śrīrādhākṛṣṇasahasranāmastotram · Chapter 1

sanatkumāra uvāca -
kiṃ tvaṃ nārada jānāsi pūrvajanmani yattvayā / prāptaṃ bhagavataḥ sākṣācchūlino yugalātmakam

kṛṣṇamantrarahasyaṃ ca smara vismṛtimāgatam / sūta uvāca - ityukto nārado viprāḥ kumāreṇa tu dhīmatā

dhyāne vivedāśu ciraṃ caritaṃ pūrvajanmanaḥ / tataściraṃ dhyānaparo nārado bhagavatpriyaḥ

jñātvā sarvaṃ suvṛttāntaṃ suprasannānano'bravīt / bhagavansarvavṛttāntaḥ pūrvakalpasamudbhavaḥ

mama smṛtimanuprāpto vinā yugalalambhanam // tacchrutvā vacanaṃ tasya nāradasya mahātmanaḥ

sanatkumāro bhagavān vyājahāra yathātatham / sanatkumāra uvāca - śṛṇu vipra pravakṣyāmi yasmiñjanmani śūlinaḥ

prāptaṃ kṛṣṇarahasyaṃ vai sāvadhāno bhavādhunā / asmātsārasvatātkalpātpūrvasminpañcaviṃśake

kalpe tvaṃ kāśyapo jāto nārado nāma nāmataḥ / tatraikadā tvaṃ kailāsaṃ prāptaḥ kṛṣṇasya yoginaḥ

sampraṣṭuṃ paramaṃ tattvaṃ śivaṃ kailāsavāsinam / tvayā pṛṣṭo mahādevo rahasyaṃ svaprakāśitam

kathayā māsa tattvena nityalīlānugaṃ hareḥ / tatastadante tu punastvayā vijñāpito haraḥ

nityāṃ līlāṃ harerdraṣṭuṃ tataḥ prāha sadāśivaḥ / gopījanapadasyānte vallabheti padaṃ tataḥ

caraṇāccharaṇaṃ paścātprapadye iti vai manuḥ / mantrasyāsya ṛṣiḥ prokto surabhiśchanda eva ca

gāyatrī devatā cāsya ballavīvallabho vibhuḥ / prapanno'smīti tadbhaktau viniyoga udāhṛtaḥ

nāsya siddhādikaṃ vipra śodhanaṃ nyāsakalpanam / kevalaṃ cintanaṃ sadyo nityalīlāprakāśakam

ābhyantarasya dharmasya sādhanaṃ vacmi sāmpratam

saṅgṛhya mantraṃ gurubhaktiyukto vicintya sarvaṃ manasā tadīhitam /
kṛpāṃ tadīyāṃ nijadharmasaṃstho vibhāvayannātmani toṣayedgurum

satāṃ śikṣeta vai dharmānprapannānāṃ bhayāpahān / aihikāmuṣmikīcintāvidhurān siddhidāyakān

sveṣṭadevadhiyā nityaṃ toṣayedvaiṣṇavāṃstathā / bhartsanādikameteṣāṃ na kadācidvicintayet

pūrvakarmavaśādbhavyamaihikaṃ bhogyameva ca / āyuṣyakaṃ tathā kṛṣṇaḥ svayameva kariṣyati

śrīkṛṣṇaṃ nityalīlāsthaṃ cintayetsvadhiyāniśam / śrīmadarcāvatāreṇa kṛṣṇaṃ paricaretsadā

ananyacintanīyo'sau prapannaiḥ śaraṇārthibhiḥ / stheyaṃ ca dehagehādāvudāsīnatayā budhaiḥ

guroravajñāṃ sādhūnāṃ nindāṃ bhedaṃ hare harau / vedanindāṃ harernāmabalātpāpasamīhanam

arthavādaṃ harernāmni pāṣaṇḍaṃ nāmasaṅgrahe / alase nāstike caiva harināmopadeśanam

nāmavismaraṇaṃ cāpi nāmnyanādarameva ca / santyajed dūrato vatsa doṣānetānsudāruṇān

