraṇīkuru /
ahetukatayā sa tvāṃ niyojayati śreyasi

yasmād bhagavatpare prārabdhaniyatyorapyanantarāyatvaṃ tasmāt / ahetukatayā
niṣkāmatvena / saḥ maheśaḥ

etāvadeva sopānaṃ prathamaṃ kṣemasaudhake [k: saudhakam] /
etadvihāya [k: etadvidhāya] cānyatra nāstīṣatphalasambhavaḥ

etāvadeva ahetukatvenopāsanameva / anyatra sādhane

p. १०२)
śrutvetthaṃ vacanaṃ rāma hemacūḍaḥ priyoditam /
papraccha bhūyastāṃ kāntāmatihṛṣṭamanāstadā

priye maheśvaraṃ brūhi yaḥ śaraṇyo bhavenmama /
sarvakartā svatantrātmā yacchaktyā niyataṃ jagat

evaṃ jagadādikartā parameśvaraḥ sevya iti śrutvā karturhi śarīravattvaṃ
niyatamiti matvā śivādiśarīriṣu īśvaratvaṃ kva tvayā niścitamiti pṛcchati ##-
taṃ viṣṇumāhuḥ kecidvai śivamanye [k: kecit śiva] gaṇeśvaram /
tathā sūryaṃ nṛsiṃhādīn buddhaṃ sugatameva ca

kutastavātra śaṅketi cettatrāpi śāstrānaikyādityāha - tamiti [k:
buddha] / buddhaṃ sugataṃ ca bauddhaikadeśinaḥ

arhantaṃ vāsudevaṃ ca prāṇaṃ somaṃ ca pāvakam /
karma pradhānamaṇava ityādi bahudhā jaguḥ

arhantaṃ jainā āhuḥ / vāsudevaṃ pāñcarātrāḥ / prāṇādīn prāṇādyupāsakāḥ /
karmādīnāṃ kartṛtvaṃ prāk parihṛtam tathāpi prasaṅgāt punastadgaṇanam

jagatkāraṇarūpaṃ vai vicitramatabheditam /
tatra kveśvarabuddhistu kartavyā tat samīraya

evaṃ jagataḥ kāraṇasya kartuḥ svarūpaṃ vicitramatairbheditam [k:
matabhe] ata āha - tatreti

na te hyaviditaṃ kiñcid bhavediti hi niścayaḥ /
yataḥ sa bhagavān vyāghrapādo dṛṣṭaparāvaraḥ

vyāghrapādaḥ te pitā

ataste yoṣito'pyevaṃ jñānametadvirājate /
brūhi me śraddadhānāya priyāyāmṛtabhāṣiṇi k:
priyāmṛtaprabhāṣiṇī]

ataḥ tatsambandhāt

p. १०३)
pṛṣṭaivaṃ sā hemalekhā priyeṇa prāha harṣitā /
nātha te sampravakṣyāmi śṛṇvīśvaravinirṇayam

īśvaro hi jagajjālapralayotpādakṛd bhavet /
sa viṣṇuḥ sa śivo dhātā sa sūryaḥ soma eva ca

sa eva sarvathā sarvaḥ sarvairapi nirūpitaḥ /
na śivo nāpi viṣṇurvā na dhātā nānya eva ca

sarvaiḥ vaiṣṇavādyaiḥ nirūpitaḥ sarvo'pi viṣṇuśivādiḥ sa eva
viṣṇuśivādimūrtiṣu sarvatrānugataṃ pārameśvaraṃ svatantracidrūpamiti
sarvātmatāṃ tasyoktvā parasparaṃ vyavṛttaṃ dṛśyaṃ sthūlaśarīraṃ na tasya
vāstavaṃ rūpamiti niṣedhati - na śiva ityādi

etatte sampravakṣyāmi śṛṇvatyantasamāhitaḥ /
kartāraṃ śivamāhuste pañcavaktraṃ trilocanam

etat śivo na śivaścetyetat / te śaivāḥ

sa kartā ghaṭakarteva cetanaḥ saśarīrakaḥ /
loke'pi cetanaḥ kartā saśarīro hi dṛśyate

saḥ sthūlaśarīrasahakṛtaḥ / kuta evamiti cedvibhajyāha - loka iti / kartā
kulālādiḥ

aśarīro'cetano vā na kartā kvacidīkṣitaḥ /
tatra mukhyaṃ hi kartṛtvaṃ cetanasyaiva sambhavet

evaṃ śarīraviśiṣṭacetanasyaiva kartṛtvamīkṣitam tathāpi tatra
śarīracetanayormadhye

yataḥ svapneṣvayaṃ jīvo hitvā sthūlaṃ śarīrakam /
caitanyamayadehena sarvānabhimatān sṛjet

kuta evamiti ced bhautikadehasya vyabhicārānna kartṛtvamityāha - svapneṣviti
/ svāpno deho naivaṃvidha ityāha - caitanyeti

ataḥ śarīraṃ karaṇaṃ kārye kartuścidātmanaḥ /
jīvānāṃ karaṇāpekṣā yato'pūrṇā svatantratā

ataḥ sthūlaśarīraṃ vināpi kāryasambhavena vyabhicārāt / astu karaṇatve'pi sthūlaṃ
cinmayaṃ vā śarīramīśvarasyāpekṣitamiti cennetyāha - jīvānāmiti

p. १०४)
bhagavāṃstu jagatkartā pūrṇasvātantryayogataḥ /
anapekṣyaiva yatkiñcit sṛjatyavikalaṃ jagat

jīvānāmapūrṇasvātantryeṇa karaṇādyapekṣāyāmapi na
pūrṇasvātantryasyeśvarasya yatkiñcidapekṣetyāha - bhagavāniti / avikalaṃ
sampūrṇam

ataḥ śarīraṃ nāstyeva hyeṣa mukhyaviniścayaḥ /
anyathā lokavatkarturupādānāśrayo bhavet

ataḥ śarīrakalpane prayojanābhāvāt / anyathā kulālādivat karaṇādyapekṣatve /
kartuḥ īśvarasya upādānasyāpyāśrayaḥ apekṣā bhavet

tathā ca deśakālādikāraṇapracayairyutaḥ /
jagat sṛjanmaheśāno jīva eva bhavettathā

pracayaiḥ samūhaiḥ sāmagryeti yāvat / jjiva eva bhavet / īśvaratvaṃ vihanyeteti
bhāvaḥ / tathā kulālādivat

p. १०५)
pūrṇaiśvaryaṃ vihanyeta jagatsṛṣṭeḥ purāpi ca /
siddhyettatsarvakartṛtvaṃ vihataṃ syānna saṃśayaḥ

iṣṭāpattāvāha - jagaditi / upādānādikaṃ [k, gh: dikajaga]
jagatsṛṣṭeḥ pūrvamapi siddhyet / īśvarasya jagatkriyāyāmupādānādyapekṣaṇe
upādānādernityatā siddheti bhāvaḥ / tat upādānādikam/ astviti cedāha -
sarvakartṛtvamiti / upādānādeḥ sṛṣṭeḥ pūrvaṃ siddhatvena taṃ
pratyakartṛtvena sarvakartṛtvaṃ vihanyetetyarthaḥ / tathā ca
karturnimittatvenopādānatvābhāveneśvaratvameva na saṅgacchata iti
[k:ccheta] bhāvaḥ / yaduktaṃ kṣemarājācāryaiḥ -
ye [eṣa ślokaḥ spandapradīpikāyām (pṛ० २३)
āgamarahasyaślokatvenoddhṛtaḥ] tvīśvaraṃ vyapadiśanti nimittahetuṃ
dattastilāñjaliramībhiriheśitāyai /
anyāṅgatopagamanena vaśīkṛtasya
kāmīśvarasthitimamī bata saṅgirante // iti /
atha ca nahīśvarasya kevalanimittatve [k: nityatve] kāryaṃ
sambhavitumarhati / tathā hi sṛṣṭeḥ purā viśarāravaḥ paramāṇava
īśvarecchayā saṃghaṭitāḥ kāryārambhakā bhavantīti hyārambhavādina āhuḥ /
naitadupapannam loke cetano hyanyecchāmanurudhya kiñcit karoti nācetanaḥ / tathā
ca paramāṇūnāmīśvarecchānurodho'nupapanna eva / nanvīśvarasyaivaṃvidhameva
sāmarthyam yat paramāṇavo'pi tadicchāmanurudhyeranniti / satyametat
īśvaro'paricchinnasāmarthya eva / tenaivālaukakasāmarthyena
bhagavānupādānādyanapekṣyaiva jagatkriyāsamarthaḥ / evaṃ satyapi bhagavato
jagatkriyāyāṃ paramāṇvādyapekṣābhyupagamo dvaitavādaśraddhāmātravilāsa
iti jñeyam / etena seśvarasāṃkhyo'pi pratyukto jñeyaḥ /
asmākamāgamaikasamāśrayāṇāmabhyupagatākhilavyavahārasamarthanasamarthap
arameśvaraiśvaryāṇāṃ nānupapattigandho'pi / nanu
vaiṣamyanairghṛṇyadoṣadūrīkaraṇāya jagatkriyāyāṃ karma nimittamiti
sarvairabhyupeyam / tathā cānyāpekṣeśvarasya siddheti ceducyate -
satyametadapratisamādheyameva dvaitavādinām / advaitavādināmasmākaṃ tu
darpaṇapratibimbanyāyena sarvasya jagataścidekarasatvena karmaṇo'pi
parameśvarasvarūpānanyatvenānyānapekṣaṇānna doṣāvakāśaleśo'pi /
nanvevamapi ghaṭādikartṛtvasya kulālādiniṣṭhatvānneśvaraḥ sarvakarteti cenna
kulālātmana īśvarānanyatvenādoṣāt / atha ca rājapuruṣakṛte rājakṛtatvavad
brahādikṛtasyāpīśvarakṛtatvāt / taduktaṃ pratyabhijñāyām -
tathā hi kumbhakāro'sāvaiśvaryaiva vyavasthayā /
tattanmṛdādisaṃskārakrameṇa janayed ghaṭam // (१/४१) iti

p. १०६)
ato hi dṛśyadehādyamanapekṣya jagat sṛjet /
nāsti tasmāt sthūladeho vastutaḥ prāṇavallabha

ataḥ śarīrādyapekṣāyāmaiśvaryavihateḥ

pararūpe hyadehe'smin muhyanti sthūlabuddhayaḥ /
bhaktuyuktāśca tairdhyāto yatra yatra yathā yathā

nanu yadi vastuto deho nāsti tarhi kuto'yaṃ viṣṇvādideha iti cedāha - pareti /
asmin īśvare / muhyanti mohaṃ prāpnuvanti na vidantīti yāvat / ye [k: ye
nāsti] evaṃvidhā bhaktiyuktāśca / yatra yatra kailāsavaikuṇṭhādideśe / yathā
yathā pañcavaktraikavaktrādirūpeṇa

tathā dhatte'nekarūpaṃ bhaktacintāmaṇiḥ svayam /
ataścetana eveśastaddehaḥ [k: etena] syāccitiḥ parā

svayamiti / na mātṛpitrādyapekṣayeti bhāvaḥ / ataḥ
evaṃvidhadehānāmicchāmātraparikalpitatvāt / parā aparicchinnā citiḥ

citireva mahāsattā samrājñī [kh, g, gh: sāmrājñī]
parameśvarī /
tripurā bhāsate yasyāmavibhinnaṃ [k: bhinnā] vibhinnavat

citireveti / citirhi svarūpapariniṣṭhitā nistaraṅgābdhikalpā turīyā tripuā / saiva
yadā svasvātantryāccitikriyākartṛtvarūpacetanatāmāsādayati tadeśvara ityucyate
/ kāryabrahmeti [k: kāryaṃ brahmeti] yaṃ vedāntina āhuḥ / sā
citirmahāsattā aparicchinnasadrūpā / samrājñī [kh, g, gh:
sāmrājñī] svatantrā / parameśvarī anuttaraiśvaryavatī / tripurā turyā / bhāsate
aviśeṣāt sarvatra sarvadetyarthaḥ

ādarśanagaraprakhyaṃ jagadetaccarācaram /
tadrūpaikatvatastatra nottamādhamabhāvanā

nanu na [k: na nāsti] sā citiḥ kvacidbhāsate kintu jagadeva bhāsata iti
cedāha - ādarśeti / yathā hyādarśā'vibhinnamapi pratibimbanagaramādarśaṃ
bhinnavadbhāsate evamasyāṃ citi [k: citiścarā] carācarātmakaṃ
jagattadabhinnamapi vibhinnavadbhāsate / yathā hi bālāḥ pratibimbaṃ paśyanto
darpaṇaṃ na vidurevaṃ mūḍhā jagat paśyanto'pi na citiṃ viduḥ / evaṃ ca
viṣṇuśivādiṣvapīyameveśvarākhyā ekā atastatra viṣṇuśivādau
nottamādhamabhāvanā kartavyā

p. १०७)
apare tu svarūpe hi kalpitaṃ [kh: kalpitā] mukhyatādi hi [kh:
nahi] /
tasmāt prājña upāsīta paraṃ rūpaṃ hi niṣkalam

nanu śāstreṣūttamatvādi kathamuktamiti cedāha - apare iti / sthūle / tasmāt
yataḥ sā mukhyatā kalpitā na vāstavī / niṣkalamaśarīram

asamarthaḥ sthūlarūpaṃ yad buddhau saṅgataṃ dṛḍham /
tadupāsyāhetutastu śreyaḥ prāpnotyanuttamam /
nānyathāsya gatiḥ kvāpi bhavedvai koṭijanmabhiḥ

nanu tadrūpaṃ prājñenopāsituṃ śakyamanyena kiṃ kartavyamiti cedāha -
asamartha iti / yad buddhau dṛḍhaṃ saṃgatamiti / yadrūpe buddhirdṛḍhānuraktā
sā mūrtirupāsyeti bhāvaḥ / anyathā īśvaramanārādhya / gatiḥ
paraśreyaḥsādhanaprāptiḥ / ṣaṭcaraṇaḥ ślokaḥ

iti śrīmajjñānakhaṇḍe hemacūḍopākhyāne īśvarasvarūpanirūpa
saptamodhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
saptamo'dhyāyaḥ //
p. १०८)
atha aṣṭamo'dhyāyaḥ
evaṃ priyāvacaḥ śrutvā jñātvā tattvaṃ maheśituḥ /
traipuraṃ cinmayaṃ hemalekhāvākyena niścitam

atrādhyāye bhāgamitapadyaiḥ stutvā virāgatām /
hemalekhoktigūḍhārthavyākhyānaṃ sunirūpyate //
traipuraṃ turyam / tadrūpaṃ cinmayameveśvarasya tattvamiti parokṣatayā jñātvā

āśvastacittastripurāṃ guṇarūpāṃ maheśvarīm /
jñātvā gurubhyaḥ paramāṃ māhaiśvaryavibhāvitaḥ

guṇarūpāṃ saguṇarūpāṃ saguṇamūrtim / gurubhyastanmantrādikaṃ ca jñātveti
śeṣaḥ / māhaiśvaryavibhāvitaḥ parameśvarānugrahaśaktividdhaḥ / etaduktam ##-
tāmekabhāvānugato hemacūḍo'bhavad dṛḍham /
evaṃ paropāsanena vyatīyuḥ ke'pi māsakāḥ

tāṃ [k: tāṃ tripurām nāsti] tripurām / ekabhāvo dṛḍhabhaktiḥ /
anugatirupāsanam

tripurā parameśānī prasādamakarod hṛdi /
viṣayādvimukhaṃ cittaṃ vicāraparamaṃ babhau

kiṃvidhaṃ prasādamakarottadāha - viṣayāditi / vicāraparamaṃ
svarūpavicāratatparam

etāvad durlabhaṃ loke parānugrahamantarā /
vicārapravaṇaṃ cittaṃ yanmukhyaṃ mokṣakāraṇam

etāvad viṣayavaimukhyapūrvakaṃ vicārapravaṇatvam / kuta etasya durlabhatā
tadāha - yaditi

rāma yāvanna jāyeta vicāraparamaṃ manaḥ /
na tāvacchreyasā yoga upāyānāṃ śataiḥ kvacit

p. १०९)
atha bhūyaḥ sa kasmiṃściddine rahasi vai tayā /
saṅgataḥ priyayā'tyantavicāraparamānasaḥ

atha vicāraparatāsampattyanantaram

āyāntaṃ svaniketaṃ taṃ dūrāt kāntaṃ dadarśa sā /
utthāya taṃ samānīya svāsane viniveśya ca

niketaṃ gṛham

pādaprakṣālanādyaistaṃ pūjayitvā yathāvidhi /
provācāmṛtaniṣyandasundaraṃ paramaṃ vacaḥ

preṣṭha ! tvāmadya paśyāmi cirāya nanu te vapuḥ /
nīrujaṃ kaccidāsīdvai yato rogāspadaṃ vapuḥ

preṣṭha atipriyatama

tanmamācakṣva [k: tanmāmā] vṛttāntaṃ yato nāhaṃ smṛtā
tvayā /
nanu māmasamālokya cāprabhāṣya kadāpi te

tat śarīravṛttāntam [g: śārīraṃ] / kutastaveyaṃ sambhāvaneti cedāha
- yata iti

nātyagāddinabhāgo'pi tadevaṃ kuta āsthitam /
manye'haṃ te'nabhimate vartanaṃ nahi vartmani

evaṃ māmasmṛtvā adṛṣṭvā [k: adṛṣṭvā nāsti] vā tvayā āsthitaṃ
tat kutaḥ / svapne'pi na manye

svapne vāpi kuto'nyatra kuta evamabhūd vada /
kathaṃ rātristvayā nītā caikāpi yugasammitā

anyatra jāgrati kuta etatsambhāvaneti bhāvaḥ / evaṃ sati kuta evaṃ te sthitirabhūt

māṃ [k: vinā māṃ ca kṣaṇo] vinā prāk kṣaṇo'pyeko yugakalpaḥ
suduḥsahaḥ /
ityuktvā sā samāśliṣya khinnevābhūtkṣaṇaṃ tataḥ

māṃ vinā kṣaṇo'pi [k: kṣaṇamapi suduḥsahamiti]

p. ११०)
so'pi priyāsamāśliṣṭo neṣadvikṛtimāyayau /
prāha priye na māmevaṃ vimohayitumarhasi

dṛḍhavairāgyeṇa neṣadapi [k: naiṣo'pi] priyāśleṣādinā vikṛtiṃ
prāptavān / māmiyaṃ mohayituṃ pravṛtteti jñātvā āha - priye iti

jñātā mayā'si sudṛḍhaṃ nāsti te śokakāraṇam /
parāvarajñā tvaṃ dhīrā mohastvāṃ vai kathaṃ spṛśet

kutastvadviyoge śoko na bhavettadāha - parāvareti

tattvāṃ praṣṭuṃ samāyāto yattadvakṣyāmi saṃśṛṇu /
yat prāk svavṛttaṃ kathitaṃ tat sphuṭaṃ me samīraya

nāhaṃ prāgiva krīḍituṃ samāgata ityāha - tattvāmiti / mahāsatī me jananī
(५/१०८) ityādi prāguktaṃ svavṛttam

kā sā te jananī proktā sakhī vā tatpatiśca kaḥ /
tatputrādyā api ca ke mama vā te kva saṃvada

te jananyādayaḥ

na tanayā suviditaṃ na tanmanye mṛṣoditam /
kintu tvayā nigaditaṃ vyapadeśena sarvathā

tat tvaduktam / na tanmṛṣoditam kintvanyavyapadeśenoktam

tadvivicya prakathaya yathā jñāsye tvahaṃ sphuṭam /
ahaṃ tvāṃ suprapanno'smi [k, kh: suprasanno] chindhi me hṛdi
saṃśayam

evamuktā hemalekhā prasannavadanekṣaṇā /
matvā sunirmaladhiyaṃ parānugrahasaṃyutam

parāyāstripurāyā anugrahayutam

nūnameṣo'tivimukho viṣayebhyo'tidhairyataḥ /
viddhaḥ [k: viṣṇuśaktyā] śaktyā maheśānyā [kh, g,
gh: mahaiśvaryā] phalitaḥ puṇyasañcayaḥ

anugrahaśaktyā

p. १११)
kālaḥ prabodhane cāyaṃ bodhayāmi tatastvimam /
nātha te'ho mahābhāgyaṃ prāptamīśakṛpāvaśāt

yato'yaṃ bodhane kālastata iti matvā prāheti śeṣaḥ / te tvayā

anyathā naiva viṣayavairasyaṃ paśyati kvacit /
etallakṣaṇamīśasyānugrahe jñeyamāditaḥ

anyathā bhāgyābhāve kvacit kālādau / etat vakṣyamāṇam / lakṣaṇaṃ jñāpakam /
ādita iti / īśānugrahe satyādāveva [kh, g, gh: veta] tajjāyata iti
bhāvaḥ

bhogavairasyamaparaṃ vicārapravaṇaṃ manaḥ /
hanta te sampravakṣyāmi vṛttiṃ proktāṃ sadātmanaḥ

aparaṃ dvitīyam / vṛttiṃ sthitim sadā sthitāmiti śeṣaḥ

parā citirme jananī sakhī buddhirmatā mama /
avidyā tvasatī soktā yayā buddhiḥ susaṅgatā

avidyāyāstu sāmarthyaṃ loke spaṣṭaṃ vicitritam /
yadrajjau sarpamābhāsya mahābhītiṃ prayacchati

mahāmohastu tatputro manastasya suto'bhavat /
tasya patnī kalpanā syāttatsutāḥ pañca ye'bhavan

jñānendriyāṇi te pañca tatsthānaṃ golakaṃ bhavet /
viṣayāṇāṃ pramoṣastu saṃskāro manaso bhavet

tadbhogaḥ svapnabhogaḥ syāt kalpanāyāḥ svasā tu yā /
mahāśanā bhavedāśā tasyā yau tanujāvubhau

tadbhogaḥ pramuṣitaviṣayabhogaḥ

krodho lobhaśca tāvuktau tatpuraṃ tu śarīrakam /
mama yastu mahāmantraḥ svarūpasphuraṇaṃ hi tat

prāṇaḥ pracāraḥ samprokto manasastu priyaḥ sakhā /
kāntārādyāstu narakā [k: navakā] evaṃ sarvaṃ prakīrtitam

p. ११२)
mayā buddheḥ saṅgamastu samādhirabhidhīyate /
manmātṛlokasaṃprāptirmokṣaḥ priya udāhṛtaḥ

evaṃ proktaḥ svavṛttāntastvamapyevaṃvidho [k: vidhau] nanu /
tadyuktyaitat suvijñāya paraṃ śreyaḥ samāpnuhi

