Triṃśikāvijñaptikārikā · Verses 21-30

paratantrasvabhāvastu vikalpaḥ pratyayodbhavaḥ /
niṣpannastasya pūrveṇa sadā rahitatā tu yā

ata eva sa naivānyo nānanyaḥ paratantrataḥ /
anityatādivad vācyo nādṛṣṭe 'smin sa dṛśyate

trividhasya svabhāvasya trividhāṃ niḥsvabhāvatām /
sandhāya sarvadharmāṇāṃ deśitā niḥsvabhāvatā

prathamo lakṣaṇenaiva niḥsvabhāvo 'paraḥ punaḥ /
na svayambhāva etasyetyaparā niḥsvabhāvatā

dharmāṇāṃ paramārthaśca sa yatastathatāpi saḥ /
sarvakālaṃ tathābhāvāt saiva vijñaptimātratā

yāvadvijñaptimātratve vijñānaṃ nāvatiṣṭhati /
grāhadvayasyānuśayastāvanna vinivartate

vijñaptimātramevedamityapi hayupalambhataḥ /
sthāpayannagrataḥ kiñcit tanmātre nāvatiṣṭhate

yadālambanaṃ vijñānaṃ naivopalabhate tadā /
sthitaṃ vijñānamātratve grāhyābhāve tadagrahāt

acitto 'nupalambho 'sau jñānaṃ lokottaraṃ ca tat /
āśrayasya parāvṛttirdvidhā dauṣṭhulyahānitaḥ

sa evānasravo dhāturacintyaḥ kuśalo dhruvaḥ /
sukho vimuktikāyo 'sau dharmākhyo 'yaṃ mahāmuneḥ