prapanno'smīti satataṃ cintayeddhṛdgataṃ harim / sa eva pālanaṃ nityaṃ kariṣyati mameti ca

tavāsmi rādhikānātha karmaṇā manasā girā / kṛṣṇakānteti caivāsmi yuvāmeva gatirmama

dāsāḥ sakhāyaḥ pitaraḥ preyasyaśca hareriha / sarve nityā muniśreṣṭha cintanīyā mahātmabhiḥ

gamanāgamane nityaṃ karoti vanagoṣṭhayoḥ / gocāraṇaṃ vayasyaiśca vināsuravighātanam

sakhāyo dvādaśākhyātā hareḥ śrīdāmapūrvakāḥ / rādhikāyāḥ suśīlādyāḥ sakhyo dvātriṃśadīritāḥ

ātmānaṃ cintayedvatsa tāsāṃ madhye manoramām / rūpayauvanasampannāṃ kiśorīṃ ca svalaṅkṛtām

nānāśilpakalābhijñāṃ kṛṣṇabhogānurūpiṇīm / tatsevanasukhāhlādabhāvenātisunirvṛtām

brāhmaṃ muhūrtamārabhya yāvadardhaniśā bhavet / tāvatparicarettau tu yathākālānusevayā

sahasraṃ ca tayornāmnāṃ paṭhennityaṃ samāhitaḥ / etatsādhanamuddiṣṭaṃ prapannānāṃ munīśvara

nākhyeyaṃ kasyacittubhyaṃ mayā tattvaṃ prakāśitam / sanatkumāra uvāca - tatastvaṃ nārada punaḥ pṛṣṭavānvai sadāśivam

nāmnāṃ sahasraṃ taccāpi proktavāṃstacchṛṇuṣva me / dhyātvā vṛndāvane ramye yamunātīrasaṃgatam

kalpavṛkṣaṃ samāśritya tiṣṭhantaṃ rādhikāyutam / paṭhennāmasahasraṃ tu yugalākhyaṃ mahāmune

devakīnandanaḥ śaurirvāsudevo balānujaḥ / gadāgrajaḥ kaṃsamohaḥ kaṃsasevakamohanaḥ

bhinnārgalo bhinnalohaḥ pitṛbāhyāḥ pitṛstutaḥ / mātṛstutaḥ śivadhyeyo yamunājalabhedanaḥ

vrajavāsī vrajānandī nandabālo dayānidhiḥ / līlābālaḥ padmanetro gokulotsava īśvaraḥ

gopikānandanaḥ kṛṣṇo gopānandaḥ satāṃ gatiḥ / bakaprāṇaharo viṣṇurbakamuktiprado hariḥ

baladolāśayaśayaḥ śyāmalaḥ sarvasundaraḥ / padmanābho hṛṣīkeśaḥ krīḍāmanujabālakaḥ

līlāvidhvastaśakaṭo vedamantrābhiṣecitaḥ / yaśodānandanaḥ kānto munikoṭiniṣevitaḥ

nityaṃ madhuvanāvāsī vaikuṇṭhaḥ sambhavaḥ kratuḥ / ramāpatiryadupatirmurārirmadhusūdanaḥ

mādhavo mānahārī ca śrīpatirbhūdharaḥ prabhuḥ / bṛhadvanamahālīlo nandasūnurmahāsanaḥ

tṛṇāvartaprāṇahārī yaśodāvismayapradaḥ / trailokyavaktraḥ padmākṣaḥ padmahastaḥ priyaṅkaraḥ

brahmaṇyo dharmagoptā ca bhūpatiḥ śrīdharaḥ svarāṭ / ajādhyakṣaḥ śivādhyakṣo dharmādhyakṣo maheśvaraḥ

vedāntavedyo brahmasthaḥ prajāpatiramoghadṛk / gopīkarāvalambī ca gopabālakasupriyaḥ

