Subhāṣitaratnakaraṇḍakathā · Verses 41-60

rūpaṃ vīryaṃ ca śilpaṃ ca vihāya vivaśā narāḥ /
paralokam ito yānti karmavāyubhir īritāḥ

puṇyaṃ tv ekam ihātyantam anugāmi sukhodayam /
puṇyam anyair ahāryatvād dhanānāṃ pravaraṃ dhanam

ye merum api vegena vikiranti diśo daśa /
te 'pi puṇyasya bhaṅgāya nālaṃ pralayavāyavaḥ

saṃvartasalilodvṛttaniraṅkuśavisarpiṇā/
puṇyaṃ na kledam āyāti catuḥsāgaravāriṇā

pradīptakiraṇāṅgāraiḥ saptabhir bhāskarānalaiḥ /
kṣitau vā dahyamānāyāṃ puṇyam ekaṃ na dahyate

// iti puṇyakathā //
VI. Bimbakathā
āḍhyo nirnaṣṭaśokaḥ kṣatasakalakalir locanānandapātraṃ
saubhāgyaśrīnidhānaṃ samupacitabalākrāntagātro yaśasvī/
tejasvī kāntarūpaḥ pravacanacaturo dāntasarvendriyāśvo
vyakto dhīmān pradātā bhavati bhagavato buddhabimbaṃ vidhāya

yāvantaḥ paramāṇavo bhagavataḥ stūpeṣu bimbeṣu vā
tatkartur divi bhūtale ca niyataṃ tāvanti rājyāny api /
rūpārūpyasamādhisaṃpad akhilaṃ bhuktvā ca sarvaṃ sukham
ante janmajarāvipattirahitaṃ prāpnoti bauddhaṃ padam

dvātriṃśatā bhūṣitacārugātraḥ sallakṣaṇair lakṣitacakravartī /
bhavej jino 'nte jitadoṣaśatruḥ tāthāgatīṃ yaḥ pratimāṃ vidhatte

indriyāṇām avaikalyaṃ strītvadurgatidūratā /
janma mānuṣyakaṃ vaṃśa uccair ādeyavākyatā

jātiḥ śrutiḥ smṛtir dhairyam abhivāñchitasaṃpadaḥ /
sthāneṣv abhiniveśaś ca rāgādibhir abādhanā

saṃbodhir iti jāyante viśeṣāḥ sādhusaṃmatāḥ /
vidhāya buddhapratimāṃ stūpaṃ vā prāṇināṃ sadā

na yāti dāsyaṃ na daridrabhāvaṃ na preṣyatāṃ nāpi ca hīnajanma /
na cāpi vaikalyam ihendriyāṇāṃ yo lokanāthapratimāṃ karoti

// iti bimbakathā //
VII. Snānakathā
nānāgandhaiḥ sugandhaiḥ snapayati sugataṃ puṣpadhūpāṅgarāgair
yo vā pūjāṃ karoti pramuditamanasā śravyavāditraśabdaiḥ /
mandākinyāṃ vijṛmbhatkanakamayasarojasya kiñjalkareṇu-
vyāptāyāṃ snāti so 'nte sakalakalimalakṣālito yāti mokṣam

divyastrīpīnatuṅgastanajaghanaghanāghātavikṣobhitāyāṃ
jṛmbhajjāmbūnadābjacyutasurabhirasodgāragandhaṃ kṣipatyām /
mandākinyāṃ suraughāḥ pratidinam udakakrīḍayā yad ramante
nānāgandhodakena snapanaphalam idaṃ buddhabhaṭṭārakasya

mṛgamadacandanaṃ vidhusukuṅkumasevyarasaṃ
surabhimanoramāsitasitāruṇapītaruci /
snapanam idaṃ ya eva vidadhāti muner manujaḥ
sa bhavati vītamānasamalo jagur astamalāḥ

// iti snānakathā //
VIII. Kuṅkumādikathā
majjadvāravilāsinīkarakucaśroṇyūruvisphāritāṃ
yat sphītasphuṭapaṅkajāṃ surapatir mandākinīṃ gāhate /
kāntābhiḥ smaravihvalābhir asakṛl lokottamāyādarāt
tad gandhodakapādyadhūpakusumasraggandhadānāt phalam

yad rājā cakravartī viyati gataghanaiḥ kuṅkumāmbhaḥpravāhaiḥ
karpūrāmodavadbhir malayajasurabhiśleṣaśītair yutāyām /
gaṅgāyām aṅgasaukhyaṃ paramam anubhavan modate sundarībhis
tat tyāgāt kuṅkumāder guṇamaṇinidhaye buddhabhaṭṭārakāya

mṛdaṅgavīṇāpaṭahapradānaiḥ kṛtvā tu pūjāṃ sugatottamānām /
śṛṇoti śabdān suramānuṣāṇāṃ śrotraṃ ca divyaṃ labhate viśiṣṭam

// iti kuṅkumādikathā //
IX. Chattrakathā
gajaturagapadātisyandanaiḥ saptaratnair
vrajati sutasahasrair vyomni yac cakravartī /
śaśadharapariveṣacchattraruddārkapādas
tad api phalam udāraṃ chattradānāt prasūtam

vācālapracalālicakracaraṇavyālolapuṣpotkaraṃ
nānāvarṇasugandhibhūrikusumanyāsena citrīkṛtam /
chattraṃ cāruvicitrapattasahitaṃ caityāya yo yacchati
prāpnoti kṣitipārcitaṃ sa hi caturdvīpeśvaratvaṃ dhruvam