etat svavṛttāntam

iti śrīmajjñānakhaṇḍe hemacūḍopākhyāne saṃsārākhyāyikāvivaraṇe
aṣṭamo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyām
aṣṭamo'dhyāyaḥ //
p. ११३)
atha navamo'dhyāyaḥ
śrutvetthaṃ priyayā proktaṃ hemacūḍo'tivismitaḥ /
harṣagadgadayā vācā punarvaktuṃ pracakrame

atra nonākapadyaiḥ [k: nonāṅka] svamātmatattvaṃ vivicya vai /
hemacūḍaḥ svātmasaṃsthāṃ prāpta ityetaducyate //
punaḥ hemalekhāṃ vaktum

dhanyā priye'si nipuṇā aho te jñānavaibhavam /
kiṃ varṇayāmi yat proktamākhyārūpatayā'khilam

jñānasya vaibhavaṃ māhātmyam / yat yasmāt /
svātmavṛttamakhilamanyāpadeśenākhyānatayā proktam ataḥ kiṃ varṇayāmi

evaṃvidhaṃ svavṛttaṃ me nābhavadviditaṃ kvacit /
tvaduktyā'haṃ samprati tat karāmalakavat sphuṭam

kvacit kāle / tat svātmavṛttaṃ krodhalobhādinā duḥkhānubhavarūpam

smarāmyanubhavāmyantaraho lokakriyā'dbhutā /
kā sā parā citirmātā kathaṃ tasyāstu no janiḥ

sphuṭamatītaṃ smarāmi vartamānamanubhavāmi / antaḥ svātmani / lokānāṃ kriyā
vyavahāraḥ

ke vā vayaṃ svarūpaṃ kimasmākaṃ tad bravīhi me /
iti pṛṣṭā hemalekhā rāmovāca priyaṃ prati

mahāsatī me jananī (५/१०८) ityādyākhyānena paraciterupeyatoktā svasya
tadaṃśātmatvaṃ coktam / tatra kā sā parā (९/४) ityupeyasvarūpaṃ
pṛṣṭvā svātmarūpaṃ pṛcchati - ke vā vayamiti / dehasya
puratvaśravaṇena prāṇādeḥ parivāratvaśravaṇena [k: parīvāratva] ca
dehāderanātmatvaniścayāt puruṣādisaṃjñāyāḥ saṅghātaniṣṭhatvena ke
ityātmanaḥ saṃjñāviṣayo'yaṃ praśno jñeyaḥ

p. ११४)
nātha śṛṇu pravakṣyāmi gūḍhārthamidamādarāt /
vicārayātmano rūpaṃ buddhyā'tyantaviśuddhayā

gūḍhārthamiti / ayaṃ praśnārtho gūḍho vaktumaśakya eva tathāpi kiñciduttaraṃ
vakṣyāmi / tadevāha - vicārayeti / ātmanaḥ śuddhasvarūpe vidite parā
citirviditaprāyaiveti prathamapraśnamupekṣya dvitīye uttaraṃ kriyata iti bhāvaḥ /
svayameva vicāraya / tatropāyamāha - atyantaviśuddhayeti /
buddherantaḥkaraṇasyendriyādidvārā bahirmukhatvamaśuddhiḥ
tatparityāgenāntarmukhatvaṃ hi śuddhiḥ / tathā ca vāhyadehādāvanātmatvaṃ
niścitya buddherantarmukhatāsampādanenātmasvarūpaṃ svayameva jñātuṃ
śakyamiti bhāvaḥ

na dṛśyaṃ nāpi tadvācyamato vakṣyāmi tat katham /
jñāte [k: jñātasvātmasvarūpo] svātmasvarūpe vai tato jñāsyasi
mātaram

nanu tvayā viditamātmatattvaṃ kuto nocyata iti cedaśakyaṃ vaktumityāha - na
dṛśyamityādi / na jñeyamityarthaḥ / jñeyamanyopadeśena [k: manyā]
jñātuṃ śakyamiti bhāvaḥ / tasya nirdharmatvena
vacanapravṛttinimittadharmābhāvānnāpi tadvācyamiti tātparyam / nanu tarhi parā
citiryā mātā tāṃ vadeti cedāha - jñāta iti

nahyādeśaḥ [k: deśasva] svarūpe'sti tata ādeṣṭṛvarjitam /
svaṃ [g, gh: svarūpaṃ] rūpaṃ svātmanā paśya
śuddhabuddhisamāśrayam

yato na dṛśyaṃ na vācyamātmarūpamatastasya na sākṣādupadeśa ityāha -
nahīti / ādeśa upadeśaḥ / nanu tarhi tat kathaṃ jñeyamiti cedāha - svātmaneti /
śuddhātmarūpeṇa sthitamityarthaḥ / viṣayavinirmuktaṃ śuddhacidrūpeṇa sthitamiti
bhāvaḥ / yadvā svātmanā sthitaṃ dṛśyā'nātmavyāvṛttadraṣṭṛmātrātmanā
sthitamiti bhāvaḥ / evaṃvidhaṃ kva paśyāmīti cedāha - śuddheti /
śuddhāyāṃ viṣayākārarahitāyāṃ buddhau karaṇavyāpārānapekṣameva
svarūpaṃ jñeyamiti bhāvaḥ

p. ११५)
devāditiryagantānāṃ bhāntaṃ bhānairabhāsitam /
bhāntaṃ sarvatra sarvasya sarvadā mānavarjitam

nanvadṛśyaṃ tat kathaṃ paśyāmīti cedāha - deveti / devaḥ sadāśivo
hiraṇyagarbhaḥ tiryag [k: tiryaggati] atisūkṣmastambākhyaḥ kṛmiḥ
devāditiryagantānāmātmatvena bhāsamānaḥ / nanu tarhi mama kuto na bhāsata iti
cedāha - bhānairabhāsitam / bhānaiḥ paricchinnairdṛśyākārairjñānaiḥ /
nāsti bhāsitaṃ yasya / buddherdṛśyākārairācchāditatvānnātyantaṃ bhāsate
kintu ghanācchannārkavadbhāsata [kh, g, gh: ghana] eva /
dṛśyākārarahitāyāṃ buddhau tu nirabhranabhogatārkavadatyantaṃ bhāsata iti
bhāvaḥ / nanu buddhāveva bhāsamānatvāt paricchedaḥ prāpta iti cedāha -
sarvatreti / sarvasya sarvatra sarvadā ghaṭādikaṃ bhāsamānaṃ tadbhāsaiva bhāsate /
sarvatra bhāsamānasūryālokasya [k: mānasūryo lo]
bhittāvatyantābhivyaktivacchuddhabuddhāvabhivyaktiriti bhāvaḥ / nanu
pramāṇavyāpāroparame [k: brahmaṇi] na tasya bhāsanaṃ syāttat kathaṃ
sarvadeti cedāha - mānavarjitamiti / pramāṇavyāpārāviṣayamityarthaḥ /
karaṇavyāpārasya [k: kāraṇa] kartaryapravṛtterata evādṛśyamapīti
bhāvaḥ

kathaṃ kutra kadā kena nirūpyetāpi leśataḥ /
mannetraṃ darśayetyevamuktametat priyādhunā

tatra pramāṇāpravṛtteḥ kathaṃ kena rūpeṇa kutra deśe kadā kāle kena
pramāṇena leśato'pi nirūpyeta [k: nirūpyate] ?
pramāṇāviṣayatvādatredānīmīdṛśo'yamiti [k: dānīṃ mādṛ]
nirūpayitumaśakya eveti tātparyam / atra dṛṣṭāntaḥ - mannetramiti / etat
ātmānaṃ nirūpayeti [kh, g: yati]

p. ११६)
nātrācāryasyopayogo yathā nayanadarśane /
nipuṇo'pi mahācāryaḥ kathaṃ netraṃ pradarśayet

ātmano'nirūpaṇīyatvādevātmadarśane [k, kh: nirū] na
sākṣādācāryasyopayoga ityāha - nātreti / nipuṇaḥ kuśalaḥ / mahān
tapomāhātmyādiyuktaḥ

ato gururupāyo'tra tadupāyapradarśanāt /
tatte vakṣyāmyupāyaṃ tacchṛṇu saṃyatamānasaḥ

nanvevaṃ ced guruḥ śiṣyasya kiṃ kuryāttadāha - ata iti /
nirūpaṇāsamarthatvāt / upa samīpe ayati gacchati yena saḥ / śiṣyasya parāg
dṛśo'tidūrāyitamātmānaṃ pratyagdṛṣṭyutpādanena samīpīkaroti gururiti
tātparyam / atra ātmāvagame / gurāvupāyapadaṃ yojayati - tadupāyeti /
tasyātmadarśanasyopāyaḥ sādhanaṃ tasya pradarśanāt / tattasmād
gurorupāyapradarśakatvāt / upāyamahaṃ vakṣyāmi

yāvat tvamātmani mametyevaṃ tu pratipaśyasi /
tataḥ paraṃ nijaṃ rūpaṃ yanmameti na bhāti te

ātmaviṣaye yāvanmameti paśyasi tataḥ paraṃ tebhyo bhinnaṃ yattava mameti na
bhāti tannijaṃ rūpaṃ vivicyeti sambandhaḥ

gatvaikānte vivicyaitadyadyad bhāti mamatvataḥ /
tattat parityajya paraṃ svātmānamabhilakṣaya

ekāntasthāne gatvā / etat mayoktaṃ yanmameti na bhāti tat / vivicya vivecaya / evaṃ
vivecanakāle mamatvena yad yad bhāti tattat parityajya anātmeti niścitya tataḥ paraṃ
yanmamatvā'nākrāntaṃ tat svātmatvenābhilakṣaya

yathāhaṃ te mamatvena bhāsanānnātmatā mayi /
sambandhamātrādātmīyā na svarūpagatā [kh: tāsmya] hyaham

etadeva vivicyopapādayati - yatheti / na svarūpagatā na svarūpāntarbhūtā

p. ११७)
mamārthamakhilaṃ tyaktvā yattyaktuṃ naiva śakyate /
tamātmānaṃ samālakṣya paraṃ śreyaḥ samāpnuhi

evaṃ mameti bhāsamānamakhilamarthaṃ nāhamiti niścayena tyaktvā yattyaktuḥ
svarūpaṃ kevalacitprakāśarūpamakhilatyāgāvadhibhūtaṃ tyaktuṃ na śakyate

ityuktaḥ priyayā hemacūḍa utthāya vai drutam /
yayāvaśvaṃ samāruhya tatkṣaṇe nagarād bahiḥ

udyānaṃ nandanasamaṃ praviśya kṣaṇamātrataḥ /
vanāntaḥ saudhamunnamraṃ sphāṭikaṃ praviveśa ha

udyānaṃ krīḍāvanam / unnamramuccam

visṛjyānucarān sarvān dvārapālānaśāsayat /
na ko'pyatra praviśatu mayayekāntavicāraṇe

atra matsamīpe / ekaḥ advitīyaḥ antaḥ sarvaniṣedhāvadhibhūta ātmā tasya
vicāraṇaṃ vivecanam / tatpare mayi satīti yāvat

rājāmātyāśca guravo rājā vā'pyatra saṅgataḥ /
apraveśyā eva yāvadahamājñāṃ diśāmi vaḥ

ityuktvāruhya saudhāgryaṃ navamīṃ bhūmimāviśat /
tatra vātāyane citre sarvalokāvalokane

uparyupari vidyamānabhūmiṣu navamīṃ bhūmim / sarvalokānāmavalokanaṃ yatra /
atyuccāmiti yāvat

āsane mṛdutūlāḍhye viveśānyavivarjitaḥ /
manaḥ samādhāya dṛḍhaṃ vicāramakarottadā

nūnamete janāḥ sarve kathamevaṃ vimohitāḥ /
naiko'pyatra [k: na ko] vijānāti svātmānaṃ leśato'pi vai [k:
ca]

p. ११८)
sarvo'pi svātmano hetoḥ karoti vividhāḥ kriyāḥ /
kecit paṭhanti śāstrāṇi sāmnāyāṅgāni [k: yāni ca] nityaśaḥ

svatmanaḥ sukhahetoḥ / āmnāyo vedaḥ

keciddhanānyarjayanti kecicchāsati cāvanim /
anye yudhyanti ripubhiranye bhogaikalampaṭāḥ

kurvantyetat svārthamete sa [k, gh: svasvātmā] katamo bhavet /
nainaṃ jānāti ko'pyatra kuta evamayaṃ bhramaḥ

aho yathāvadātmānamaviditvaiva vai kṛtam /
vyarthaṃ svapne kṛtamiva tadadya vimṛśāmi tam

mayā kṛtam / yasmādajñānāt kṛtaṃ vyarthaṃ tat tasmāt

gṛhadhānyarājyadhanayoṣitpaśvādi [gh: dhānyaṃ; k: dikañca na]
kiñcana /
na me svarūpaṃ bhavati tvanahantāśrayatvataḥ

vimarśanaprakāramāha - gṛhetyādi / anahanteti /
ahamityabhāsanenāhantāśrayatvābhāvāt

madarthaṃ bhūtatāhetordeho'haṃ syāṃ hi sarvathā /
nūnaṃ kṣatriyadāyādo gaurāṅgo'haṃ na saṃśayaḥ

madartheti / ahamityasmatpratyayaviṣayabhūtatvāddhetordeho'haṃ syām / etadeva
draḍhayati - nūnamiti

ahantayā samākrāntāstathaite'pi janāḥ pare /
iti niścitya dadhyau taṃ dehaṃ rājakumārakaḥ

eteṣāṃ janānāmapyātmā [k: pyātmadeha] deha eveti saṃbhāvayati -
ahanteti / tathaite dehātmāna eva / dehamātmatvena dadhyau cintayāmāsa

atha dehasya cātmatvaṃ pratiṣeddhuṃ pracakrame /
aho kathaṃ deha eṣa mamatāyāḥ samāśrayaḥ

atha dhyānānantaram / dehasvabhāvamupalabhya mamatāśrayasyā'nātmatvamiti
hemalekhoktaṃ smṛtvāha - aho iti

p. ११९)
rudhirāsthyādisaṃghātaḥ pratikṣaṇavikāravān /
mama rūpaṃ bhavennūnaṃ chinnametattu lakṣyate

kathaṃ mama rūpaṃ bhavet / hetvantaramapyāha - chinnamiti

kāṣṭhaloṣṭasamatvena svapnādau cānyathā sthitaḥ /
nāhaṃ deho'nya eva syāṃ prāṇo'pyeṣa tathāvidhaḥ

dehaikadeśarūpaṃ hastādyaṅgaṃ chinnaṃ sadahantānāśrayatvena
kāṣṭhaloṣṭasamatvena yasmāllakṣyate ato mama rūpaṃ dehaḥ katham ? atha ca
svapnādau anyathaivāyaṃ dehaḥ sthito lakṣyate / anusaṃdhānena
jāgratsvapnayorekātmatvaniścayāddehasya pṛthagrūpatvānnātmatvamiti bhāvaḥ
/ ādipadena suṣuptirjanmāntaraṃ vā / tathāvidho mamatvādyāśrayaḥ

mano buddhiśca nāhaṃ syāṃ yata etanmameritam /
ato dehādibuddhyantādanya [k: ddhyantasta] eva na saṃśayaḥ

mameritaṃ mamatvenoktam / ato dehādermamatvāśrayatvāt

ahaṃ kadācinnāsmīti bhāsanābhāvahetutaḥ /
sarvadā'haṃ bhāsamānaḥ sthita eva na saṃśayaḥ

dehādīnāṃ mamatvāśrayatvenā'nātmatvādanyasyā'nupalambhāt suṣuptau
śūnyopalambhācca śūnyamātmeti prāpte āha - ahamiti / ahaṃ nāsmīti
kadācidapi bhāsanābhāvāddhetoḥ sarvadā bhāsamāno'haṃ sthita eva sadrūpa eva
na śūnyarūpa ityarthaḥ / suṣuptāvapi nāsmīti na prāmāṇikaḥ pratyayaḥ /
tadā'nubhaviturabhāve vyutthitasya na kiñcidavediṣam iti
dṛśyasāmānyādarśanasmṛtyanupapatteḥ / tathā cātmā'śūnyarūpaḥ
sarvadā'smīti bhāsata eva / kadācidapi nāhamasmīti bhāsanābhāvāditi bhāvaḥ

bhāsamānasya tu mama kena bhānamiti sphuṭam /
nahi jānāmi tat kasmādetanna viditaṃ mayā

kena hetunā / ghanācchannārkavat sāmānyena bhāsamānasya kena viśeṣahetunā
sphuṭaṃ bhānamayamahamasmīti vijñānaṃ syāditi nahi jānāmi tadetat
kasmānnimittānna viditam

p. १२०)
ghaṭādikaṃ cakṣurādyairbhāsate bhuvi nānyataḥ /
prāṇastvacā vibhātyeṣa mano jñānena cohitam

jñānena jñānātmakakāryahetunā / ūhitaṃ kāryakāraṇatvenānumitam

evaṃ buddhiḥ kena ca me bhāsanaṃ nāvidaṃ tvidam /
athaiṣāṃ bhāsanādeva nātmā bhāseta me yadi

evaṃ buddhiḥ kāryeṇānumitetyarthaḥ / me mama / atheti
nimittasambhāvanādyotakam / yathā hi pratibimbabhāsanakāle śuddhadarpaṇo na
bhāsate evameṣāmanātmanā bhāsanādātmā na bhāsata iti sambhāvayati -
eṣāmiti

tarhi no vimṛśāmyetāṃstato me bhāsanaṃ bhavet /
iti niścitya manasā jahau mānasagocaram

evaṃ dṛśyabhāsanasāmānyā bhāvamātmavijñāne [gh: sāmānya]
nimittaṃ niścityāha - tarhīti / yadyanātmabhāsanādātmā na bhāsate
tarhyetānanātmabhāvānna vimṛśāmi / nahyete svato bhāsante
avimṛṣṭānāmabhāsanāt / yathā hi ghaṭavimarśanakāle tato'nyanna bhāsate
tathā anātmavimarśanakāle [k: antya] ātmā na bhāsata iti /
anyāvimarśane [k: vimarśanena] ātmabhāsanaṃ bhavediti bhāvaḥ /
vimarśaḥ ayamīdṛśa ityādi mānasollekhaḥ / manasā mananātmakena
sūkṣmabuddhirūpeṇāntaḥkaraṇena mānasagocaraṃ [k: so'gocaraḥ]
mānasollekham [k: llekhaḥ]

athā'paśyadandhakāraṃ gāḍhaṃ tat kṣaṇamātrataḥ /
idaṃ mamātmano rūpamiti niścitamānasaḥ

atha yatkiñcidbhāvamātrānullekhānantaram tat tamaḥ tadidamātmano rūpamiti
yojanā / kṣaṇamātrataḥ andhakāradarśanottarakṣaṇe / niścitamānasaḥ niścitaṃ
mānasaṃ manovikārātmaka tamo yena

p. १२१)
praharṣamatulaṃ [k, gh: tumulaṃ] lebhe cātha bhūyo vyacintayat /
nūnaṃ punaḥ prapaśyāmītyevaṃ cittaṃ rurodha vai

praharṣam ātmā dṛṣṭa iti bhramajanitam [k: śrama]

cañcalaṃ haṭhayogena niruddhaṃ [gh: niruddhe] samavaikṣata /
tejaḥpuñjamanādyantaṃ bhāsvaraṃ kṣaṇamātrataḥ

cañcalaṃ mano haṭhayogena kiñcidanullikhāmīti
dṛḍhasaṅkalparūpābhiniveśamātreṇa na tu [k, kh, g: nanu]
prāṇāyāmanirodhādyabhyāsena / bhāsvaraṃ prakāśaikanibiḍam

prabuddhaścintayāmāsa kimetaditi vismitaḥ /
aho paśyāmi vividhaṃ kimātmānaṃ kathaṃ tvidam

kṣaṇamātrataḥ prabuddhya [k: prabuddhaḥ] nirodhāt parāvṛttya /
etattamastejaśca [k: etanme teja] idaṃ viruddharūpatvamātmanaḥ kathamiti
vismitaḥ

bhūyaḥ paśyāmi cetyevaṃ rurodha svamanastadā /
vilīnaṃ nidrayā cittaṃ babhau cirataraṃ dṛḍham

tadā rodhānantaram [gh: rodhanā] nidrayā
paripakvakarmasāmānyābhāvarūpayā [kh: sāmānya] / hetau tṛtīyā /
nidrāhetunā cittaṃ vilīnam

tatrāpaśyat svapnajālaṃ vicitrānekadarśanam /
atha prabuddho'tyantaṃ vai cintāṃ prāpa mahattarām

kimahaṃ nidrayācchannaḥ svapnān samavalokayam /
tamastejaścāpi dṛṣṭamaho svapnātmakaṃ [k: tmako] bhavet

tamaḥ pramukhaṃ dṛṣṭamapi svapnātmakameva syāditi sambhāvayati - tama
iti

p. १२२)
svapnastu mānasollāsastadetaṃ varjaye katham /
bhūyo nigṛhya paśyāmītyevaṃ niścitya vai dṛḍham

mano nigrahītuṃ pravṛttasya me mānasaṃ prasaratyeva tat kathamatra kartavyamiti
cintayati - svapna iti / etaṃ svapnam

rurodha cittaṃ tu haṭhāttadetadabhavat sthiram /
tadānandasamudrāntarnimagna iva so'bhavat

cittaṃ dṛḍhaṃ rurodhetyanvayaḥ / tadā rodhānantaram / īṣat kiñcitkālaṃ cittaṃ
sthiramabhavat / tadā niruddhacittadaśāyām

punaścittapracalanāt prabuddho'bhavadañjasā /
kimeṣa me'bhavat svapnaścā'thavā cittavibhramaḥ

prabuddhaḥ nirodhacyutaḥ / nirodhakālikaṃ sukhamātrarūpaṃ svātmānamavidan
[k: danniva kalpa] vikalpayati - kimeṣa iti