bālānuyāyī balavān śrīdāmapriya ātmavān / gopīgṛhāṅgaṇaratirbhadraḥ suślokamaṅgalaḥ

navanītaharo bālo navanītapriyāśanaḥ / bālavṛndī markavṛndī cakitākṣaḥ palāyitaḥ

yaśodātarjitaḥ kampī māyāruditaśobhanaḥ / dāmodaro'prameyātmā dayālurbhaktavatsalaḥ

subaddholūkhale namraśirā gopīkadarthitaḥ / vṛkṣabhaṅgī śokabhaṅgī dhanadātmajamokṣaṇaḥ

devarṣivacanaślāghī bhaktavātsalyasāgaraḥ / vrajakolāhalakaro vrajānadavivarddhanaḥ

gopātmā prerakaḥ sākṣī vṛndāvananivāsakṛt / vatsapālo vatsapatirgopadārakamaṇḍanaḥ

bālakrīḍo bālaratirbālakaḥ kanakāṅgadī / pītāmbaro hemamālī maṇimuktāvibhūṣaṇaḥ

kiṅkiṇīkaṭakī sūtrī nūpurī mudrikānvitaḥ / vatsāsurapatidhvaṃsī bakāsuravināśanaḥ

aghāsuravināśī ca vinidrīkṛtabālakaḥ / ādya ātmapradaḥ saṅgī yamunātīrabhojanaḥ

gopālamaṇḍalīmadhyaḥ sarvagopālabhūṣaṇaḥ / kṛtahastatalagrāso vyañjanāśritaśākhikaḥ

kṛtabāhuśṛṅgayaṣṭirguñjālaṅkṛtakaṇṭhakaḥ / mayūrapicchamukuṭo vanamālāvibhūṣitaḥ

gairikācitritavapurnavameghavapuḥ smaraḥ / koṭikandarpalāvaṇyo lasanmakarakuṇḍalaḥ

ājānubāhurbhagavānnidrārahitalocanaḥ / koṭisāgaragāmbhīryaḥ kālakālaḥ sadāśivaḥ

virañcimohanavapurgopavatsavapurddharaḥ / brahmāṇḍakoṭijanako brahmamohavināśakaḥ

brahmā brahmeḍitaḥ svāmī śakradarpādināśanaḥ / giripūjopadeṣṭā ca dhṛtagovarddhanācalaḥ

purandareḍitaḥ pūjyaḥ kāmadhenuprapūjitaḥ / sarvatīrthābhiṣiktaśca govindo goparakṣakaḥ

kāliyārtikaraḥ krūro nāgapatnīḍito virāṭ / dhenukāriḥ pralambārirvṛṣāsuravimardanaḥ

māyāsurātmajadhvaṃsī keśikaṇṭhavidārakaḥ / gopagoptā dhenugoptā dāvāgnipariśoṣakaḥ

gopakanyāvastrahārī gopakanyāvarapradaḥ / yajñapatnyannabhojī ca munimānāpahārakaḥ

jaleśamānamathano nandagopālajīvanaḥ / gandharvaśāpamoktā ca śaṅkhacūḍaśiro haraḥ

vaṃśī vaṭī veṇuvādī gopīcintāpahārakaḥ / sarvagoptā samāhvānaḥ sarvagopīmanorathaḥ

vyaṃgadharmapravaktā ca gopīmaṇḍalamohanaḥ / rāsakrīḍārasāsvādī rasiko rādhikādhavaḥ

kiśorīprāṇanāthaśca vṛṣabhānasutāpriyaḥ / sarvagopījanānandī gopījanavimohanaḥ

gopikāgītacarito gopīnartanalālasaḥ / gopīskandhāśritakaro gopikācumbanapriyaḥ

gopikāmārjitamukho gopīvyajanavījitaḥ / gopikākeśasaṃskārī gopikāpuṣpasaṃstaraḥ

gopikāhṛdayālambī gopīvahanatatparaḥ / gopikāmadahārī ca gopikāparamārjitaḥ

gopikākṛtasaṃnīlo gopikāsaṃsmṛtapriyaḥ / gopikāvanditapado gopikāvaśavartanaḥ

rādhāparājitaḥ śrīmānnikuñjesuvihāravān / kuñjapriyaḥ kuñjavāsī vṛndāvanavikāsanaḥ