āhosvit satya eṣa syādavicintyaṃ vibhāti me /
nā'nvabhūvaṃ kiñcidapi sukhamāptaṃ kathaṃ mayā

viṣayānubhavena sarvatra sukhānubhavaḥ tat kathaṃ kiñcidapyananubhūya
nirodhakāle sukhānubhava iti śaṅkate - nānvabhūvamiti

aho'sya sukhaleśasya tulyaṃ nāstyatra kiñcana /
ahaṃ suṣuptavanmūḍhaḥ kathametat sukhaṃ sthitam

kiñcana sukham / suṣuptavat bāhyāntarāgrahaṇena mohagrasto'haṃ sthitaḥ / tatra
kathameṣa sukhānubhavaḥ

nātra hetuṃ kañcidapi lakṣaye tat kathaṃ bhavet /
ātmāvagamanāyāhaṃ pravṛtto'pyadya nāvidam

atra sukhopalabdhau tat sukhaṃ hetuṃ vinā kathaṃ bhavet

ātmānamanyaccānyacca paśyāmi kimidaṃ bhavet /
prakāśo vāndhakāro vā sukhaṃ vānyadathāpi vā

ātmānaṃ nāvidamityanvayaḥ / anyaccānyacca tamaḥprakāśādirūpam / apirevārthe
/ atha prakāśādibhyo'nyadeva vetyarthaḥ

p. १२३)
ātmā bhavenmama tathā kramikaitatsvarūpakaḥ /
nāntamemyatra bhūyastāṃ pṛcchāmi viduṣīṃ priyām

athavā tathā'nubhūtatamaḥprabhṛtibhāvakramayuktasaṅghasvarūpaka ātmā
bhavet / atrāntaṃ niścayaṃ naimi na prāpnomi

iti niścitya dvāreśamāhūyājñāṃ samādiśat /
svasannidhānamānetuṃ hemalekhāṃ nṛpātmajaḥ

atha prāptā muhūrtena dvārikasya nideśataḥ /
āruroha mahāsaudhaṃ meruminduprabheva sā

athāpaśyad rājasutaṃ priyaṃ śāntātmamānasam /
niścalaṃ nirvikāraṃ ca saṃhṛtendriyamaṇḍalam

hemalekhā apaśyat / śāntaṃ niśceṣṭam / ātmā śarīraṃ mānasañca / calanaṃ
[kh, g, gh: calaḥ] prāṇacāraḥ / vikāraḥ kāmādiḥ

samīpamupasṛtyāśu tadviṣṭaramupāruhat /
ekāsanopaviṣṭāyāṃ tasyāṃ sa nimiṣārddhataḥ

bhartṛsamīpam / tasyāṃ hemalekhāyāṃ sa hemacūḍaḥ

unmīlya nayane pārśve samālokayadāsthitām /
ālokitā priyaṃ śīghraṃ praṇayāt pariṣasvaje

priyāṃ samālokayat / ālokitā sā

tataḥ prāhāmṛtasyandi sundaraṃ vacanaṃ priyā /
nātha kiṃ bhavatāhūtā kaccitte nīrujaṃ tanau

vadāhūtau kāraṇaṃ me yadarthamahamāgatā /
evaṃ priyānuyuktaḥ sa babhāṣe svātmanaḥ priyām

priye tvayānuśiṣṭo'haṃ vivikte'tra samāsthitaḥ /
vicāraparamaḥ svātmarūpalakṣaṇahetave

vicāraḥ parama upādeyo yasya tatpara iti yāvat / svātmarūpasya lakṣaṇaṃ
vijñānam taddheturyaya mokṣasya tadarthaṃ vicāraparama iti sambandhaḥ

p. १२४)
tatpareṇāpi citraṃ tu lakṣitaṃ tat pṛthak kimu /
ātmanaḥ sarvadā prāpterbhāsamānatvato'pi ca

tatpareṇāpi ananyamānasenāpi / citram anekavidham / pṛthag atyantabhinnam
prakāśāndhakārādirūpam / svena yathā vicāritaṃ tadāha - ātmana iti /
ātmatvādeva prāptatvam prakāśarūpatvādbhāsamānatvam

asamyag bhāsanaṃ cānyabhāsanasya nimittataḥ /
iti matvā nirudhyānyabhāsanaṃ suvyavasthitaḥ

evaṃvidhasyāpyasamyagbhāsanamanyabhāsananimittāt / anyeṣāṃ bhāsanaṃ
bhāsanakaraṇamindriyādi [k: diniruktam] niruddhya

apaśyamandhakāraṃ ca prakāśamanyadeva ca /
kvacit sukhaṃ mahat prāptaṃ kimetadvada me priye

idamevātmano rūpamathavā'nyad bhavet kvacit /
samyag vivicya kathaya yathā tamabhilakṣaye

idameva prakāśāndhakārādyanyatamam / anyat prakāśāndhakārādibhyaḥ / kvacit
samādheranyatra

ityuktā sā'bravīd hemalekhā jñātaparāvarā /
śṛṇu priya pravakṣyāmi samāhitadhiyā'khilam

yastvayā bāhyasaṃrodhe vyavasāyaḥ samedhitaḥ /
sa śubhaḥ sammataḥ sarvaiḥ sumukhyaścātmavedibhiḥ

vyavasāyaḥ yatnaḥ / śubhaphalapradatvācchubhaḥ / anantarasādhanatvāt
sumukhyaḥ

vinā tena na tat prāptaṃ kenāpi kutracit kvacit /
na tat kāraṇatāmeti tatprāptau prāptabhāvataḥ

tena nirodhena / tat advaitātmavijñānam / kutracit kāle kvaciddeśe /
nanvevamātmajñānasya sādhanasādhyatvena ghaṭādijñānatulyatve
ghaṭavadātmano jaḍatvamanātmatvañca syādityata āha - na taditi / tat
nirodhanam / tatprāptau ātmavijñānaprāptau / prakṛte ātmarūpameva vijñānaṃ
vivakṣitam na tvātmano vijñānam / atastasya prāptatvamiti bhāvaḥ

p. १२५)
aprāptāvātmatā na syādātmatve'nāptatā kutaḥ /
aprāpyaḥ sarvathaivātmā prāptistasya na vidyate

etadeva sādhayati - aprāptāviti

aprātasya bhavet prāptirātmatvānnāptirastyataḥ /
tannirodho'pi nāptyarthastvatra paśya nidarśanam

tannirodhaḥ manonirodhaḥ / nidarśanaṃ dṛṣṭāntam

andhakārasamācchannaṃ kiñcit tasya nirodhataḥ /
dīpādyairāpyate prāptamiva loke yathā tathā

kiñcit ghaṭādi / tasya andhakārasya dīpasūryādibhirnirodhataḥ parihārataḥ
ghaṭādyāpyate / atra sthitamapi ghaṭādi yathā tamonirodhāt prāptamiva bhavati
tathā svaprakāśacidekarūpamātmatattvaṃ vāsanodbhūtavikalpairācchannamiva
sthitaṃ vikalpanirodhena prāptamiva bhavati / tathā ca nirodhasya na
svarūpaprāpakatvamiti bhāvaḥ

yathā kaścid bhrāntacittaḥ kvacidvismṛtaniṣkakaḥ [k: kaści] /
anyacintānirodhena samāhitatayā punaḥ

nātrāndhakāravat svarūpātiriktamācchādakaṃ sambhavatītyāśayena
dṛṣṭāntāntaramāha - yatheti / niṣkaṃ suvarṇam

āsādayati tanniṣkaṃ naṣṭaṃ prāptaṃ yathā tathā /
na nirodho'tra hetuḥ syānniṣkāptau tu yathā tathā

prāptaṃ yathā prāptamiveti dvitīyaṃ yathāpadaṃ yojanīyam / atra yathā anaṣṭaṃ
niṣkaṃ naṣṭaṃ prāptamiti cocyate tathā aprāpta ātmā prāpto bhavati / atra
yathā'nyacintānirodho na niṣkaprāptau hetustathā prakṛte'pi nirodho na hetuḥ

p. १२६)
ātmalābhe na hetuḥ syānnirodho bāhyavastunaḥ /
tvayā na lakṣitaḥ svātmā tatra vyutpattivarjanāt

bāhyavastuno nirodhaḥ / nanu tarhyātmā mayā nirodhenāpi kuto na lakṣita iti cedāha
- tatreti / vyutpattiḥ vastuparicayaḥ

yathā prakāśe'vyutpanno rātrau rājasabhāṃ gataḥ /
paśyan sabhyāṃśca dīpāṃśca na jānāti prakāśakam

avyutpattyā dṛśyamānamapi nopalakṣayatītyatra dṛṣṭāntamāha - yatheti /
avyutpannaḥ prakāśo hi pradīpaprasṛto bhāsvararūpavān bhāvāvabhāsaka iti
paricayahīnaḥ / evaṃ tvayā na lakṣita iti yojyam

śṛṇu priya nirodhānte hyandhakāro vilokitaḥ /
andhakārāvalokādau śeṣabhāvastava sthitaḥ

evaṃ svarūpānupalakṣaṇe'vyutpattiṃ nimittamktvā tadvyutpattyarthamāha -
śṛṇviti / nirodho hyavikalpadaśā /
tatrāndhakārāvalokanarūpavikalpāsambhavānnirodhānte ityuktam /
tādṛśāndhakārāvalokanasyādau [kh, g, gh: lokasyādau]
pūrvadaśāyāṃ nirvikalparūpāyām / yastava śeṣabhāvaḥ sthitaḥ pariśiṣṭaṃ
rūpaṃ sthitam / tathā [k: yathā] hi dehādyatiriktaṃ jñānamātmano rūpam
tacca vikalpakāle dṛśyasaṃvalitameva [k, kh: dṛśyaṃ saṃ]
prakāśate / nirodhakāle dṛśyaparicyutau yad jñānamātraṃ sthitaṃ
tatpariśiṣṭaṃ rūpaṃ śeṣabhāva ityucyate / na ca tādṛśaśeṣabhāvo'pahnotuṃ
śakyaḥ svaprakāśatvena tasya prakāśamānatvāt vyutthitasya tasyaitāvantaṃ
kālaṃ kiñcidavidannāsamityanusandhānācceti

taṃ bhāvaṃ bhāvaya sadā paramānandadāyakam /
atra sarve mahāmohagrahagrastāḥ parāgdṛśaḥ

taṃ bhāvaṃ śeṣabhāvam dṛśyarahitadṛṅmātrarūpam / sadā ahamasmīti
bhāvaya anusandhiparo bhava / duḥkhamūladvaitābhāsavaidhuryeṇa [k:
dṛśya-; k: bhāsana]
duḥkhādirūpānandācchādakābhāvādabhivyaktaparamānandarūpatvena [k:
dṛśyā-; k: vyaktadṛśyapa] prakāśamānatvāt
paramānandadāyakamiti / atra evaṃvidhe svarūpe sarvaṃ śāstrajñā yoginaśca /
parāgdṛśaḥ [k: yaḥ sadṛśaḥ] bahirmukhāntaḥkaraṇāḥ [k:
karaṇa] paśyāmīti paricchinnābhiniveśaparā [k: para] iti yāvat /
yaduktam - paśyāmīti parāgdṛṣṭeralabhyaṃ tat paraṃ padam iti

p. १२७)
anviṣyānviṣya vihatā na tāṃ prāpuśca bhāvanām /
santi loke śāstravidaḥ kuśalāśca sutārkikāḥ

yataḥ sarve tatra mahāmohagrastāḥ ata āha - anviṣyeti / tadbhāvāprāptyā
vihatāḥ śrāntāḥ / tāṃ bhāvanāṃ śeṣabhāvānusandhirūpām / nanu māstveṣā
bhāvanā śāstrābhayasatarkādibhireva labdhapuruṣārthā bhavāma iti cennetyāha
- santīti / śāstravidaḥ śravaṇaparāḥ / kuśalāḥ tārkikā mananaparāḥ /
evaṃvidhā api parāgdṛśo nididhyāsanarāhityena puruṣārthāprāptyā
śocantyeveti bhāvaḥ

aviditvā bhāvamamuṃ śocantyeva divāniśam /
śabdārthaśilpamātreṇa nahi tatpadamāpyate

śabdārthe śrutārthe śilpo mananaṃ tanmātreṇa

yāvadanveṣaṇaṃ kuryādvicāraṃ vāpi paṇḍitaḥ /
tāvanna prāpyate tadvai yato na grāhyameva tat

nanvatisūkṣmo'pi śāstrārtho bhūyaḥ śravaṇamananābhyāṃ cittamupārohati
evameṣa bhāvo'pi śravaṇamananābhyāmeva bhūyaḥkṛtābhyāṃ cittārūḍho
bhavet kiṃ rodharūpanididhyāsaneneti cennetyaha - yāvaditi / anveṣaṇaṃ
śravaṇam [k: śravaṇam nāsti] vicāraṃ mananam / kuta evamiti cedāha
- yata iti / asyāgrāhyatvenālaukikatvānna kevalaśravaṇamananābhyāṃ
cittārūḍhateti bhāvaḥ

p. १२८)
gatvā dūraṃ na tat prāpyaṃ sthitvā prāptaṃ hi sarvadā /
na tadvicārya vijñeyamavicārād vibhāsate

alaukikatvameva tasyāha - gatveti [k: yata iti] / atra
gamanamindriyaprasāraḥ / sthitistadaprasāraḥ / vicāraścintanaṃ cittaprasāraḥ
[kh: prasādo] avicārastadabhāvaḥ / parāg vastu hi
bāhyamindriyavyāpāreṇa āntaraṃ vicāreṇa jñātuṃ śakyam asya tu
pratyagrūpatvenendriyamanonirodhamantarā durvijñeyatvamiti bhāvaḥ

dhāvan svamūrdhacchāyeva na prāpyaṃ kriyayā kvacit /
yathā hi nirmalādarśe pratibimbasahasrakam

savyāpāreṇa na prāpyamityatra dṛṣṭāntamāha - dhāvanniti /
pramāṇavyāpārasya pramātaryaprasara iti tātparyam / vastunyavyutpannena
nirodhavatāpi tad durvijñeyamiti vastuvyutpattaye bhūyaḥ sadṛṣṭāntaṃ
nirūpayati - yatheti

paśyan bālo'pi nādarśaṃ paśyatyevaṃ janaḥ khalu /
paśyan svātmamahādarśe pratibimbaṃ hi jāgatam

bālaḥ ādarśe'vyutpannaḥ paśyannapīti sambandhaḥ / na paśyati eṣa ādarśa iti na
vijānāti / dārṣṭāntike yojayati - evaṃ jana iti / jāgataṃ jagatsambandhi
pratibimbam

svātmānaṃ na vijānāti tadvyutpattivivarjanāt /
yathā paricitākāśaḥ paśyannākāśasaṃśritam

cittasamārohāya dṛṣṭāntaramāha - yatheti / vyutpattihi vastuparicayaḥ / yathā
hyākāśamavakāśātmakamiti kathañcit paricitākāśaḥ puruṣaḥ sarvatra jagat
paśyan [k, kh: paśyet] tadāśrayamākāśaṃ ca paśyati /
kathañcidapyaparicitākāśastu sarvamākāśāśritaṃ jagat paśyannapi nākāśaṃ
paśyati / evamaparicitātmasvarūpaḥ svātmapratibimbitaṃ jagat paśyannapi
nātmānaṃ paśyatīti bhāvaḥ

p. १२९)
jagannāvaiti cākāśaṃ tathā svātmasvarūpakam /
nātha sūkṣmadṛśā paśya jñānajñeyātmakaṃ jagat

avyutpattyā nirodhenāpyātmā nopalakṣita iti tatra vyutpādanāya śeṣabhāvastava
sthitaḥ (९/७७) ityādyuktam tathāpi tatra priyasyāvyutpattimālakṣya
prakārāntareṇa tatra vyutpādayituṃ bhūya āha - nātheti / jagadastīti śeṣaḥ

tatra jñānaṃ svataḥ siddhaṃ tadabhāve na kiñcana /
pramāṇānāṃ pramāṇaṃ tadapramāṇaṃ svato bhavet

anekavidhamapi jagat saṃkṣepeṇa jñānaṃ jñeyamiti dvirūpam / tatra jñeyaṃ
pratyakṣādipramāṇaiḥ siddhamanātmarūpaṃ [kh, gh: svarūpaṃ] ceti
tannirūpaṇamaprayojakamiti jñānameva nirūpayati - tatreti / tayormadhye
ityarthaḥ / svataḥ pramāṇamanapekṣya / tadabhāve na kiñcid bhāyāt [k,
kh: bhūyāt; gh: bhāyāditi tātparyam] atastadapahnotumaśakyamiti tātparyam /
nanu tadabhāve na kiñcanetyanupapannam pramāṇaiḥ [k: pramāṇaṃ]
prameyasya siddhatvādityāśaṅkya pramāṇānāṃ pramāṇatve siddhe pramāṇaiḥ
prameyaṃ setsyati pramāṇatvaṃ ca prameye
vyāvṛtti(pṛti)kriyāmantarā [k: avyā] na sidhyati tasyāṃ ca
kriyāyāṃ na [kh, g: na nāsti] pramāṇasya svātantryam karaṇatvāt
kuṭhāravat / ataḥ pramāṇānāṃ pramātāramantarā pramāṇatvāsiddhau prameyaṃ
na sidhyatīti tātparyeṇāha - pramāṇānāmiti / pramāṇānāṃ pramāṇaṃ
svarūpasādhakamityarthaḥ / nanu pramāṇaṃ pramitaṃ hyasti tathā ca pramātari
pramāṇāpekṣāyāṃ tatrāpi pramātrantarāpekṣāyāmanavasthānaṃ
syādityāśaṅkyāha - apramāṇamiti / na pramāṇaṃ yasya tat [k, kh:
tam] / nanu tarhi kathaṃ tadasti ? tadāha - svata iti /
svasattāyāmananyāpekṣamiti bhāvaḥ

p. १३०)
yataḥ pramāṇānapekṣamādisiddhamatastu tat /
siddhisādhakabhāvena [g: siddha] na tatsiddhiḥ kadācana

kuta evamiti cedāha - yata iti / pramāṇānapekṣamiti / pramātu ścidrūpatvena
sadā prakāśamānatvāt nahi vaikartanaṃ jyotirdīpālokamapekṣate (p० p०
१२) iti rītyā'prakāśitaprakāśakapramāṇasya tatrānupayoga iti tātparyam / ataḥ
sādhanānapekṣaṇāt / siddhisādhaketi [k: siddha] / siddhirutpattirjñaptirvā
[k: statprati] sādhakaṃ tayoḥ sādhanam utpattisādhanaṃ jñaptisādhanaṃ
vetyarthaḥ / siddhisādhakasya bhāvaḥ sattvam / utpattyādisādhakasattvena
kadācidapi na tatsiddhiḥ cidātmana utpattirjñaptirvā na sādhanāntareṇa yujyata iti
bhāvaḥ / cidātmana utpattau jñaptau vā kartṛkaraṇayorapekṣāsti / tathā ca
citibhedāsambhavenaikyāt svasya svasiddhikartṛtvakaraṇatvānupapattiḥ / acidātmā
tu citimantarā svayamevāsiddhaḥ kathaṃ parasiddhiṃ kuryāditi tātparyam / etaca
śrīpratyabhijñāyāṃ kartari jñātari (१/२) iti sūtreṇa [k, gh:
sūtre] vitānitam

tatra vipratipannasya na praśno nāpi cottaram /
anapahnavanīyaṃ tanmahādarśatalaṃ bhavet

tatra jñānasvarūpe / vipratipannasya nāsti jñānamityākṣepaparasya / na praśno
nāpi cottaram / sidhyatīti śeṣaḥ / jñeyasya jaḍasya
svarūpamātrapariniṣṭhitasvabhāvasyānyatrāsti nāstīti vikalpanasāmarthyābhāvāt /
jñānādhīnatvādakhilasiddhestadākṣepe na praśnādikaṃ siddhyatīti tātparyam
yatastadapahnave'sti nāsti veti praśnādyasiddhirata āha - anapahnavanīyamiti /
nanu jñānaṃ jñeyamiti vastudvayam tatra jñānāpahnave jñeyasya prakāśa
evopahataḥ syāt na tu jñeyasvarūpasyopahatiḥ tathā ca tadabhāve na kiñcaneti
kathamityāśaṅkya jñeyaṃ jñānānna pṛthagiti vaktumāha -
tanmahādarśeti

p. १३१)
tatra sarvaṃ bhāsate vai darpaṇapratibimbavat /
deśena vāpi kālena paricchittirna vidyate

tatra mahādarśatalanibhe jñānātmani / yathā hi darpaṇaṃ vinā pratibimbaṃ na
kiñcit evaṃ jñānaṃ vinā jñeyaṃ na kiñciditi bhāvaḥ / nanu na tadantaḥ sarvaṃ
bhāsate yena sarvaṃ pratibimbātmakaṃ bhavet /
deśakālayostatparicchedakayostadanantargatatvādityāśaṅkya netyāha -
deśeneti

tadantarbhāsamānatvāt kathaṃ tābhyāṃ paricchidiḥ /
paricchedasya bhānaṃ tu gagane vastubhiryathā

deśakālābhyāṃ jñātasya [gh: jñānasya] kuto na paricchittiriti cedāha
- tadantariti / yathā hi dīpena prakāśamāno ghaṭādirdīpaprakāśāntarnimagna
eva yāvān [k: yāvān nāsti] ghaṭāderaṃśo
dīpaprakāśāvyāptastāvānna prakāśamānaḥ tathā jñānena prakāśamānaṃ
jñānāntarnimagnameva nikhilaṃ jñeyam / evaṃ ghaṭākāraṃ
jñānamityādyanubhavādapi bhāsamāno ghaṭādyākāro jñānāntargata eva / nahi
jñānāntarbhāamānaghaṭādyākārādanyo ghaṭādirjñānād bahirabhyupeyate
pramāṇābhāvāt prayojanābhāvācca
pratibimbānumitabimbātmakaghaṭāderanumitijñānabhāsyatvena
tadantarnimagnatvena jñānāntargatatvasiddheśca / tathā ca deśakālayorapi
jñeyatvena jñānāntargatatve siddhe svāntargatena na svapariccheda iti bhāvaḥ /
paricchidiḥ paricchittiḥ / nanu kathaṃ tarhyavedānīmetadajñānamiti
paricchedabhānamiti ced vyāpakasyā paricchinnasyākāśasya [k:
paricchinnasyā nāsti] svāntarnimagnairghaṭādyairiva paricchedābhāsa
evetyāha - paricchedasyeti / vastubhiḥ ghaṭādyaiḥ

p. १३२)
rājaputra ! sūkṣmadṛśā tallakṣaya nijaṃ vapuḥ /
yatra sāmānyacaitanye jagadetad virājate

evamakhaṇḍamaparicchinnaṃ svaprakāśaṃjñānaṃ niṣkṛṣya tadeva samādhau
lakṣaṇīyaṃ tava nijaṃ vapurityāha - rājaputreti / sūkṣmadṛśeti
viṣayākārarahitayā'ntarmukhyetyarthaḥ / yathā hi ghaṭādeḥ sthūlaṃ
rūpamākāraḥ sūkṣmaṃ tu nikhilapārthivavikārānusyūtaṃ pṛthivīsāmānyam
evaṃ tattadākārākhiladṛganusyūtā sāmānyacitiḥ sāmānyacaitanyaṃ tadrūpaṃ
nijaṃ vapurlakṣaya / jagaditi / samādhau sāmānyacidrūpaṃ yat prakāśate vyutthāne
vikalpadaśāyāṃ tadeva pratibimbānāṃ darpaṇavad jagadāśrayamiti bhāvaḥ

tatsamāveśasaṃsiddhyā sarvakartṛtvamāpnuyāt /
tasyopalabdhiṃ vakṣyāmi yataḥ prāpnoṣi [k: prāpnoti] tatpadam

nanvevaṃ mahatā prayāsena svarūpa upalakṣite'pi na kiñcit phalaṃ dṛśyata iti
cedāha - tatsamāveśeti / tasya
jagatprakāśādhiṣṭhānasāmānyacaitanyasyopalakṣitasya samāveśaḥ
so'hamasmītyavicchedenānusandhānam nididhyāsanamiti yāvat / tasya siddhiḥ
paripākaḥ ayatnenānuvṛttirityetat / sarvakartṛtvaṃ parameśvaratanmayatvam /
yaduktam [gh: taduktam] -
khyātimapūrṇāmpūrṇakhyātisamāveśadārḍhyataḥ kṣapaya / sṛja bhuvanāni
yatheṣṭaṃ [yathecchaṃ sthāpya hara tiraya bhāsaya ca iti
mudritagranthapāṭhaḥ] bhaja śambhuṃ bhava gururjagataḥ // (vi० pa०
५२) iti / nanu sāmānyacaitanyamityapi suṣuptivaddaśāviśeṣaḥ tat kathaṃ tasya
sarvadaśānusyūtatvamiti cettasya [k: cittasya] sarvatropalabdhirastītyāha
- tasyeti / sāmānyacaitanyasyetyarthaḥ / upalabdhim upalabdhisthānam / yataḥ
yasmād madvacanāt / tatpadaṃ sāmānyacaitanyasthānam

p. १३३)
nidrājāgranmadhyabhāge saṃvidbhedāntare tathā /
madhye saṃvidvedyayośca sūkṣmabuddhyā'bhilakṣaya

tadevāha - nidretyādi / sāmānyacaitanyaṃ nāma viṣayākārarahitaṃ
nirvikalpaṃ jñānam tacca nidrājāgranmadhyabhāge sthitamabhilakṣayeti
sambandhaḥ / nidrā suṣuptiḥ / jāgrad vikalpajñānadhārā / antaḥkaraṇāt
pṛthagbhṛtaiḥ sthūlairindriyairjāgrati viṣayagrahaṇam svapne tu [k:
anu] mano'ntaḥpraviṣṭaiḥ prāptatadaikyakalpairjalanimagnakarakāsadṛśaiḥ
saṃskārātmakamānasaviṣayagrahaṇam / suṣuptau punarindriyaviśiṣṭaṃ manaḥ
svayonau prakṛtau vilīyate / prakṛtiśca tadonmiṣattamoṃ'śena sattvāṃśaṃ
rajoṃ'śaṃ cācchādya tiṣṭhati / tadā ghanacchannārkavadātmāpi
tamasācchannaḥ svayaṃ mandaṃ prakāśate / tathā ca
jāgratsuṣuptyormadhyakṣaṇe manaso vilayābhimukhatvānna viṣayagrahaṇam /
prākṛtatamaso'tyantamanunmeṣānna svarūpācchādanamiti cidātmā
viṣayākāramaprāptaḥ [k: samāptaḥ] prakāśamānaḥ
sāmānyacaitanyarūpaḥ / evaṃ saṃvidbhedāntare saṃvidāṃ bhedo ghaṭākāratā
paṭākāratetyādi / evaṃ bhinnasaṃvidāmantare madhye nahi jñānasya
ghaṭākārataiva [k, g: taiva] paṭākāratā tadbhedasya prasiddhatvāt /
siddhe ca tadbhede ghaṭādyākāraśūnyā śuddhāntarāladaśā'nivāryaiva / evaṃ
saṃvidvedyayormadhye saṃvidityahaṅkārātmā draṣṭā / yathā muktadvāraṃ
[k: dvāreṇa] taḍākodakaṃ kulyādvārā kedārodakenaikībhavati tathā
viṣayagrahaṇakāle draṣṭṛsaṃvid dṛśyasaṃvitparyantaṃ karaṇadvāraikībhavati
/ tatra draṣṭṛ sthāne śarīrādi (dau) draṣṭrākāraṃ caitanyam nabhasi
dṛśye sūryamaṇḍale ca tadākāram madhye tu śuddhamākāravarjitamiti /
viṣayākāravarjitaṃ caitanyamātmano vāstavaṃ rūpam /
tasyoapalabdhisthānānyetānīti bhāvaḥ

p. १३४)
etatpadaṃ nijaṃ rūpaṃ yat prāpya na vimuhyati [k, g: hyasi] /
etadajñānamātreṇa pravṛttaṃ jagadīdṛśam

nanvetadātmopalabdhisthānam tathā ca [k: ca tatropalabhya nāsti]
tatropalabhya ātmā kīdṛśa cedāha etaditi / etatpadameva nijaṃ rūpam na
tato'tiriktaṃ kiñcit / parityaktadṛśyākāraṃ śuddhacaitanyameva
draṣṭurvāstavaṃ rūpamiti bhāvaḥ / yat prāpya ahamasmīti dṛḍhamupalabhya /
etadajñānamātreṇa ahamasmītyanupalambhanena / īdṛśaṃ mahāduḥkhamayam /
śuddhacaitanyaṃ vāstavamātmano rūpamiti jñāte tattadākārasya darpaṇe
pratibimbavat kalpitatvaniścaye pratibimbavyāghrāderyathā na duḥkhadatvamevaṃ
dṛśyābhāsasyāpīti bhāvaḥ

nātra rūpaṃ raso vāpi na gandhasparśaśabdanam [k: kam] /
na duḥkhaṃ na sukhaṃ vā tu na grāhyaṃ grāhakaṃ ca na

yata evaṃvidhadaśāsūpalabhyaṃ [gh: dṛśā sūpa]
śuddhacaitanyamevātmano vāstavaṃ rūpamato viṣayākārābhāsadaśāyāmapi
darpaṇe pratibimbavat svarūpātiriktaṃ na kiñcidityāha - neti / atra ātmani /
śabdanaṃ śabdaḥ / na grāhyamiti viśeṣarūpeṇa niṣiddhānāṃ rūpādīnāṃ
sāmānyarūpeṇa niṣedhaḥ / grāhakamindriyādi

sarvāśrayaṃ sarvarūpamapi sarvavivarjitam /
eṣa sarveśvaro dhātā viṣṇurīśaḥ sadāśivaḥ

pratibimbānāṃ darpaṇa iva sarvasya dṛśyasyāśrayam tathā sarvarūpam /
evamapi vastutaḥ sarvavivarjitam / darpaṇasya yathā sarvapratibimbāśrayāditve'pi
vastutaḥ sarvavarjitatvaṃ tatheti bhāvaḥ / kā sā parā citirmātā (९/४) iti ke
vā vayam (९/५) iti ca pṛṣṭam / tataḥ jñāe svātmasvarūpe vai tato
jñāsyasi mātaram (९/७) ityuttaramuktaṃ prāk / tatra punaḥ pṛṣṭā
hemalekhā mahatā prabandhena svātmarūpaṃ vivicya provāca /
sampratyevaṃvidhaṃ śuddhaṃ svātmarūpameva paracidātmakaṃ
mātṛrūpamityupadiśati - eṣeti / śuddhaḥ sāmānyacaitanyarūpa
ātmetyarthaḥ / sarveṣāṃ brahmādīnām īśvarasturya īśastirodhānakriya īśo
rudraḥ / sadāśivaḥ pañcamo'nugrahakārī / yathā hi darpaṇe
tattatpratibimbaparicchinnadarpaṇāṃśānāṃ tattadrūpeṇa bhede'pi
darpaṇasāmānyarūpeṇā'khiladarpaṇānusyūtatā tasya tathā [k: yathā]
pratibimbakalpatattaddehādyavacchinnacaitanyarūpeṇa bhede'pi
samādhyādyupalabdhasāmānyacaitanyarūpeṇa sarvānusyūtatvādeṣa eva
sarveśvarādiriti bhāvaḥ

p. १३५)
paśyeṣadantaḥ saṃrudhya svātmānaṃ svātmanā satā /
tyaktvā bahiḥprasaratāmantaḥprasaraṇodyataḥ

evaṃvidhamātmatattvaṃ madupadeśairvyutpannasya tava [k, kh: tava
nāsti] na durlakṣyamityāha - paśyeti / īṣaditi na ciraṃ saṃrodhāpekṣā
kintu kṣaṇaṃ dṛśyākārānullekhena manaḥ saṃrudhya tadrūpaṃ paśyeti
bhāvaḥ / tadrūpasyādṛśyatvāt kathaṃ paśyāmīti cedāha - svātmanā sateti /
nahi tadidamīdṛśamiti draṣṭuṃ śakyam kintu
nirodhāvadhibhūtasvātmābhinnasāmānyasadrūpeṇa sadyo
janitaśiśorjaḍavyāvartakāntarullasatsvarūpābhinnaviśeṣavadasmīti
sāmānyābhyupagamarūpeṇeti bhāvaḥ / kathaṃ manaḥ saṃroddhavyaṃ tadāha ##-
udyamavān sannityarthaḥ / atrāntaḥprasaraṇaṃ bahiḥprasaraṇatyāgasya
dṛḍhāvaṣṭambharūpo'bhiniveśa eva nānyad vyāpārāntaram svarūpe
[k, kh: svarūpaṃ] vyāpārānupapatteḥ

tyaktvā paśyāmīti bhāvamandhavanniścalātmanā /
darśanādarśane tyaktvā yo'si so'si drutaṃ bhaja

evamapyahaṃ māṃ paśyāmītyabhiniviśataḥ svarūpaṃ durlakṣyamityata āha ##-
niścalātmanā vṛttisāmānyaśūnyarūpeṇa sthitaṃ paśyeti sambandhaḥ /
yaduktam - paśyāmītyapi yāvatte draṣṭṛbhāvo vijṛmbhate /
tāvadyatnaśataiścāpi na paśyasyātmavaibhavam // iti / etadeva vivicya punarāha ##-
suṣuptirūpaṃ mūḍhatvam tadubhayaṃ vyāvṛttarūpaṃ tyaktvā nāhamasmīti
dṛḍhaṃ niścitya sthitastvaṃ yo'si yadrūpo'si
pariśeṣādavasthātrayānugatayādṛśa[k: tayā dṛśā
sā]sāmānyacaitanyaturya[gh: turya nāsti]rūpo'si so'si tadrūpa evāsi
tamevātmatvena bhaja / avasthātrayasākṣituryarūpamātmatvena
kālavilambamapahāya drutaṃ bhajeti bhāvaḥ

p. १३६)
ityuktaḥ priyayā hemacūḍa ālakṣya tat [kh, g, gh: taṃ] padam
/
ciraṃ viśrāntimālabhya bahirvismaraṇaṃ yayau

tathā kṛtvā tat [kh, g, gh: taṃ] padamālakṣya / viśrāntiḥ
nirvikalpasamādhiḥ

iti śrītripurārahasye jñānakhaṇḍe hemacūḍaviśrāntirnāma
navamo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
navamo'dhyāyaḥ //
p. १३७)
atha daśamo'dhyāyaḥ
athā'paśyaddhemalekhā priyaṃ prāptaparasthitim /
na cālayat parapadāttataḥ so'pi muhūrtataḥ

atrādhyāye dhātupadyaiḥ priyayā bodhitaḥ punaḥ /
prāpya bāhyasamādhiṃ sa jīvanmukto'bhavad dṛḍham //
prāptā parasmin sāmānyacidrūpe sthitiryena / na cālayat nodvodhayat

prabuddha unmīlya netre apaśyat sapriyaṃ jagat /
bhūyastatpadaviśrāntimīhamāno'tivegataḥ

sapriyaṃ priyāsahitam / tatpadaviśrāntiḥ samādhiḥ

netre ni(nya)mīlayadyāvadabravīttāvadeva sā /
priyaṃ haste samādāya sudhāsundarabhāṣiṇī

sā hemalekhā

nātha kiṃ te vyavasitaṃ brūhi netranimīlanāt /
unmīlanādvā kiṃ syātte lābhālābhau samīraya

vyavasitaṃ niścitam / nimīlanādinā yadbhaved lābho'lābho vā tau samīraya

unmīlya na prāpyate kiṃ nimīlya prāpyate ca kim /
tanme brūhi priyatama śrotumicchāmi te sthitim

etasyaiva vivecanam - unmīlyeti / sthitim abhyupagamam

evaṃ pṛṣṭastayā prāha madamatta ivālasaḥ /
anicchannapi vaktuṃ tāmālasyabharamantharaḥ

mantharaḥ mandavyavahāraḥ

priye viśrāntimatyantaṃ prāptavānasmi vai cirāt /
na bāhye duḥkhabhūyiṣṭhe viśramo'sti kvacinmama

viśrāntiṃ viśramaṇaṃ duḥkhāsambhinnasukhamityetat / bāhye vyavahāre

p. १३८)
alamṛjīṣaromanthaprāyavyavahṛtairbahiḥ [g, gh:
hṛterbahiḥ] /
daurbhāgyāndho nādya yāvadavidaṃ svātmasatsukham [gh: svātmanaḥ
sukham]

ṛjīṣaṃ hṛtarasekṣukhaṇḍāṃśaḥ / romanthaḥ carvitacarvaṇaṃ paśuṣu
prasiddham / tadevānnaṃ ca pānaṃ ca priyāṅgaṃ mohakaṃ ca tat / etadāsvādanaṃ
nūnaṃ paśuromamanthavat sadā // ityuktarītyā nahyapūrvaṃ kiñciditi bhāvaḥ /
anandho'pi daurbhāgyenāndhaprāyaḥ / svātmasambandhi satsukham / na tu
vaiṣayikasukhavadasat kṣaṇikamiti bhāvaḥ

yathā kaścidaṭan bhikṣāṃ nidhānaṃ svaṃ na veda vai /
tathā'haṃ svasukhāmbhodhmaviditvā punaḥ punaḥ

svātmasambandhisukhāmbhodhim

sukhaṃ vaiṣayikaṃ śreṣṭhaṃ duḥkhasaṃghābhisaṃplutam /
vidyudvilayanaṃ matvā sthiraṃ tatparatāvaśāt

śreṣṭhaṃ sthiraṃ ca matveti yojanā / vidyudvilayanaṃ vidyudiva kṣaṇamātreṇa
vilayanaṃ nāśo yasya / tatparatā tadāśrayaṇam

duḥkhairabhihato nūnaṃ viśrāntiṃ na tu labdhavān /
aho janā duḥkhasukhavivekajñānavarjitāḥ

viśrāntiṃ duḥkhāsambhinnasukham / janāstu duḥkheṣu sukhābhimānād
duḥkhamevānubhavantītyāha - aho iti

sukhārthino duḥkhasaṃghaṃ sañcinvanti mudhā sadā /
tadalaṃ duḥkhabhogena svayatnāsāditena vai

duḥkhasaṅghaṃ duḥkhasādhanajālaṃ dhanagṛhādikam

priye kṛpāṃ mayi kuru prārthayāmi kṛtāñjaliḥ /
viśrāntimabhivāñchāmi ciraṃ svasmin sukhātmani

viśrāntiṃ proktasukhātmakasvasvarūpāvasthānātmakaṃ samādhim

aho daivahatā bhāsi jñātvāpi tvamidaṃ padam /
tadviśrāntiṃ parityajya mudhā duḥkhāya ceṣṭase [kh, g, gh:
ceṣṭasi]

ceṣṭase [kh, g, gh: ceṣṭasi] vyavahāraparāsi

p. १३९)
ityuktā sā priyaṃ prāha smayitveṣanmanīṣiṇī /
nātha te tanna viditaṃ padaṃ paramapāvanam

smayitvā smitaṃ kṛtvā / tat aparicchinnaṃ sāmānyasaṃvidrūpam / na viditam
ahamasmīti na pratyabhijñātam / paramapāvanaṃ dvaitamalaleśarahitam

yatra sthitā na muhyanti paṇḍitāḥ pāvanāśayāḥ /
tatpadaṃ dūrataste'sti bhūsthasyeva nabhastalam

yatra advaitacidrūpe pūrṇe pade / sthitāḥ ahamasmīti dṛḍhābhiniveśaṃ gatāḥ /
na muhyanti netronmīlananimīlanābhyāṃ svarūpe viśeṣaṃ nādhigacchantīti
bhāvaḥ / pāvanāśayāḥ dvaitavāsanotkrāntacittaḥ / tatpadaṃ paṇḍitāsāditam

tvayā kiñcit suviditaṃ bhavedaviditopamam /
nimīlyonmīlya vā netre tatpadaṃ na samīkṣyate

tvayā nirodhaparatantreṇa kiñcit paricchinnaṃ viditamapi tatra
paricchedasyāvastutvena śuddhaṃ na viditamityaviditopamameva / kuta evamiti
cedāha - nimīlyeti

akṛtvā vāpi kṛtvā vā na tallabhyeta karhicit /
agatvā cāpi vā gatvā na tadāsādayet padam

akṛtveti / svaprakāśatvānnityasattvāt [k: nityatvāt] sarvagatatvācca /
tatsvarūpe nimīlanakaraṇagamanādibhirna viśeṣa iti bhāvaḥ

nimīlya kṛtvā gatvā vā prāptaṃ pūrṇaṃ kathaṃ bhavet /
yavāṣṭakamitenaiva pakṣmaṇonmīlitena tu

anyathā pūrṇatvādihānirityāha - nimīlyeti / pūrṇamiti svaprakāśaṃ
nityamityanayorupalakṣaṇam / pūrṇasya netronmīlanena tirohitatā'tyantaviruddheti
sopahāsamāha - yavāṣṭaketi

p. १४०)
antarhitaṃ yadi tadā nanu pūrṇaṃ bhavetpadam /
aho te mohamāhātmyamāścaryaṃ kimahaṃ bruve

antarhitatve pūrṇaṃ bhavet ! nanviti sāvahelaṃ vākyam / etadeva spaṣṭamāha -
aho iti

yasmin brahmāṇḍakoṭīnāṃ koṭayaḥ koṇasaṃsthitāḥ /
pakṣmaṇo'ṅgulimānasyonmīlanāttattirohitam

yasmin sāmānyacidrūpe ātmani / tirohitamityāścaryamiti sambandhaḥ

śṛṇu rājakumāraitat tattvasāraṃ vadāmi yat /
yāvat granthivibhedo na na tāvat sukhamṛcchati

evaṃ mohe hetuṃ vaktumāha - śṛṇviti / tattvasāramiti / tattvasya
sāmānyasaṃvidātmanaḥ sāraṃ niṣkṛṣṭaṃ rūpam / yadetadvadāmi
tacchṛṇviti sambandhaḥ / granthibhedābhāvādviditamapyaviditaprāyamityāha ##-
granthayaḥ koṭiśaḥ santi moharajjuvivartitāḥ /
tatra svarūpāsaṃvittirmoharajjurudīritā

rajjvādivivartanenodgrathitā granthirityucyate / prakṛtagranthayastu
moharajjorvivartanodgrathanātmikāḥ / katamā sā [k, g: sā nāsti]
moharajjuriti cedāha - tatreti

yatra tā granthayaḥ santi viparītagrahātma(tmi)kāḥ /
tatrādyā dehamukhyeṣu bhavedātmatvaniścayaḥ

yatra yasyāṃ moharajjau / tatra tāsu granthiṣu madhye / dehamukhyeṣu
dehendriyādiṣu / dehādāvātmatvaniścayasya svarūpājñānamūlakatvena
tadāśrayatvam / yathā sudṛḍhagrantheḥ svāśrayarajjucchedanamantarā na
visraṃsanam evaṃ svarūpājñānarajjucchedanamantarā dehādyātmabhāvo
duṣparihara ityasya granthitvaṃ jñeyam

yadvaśādeṣa saṃsāra ātato duṣpratikriyaḥ /
tathā jagatyanātmatvabuddhirbhānasamāśraye

yadvaśāt dehādyahaṃ bhāvavaśāt / es' prasiddhaḥ / saṃsāraḥ [kh, gh:
saṃsāraḥ nāsti] sukhaduḥkhānubhavapravāhaḥ / dvitīyāṃ granthimāha tatheti
/ darpaṇapratibimba [k: bimbādbhā] vadbhānasamāśraye
bhānamātrātmake jagati / anātmabuddhirdvitīyetyarthaḥ /
dehādyātmakadraṣṭṛbhāsanapūrvakatvādanātmadṛśyabhāsanasya
dvitīyagranthitvaṃ jñeyam

p. १४१)
evaṃ jīveśabhedādiniścayā granthayo matāḥ /
etaccirāt samudbhūtaṃ bhūyaḥ saṃvartitaṃ ca vai

ādinā jīvaparasparabhedaniścayādiḥ / etat svarūpājñānam / cirāt anādikālāt /
bhūyaḥ saṃvartitaṃ granthirūpaṃ samāpannamiti sambandhaḥ / tathā rajjureva
bhūyaḥsaṃvartanena grathitā granthirityucyate evaṃ svarūpājñānameva
dehādyāśrayacidātmapradeśasaṃvartanena paricchedādyābhāsatvena grathitaṃ
granthirityucyata iti tātparyam

granthirūpaṃ samāpannaṃ puruṣaḥ pāśitastataḥ /
tadgranthivisraṃsanato bandhānmuktiḥ samīritā

tato'jñānarajjvā yathā rajjugranthivisraṃsanataḥ pāśitāḥ paśavo muktāḥ evaṃ
puruṣā apīti bhāvaḥ

yattvaṃ nimīlya netre sve padamāsādayasyalam /
tatpadaṃ nijarūpaṃ te śuddhasaṃvidanuttaram

nanu keyaṃ mamājñānagranthiryā visraṃsanīyetyāśaṅkyāntaḥkaraṇānirodhe
mama na svarūpaviśrāntirityeṣaiva bhramarūpeti vaktumāha - yattvamiti / alaṃ
paryāptaṃ pūrṇaṃ padamityarthaḥ / tadeva padaṃ te nijarūpam / anuttaraṃ
sarvaniṣedhāvadhibhūtam

tadevākhilasaṃsāracitrādarśatalaṃ mahat /
kadā kva kena rūpeṇa nāsti tanme nirūpaya

citrasyādarśatalam / mahat aparicchinnam / kadā kva keneti
kāladeśākāraparicchedanirāsaḥ

p. १४२)
yadā yadrūpato yasminneti brūyāḥ svasaṃvidam /
tarhi tatkāladeśādervandhyāputratvameva hi

kuta evamiti cedāha - yadeti / svasaṃvidaṃ sāmānyacitim /
idānīmatraitadrūpeṇa saṃvinnāstīti yadi brūyāstarhi tatkālādīnāṃ
vandhyāputratvameva / yasmin kāle deśe vā yadākāreṇa saṃvinnāsti tatkālādikaṃ
prakāśate na vā ? ādye kālādīnāṃ jaḍatvenāsvaprakāśānāṃ
saṃvittādātmyamṛte prakāśānupapatteḥ siddhā saṃvit /
dvitīye'prakāśamānānāṃ tucchatvaṃ durapohamityabhisandhiḥ

pratibimbo nirādarśo yathā nātha tathaiva tat /
tasmāttatpadasaṃtyāgānnāsti kutrāpi kiñcana

saṃvittādātmyarahitānāṃ kālādīnāṃ nirādarśapratibimbavadasattvamevetyāha
- pratibimba iti / tatpadaṃ sāmānyacaitanyam

tatte netornmīlanena kimantaritatāmiyāt /
yāvadevaṃ vijānāmītyevaṃ granthirdṛḍhā bhavet

tat tasmāt saṃvidātmano'paricchinnatvādityarthaḥ / evaṃ kriyayā ātmānaṃ
vijānāmi ityevamabhimānarūpā granthiḥ

tāvanna tatpadaṃ prāptaṃ yatprāptaṃ syānna tadbhavet /
nimīlyonmīlya vā netre yatprāptaṃ manyase padam

prāptaṃ na bhavati / nanvanubhūyamānasya kathamapalāp iti cedāha -
yatprāptamiti / na tadbhavediti / sarvatrānupalabhyamānasya paricchinnatvena
sāmānyacaitanyātmakapūrṇapadatvābhāvāditi [k: bhāvatvā] tātparyam /
etadeva viśadayati - nimīlyeti

tanna pūrṇapadaṃ yasmāt paricchedāt kriyāditaḥ /
kutra nātha mahāsaṃvinnāsti kālānalaprabhā

kriyā nirodharūpā / ādinā kālaḥ / nirodhakriyayā tatkāle bāhye bhāsamānatvena
pariccheda iti bhāvaḥ

p. १४३)
svātmīkaroti yā'nalpakalpanendhanasaṃcayam /
na te kartavyasaṃśeṣo vijñāya paramaṃ padam

kālānalatvameva nirūpayati - svātmīti / yathā kālānalaḥ svātmani patitaṃ
sarvaṃ svātmīkaroti tathā svātmani tādātmyena bhāsamānamakhilaṃ svātmīyaṃ
karotīti bhāvaḥ / mano niroddhavyamiti yo'yaṃ bhramaḥ sa parihartavya ityāha -
na ta iti / śeṣo bhavediti śeṣaḥ

tyaja granthiṃ sannirudhya paśyāmīti hṛdi sthitām /
idaṃ nāhamiti granthimunmūlaya parāṃ dṛḍhām

sannirudhyaiva svarūpaṃ paśyāmi nānyatheti bhramarūpāṃ granthiṃ tyaja /
etadgranthimūlabhūtāmaparāṃ granthiṃ tyajetyāha - idamiti / yathā
nirodhakāle bhāsamānaṃ dṛśyāsaṃbhinnamātmarūpam evamanirodhakāle
bhāsamānamapi viṣayasaṃbhinnarūpaṃ svātmana eva rūpam / taccāpi śuddhameva
dṛśyasya pratibimbatulyatvāditi bhāvaḥ

paśya sarvatra cātmānamakhaṇḍānandabṛṃhitam /
paśyātmanyakhilaṃ lokaṃ darpaṇapratibimbavat

etadevopapādayati - paśyeti / sarvatra dṛśyāvabhāsajāle
abhāsamānasyāsiddherbhāsamānasya [k, kh: ābhāsa] sarvasya
bhānavyāptatvād bhānasyaivātmatvāditi bhāvaḥ / nanu sarvatra bhānātmā bhāsate
tathāpyayaṃ nirodhe [g: nirodhe nāsti] bhāsamāna iva nānandaikarūpa iti
cedāha - akhaṇḍānandabṛṃhitamiti / aparicchinnānandena bṛṃhitaṃ
bharitamityarthaḥ / idamatrākūtam - svātmanaḥ saṃvidrūpataivānandarūpatā
nātiriktā dvaitāpatteḥ / akhaṇḍaikavastunyātmani nirdharmake
jaḍātmatvavyāvṛttaye yathā saṃvicchabdavyavahāraḥ tathā
duḥkharūpatāvyāvṛttaye ānandaśabdavyavahāraḥ / yaśca nirodhakāle
ānandānubhavaḥ sa na svarūpaviśeṣakṛtaḥ svarūpasya nirviśeṣatvāt / api tu
kāma [kh, g, gh: kāmā] eva mahad duḥkhaṃ niṣkāmasya kutastu
tat iti nītyā kāmavāsanā'nantasantatisamākrāntasvabhāvo dāvāgnisaṃkīrṇa iva
duḥkhabhāgayaṃ janaḥ / nirodhakāle punarayameva
dvaitabhāsābhāvāttanmūlakakāmavāsanānāmanunmeṣānmastakanyastabhāratyāg
a iva saviśeṣa eva sukhī saṃvṛtto bhavati / tathā ca kāmavāsanāhānamūlaiva
nirodhe sukhātmatānubhūtirityanirodhe'pi kāmavāsanāhāne prajahāti yadā kāmān
(bh० gī० २/५५) iti bhagavaduktanītyā ānandarūpatānubhūtiranivāryaiveti /
nanvanirodhe kāmavāsanāmūlasya dvaitabhāsasyānapohyatvena
kāmavāsanānāmunmeṣāvaśyambhāvāttannimittaṃ duḥkhaṃ kathaṃ na
bhavedityāśaṅkyāha - paśyeti / anirodhe bhāsamānamakhilaṃ dvaitaṃ na
svātmanaḥ pṛthagasti darpaṇapratibimbavadityarthaḥ / yathā hi pratibimbatvena
dṛṣṭe vastuni na kāmavāsanodayaḥ tathā nikhilasya dṛśyasya
svātmādarśapratibimbatvaniścaye sati na kāmavāsanā nāpi duḥkhamiti bhāvaḥ

p. १४४)
sarvatrākhilamātmānamiti bhūyo na bhāvayan /
śeṣamabhyupagamyāntaḥ svastho bhava nijātmanā

nanu sarvamātmani pratibimbātmakaṃ cet sarvatrākhilamātmānameva paśyāmīti
manvānaṃ pratyāha - sarvatreti / āntare bāhye cetyarthaḥ / akhilamiti /
bhāsamānamakhilaṃ sukhādikaṃ ghaṭādikaṃ cetyarthaḥ /
sarvatrākhilamātmānaṃ paśyāmīti śeṣaḥ / tathā ca sarvatra
bhāsamānamakhilamātmānaṃ paśyāmīti prathamaṃ niścitya / bhūyaḥ sarvatra
akhilamātmānamityādyaṃśaṃ na bhāvayan / śeṣaṃ rūpaṃ bhāvyāṃśariktaṃ
bhāvakarūpaṃ sāmānyacaitanyam ahamasmītyantarabhyupagamya /
cetyātiriktacitimātrarūpo'hamasmīti saṃskāraśeṣaḥ sanniti bhāvaḥ / evaṃvidhena
nijātmanā akṛtrimasvasvarūpeṇa svastho bhava /
evaṃvidhasvasvarūpāvaṣṭambhādapracyuto bhavetyarthaḥ / yadāha vasiṣṭhaḥ ##-
jñātvā nānuśocati // (yo० vā० ३/७/९) iti

p. १४५)
iti priyoditaṃ śrutvā hemacūḍaḥsitāśayaḥ /
viditvā pūrṇamātmānaṃ sarvatra bhrāntivarjitaḥ

sitāśayaḥ sarvabhrāntyapagamācchuddhāntaḥkaraṇaḥ / pūrṇamātmānaṃ
nirodhetaradaśayorekarūpeṇa bhāsamānam / nirodha eva śuddhātmā bhāsata iti
bhrāntivivarjitaḥ

kramāt pūrṇasamāveśāsādanāt sthirabhāvanaḥ /
viharan sarvadā hemalekhādiyuvatīgaṇaiḥ

proktarūpāhaṃbhāvabhāvanākramāt pūrṇe proktarūpe samāveśo
niṣprakampābhimānaḥ / prāksthitadehasamāveśavat / yadāhuḥ -
dehātmajñānavajjñānaṃ dehātmajñānabādhakam / ātmanyeva bhavedyasya sa
necchannapi mucyate // iti / sthirabhāvana iti / samāveśasiddhyuttaraṃ
sthiratatsaṃskāra ityarthaḥ / viharan bhuvi sthita iti dūrasthena saṃbandhaḥ

śāsan rājyaṃ samṛddhaṃ svaṃ jitvā śatrugaṇaṃ raṇe /
śāstrāṇi śrāvayan śṛṇvannarjayan dhanasaṃcayam

aśvamedharājasūyādyairyajan kratumukhyakaiḥ /
varṣāṇāmayute dve vai jīvanmukto bhuvi sthitaḥ

jīvanmuktadaśāsaṃsthaṃ niśāmya tanayaṃ nṛpaḥ /
muktācūḍaśca tadbhrātā maṇicūḍo'pyacintayat

hemacūḍapitā muktācūḍo nṛpaḥ

kimayaṃ pūrvavanneha lakṣyate sarvathā kila /
sukhe na hṛṣyatyatyantaṃ duḥkhe nodvijate tathā

taccintanaprakāramāha - kimayamiti / ayaṃ hemacūḍaḥ

lābhālābhau śatrumitre sāmyāt paśyati vai kutaḥ /
karoti rājakāryāṇi naṭavad raṅgamaṇḍale

naṭavacchannāntarabhiprāyaḥ

p. १४६)
kāpiśāyanapāyīva sadā matto'bhilakṣyate /
sadānyatra gatasvānta iva kṛtyaṃ karotyalam

kāpiśāyanaṃ madyam

tatkena hetunā ceti tamāsādya rahaḥ kvacit /
apṛcchatāṃ hemacūḍaṃ kuta evaṃ bhavāniti

taṃ hemacūḍam / muktācūḍamaṇicūḍāvapṛcchatām

tataḥ svasthitimācakhyau hemacūḍastayoḥ kramāt /
tāvubhau bhrātṛpitarau hemadūḍena bodhitau

tayoḥ pitṛbhrātroḥ

āsāditaparaṃtattvau [k: paratattvau] jīvanmuktau babhūvatuḥ /
atha mantrigaṇo'pyevaṃ rājñaḥ śrutvā jagadgatim

jagadgatiṃ jagata ātmā'vyatiriktarūpatvena sthitim

vicārya svātmano bhāvaṃ jñātajñeyo'bhavattadā /
evaṃ viśālanagare krameṇaiva parasparam

ātmanastādṛśaṃ bhāvaṃ vicārya niścitya / parasparamupadeśādviduriti
saṃbandhaḥ

upadeśād viduḥ sarve tattvamābālagopakāḥ /
narā nāryo bālavṛddhā dāsā dāsīgaṇā api

tattvaṃ vastuyāthātmyam

jñātajñeyāstyaktadehāhaṃbhāvā abhavan khalu /
na tatra kasyacit kāmaḥ krodho vā lobha eva vā

jñātaṃ jñeyaṃ śāstreṣu mukhyajñeyatvenābhimataṃ yaiḥ / lobha eva vā
anāhṛto nāstīti saṃbandhaḥ

anāhṛto'sti bālasya sthavirasyāpi vā kvacit /
āhṛtaiḥ krodhakāmādyairvyavahāraparāyaṇāḥ

bālasyeti / bālavṛddhayoravicārasvabhāvayoḥ prāyaḥ sadā
krodhādisaṃbhavastathāpi samyaktattvavedanamāhātmyena
kāmādimūladehāhaṃbhāvasyonmūlitatvānna tanmūlakāmādiranāhṛto'stīti
tātparyam / kimarthaṃ kāmāderāharaṇamiti ced vyavahārārthamityāha -
āhṛteti / yathā hi naṭānāmāhṛtakāmādyaiḥ prāsaṅkiko nāṭyavyavahāraḥ
evaṃ tatra sarveṣāmiti bhāvaḥ

p. १४७)
bālaṃ mātā khelayati aratattvasya vārtayā /
dāsā dāsyaḥ svāminaṃ svaṃ sadā paricaranti vai

nanu sadā vyavahāraparāṇāṃ keṣāñcidaparipakvacittānāṃ tattvānusaṃdhānaṃ
śithilībhavedityāśaṅkya tadvyavahārasya tattvānusaṃdhānānukūlatvānnetyāha
- bālamityādi / paratattvasya vārtayā / mā ruda tvaṃ maheśvaro'si na te vastuto
duḥkhamityādirūpayā / evamagre'pi jñeyam

paratattvaparairvākyairvyāharantaḥ parasparam /
naṭā nāṭyaṃ vitanvanti pātraistattvaprasaṅgajaiḥ

tattvaprasaṅgajaiḥ pātraiḥ vivekamohādiveṣaiḥ

vivekavārtāparamaṃ vaco gāyanti gāyakāḥ /
vidūṣakā dūṣayanti lokavyavahṛtiṃ sadā

śāstrāṇi pāṭhayanti sma vidvāṃsaḥ pāṭhakān janān /
paratattvavicārārhairudāharaṇamaṇḍalaiḥ

evaṃ tatra narā nāryo dāsā dāsyo naṭā viṭāḥ /
bhṛtyā bhaṭā mantriṇaśca śilpino vārayoṣitaḥ

sarve veditavedyānte viśālanagare'bhavan /
prāksaṃskārabalenaiva vyavahāraparāyaṇāḥ

nanu sarveṣāṃ tatra viditavedyatve kathaṃ tatra bhūpālādeḥ sarvo
rājyādivyavahāra ityāśaṅkyāha - prāgiti / yathā hi madirāmattaḥ śūraḥ
prāksaṃskāramātreṇa śastravartmasvaskhalan yudhyati tatheti bhāvaḥ

p. १४८)
na saṃsmarati saṃvṛttaṃ śubhaṃ vāpyaśubhaṃ tathā /
bhaviṣyad nānusandhatte harṣaśokādisādhanam

nanu tatratyajanasya kathaṃ saṃskāramātrād vyavahāraḥ kīdṛśaśceti cedāha
- na saṃsmaratīti / saṃvṛttam atītam duḥkhādisādhanaṃ prāptaṃ dṛṣṭvā
bhaviṣyaśokādi nānusaṃdhatte

vartamāne smayan hṛṣyan khidyan krudhyannivānvaham /
madhukṣība ivātyantaṃ vyavahāraparo janaḥ

vartamāne harṣasukhādau

evaṃvidhaṃ tannagaramṛṣayaḥ sanakādayaḥ /
prasiddhavidyānagaramityākhyamūcurāgatāḥ

sanakādayaḥ sanakavāmadevādyāḥ / nagaramāgatā iti saṃbandhaḥ

yatra kīrāḥ pañjarasthā api vāco vadanti vai /
citirūpaṃ svamātmānaṃ bhajadhvaṃ cetyavarjitam

yatretyādiślokacatuṣṭayaṃ caturthādhyāyāntagataṃ prāg vyākhyātam

nāsti cetyaṃ citeranyad darpaṇapratibimbavat /
citiścetyaṃ citirahaṃ citiḥ sarvaṃ carācaram

yataḥ sarvaṃ citimanu bhāti sā tu svatantrataḥ /
ataścitiṃ janāḥ sarvabhāsinīṃ sarvasaṃśrayām

bhajadhvaṃ bhrāntimutsṛjya citimātraṃ sudṛṣṭayaḥ /
tiryañco'pyevamatyantaṃ yatra vāco vadanti vai

prasiddhavidyānagaraṃ tadadyāpi pracakṣate /
evaṃ tatra purā hemalekhayā khalu bodhitaḥ

hemacūḍo'bhavad vidvān jīvanmuktastathetare /
strībālapramukhāḥ sarve jātā jñātaparāvarāḥ

p. १४९)
tasmācchreyonidānaṃ tu satsaṅgaḥ prathamaṃ bhavet /
tasmācchreyovāñchane tu satsaṃśrayaparo bhavet

yasmāddhemalekhāsaṅgāt sarve muktā jātāstasmāt sajjanasaṃśrayaparaḥ

iti śrītripurārahasye jñānakhaṇḍe hemacūḍopākhyānasamāptirnāma
daśamo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyāṃ
daśamo'dhyāyaḥ //
p. १५०)
atha ekādaśo'dhyāyaḥ
śrutvaivaṃ hemacūḍasya kathāmatyadbhutāṃ tadā /
bhārgavaḥ sandigdhamanāḥ praṣṭuṃ samupacakrame

atrādhyāye modapadyairdatta āha bhṛgūdvaham /
upalabdhyupapattibhyāṃ cetyaṃ nānyacciteriti //
te tvayā / jñānaṃ śuddhādvayātmarūpam / viṣamaṃ sarvānubhavaviruddham /
sarvataḥ sādhanairasādhyaṃ ca

bhagavan śrīguro yatte proktaṃ jñānaṃ mahādbhutam /
bhāti me viṣamaṃ hyetadasādhyaṃ cāpi sarvataḥ

kathametajjagad dṛśyaṃ citimātrasvarūpakam /
adṛṣṭaṃ kevalaṃ hyetacchraddhopeyaṃ na cānyathā

viṣamatvamevāha - kathamiti / dṛgdṛśyayordvitvasya prāmāṇikatvena
citimātratvamadṛṣṭam / etacca śraddhāmātreṇāṅgīkartavyaṃ
nopalabdhyupapattibhyāmiti tātparyam

citiścetyavinirmuktā nānubhāvyā kathañcana /
nopapannaṃ sarvathaitat kathaṃ cittaṃ samāruhet

upalabdhyabhāvamevāha - citiriti / kathañcana kenāpi pramāṇavyāpāreṇa /
nānubhāvyā nānubhavaviṣayīkāryā / evaṃvidhā citirastīti sarvathā nopapannaṃ na
yuktiyuktam / kathamiti / evaṃ caivaṃvidhā citirastīti kathaṃ niścetavyamiti bhāvaḥ

kṛpayā bodhanīyo'hamatra sarvātmanā khalu /
ityāpṛṣṭo dattagururavadad bhārgavaṃ prati

evamākṣepeṇa svasmin gurordhārṣṭyaśaṅkā bhavediti matvāha - kṛpayeti /
atra śuddhacitiviṣaye

p. १५१)
śṛṇu rāma pravakṣyāmi dṛśyatattvaṃ yathāsthitam /
etad dṛśyamaśeṣaṃ tu dṛśimātraṃ na cetarat

cetyasya [kh: caitya] cidatirekeṇa naraśṛṅgaprāyatvāt cetyanirmuktā
[kh: caitya] citirupapannaiveti vaktuṃ dṛśyatattvaṃ nirūpayati -
śṛṇviti / dṛśyasya cetyasya tattvaṃ svarūpam / yathāsthitam ananyathetyarthaḥ /
tadevāha - etaditi

atropapattiṃ vakṣyāmi śṛṇu samyak samāhitaḥ /
etad dṛśyaṃ kāryabhūtamutpatterupalambhataḥ

atra dṛśyasya citimātratve [g, gh: dṛśi] / upapattiṃ yuktim /
upalabdhiprakārasya hemacūḍopākhyānena samyaguktatvena prakṛte
upapattirevocyata iti jñeyam / tatrādau dṛśyasya dṛkkāryatāṃ sādhayati -
etaditi / kāryaṃ kartṛvyāpāraviṣayam

utpattirnūtanābhāsaḥ pratikṣaṇamidaṃ jagat /
nūtanatvenaiva bhāti tatkṣaṇotpattimajjagat

nanu keyamutpattiriti cedāha - nūtanābhāsa iti / nūtanatvenābhāsanamityarthaḥ
/ loke hi nūtanatvenābhāsamānamevotpannamityucyate / yasmādidaṃ
jagannūtanatvenaiva pratikṣaṇaṃ bhāti tasmādityarthaḥ / etaccāgre bhaviṣyati

kecit prāhurjagadidamakhaṇḍaikakṣaṇodbhavam /
anye padārthasaṃghātamayaṃ sthiracarātmakam

nanu ghaṭādidṛśyasamudāyo hi jagaditi vyavahriyate samudāyātiriktaṃ na
kiñcidekaṃ vastu jagadityāśaṅkya vijñānavādyabhyupagatāṃ jagataḥ
kṣaṇikaikarūpatāṃ svābhimatāṃ pradarśayati - keciditi / atra
vijñānavādināmayamabhyupagamaḥ kṣaṇikavijñānasaṃtānarūpāḥ pramātāraḥ
pūrvapūrvasaṃskārajanya evottarottaravijñāne dṛśyākārāḥ / ghaṭākāraṃ
jñānaṃ paṭākāraṃ jñānamityādyanubhavena
vijñāneṣvākārasyāvaśyābhyupeyatvena tāvataiva vyavahāropapattau bāhyaṃ
nābhyupeyam / yasmin jñāne hi yāvān deśakālavastvākāro bhāsate
tāvānakhaṇḍaikarasastatkṣaṇe / kuṇḍakṣaṇo badarakṣaṇaḥ kuṇḍabadarakṣaṇa iti
krameṇa jagat kṣaṇikaṃ tattatkāladeśākārātmakamakhaṇḍaikarasaṃ
vijñānameveti / anye hi kāṇādaprabhṛtayaḥ padārthasaṃghāta eva jagat
taccākāśādirūpaṃ sthiraṃ nityam ghaṭādirūpaṃ caramanityam /
sthiracarobhayavastusamudāya eva jagadityāhuḥ / atra
kāṇādapramukhairvādibhirbāhyārthe na kiñcit pramāṇaṃ vaktuṃ śakyam
sarvavyavahārasyāvaśyābhyupeyajñānākāramātraparyavasitatvāt / evamapi
kathañcid vyavahārāspṛṣṭaṃ bāhyaṃ kalpitamajāgalastanāyitameva
[k, kh: mevāha] / vijñānavādimataṃ tu cidātmani
jagatpratibimbavādinaḥ svasyānukūlam aṃśena pratikṣaṇapariṇāmino
[pratikṣaṇapariṇāmino hi sarve eva bhāvāḥ ṛte citiśakteḥ iti
sāṃkhyatattvakaumudīsthitaḥ pāṭhaḥ / draṣṭavyā - sāṃ० kā० ५] hi
bhāvā ṛte citiśaktim ityādyanyamatāviruddhaṃ ceti tasya
prathamamupapādanamiti dhyeyam

p. १५२)
sarvathā tu samutpattimadityeva viniścitam /
tatra svabhāvavādastu nocito'tiprasaṅgataḥ

anyairyathecchamuktamapi jagad dṛśyatvahetukānumānena
vahvāgamānukūlenotpattimadeva siddhyatītyāha - sarvatheti / sthiraṃ
kṣaṇikamityubhayathā [k: bhayaṃ yathā] sthitamapītyarthaḥ / dṛśyasya
nityatvapakṣavyāvartakastuśabdaḥ / jagato naraviṣāṇatulyatāṃ sampādayituṃ
pravṛttasya tatkṣaṇikatvāks'ṇikatvasādhanaṃ vadhyamaṇḍanatulyamiti
tadupekṣaṇaṃ sarvathetyanena sūcitam / atha jagato na kiñcidupādānaṃ pramāṇena
sidhyatīti nirupādānaindrajālikasṛṣṭabhāvatulyatāṃ vaktumādau jagataḥ
satyatvaṃ sopādānatvaṃ ca vadatāṃ mataṃ krameṇa pratikṣeptumupakramate -
tatreti / jagataḥ [k: jagataḥ nāsti] kāryatve siddhe [k: siddheti] sati /
svabhāvavāda iti / kāraṇamanapekṣyaiva kāryamutpadyate tathā svabhāvāt
kāryasyotpatteḥ pūrvaṃ kāryasyāsattvādeva kaḥ kamapekṣeta / utpannaśca
svayaṃsiddho'nyaṃ kimityapekṣeta / tasmādyathā kāraṇasya kāryānapekṣatvaṃ
svābhāvikamucyate evaṃ kāryasyāpīti hi cārvākaḥ svabhāvavādamāha / taṃ
dūṣayati - nocita iti / na yukta ityarthaḥ / atiprasaṅgata iti / kāraṇamanapekṣya
jāyamāno ghaṭaḥ paṭo'pi bhavediti bhāvaḥ / mama tu
ghaṭapaṭakāraṇayorvaicitryānna ghaṭaḥ paṭo bhavet / nanu ghaṭakāraṇameva
paṭakāraṇaṃ kuto na bhavediti cet svakāraṇavaicityāditi gṛhāṇa

p. १५३)
anvayavyatirekābhyāṃ kāryakāraṇaniścayāt /
saṃvādataḥ pravṛttīnāṃ kathamākasmikaṃ bhavet

nanu kapālaḥ kāryaṃ ghaṭaḥ kāraṇamiti kuto na bhavediti cedāha - anvayeti /
anvayo hi kārye samagrakāraṇavyāptiḥ / vyatirekastu kāraṇābhāve
kāryābhāvavyāptiḥ / etajjñānena kāryakāraṇayorniyatarūpatāniścayāt /
nanvanvayavyatirekayorjñānasya bhramatvasambhavāt kathamuktaniścayaḥ
pramāṇaṃ syāditi cedāha - saṃvādata iti / tajjñānasya bhramatve
kāraṇamupādāya kāryārthaṃ pravṛtto visaṃvādyeteti bhāvaḥ / tasmāt
kāryamākasmikaṃ niṣkāraṇaṃ kathaṃ bhavet

kvacittu kāraṇe'dṛṣṭe'pyadṛṣṭaṃ kalpyameva tat /
bahūnāmanurodho hi nyāyayaḥ sarvairudāhṛtaḥ

nanvākasmikaduḥkhādisamāgame na kiñcit kāraṇaṃ dṛṣṭamiti cedāha -
kvaciditi / adṛṣṭaṃ kāraṇam / nanu dṛṣṭakāraṇadṛṣṭāntenādṛṣṭakāraṇe
kāraṇaṃ kalpanīyam athavā dṛṣṭakāraṇābhāvenākāraṇakameva [k:
kāraṇameva] kāryaṃ [k, kh, g: kāraṇaṃ] kalpanīyamiti
[veti iti sārvatrikaḥ pāṭhaḥ / sa cānāvaśyakaḥ] cedāha - bahūnāmiti

bhūyo dṛṣṭaṃ sapūrvaṃ hi kāryaṃ kvacidadarśane [gh: nam] /
dṛṣṭavat parikalpyaṃ syādanyathā sārvalaukikī

nanu kasya bahutvamiti cedāha - bhūya iti / bahuśa ityarthaḥ / prāyaḥ sarvaṃ hi
jagad dṛṣṭakāraṇakameveti bhāvaḥ / viparīte doṣamāha - anyatheti /
ākasmikatvābhyupagama ityarthaḥ / sārvalaukikī saṃpravṛttirityanvayaḥ

p. १५४)
sampravṛttirvirudhyeta tasmāt sarvaṃ sakāraṇam /
ata eva kāryahetoḥ kiñcitkāraṇatatparaḥ

kāryārthaṃ [k, kh: kāryārtha] kāraṇopādāne samīcīnā
phalaparyavasāyinī pravṛttirviruddhyeta visaṃvādyeta / niyamena
phalaparyavasāyinī na bhavediti yāvat / kvacit pravṛtteḥ phalāparyavasānaṃ tu
samagrakāraṇavaikalyāditi tātparyam / yasmāt pravṛtteḥ phalaparyavasānaṃ
tasmāt / kāryārthaṃ kāraṇe pravṛttiṃ nidarśayati - ata eveti / tatparo [k:
tatparā] dṛśyata iti sambandhaḥ

sarvatra dṛśyate lokastasmādetanna kiñcana /
kecidāhurasatkalpairaṇubhiḥ kāryamudyatam

etaccārvākābhyupagataṃ na kiñcana vicārāsahamityarthaḥ / athātra
kāṇādamatamutthāpayati nirākartum - keciditi / asatkalpairadṛṣṭaiḥ / udyatam
utpannam

tebhyo'tyantaṃ vibhinnaṃ cāpyasadatyantato bhavet /
asatsatorekatā hi viruddhā [kuto na viruddhā bhavedityanvayaḥ / viruddhā
bhavedeveti tātparyam] na kuto bhavet

tebhyaḥ aṇubhyaḥ / vibhinnaṃ kāryam / paramāṇavo hi
jālamarīcyupalabdhatrasareṇorārambhakadvyaṇukakāraṇabhūtāḥ kāryasya
dvyaṇukasya sāvayavatvahetunānumitāḥ / tatrāyaṃ sṛṣṭikramaḥ -
paripakvaprāṇyadṛṣṭasahakṛteśvarecchayā viśarāruṣu sthireṣu paramāṇuṣu
kriyotpadyate tataḥ krameṇa paramāṇudvayaṃ saṃyujyate / tasmāt saṃyuktād
dvyaṇukam / punarīśvarecchayaiva dvyaṇukeṣu kriyā tataḥ krameṇa
tribhirdvyaṇukaiḥ saṃyuktaistrasareṇuriti rītyā ghaṭādyantakaryotpattiḥ /
dvyaṇukādikāryaṃ ca paramāṇvādikāraṇebhyo'tyantabhinnam nāśānantaraṃ
cātyantamasad naraśṛṅgatulyamiti tanmatam / etannirākaroti - asaditi /
nahyeka eva ghaṭa utpatteḥ purā asat tataḥ sannāśottaramasanniti yuktam
sattvāsattvayorvirodhāt

p. १५५)
nahi pītamapītaṃ ca prakāśaṃ cāprakāśakam /
ekaṃ bhaved viruddhatvāt sāṅkaryādiprasaktitaḥ

nanu sattvāsattvayorbhāvābhāvatve'pi saṃyogatadabhāvayoriva na virodha
ityāśaṅkyāha - nahīti / saṃyogasyāvyāpyavṛttitvānna tadabhāvavirodhaḥ /
sattvaṃ tu ghaṭādau samavāyena sattāvattvam / tacca vyāpyavṛttīti
svābhāvaviruddhameva [k: svabhāva] / pītamiti / ata eva pītamapītaṃ
caikaṃ na bhavediti bhāvaḥ / nanu vastusvabhāvo hyanubhavānurodhena kalpanīyaḥ
tathā ca samavāyināmavayavināṃ daiśikavyāpyavṛttitve'pi ghaṭo'sti
nāstītyanubhavānurodhāt kālikāvyāpyavṛttitvamiṣyata iti cedāha -
prakāśamiti / aprakāśakamiti svārthaṃ kaḥ / prakāśamaprakāśaṃ ca vastu
naikaṃ bhavet / anyathā'nubhavamātrānurodhenaikasya
viruddhobhayarūpatvābhyupagame nīlaṃ tamaścalatītyanubhavānurodhena tamaso
dravyatve ekasminneva dravye bhāsvaraśuklarūpotpattyā prakāśatvaṃ
kṛṣṇarūpotpattyā tamastvamiti vaktuṃ śakyatvena
tamaḥprakāśayoraikyaprasaṅga [k: ṅgāditi] iti bhāvaḥ / pītamapītaṃ
prakāśamaprakāśaṃ ca vastu naikaṃ bhavedviruddhatvāditi sambandhaḥ /
tasmādbhāvābhāvayoḥ kāladeśabhedenāpi virodha iti siddham / nanu tamaso
dravyatve dravyacākṣuṣamālokasahakṛtamiti niyamabhaṅgaprasaṅga iti cenna
anubhavānurodhena niyamasyaivānyathā kalpayituṃ yuktatvāt / atha cāvayavivāde
dūṣaṇāntarāṇyapyāha - sāṅkaryādiprasaktita iti /
sattvāsattvādirūpaviruddhadharmādhyāsātmakasāṅkaryaprasakterityarthaḥ / ādinā
paramāṇoravayavasiddhiḥ tatsaṃyogasyāvyāpyavṛttitvabhaṅga
ityādidoṣo'vaseyaḥ / nau proktasāṅkaryādidoṣāṇāṃ sarvamatasādhāraṇyena
nedṛśairdos'irahameva paryanuyojya iti cet satyamuktam / ata [gh: eta] eva
dvaitasatyatvavādinaḥ sarvānadhikṣeptumevāṇuvādanirasanamiṣeṇemāni
dūṣaṇānyuktāni [k: nyuktāni......ḍūṣaṇāni nāsti] dattaguruṇā /
dvaitānupapattyanveṣaṇaparāṇāmadvaitināṃ punarimāni dūṣaṇāni vāsudevasya
bhagadattaprayuktavaiṣ'vāstravad [bhagadattaprayuktaṃ vaiṣṇavāstraṃ
vāsudevasyorasi vaijayantīrūpeṇa pariṇatamityeṣā kathā mahābhārate droṇaparva.i
२९ adhyāye draṣṭavyā] bhūṣaṇānyeveti [k: dadūṣaṇā] jñeyam
[g, gh: dhyeyam]

p. १५६)
īśvarecchādito vāpi kathamādikriyodbhavaḥ /
guṇasāmyaprakṛtikaṃ jagadityapyasaṃbhavi

evaṃ paraiḥ sādhitaṃ jagadabhyupagamya sāṅkaryādibhirdūṣayitvā samprati
jagadutpattireva na sambhavatīti mūlacchedakaṃ dūṣaṇamāha - īśvareti /
īśvarecchayā hi paramāṇuṣu kathamādau kriyodbhavaḥ kvacidapi kasyacidicchayā
kasmiṃścidacetane kriyotpattyadarśanāt / yadi prabhoricchāmacetanā
anuruddhyeran tarhi bhaṭān vinā rājecchāmanurudhya śastraṇyeva
śatrubhiryudhyeran / tasmānnaiṣa ārambhavādo yukta iti bhāvaḥ /
evamārambhavādaṃ pratikṣipya [k: prakṣipya]
pariṇāmavādamadhikṣeptuṃ tanmatamanuvadati - guṇasāmyeti / anīśvarāḥ
sāṅkhyāstu sattvarajastamoguṇānāṃ sāmyāvasthā prakṛtiḥ svata eva
guṇavaiṣamyadvārā jagadākāreṇa pariṇamata ityāhuḥ / etanmatamapyasambhavi

vaiṣamyahetormṛgyatvāt sāmyahetośca hīnataḥ /
cetanenānadhiṣṭhānād dṛṣṭāntānupalambhataḥ

kuta iti cedāha - vaiṣamyeti / prakṛtirhi pralaye guṇasāmyarūpā / pralayānte ca
nirhetukaṃ tadguṇavaiṣamyamayuktam [k, kh: vaiṣamyayuktam] / nāpi
prakṛteranyat pralaye kiñcidasti yadguṇavaiṣamye hetutāmiyāt /
kathañcidviṣamaguṇāyāḥ prakṛteḥ punaḥ sṛṣṭyante
pralayanimittasāmyahetorasambhavaśca / nanvasti heturguṇānāṃ sāmye vaiṣamye
ca yaddhi seśvaraiḥ parairīśvarasya vaiṣamyanairghṛṇyaparihārāya
karmābhyupagataṃ tadeva guṇavaiṣamyādau heturiti cedāha - cetaneti /
cetanenānadhiṣṭhānāt prakṛteḥ pariṇāmo nopapadyata iti śeṣaḥ / sarvatra
cetanavyāpāramantarā jaḍeṣu kriyā'darśanāt svataḥ prakṛterjagadrūpeṇa
pariṇatiḥ bandhāya puruṣaṃ prati pravṛttiḥ mokṣāya nivṛttiśca nopapadyate /
cetanapreraṇaṃ vinā jaḍeṣvadṛṣṭamātreṇa pravṛttirnivṛttirvā na kvacid
dṛṣṭeti dṛṣṭāntābhāvānnānumānenāpyetatsiddhirityāha - dṛṣṭānteti

p. १५७)
tasmājjāgatakāryasya kāraṇaṃ nopalabhyate /
adṛṣṭe tu śrutirmūlaṃ nānyamānasya [k, kh: mānasusa]
saṅgamaḥ

yasmādevaṃ jagataḥ kāraṇanirūpaṇaṃ nopapadyate tasmādupapannamupādānaṃ
kāraṇaṃ nopalabhyate / nanu jagadrūpaṃ kāryaṃ
pramāṇasiddhamanapahnavanīyam tasyākāraṇakatvābhyupagame
paramatapraveśaḥ tasmāt kāraṇopapādanaṃ [k: pādane]
cāsmaduktamārgeṇaiva bhavatiavyamiti cedāha - adṛṣṭe tviti / parokṣe viṣaya
ityarthaḥ / śruti āgamaḥ / mūlaṃ niścāyakaṃ pramāṇamityarthaḥ / kuta evamiti
cedāha - nānyeti [k: nānyeti nāsti] / anyasya pratyakṣādernasaṅgamo
[k, kh: kṣādirna] na pravṛttirityarthaḥ

pramātṝṇāmapūrṇatvāt pramāṇasyānavasthiteḥ /
kāryakartraviyogasya [k, kh: kartṛ] bhūyodarśanahetutaḥ

kuta evamiti cedāha - pramātṝṇamiti / indriyasaṃnikṛṣṭe hi pratyakṣaṃ
pramāṇam tathā ca pramātṝṇāṃ parichinnatvenāpūrṇatvāt svargendrādau
tadindriyasannikarṣāsambhavānna pratyakṣapravṛttiḥ / anumānasya
pratyakṣamūlakatvādeva nityaparokṣe na pravṛttiḥ / kathañcit
pravṛttyupapādane vā'numānapramāṇasya
buddhikauśalyāyattatvenānyathāpyanumānapravṛttyā'navasthiterna
kiñcidanumānena prakṛtaṃ setsyati / dṛśyate ca [k, kh: ca nāsti]
tarkamātrasādhite'rthe tairthikānāṃ pṛthagabhyupagama ityabhipretyāha -
pramāṇasyeti / anumānasyetyarthaḥ / nanvāgamo hi śabdaḥ / so'pi
paricchinnapramātṛprayuktaḥ svargādiparokṣe kathaṃ pramāṇamityāśaṅkya
nādṛṣṭe'rthaṃ śabdamātrasya prāmāṇyamucyate kintvaiśvarasyaiva
śrutyāderityabhipretya tasyāgamasya pramāṇeṣu śreṣṭhatvaṃ vaktuṃ
prasaṅgādīśvaraṃ sādhayati kāryeti [k: kāryeti nāsti] / kāryaṃ
kartravinābhūtamiti bhūyodarśanājjagat sakartṛkamityarthaḥ

p. १५८)
sakartṛkaṃ jagadidaṃ sambhavāccetano hi saḥ /
kāryasyācintyarūpasya kartā sādhāraṇaḥ katham

sakartṛkamiti / nanvanumāneneśvarasādhanamanupapannam anumānaṃ hi
nityaparokṣāsādhakamityanupadamuktatvāditi [k: parokṣa] ceducyate -
kāryasya nopādānāvinābhūtatvaniyamaḥ yoginirmitakāryaṃ vyabhicārāt / nanu
tatrāpi yogīcchayā jhaṭiti saṅghaṭitaparamāṇava evopādānatāṃ bhajeranniti
cenna niyataśivakastūpakakāpālikākapālātmakakramollaṅghanena
vyabhicārānapohāt / niyataśivakādikramollaṅghanaṃ
yogasāmarthyajanitamanapahnavanīyam / tenaiva sāmarthyena kāryanirvāhe
paramāṇusaṅghaṭanakalpanasya [k, kh: apara] niryuktikatvāt /
prasiddhakāraṇādikrameṇaiva ghaṭaṃ nirmimāṇo yogī kulāla eva bhavediti ca
jñeyam / nahi karyasya kartravinābhūtatvāniyamaḥ avyabhicārāt / tasmāt kāryasya
sakartṛkatvānumānaṃ nānavasthitam / evaṃ sādhito'pi kartā na jaḍaḥ upādāna
[k, kh: dānā] gocarāparokṣajāñādimattvarūpakartṛtvasya
jaḍe'sambhavādityāha - sambhavāditi

tasmādacintyaśaktiḥ sa āgamastadvimarśanam /
pūrṇasya tvapratihataṃ pramāṇaṃ sarvato'dhikam

yasmādacintyarūpakāryasya prākṛtaḥ kartā na sambhavati
tasmādacintyaśaktirjagatkartā / taditi luptaṣaṣṭhyantaṃ tasya
pūrṇasyācintyaśakteḥ / jagatkarturvimarśanaṃ tattvāvagamako vyāhārātmā
vyāpāra āgamaḥ / asyācintyaśaktitvādevāśarīriṇo'pi vyāhārātmā vyāpāra iti
jñeyam / yasmādevaṃvidho'yamāgamaḥ [k, kh: tasmā]
tasmādapratihataṃ sarvathānyairabādhitaṃ pramāṇam / ata eva sarvataḥ
pramāṇebhyo'dhikaṃ śreṣṭhaṃ prablamityetat

p. १५९)
tatraikastu maheśānaḥ purā sṛṣṭerudāhṛtaḥ /
svatantro hyanupādānaḥ svātantryabharavaibhavāt

dṛśyaṃ dṛśimātramiti atropapattiṃ vakṣyāmi (११/७) iti pratijñāya
mahatā prabandhenāgamasya pramāṇamūrdhanyatvaṃ saṃsādhya
pratijñātārthanirvāhāyāgamoktārthamanuvadati ślokadaśakena - tatreti /
āgame ityarthaḥ / upādānarahita ityudāhṛtaḥ / tathā cāgamaḥ - ātmā vā
idameka evāgra āsīnnānyatkiñcana miṣat (aita० u० २/१/१) nāsadāsīnno
sadāsīttadānīm (ṛ १०/१२९/१) nirupādānasambhāraḥ svātmabhittau hi
līlayā / jagaccitraṃ samullikhya krīḍatyeṣa maheśvaraḥ // ityādiḥ / svātantryasya
bhara utkarṣaḥ tasya vaibhavānmāhātmyādavabhāsayadityanvayaḥ

svātmabhittau jagaccitraṃ vilāsāyāvabhāsayat /
yathā svapnamanorājye kalpitaṃ svena kevalam

vilāsāya krīḍanāya / yathā svapne manorājye vā [k: vā nāsti] svena
kevalamupādānādyanapekṣya parikalpitaṃ deham

ahaṃtvenaiva gṛhṇāti dehaṃ tadvadyaṃ jagat /
na te rūpaṃ yathā dehaḥ svapnavyāvṛttihetutaḥ

tatkāle'haṃtvena gṛhṇāti tadvad ayam īśvaraḥ svaparikalpitaṃ jagadahaṃtvenaiva
gṛhṇāti / yaduktam - svāṅgabhūteṣu [svāṅgarūpeṣu iti tatratya
pāṭhaḥ] bhāveṣu pramātā kathyate patiḥ (ī० pra० ३/१४) iti / na ta iti /
yathā hi manorājyaparikalpitadeho na te svarūpam svapnādau vyāvṛtteḥ

p. १६०)
tathāsya na jagaddeho vyāvṛtteḥ pralaye nanu /
dehādivyatiriktastvaṃ yathā kevalacinmayaḥ

dārṣṭāntike yojayati - tatheti / asya īśvarasya / ahaṃtvena gṛhītamapi jaganna
dehaḥ pralaye jagato vyāvṛtteḥ / yathā jāgradādyavasthāsvanuvṛttasya
cidātmanastavāvasthānanuvṛttadehādivyatiriktatvam [k: statā]
evamīśvaro'pi pralayānanuvṛttajagadvyatiriktaśuddhacinmaya ityāha -
dehādīti

evaṃ devo jagacchūnyacidekavapuravyayaḥ /
tenedaṃ svātmani jagaccitramunmīlitaṃ nanu

avyaya ityanityajagadvyatiriktatvanirvāhakaṃ viśeṣaṇam / tena cidekavapuṣā
īśvareṇa

kvonmīlayejjagaccitraṃ svānyasya kvāpyasambhavāt /
ṛte citiṃ kadācidvā kva kiṃ bhavitumarhati

pūrṇasya tvapratihatam (११/२३) ityuktaṃ pūrṇatvaṃ sādhayati - kveti /
svasmādanyasya dṛśyasya kvāpi svasmādanyatrāsambhavājjagaccitraṃ
kvonmīlayedityarthaḥ / kutaḥ kvāpi svānyasyāsambhava iti cedāha - ṛta iti /
kadā kva mimiti kāladeśākārapratiṣedhaḥ

yatrābhāvaściterbrūyāt sa deśo naiva sidhyati /
abhāvaśca citeḥ kena sidhyettasmāccitiḥ parā

yatreti / yatra cidabhāvastaddeśaprakāśāsambhavānna siddhyet siddheḥ
prakāśāyattatvāditi bhāvaḥ / abhāvaśceti / citaḥ sarvaprakāśakatvena
tadabhāvaḥ kena sidhyediti bhāvaḥ / tasmāt cidabhāvasyāsiddheḥ / parā aniṣedhyā
niṣedhāvadhibhūtatvāt

mahāsattā jagadgrāsaśīlā pūrṇā'vabhāsate /
samudramantarā bhaṅgā divānāthaṃ vinā prabhāḥ [kh, g:
bhā]

ata eva mahāsattā / mahatī aparicchinnā sattā yasyāḥ / ata eva jagatastayā
vyāptatvājjagato grasanaṃ śīlaṃ yasyāḥ / ata eva pūrṇā / ata eva tadavinābhūtaṃ
jagaditi sadṛṣṭāntamāha - samudramiti

p. १६१)
yathā na santi tadvad vai saṃvidrūpaṃ vinā jagat /
tasmādeṣa mahādevaḥ śudhacaitanyavigrahaḥ

yathā hi samudrādyavinābhūtāstaraṅgādayastathā [k, kh:
samudrāvi] saṃvidrūpāvinābhūtaṃ jagat / yasmātsaṃvidavinābhūtaṃ jagat
tasmācchuddhacaitanyavigraho dṛśyaleśarahita āsīditi sambandhaḥ

āsīt sṛṣṭeḥ purā tasmādutpannaṃ tatra saṃsthitam /
tasmin vilīyate cānte jagadetaccarācaram

tasmāt mahādevāt yathā hi samudrāderutpattyādimatāṃ taraṅgādīnāṃ
samudrādimātrādyātmatvam evaṃ jagataścinmātrātmatvamiti bhāvaḥ

ityāgamaprasiddho'rthastanna vipratipadyate /
adṛṣṭārtheṣu saṃvādāt pramāṇaṃ hyāgamo bhavet

itīti / tatraikastu (११/२४) ityādiślokadaśakoktaḥ / tat āgamoktam / na
vipratipadyate saṃśayaviṣayatāṃ na prāpnoti / kuta evamiti cedāha - adṛṣṭeti
/ yatpramāṇaṃ hi kvacidvisaṃvādi tatpramito'rtho vipratipadyate / yatpramāṇaṃ
sarvatrāvisaṃvādi tatpramito'rtho na vipratipadyata iti niyamaḥ / āgamastvadṛṣṭa
eva pramāṇaṃ na kvacidvisaṃvādi ato na tatsiddho'rtho vipratipadyate / ataḥ sarvathā
āgamaḥ pramāṇameva bhavediti bhāvaḥ

dṛśyante maṇimantrādisiddhayaḥ sarvato yataḥ /
nālpaprajño vijānīyād maṇimantramahāphalam

nanu vedādyāgamo neśvaroktaḥ pramāṇābhāvāditi cedāha - dṛśyanta iti /
maṇimantrauṣadhānāmāgamoktānāṃ sidhayaḥ phalotpattayaḥ sarvataḥ [k:
sarvatra] sādhakeṣu yato dṛśyante tasmādāgamaḥ sarvajñagadita iti
sambandhaḥ / yato maṇyādiphalamīśvarādanyo'lpaprajño jñātuṃ [k:
dātuṃ] na samartha ityāha - neti

p. १६२)
tasmāt sarvajñagadito hyāgamaḥ sarvadarśanaḥ /
tatrokto deva evādau sṛṣṭerjagata āsthitaḥ

sarvadarśana iti / dṛśyate'neneti darśanaṃ pramāṇavyāpāraḥ [k, kh:
pramāṇaṃ] sarvatra darśanaṃ yasya / dṛṣṭādṛṣṭaviṣaya iti yāvat /
devaścinmātramūrtirīśvaraḥ evakāreṇa pradhānādivyāvṛttiḥ

nirupādāna evādau sṛṣṭavānakhilaṃ jagat /
yasmād [k: asmā] maheśvaraḥ pūrṇasvacchasvātantryasaṃyutaḥ

ādau svayameko'pi sṛṣṭikāle upādānaṃ kutaścit saṃpādayatīti cennetyāha ##-
ghaṭādikāryamavabhāsayati īśvaro nirupādānaścet kathaṃ kvāvabhāsayediti
cedāha - yasmāditi / pūrṇamaparicchinnaṃ svacchamakṛtrimaṃ sahajaṃ
svātantryam tena yutaḥ

cidātmabhittāvakhilaṃ citramunmīlayed [k, kh, gh: laya] jagat
/
na tajjagat sambhavati bahiḥ kvacidavasthitam

cidātmeti / yasmāt svasya pūrṇatvena svānyasyāsambhavaḥ
pūrṇasvātantryayutaśca tasmāt svasmin cidātmarūpabhittau akhilaṃ
jagaccitramunmīlayediti bhāvaḥ / nanvātmabhittāvunmīlayatīti kuta etaditi cedāha ##-
pūrṇatvādīśvarasyeha sthānamanyanna vidyate /
anyasthānasthitaṃ tacca kathañcinnaiva sidhyati

kuto na sambhavatīti cedāha - pūrṇatvāditi / vrīhibhiḥ pūrṇe ghaṭe'nyasya
sthānābhāva iva digādināmātmanā pūrṇatvena nānyasya sthānamastītyarthaḥ /
ātmano'pūrṇatvābhyupagame'pi [kh, g: ātmanaḥ pū] na tadanyatra
jagatsiddhyati citprakāśabahirgatasyāprakāśādityāha - anyasthāneti

p. १६३)
tathā ca darpaṇābhoge pratibimbavadeva hi /
jagadunmīlitaṃ deve caivaṃ sarvaṃ samañjasam

nanvetadasamañjasam anyasvarūpāntaranyāvabhāsādṛṣṭeścidātmasvarūpe
jagadavabhāsānupapatterityāśaṅkyāha - tathā ceti / darpaṇeti /
darpaṇasvarūpāntaḥ pratibimbāvabhāsavad deve cidātmasvarūpe
jagadunmīlitamavabhāsata ityevamabhyupagamāt [k: ityevābhyu] sarvaṃ
samañjasamiti bhāvaḥ

jagadāderhi devasya yogīva jagataḥ kriyāḥ /
saṅkalpanagaraprakhyā sṛṣṭirdevasya sammatā

nanu nirupādānānasya kartuḥ kāryakriyā na kvacid dṛṣṭeti cedāha -
jagadāderiti / jagatkarturityarthaḥ / nanu tarhi yoginirmitavajjagadapi
svanirmāturbhidyeta / tathā ca kathamuktaṃ cidatiriktaṃ jagannāstīti cedāha -
saṃkalpeti / devasya jagatkartuḥ saṅkalpanagaravat karturanatiriktā sṛṣṭiriti
bhāvaḥ

rāma te mānasī sṛṣṭirmanomayayeva kevalā /
anekamātṛmeyādipracurā hyavabhāsate

nanu saṅkalpanagaramapi karturbhinnameveti cennetyāha - rāmetyādi / mānasī
sṛṣṭiḥ saṅkalpanagarapracurā yā'vabhāsate sā manomayīti sambandhaḥ

anekabhedabhināpi manaso'nyā nahi kvacit /
utpanā manasastatra sthitā tatraiva līyate

etadeva sādhayati - aneketi / bhedairvyāvṛttadharmairbhinnāpi mānasī
sṛṣṭiryato manasyutpannā tatraiva sthitā līnā ca tato manaso nahyanyeti
sambandhaḥ

sā kevalamanorūpā yathā tadvajjagacchivāt /
seti / mānasī sṛṣṭiḥ / yathā manasa utpattyādinā mānasasṛṣṭermanomayatvam
tathā cidātmanaḥ śivādutpattyādimajjagaccinmayamityarthaḥ / nanu
śivādutpannasya jagataḥ śivarūpataiva na citirūpateti cedāha - sa iti / nanu
citeḥ kulālavadvigrahaḥ syādityāśaṅkya netyāha - avigraheti / nāsti
cidatirikto vigraho deho yasyāḥ

p. १६४)
tripurānantaśaktyaikyarūpiṇī sarvasākṣiṇī /
sā citiḥ sarvataḥ pūrṇā paricchedavivarjanāt

sā citireva prakaraṇapratipādyā tripuretyāha - tripureti / śaktayo'sya
[śaktiśca śaktimāṃścaiva padārthadvayamucyate / śaktayo'sya jagatsarvaṃ
śaktimāṃstu maheśvaraḥ // ityayaṃ ślokaḥ
paramārthasārasyābhinavaguptakṛteryogarājakṛtavivṛtau (pṛ० १०)
śrīsarvamaṅgalāśāstraślokatvenoddhṛtaḥ /] jagatsarvam ityuktanītyā
ghaṭādyābhāsarūpā anantā yāḥ śaktayaḥ tāsāmaikyaṃ saṅghaṭṭaḥ tadrūpiṇī
/ yathā hi darpaṇe pratibhāsamānapratibimbānāṃ darpaṇa eva saṅghaṭṭamayaṃ
rūpam tatheti bhāvaḥ / nanu tarhi darpaṇavacciterjaḍarūpatvamapi syāditi cedāha ##-
jñānaśaktirūpaṃ na jaḍasya sambhavatīti bhāvaḥ / prāguktamapi pūrṇatvaṃ
samyak sādhayitumupakramate - sā citiriti

kālo deśaśca loke'smin paricchedakaraḥ smṛtaḥ /
tatrākāramayo deśaḥ kālastu syāt kriyāmayaḥ

nanu kathaṃ paricchedavarjiteti cedāha - kāla iti / kāladeśayoreva
paricchedakatvaṃ [k: katvaṃ ....... pariccheda nāsti] loke prasiddhamiti
bhāvaḥ / nanu paricchedakābhimatayordeśakālayoḥ kiṃ rūpamiti cedāha -
tatreti / tayormadhye ityarthaḥ / ihedānīṃ ghaṭaḥ ityatra iheti gṛhādirūpo deśaḥ
idānīmiti prātarādirūpaḥ kālaśca bhāsate / tatra gṛhādirūpo deśaḥ
pṛthivyādeḥ saṃsthānaviśeṣātmākāra eva / kālastu sūryādiparispandādirūpā
kriyaiva / yaduktaṃ śrīpratyabhijñāyām - mūrtivaicitryato
deśakramamābhāsayatyasau / kriyāvaicitryanirbhāsāt kālakramamapīśvaraḥ //
(२/५) iti / tathā kālaḥ sūryādisañcārastattatpuṣpādijanmaiveti ca /
nahyākārakriyābhyāṃ deśaḥ kālo vānya udayagiryādirūpeṇa
sūryādikriyārūpeṇa vopādhinopahito'khaṇḍaḥ sambhavati yataḥ
sarvavyavahārasyopādhinaiva nirvāhāttatkalpane pramāṇaprayojanayorabhāvāt

p. १६५)
yāṃ citiṃ samupāśritya syādākāraḥ kriyāpi vā /
tasyāḥ paricchedakatvamanayoḥ syāt kathaṃ vada

evaṃ deśakālayoḥ svarūpaṃ vivicya tābhyāṃ paricchedābhāvaṃ cidātmanaḥ
sādhayati - yāmiti / loke hi śatāyuṣo gṛhasthasya puruṣasya tato mahataḥ
kaliyugātmakakālasya jambūdvīpātmakadeśasyaikāṃśena śatavarṣakālena
gṛharūpadeśena ca pariccheda etāvatkālaṃ sthita etaddeśe sthita iti prasiddhaḥ /
prakṛte cidātmaikadeśāśrayeṇa satordeśakālayorākārakriyārūpayoḥ
kathañcidātmaparicchedakatvamityarthaḥ

kasmin deśe ca kāle ca citirnāstīha tadvada /
yatra na syāccitiḥ so'pi kathaṃ syāditi vai bhavet

nanu na [k, kh, g: na nāsti] cidātmāśritau deśakālau
yatastayormahattarayorekadeśastho [k, kh: yasta] ghaṭādivaccidātmeti
cedāha - kasminniti / yatreti / deśe kāle cetyarthaḥ [kh, gh:
vetyarthaḥ] / so'pīti deśaḥ kālo'pītyarthaḥ / yathā hi ghaṭaśarāvādikaṃ
mṛdavinābhūtaṃ mṛdāśritaṃ mṛdaṃ vinā na bhavati yathā [k, kh:
tathā] ca darpaṇāvinābhūtaṃ pratibimbavastu darpaṇāśritaṃ darpaṇaṃ vinā
na bhavati tathā cidavinābhūtau deśakālau na tāṃ vinā sta iti tadāśritāveveti
bhāvaḥ

p. १६६)
astitā hi padārthānāṃ prakāśo nāparaḥ khalu /
prakāśastu citiḥ proktā nāciteḥ syāt [k: nācitaḥ] prakāśatā

nanu saurālokavaccitirvastuprakāśikā tathā ca yathā saurālokarahito
ghaṭādirandhakāre'sti tathā citiṃ vināpi deśādibhāvo'pyastviti cedāha -
astiteti / sattvamityarthaḥ / vastūnāṃ sattvaṃ hi prakāśanameva netarat /
sattvātmakaprakāśo hi citireva / nāsti citiryasya so'citiḥ cidaviṣaya iti tātparyam /
tasyāciteḥ [k: nācitaḥ] prakāśatā yato nāsti tataścitireva prakāśa
ityarthaḥ / tathā ca saurālokaṃ vinā'ndhakāre
ghaṭāderbhāsanādālokādanyadastitvaṃ ghaṭādeḥ / citprakāśaṃ [k, kh:
ataści] vinā ghaṭādeḥ kathañcidapi vyavahārābhāvāccitprakāśa
evāstitvamiti bhāvaḥ

prakāśastu sumukhyaḥ syādyaḥ svatantraḥ prakāśate /
jaḍā na svaprakāśā hi citiyogaprakāśanāt

nanvastu bhāvānāṃ sattvaṃ prakāśa eveti tathāpi ghaṭaḥ prakāśate citiḥ
prakāśata iti vyavahārasāmyāt kathaṃ citirghaṭāderdṛśyasyāśrayabhūteti
cedāha - prakāśa iti / yaḥ svatantraḥ anyānapekṣaḥ prakāśate tasya prakāśa
eva sumukhyaḥ [gh: mukhyaḥ] / jaḍā iti / jaḍāścidātmabhinnā na
svaprakāśāḥ anyānapekṣaprakāśā na bhavantītyarthaḥ / hi yasmāt / citiyogena
cidviṣayatāpattyā prakāśanāt / cittādātmyamaprāptānāmaprakāśanānna
jaḍānāṃ svatantraḥ prakāśa iti bhāvaḥ

anyānapekṣaṇenaiva citiḥ svasmin prakāśate /
jaḍāścitiṃ samāśritya prakāśante na cānyathā

citistu na tathetyāha - anyeti / svasmin anyatādātmyamanupagate svasvarūpe
[k, kh: svarūpe] samādhyādidaśāsu prakāśate / tasmāccijjaḍayoḥ
prakāśavaiṣamyāccitimāśrityaiva jaḍāḥ prakāśante na svātantryeṇetyarthaḥ

p. १६७)
aprakāśe'pi vastūnāmastitā cettadā śṛṇu /
asti nāstīti loke'smin vyavasthā nahi setsyati

astu bhāvānāmākāśāśritatvavaccidāśritatvam tathāpyasti prakāśate
cetyādivyavahārādastitā prakāśād [k: kāśavad] bhinnaiveti cedāha ##-
[k: sama.....ādye nāsti] vā ? ādye
samaniyatayorghaṭatvakalaśatvayorivābhedaḥ siddha eveti matvā dvitīye
dūṣaṇamāha - astīti / yadyaprakāśe'pyastitvaṃ ghaṭādestarhi ayaṃ
nāstyaprakāśamānatvāt ityādi vyavasthā na setsyatīti bhāvaḥ / nanu tarhyayaṃ
prakāśate'sti ca yataḥ prakāśate tato'stītyādivyavahāraḥ kathamiti ceducyate
dṛśyaḥ pratyakṣatvādityādivanneya iti

tasmādvastvastitā loke citprakāśo na cāparaḥ /
yathā hi pratibibimbānāṃ sattvaṃ darpaṇa eva hi

tasmāditi / prakāśāstitvayoḥ samaniyatatvādityarthaḥ / atra dṛṣṭāntaḥ -
atheti / dharmadharmiṇostādātmyābhiprāyeṇoktam - darpaṇa eveti /
darpaṇasattvameva pratibimbānāṃ sattvamityarthaḥ

tathā citirjagatsattā tataḥ sarvaṃ citirbhavet /
adhikaṃ bhāsate yattu tannairmalyamahittvataḥ [k: mahattvataḥ]

evaṃ citprakāśayostādātmyāt citirjagatsatteti sarvaṃ jagat / nanu citireva sarvaṃ
cettarhi citirityeva bhāseta ghaṭaḥ paṭa ityadhikāṃśabhāsanaṃ kathamiti cedāha
- adhikamiti / tannairmalyeti / tasyāściternairmalyasya mahittvato [k:
mahattvataḥ] māhātmyādityarthaḥ

p. १६८)
kāṭhinyanirmalatvābhyāṃ pratibimbāvabhāsanam /
tayostu tāratamyena pratibimbaḥ sphuṭo'sphuṭaḥ

nanu darpaṇe'dhikāvabhāsaḥ pratibimbavidhayā bhavet prakṛte cidātmani
kathamadhikāvabhāsa iti cetpratibimbavidhayaiveti vaktuṃ pratibimbanimittaṃ
vivecayati - kāṭhinyeti / kāṭhinyamariktātmatvam [k, kh:
kāṭhinyabharitātmatvam] pratibimbāvabhāsanaṃ bhavediti śeṣaḥ / tayoḥ
kāṭhinyanirmalatvayoḥ / tāratamyena nyūnādhikabhāvena

darpaṇe ca jale cāpi spaṣṭametaddhi lakṣyate /
jaḍatvād darpaṇādestu svātantryaparivarjanāt

kāṭhinyanirmalatvayorādhikyena darpaṇe sphuṭaḥ pratibimbaḥ nyūnatvena
jale'sphuṭaḥ pratibimbaḥ / etacca sarvaiḥ spaṣṭaṃ lakṣyate / bhittau
nairmalyābhāvādākāśe kāṭhinyābhāvācca na pratibimbāvabhāsa iti bhāvaḥ /
nanu citeḥ svāntaḥ [k: svataḥ] pratibimbāvabhāsane
darpaṇavadbimbāpekṣāpi syāditi cedāha - jaḍatvāditi / parivarjanād
bimbāpekṣeti sambandhaḥ

bimbāpekṣā citeḥ svacchasvātantryādanapekṣatā /
nirmalatvaṃ svataḥsiddhaṃ citermālinyavarjanāt

svacchaṃ [k: svaccha] paricchedamalarahitaṃ sārvatrikaṃ yat svātantryaṃ
tasmāt citerbimbānapekṣatā / yaduktam -
antarvibhāti sakalaṃ jagadātmanīha
yadvadvicitraracanā mukurāntarāle /
bodhaḥ [paraṃ nija iti tantrasārasthaḥ (pṛ० १९)
īśvarapratyabhijñāvivṛtivimarśinīsthaśca (bhā० २ pṛ० २०३) pāṭhaḥ
/ paramārthasārayogarājavivṛtau (p. ३९) tu mūlasthita eva pāṭho
dṛśyate /] punarnijavimarśanasārayuktyā [vṛttyā iti tantrasārasthaḥ
pāṭhaḥ]
viśvaṃ parāmṛśati no mukurastathā tu // iti / (ta० sā० pṛ० १९)
nanu jalādeḥ katakādinā nairmalyaṃ sambhavati citeḥ kathamiti cedāha -
nirmalatvamiti / ākāśavadasaṅgatvena mālinyavarjanāt

p. १६९)
anekarasataiva syād mālinyaṃ tat [g, gh: sā] citernahi /
aikātmyarūpyāccicchakterakhaṇḍatvācca sarvathā

jalādigataṃ mālinyaṃ kim ? yaccitirūpe nāstītyucyate ityāśaṅkyāha -
aneketi / anekarasatvaṃ vastvantarasaṃmilitatvam / yathā pārthivarajaḥsaṃmilitatvaṃ
jale mālinyam / yathā ca darpaṇe kācānyāṃśasaṃmilitatvam / nanvevaṃvidhaṃ
mālinyaṃ citeḥ kuto neti cedāha - aikātmyarūpyāditi / avayavināṃ
svāvayavāntarāleṣu svātiriktāṃśamelanānmālinyasambhavaḥ / cidātmano
niravayavatvenaikarūpyānna mālinyamiti bhāvaḥ / evaṃ nairmalye nimittamuktvā
kāṭhinye'pi nimittamāha - akhaṇḍeti / akhaṇḍatvādariktātmabhāvahetoriti
sambandhaḥ / riktātmatvamavakāśātmatvam / avakāśavattvamiti yāvat / loke
hyavayavasaṃśleṣatāratamyena kāṭhinyatāratamyaṃ dṛṣṭam / yadavayavānāṃ
saṃśleṣādhikyam tatra kāṭhinyādhikyam / saṃśleṣanyūnatve kāṭhinyanyūnatā /
dṛṣṭaṃ caitatpāṣāṇajalayoḥ / saṃśleṣe ādhikyaṃ cāvayavāṃśānāṃ
sambandhādhikyanimittam / tathāhi - yasmādyasyāvayavāṃśā
yāvanto'dhikāḥ saṃyuktāstasya tāvadadhikaḥ saṃśleṣastāvadadhikaṃ
kāṭhinyaṃ ca [k, kh, g: ca nāsti] tathā yasya yāvadavayavāṃśā
asaṃyuktāstasya tāvadaṃśāvacchedenāntaravakāśavattvādriktātmatvācca
tasyānadhikakāṭhinyavattvamiti / citestu
niravayavatvenākhaṇḍatvādariktātmatvamiti bhāvaḥ

ariktātmabhāvahetornairmalyaṃ sarvato'dhikam /
asvato bhāsamānasya bhānamanyānuṣaṅgataḥ

ariktātmabhāvahetościternairmalyaṃ sarvato'dhikam / prakṛte nairmalyamiti
kāṭhinyasyāpyupalakṣaṇam / tathā ca citernairmalyaṃ kāṭhinyaṃ ca sarvato
darpaṇāderadhikamityarthaḥ /
avayavināmavayavāṃśeṣvavakāśatāratamyasambhavāttadavakāśeṣu
vastvantarapraveśatāratamyasaṃbhavācca kāṭhinyanairmalyatāratamyam
citerakhaṇḍatvena sarvathā riktātmatvāddhetornairmalyaṃ kāṭhinyaṃ ca
sarvato'dhikamiti bhāvaḥ / nanu jagataḥ pratibimbatve pramāṇābhāvānna
pratibimbatvamiti cet pratibimbalakṣaṇayogāt pratibimbatvamiti vaktuṃ
pratibimbalakṣaṇamāha - asvata iti / anyāsambandhe'bhāsamānatve
satyanyasambandhena bhāsamānatvaṃ pratibimbatvam [k: anyaprati] / yathā
pratibimbaghaṭo darpaṇaṃ vinā'bhāsamāno darpaṇasambandhenaiva bhāsate evaṃ
citiṃ vinā'bhāsamānaṃ citisambandhenaiva bhāsata iti jagat pratibimbātmakameva

p. १७०)
pratibimbasvarūpajñāḥ pratibimbaṃ pracakṣate /
jagadetādṛśaṃ sarvaṃ sarvaiḥ samabhilakṣitam

pratibimbamiti / pratibimbatvamityarthaḥ / etādṛśaṃ pratibimalakṣaṇavat

svato na bhāsate kvāpi bhāsate ca cidāśrayāt /
ato jagat syādādarśapratibimbasusaṃmitam

lakṣaṇaṃ jagati yojayati - svata iti / susaṃmitaṃ samam

citirvicitrā'nyabhāvairuparaktāpi bhāsinī /
svarūpādapracyutaivādarśavalleśato'pi hi

evaṃ jagataḥ pratibimbalakṣaṇayogāt pratibimbatvamupapādya
citerdarpaṇatulyatāṃ vaktuṃ pratibimbagrāhiṇo lakṣaṇaṃ citi yojayati - citiriti /
anyasvarūpoparaktatvena bhāsamānatve [k: mānetyapra]
satyapracyutasvarūpatvaṃ pratibimbagrāhitvam / bhāsinīti / bhāsanamātrarūpā / ata
eva leśato'pyapracyutetyanvayaḥ

darpaṇapratibimbānāṃ darpaṇānanyatā yathā /
cidātmapratibimbānāṃ cidātmānanyatā tathā

evaṃ mahatā prayatnena jagataḥ pratibimbatve sādhite phalitamāha - darpaṇeti

p. १७१)
darpaṇe pratibimbo hi bimbaheturnirūpitaḥ /
citiḥ(ti) svātantryahetuḥ syāt pratibimbo hi jāgataḥ

svacchasvātantryādanapekṣatā (११/५७) iti citi pratibimbane [k,
kh, g: pratibimbe] na bimbāpekṣetyuktam tannirvāhayitumupakramate -
darpaṇa iti / bimbaṃ heturyasya sa bimbahetuḥ / svātantryaṃ heturyasya sa jāgataḥ
pratibimbaḥ

svasaṅkalpādrāma paśya svātmani pratibimbitān /
bhāvān bimbavinābhūtānnirnimitāvabhāsanān

bimbaṃ vinā pratibimbane dṛṣṭānamāha - svasaṅkalpeti / svātmani
antaḥkaraṇaparichinnacaitanye / nirgataṃ nimittaṃ yasya nirnimittamavabhāsanaṃ
yeṣām darpaṇapratibimba iva nālokādinimittāpekṣāpīti bhāvaḥ /
saṅkalpānmanorājye bhāsamānā bhāvāḥ pratibimbalakṣaṇayogāt
pratibimbabhūtāḥ teṣāmavabhāsanaṃ bimbādyanapekṣameva prasiddham evaṃ
paraciti jagatpratibimbanamiti bhāvaḥ

saṅkalpa eva svātantryaṃ citerucchūnamīryate /
asaṅkalpadaśāyāṃ sā citiḥ svacchaikarūpiṇī

saṅkalpapadārtha vivṛṇoti - saṅkalpa iti / cidātmano yatsvātantryaṃ nāma
śaktiḥ tasya śaktitvādeva cidātmānatirekatvaṃ sūkṣmarūpatvaṃ ca /
tadyadocchūnaṃ puṣṭaṃ bhavati dṛśyākāratvena sthūlatāṃ prāpnotīti yāvat
tadā tatsvātantryameva saṅkalpa itīryate [k: itīryate....ṣaṅkalpa nāsti] /
yathā hi tava svātantryameva saṅkalparūpam / sa [k, kh:
tatvamapyaneka] tvayayanekabhāvān pratibimbatvenāvabhāsayati
evameveśvarasya svātantryamapi jagadavabhāsayatīti bhāvaḥ / asaṅkalpakāle ca
yathā tavātmabhūtā [k, kh: tathā cātma] citiḥ pratibimbavarjanena
svacchaikacinmātrarūpiṇī

p. १७२)
evaṃ citerviśuddhaikarūpāyāḥ sṛṣṭitaḥ purā /
bṛhat svātantryamabhavat saṅkalpātmakameva tat

evaṃ sṛṣṭeḥ purā pralaye viśuddhaikarūpā yā parā citistasyā yad
bṛhadaparicchinnaṃ svātantryaṃ tadeva sṛṣṭyādau saṅkalpātmakamabhavat /
śuddhaciddaśāyāṃ svātantryasya tadekarūpatvena sthitasya sṛṣṭyādau
jagadrūpatāpattireva saṅkalpatvamiti bhāvaḥ

tata etatsamābhātaṃ pratibimbātmakaṃ jagat /
bṛhatsaṅkalpasusthairyāccirametad vibhāsate

tataḥ saṅkalpādetajjagatpratibimbātmakaṃ samābhātaṃ bhavati / nanu
yathā'smatsaṅkalpabhāsitabhāvānāmasthiratvam
evamīśvarasaṅkalpabhāsitasyāpyasthairyaṃ kuto neti cedāha - bṛhaditi /
bṛhataḥ saṅkalpasya sthiratvenaitajjagacciraṃ bhāsate saṅkalpajāvabhāsasya
saṅkalpānyūnakālatvaniyamāditi bhāvaḥ

sādhāraṇaṃ jagad bhāti pūrṇasvātantryahetutaḥ /
anyeṣāṃ tadapūrṇatvād bhātyasādhāraṇātmanā

nanu tathāpi svasaṅkalpajātaṃ svātmana eva bhāsate nānyasya /
īśvarasaṅkalpajātajagataḥ kathaṃ sarvasādhāraṇyena bhasanamiti [gh:
bhāna] cedāha - sādhāraṇamiti / īśvarasya pūrṇasvātantryāt
sarvasvātantryāddhetorityarthaḥ / tadapūrṇatvāt svātantryāpūrṇatvāt
sarvasvātantryābhāvādityarthaḥ / īśvara idamīdṛśaṃ jagat
pramātrantaradṛśyamiti saṅkalpayati tatastathā bhāsate / jīvena tathā
saṅkalpite'pi jagati pramātrantaradṛśyamityaṃśe'svātantryānna soṃ'śo bhāsata
iti bhāvaḥ

abhyāsānmaṇimantrādyaiḥ svātantryaṃ tu yathā yathā /
tyajet saṅkocamātmasthaṃ tathā tatra hi bhāsanam

jīvānāmapūrṇaṃ svātantryamiti tatsaṅkalpitānāmasādhāraṇyamuktam / tasyaiva
svātantryasyopāyairyāvat saṅkocahānistāvat pūrṇatvamityāha - abhyāsāditi /
abhyāsaḥ śuddhacidātmatattvasyāhamityavicchinnānusandhānam / maṇimantrau
prasiddhau / ādinauṣadhiḥ / etaiḥ sādhitaiḥ / tatra tatsvātantryakalpite

p. १७३)
paśyaindrajālikaṃ rāma nirupādānayogataḥ /
bhāsayantaṃ jagaccitraṃ saṅkalpādeva sarvataḥ

atrodāharaṇamāha - paśyeti / aindrajāliko hi
sādhitamaṇimantrādyairgajaturagādirūpaṃ citraṃ jagadupādānamanapekṣyaiva
saṅkalpamātreṇa sarvato bhāsayatīti bhāvaḥ / yadvā
mānasasṛṣṭerasādhāraṇamasthairyamarthakriyābhāvaśceti [k:
sṛṣṭamasā-] bāhyasṛṣṭivaisādṛśyād dṛṣṭāntāntaramāha ##-
sādhāraṇaṃ sthiraṃ svārthakriyārhaṃ bhūya eva tu /
svātmanyupasaṃharecca jagadevaṃ vibhasate

svīyā yā'rthakriyā ghaṭāderudakāharaṇādirūpā tadarham / evaṃvidhaṃ
jagadaindrajālikaḥ sṛṣṭvā bhūyaḥ svātmani svasṛṣṭaṃ sarvamupasaṃharecca /
evamīśvarasṛṣṭamapi jagadvibhāsate

yoginaḥ paśya sṛṣṭiṃ tāṃ pūrṇasthairyasamāvṛtām /
yoginastu mitatvena sṛṣṭirbāhyā vibhāvitā

nanvevamapyaindrajālikasṛṣṭeratisvalpakālasthāyitvena vaisādṛśyameveti
matvāha - yogina iti / viśvāmitrāderyogino
nakṣatrādisṛṣṭimāpralayasthāyitvarūpapūrṇasthairyasamāvṛtāṃ
paśyetyarthaḥ / nanu tathāpi yoginaḥ sṛṣṭirīśvarasṛṣṭivat svasvarūpe kuto neti
cedāha - yoginastviti / sādhāraṇayogina īśvarāpekṣayā paricchinnatvena
parimitasvarūpatvena bahiḥsthānalābhāt parimitaśaktitvācca bāhyā
sṛṣṭirvibhāvitetyarthaḥ / yastu pūrṇayogī sa bāhyamanapekṣya śrīkṛṣṇādivat
[k, kh: śrīkṛṣṇādiḥ] svasvarūpe
evā'khilaviśvavaicitryamavabhāsayituṃ samartha iti dhyeyam

p. १७४)
amitatvāt sṛṣṭiriyaṃ cinnāthasyāntareva hi /
ata eva cidātmatvavyatirekādasatyatā

naivamīśvara ityāha - amitatvāditi / ata eva antaḥsṛṣṭatvādeva /
anyāntaranyāvabhāsanaṃ pratibimbatulyameveti [k: pratibimbatulyameveti
nāsti] pratibimbasya [g: prati nāsti]
darpaṇātmatvavyatirekeṇāsatyatvavajjagato'pi cidātmatvavyatirekādasatyatāmāha
- [k, kh: cidātmavya] cidātmatveti

jagataḥ pratibimbasyādarśātmatvaṃ vinā yathā /
ata eva vicāreṇāsatyatāṃ yāti nānyathā

asatyatā jagata ityanvayaḥ / ata eveti / pratibimbarūpatvādevetyarthaḥ / nānyatheti /
pratibimbātmakametajjagaditi vicāre kṛte na satyatāṃ prāpnotītyarthaḥ

satyaṃ svabhāvaṃ no muñcedasatyaṃ taṃ parityajet /
jagat paśya bhārgavaitat svabhāvādaticañcalam

evaṃ pratibimbatvenāsatyatvaṃ prasādhyāsatyalakṣaṇavattvādapi jagatoasatyatāṃ
vaktuṃ prasaṅgāt satyāsatyalakṣaṇamāha - satyamiti /
avyabhicaritasvabhāvaṃ satyam anyadasatyamiti tadarthaḥ / etat pratyakṣaṃ jagat /
aticañcalaṃ kṣaṇikam

satyāsatye vibhāgena bhāsete sarvato'khilam /
pratibimbādarśabhānamiva tatpravicāraya

kathamayaṃ niścaya iti cedvicāreṇa bhavedityāha - satyeti / sarvataḥ sarvatra /
akhilaṃ tajjagat pravicāraya / kathamiti cedāha - pratibimbādarśabhānamiveti /
pratibimbādarśayoraniyataniyatarūpatvena [g: niyata nāsti] bhānavad
jagaccidātmanorbhānaṃ bhavediti pravicārayeti bhāvaḥ

p. १७५)
ādarśo hyacalastatra calaṃ hi pratibimbakam /
tathā jagaccalaṃ saṃvidacalā sarvabhāvitā

etadeva dṛṣṭānte vicārapūrvakaṃ dārṣṭāntike yojayati - ādarśa iti /
yāvatpratibimbeṣu vādarśasyāvyāvṛttatvenāparityaktasvabhāvatvena satyatā
ghaṭapratibimbasyapaṭādipratibimbakāle vyāvṛttatvena parityaktasvabhāvatvāda
satyateti bhāvaḥ / tatheti / ghaṭāderjagataḥ parasparaṃ vyāvṛtteḥ saṃvidaḥ
sarvatrā'vyāvṛtterjagadasatyaṃ saṃvit satyeti jñeyam /
jagatsaṃvidoścalācalatvaṃ sarvairjñātamityāha - sarveti

ata eva hi bhāvānāṃ vicārāsaharūpatā /
tathā hi sūryāloko hi vastūnāmavabhāsakaḥ

ata eva asatyatvādeva / yaddhi asatyaṃ tanmarutoyakeśoḍrakādivadavicārasahameva
/ vicāreṇedamīdṛśamiti nirṇītaṃ na [k, kh: na nāsti] bhavediti
bhāvaḥ / vicārāsahatvamevopapādayati bhāveṣu tathā hīti

ulūkādidivāndhānāṃ viparīto'ndhakāravat /
prakāśatvāndhakāratve na vivikte'nayoḥ [vivikte'nayoḥ ityatra
sandhirārṣaḥ] sphuṭe

viparītaḥ anavabhāsakaḥ / na vivikte vivekamaprāpte / anayoḥ saurālokatamasoḥ /
vastvavabhāsakatvaṃ prakāśatvam anavabhāsakatvaṃ prakāśaviruddhatvaṃ
vāndhakāratvam / evaṃ ca saurālokasya manuṣyādīn pratyavabhāsakatvena
ulūkādīn pratyanavabhāsakatvena [k: katvaṃ naivaṃ] evaṃ tamaso'pi
manuṣyādīn pratyanavabhāsakatvenolūkādin pratyavabhāsakatvena kasya
prakāśatvaṃ kasya vāndhakāratvamiti vivektumaśakyatvena vicārāsahatvamiti
bhāvaḥ

p. १७६)
evaṃ viṣaṃ kasyacit syādaviṣaṃ kasyacid bhavet /
manuṣyādeḥ pratighātakarī bhītirhi lakṣyate

evamanyeṣāmapi svabhāvānavasthitimāha - evamiti / viṣaṃ
vatsanābhādirmanuṣyādermārakaṃ syāt tadutpannakṛmyāderaviṣamamārakam /
pratīghāto gamanapratibandhaḥ

yogināṃ guhyakādīnāmapratīghātalakṣaṇā /
kālo deśaśca dīrgho yo manuṣyādiprabhāvitaḥ

apratīghāto lakṣaṇaṃ yasyāḥ / pratīghātakarī na bhavatīti tātparyam / yaḥ kālo
deśaśca manuṣyādibhirdīrghatvena jñātaḥ sa eva devādīnāmadīrgha ityāha -
kāla iti

sa eva viparīto vai devānāṃ yogināmapi /
darpaṇe bhāsamānasya dūrāderdūratā yathā

kathamekasyaiva dūratvamadūratvaṃ ceti cet sadṛṣṭāntamāha - darpaṇa iti

tathaivāsya svabhāvo'pi vicāre [k, kh, gh: vicāro na
sthirībhavet] na sthiro bhavet /
ata āśrayarūpeṇa vinā nāsti hi kiñcana

tathaiveti / darpaṇe dṛśyamāno yaḥ sudīrgho'pi deśastasya darpaṇānatiriktatvena
yathā na dīrghatvam evamevātra citi bhāsamānālokādīnāmaprakāśatvādikaṃ
vicāritaṃ sad na sthiraṃ [g: asthiraṃ] bhavatītyarthaḥ / ataḥ
pratibimbātmakatvājjagata āśrayarūpeṇa cidātmanā vinā nāstītyarthaḥ

p. १७७)
yadastīti bhāti tattu citireva maheśvarī /
evaṃ jagaccidekātmarūpaṃ te samyagīritam

yaditi / yathā darpaṇe'stīti bhāsamānānāṃ pratibimbānāṃ darpaṇa eva svarūpam
evaṃ cidātmani yadastīti bhāti tatsarvaṃ citireva maheśvarīti svasmin
pratibimbātmakavaicitryabhāsane svaiśvaryameva nimittam na tu darpaṇasyeva
bimbamiti [k, kh: pratibimba] sūcitam / adhyāyādau yatpṛṣṭaṃ
kathaṃ citeranyaccetyaṃ [k, kh: caityaṃ] nāstīti tadiyatā [k,
kh: tadīyatā] granthenopapādyopasaṃharati - evamiti

iti śrītripurārahasye jñānakhaṇḍe jagattattvanirūpaṇe ekādaśo'dhyāyaḥ //
iti śrītripurārahasye jñānakhaṇḍavyākhyāyāṃ tātparyadīpikāyām
ekādaśo'dhyāyaḥ //
p. १७८)
atha dvādaśo'dhyāyaḥ
evaṃ dattātreyamukhād jagattattvaṃ niśamya tu /
papraccha bhārgavo bhūyaḥ saṃdehakalilāntaraḥ

atrā'dhyāye cādhipadyairjagatsatyatvabhāsanam /
dṛḍhabhāvanayetyuktaṃ śailākhyānena vai sphuṭam //
evaṃ citireveti / sandehena kalilaṃ [k: kalikalu] kaluṣitamāntaraṃ mano
yasya

bhagavan saṃśrutaṃ proktaṃ bhavatā jāgataṃ nanu /
yathā bravīṣi bhagavaṃstattathaiva na cā'nyathā

jāgatam svarūpamiti śeṣaḥ / tathaiva citimātrarūpameva

tathāpi kuta etaddhi bhāti satyātmakaṃ sadā /
kuto vā'nyairbuddhimadbhiḥ satyatvena viniścitam

tathāpi asatyamapi / kutaḥ kasmāt kāraṇāt / sadā satyātmakaṃ bhāti /
rajjusarpāderasatyasya kadācidasatyatvena bhānaṃ dṛṣṭam idaṃ hi jagat kathaṃ
sadā satyātmakaṃ bhātīti bhāvaḥ / nanvetad gagananailyatulyaṃ mūḍhaireva
satyatvena viditamiti cedāha - kuto veti / anyaiḥ parairdvaitavādibhiḥ /
buddhimadbhistarkanipuṇaiḥ

tvattaḥ śrutaṃ cāpi bhūyo bhāti me satyavat kutaḥ /
brūhyetat kṛpayā nātha yathā naśyedayaṃ bhramaḥ

atha ca tvattaḥ gurorāptatamād asatyamidamiti sopapattikaṃ śrutamapi bhūyaḥ kuto
me jagat satyatvena bhāti etad brūhi

ityāpṛṣṭo bhārgaveṇa dattātreyo mahāśayaḥ /
jagatsatyabhrāntimūlaṃ pravaktumupacakrame

mahāśaya iti / mahān aparicchinnaḥ cidātmākāra āśayaścittaṃ yasya / jagat
satyamiti yā bhrāntiḥ tanmūlaṃ tannimittam

p. १७९)
śṛṇu rāma jagadbhrāntermūlametat sanātanam /
vastvavidyāpūrvakaṃ yad dṛḍhabhāvanameva [gh: dṛḍhā; k:
hṛdā] tat

etadvakṣyamāṇam / sanātanam anādi / tadevāha - vastviti / vastuno'vidyā
ayathāvadgrahaṇam etatpūrvakaṃ yadvastuno'nyarūpeṇa dṛḍhabhāvanam /
bhāvanāyā [gh: nāyāṃ] dṛḍhatvaṃ śraddhāvattvam / tat
proktabhramanimittam

paśyātmānamavijñāya svātmabuddhiṃ śarīrake /
kva māṃsarudhirāsthīni kva cidātmātinirmalaḥ

atrodāharaṇamāha [k: tatro] paśyeti /
ātmānamaparicchinnacidrūpamavijñāya ayathāvat paricchinnatvena vijñāya /
śarīramātmeti dṛḍhabhāvanāditi śeṣaḥ / svātmabuddhimiti / śarīramātmeti
buddhim / śarīraṃ kuto nātmeti cedāha - kveti / atinirmalaḥ cidekarasaḥ

kevalaṃ bhāvanādārḍhyāccidātmā dehako'bhavat /
jñāte'pyātmani cidrūpe bhūyo bhrāntiḥ śarīrake

ātmatvena dṛḍhabhāvanād dehātmatvaniścayaḥ [k: dehātmani] / evaṃ
bhāvanādeva ātmā cidrūpo na deha ityupapattyupalabdhibhyāṃ jñāte'pi
punarbhrāntiḥ

evameva bhāvanayā satyaṃ bhāti jagat khalu /
viparītaṃ bhāvayan vai dṛḍhabhrāntiṃ nivartayet

evameveti / anātmani dehe bhāvanayātmabuddhivadevetyarthaḥ /
dṛḍhasatyatvabhāvanayā asatyamiti samyag jñātamapi jagat satyamiti bhāti /
nanvevaṃ sati jagati satyatvabuddhiranivāryaiveti cennetyāha - viparītamiti /
etajjagad asatyamiti sadā viparītaṃ dṛḍhaṃ bhāvayan satyatvabhrāntiṃ nivartayet

yo yathā bhāvayedetajjagattasya tathā bhavet /
yogināṃ dhāraṇādhyānaiḥ paśya tadrūpasaṅgatim

kuta evamiti cedevameva bhāvanāsāmarthyamityāha - yo yatheti / kvaitad
dṛṣṭamiti cedāha - yogināmiti / dhāraṇā dhyānaṃ ca
bhāvanāparipākaviśeṣaḥ / bahuvacanaṃ dhāraṇāderavāntarabhedābhiprāyam /
tadrūpasaṅgatiṃ jagato bhāvanānurūpatāprāptim

p. १८०)
atra te vartayiṣyāmi purāvṛttaṃ [k: punarāvṛttamadbhu]
mahādbhutam /
asti vaṅge sundarākhyaṃ puraṃ paramapāvanam

atra jagato bhāvanānurūpatāprāptau / vartayiṣyāmi upakramiṣyāmi /
paramapāvanaṃ tīrthabhūtam