yamunājalasiktāṅgo yamunāsaukhyadāyakaḥ / śaśisaṃstambhanaḥ śūraḥ kāmī kāmavijohanaḥ

kāmādyāḥ kāmanāthaśca kāmamānasabhedanaḥ / kāmadaḥ kāmarūpaśca kāminī kāmasañcayaḥ

nityakrīḍo mahālīlaḥ sarvaḥ sarvagatastathā / paramātmā parādhīśaḥ sarvakāraṇakāraṇaḥ

gṛhītanāradavacā hyakrūraparicintitaḥ / akrūravanditapado gopikātoṣakārakaḥ

akrūravākyasaṅgrāhī mathurāvāsakāraṇaḥ (orm)/ akrūratāpaśamano rajakāyuḥpraṇāśanaḥ

mathurānandadāyī ca kaṃsavastraviluṇṭhanaḥ / kaṃsavastraparīdhāno gopavastrapradāyakaḥ

sudāmagṛhagāmī ca sudāmaparipūjitaḥ / tantuvāyakasaṃprītaḥ kubjācandanalepanaḥ

kubjārūpaprado vijño mukundo viṣṭaraśravāḥ / sarvajño mathurālokī sarvalokābhinandanaḥ

kṛpākaṭākṣadarśī ca daityārirdevapālakaḥ / sarvaduḥkhapraśamano dhanurbhaṅgī mahotsavaḥ

kuvalayāpīḍahantā dantaskandhabalāgraṇīḥ / kalparūpadharo dhīro divyavastrānulepanaḥ

mallarūpo mahākālaḥ kāmarūpī balānvitaḥ / kaṃsatrāsakaro bhīmo muṣṭikāntaśca kaṃsahā

cāṇūraghno bhayaharaḥ śalāristośalāntakaḥ / vaikuṇṭhavāsī kaṃsāriḥ sarvaduṣṭaniṣūdanaḥ

devadundubhinirghoṣī pitṛśokanivāraṇaḥ / yādavendraḥ satāṃnātho yādavāripramarddanaḥ

śauriśokavināśī ca devakītāpanāśanaḥ / ugrasenaparitrātā ugrasenābhipūjitaḥ

ugrasenābhiṣekī ca ugrasenadayāparaḥ / sarvasātvatasākṣī ca yadūnāmabhinandanaḥ

sarvamāthurasaṃsevyaḥ karuṇo bhaktabāndhavaḥ / sarvagopāladhanado gopīgopālalālasaḥ

śauridattopavītī ca ugrasenadayākaraḥ / gurubhakto brahmacārī nigamādhyayane rataḥ

saṃkarṣaṇasahādhyāyī sudāmasuhṛdeva ca / vidyānidhiḥ kalākośo mṛtaputrapradastathā

cakrī pāñcajanī caiva sarvanārakimocanaḥ / yamārcitaḥ paro devo nāmoccāravaśo'cyutaḥ

kubjāvilāsī subhago dīnabandhuranūpamaḥ / akrūragṛhagoptā ca pratijñāpālakaḥ śubhaḥ

jarāsandhajayī vidvān yavanānto dvijāśrayaḥ / mucukundapriyakaro jarāsandhapalāyitaḥ

dvārakājanako gūḍho brahmaṇyaḥ satyasaṅgaraḥ / līlādharaḥ priyakaro viśvakarmā yaśaḥpradaḥ

rukmiṇīpriyasandeśo rukmaśokavivarddhanaḥ / caidyaśokālayaḥ śreṣṭho duṣṭarājanyanāśanaḥ

rukmivairūpyakaraṇo rukmiṇīvacane rataḥ / balabhadravacogrāhī muktarukmī janārdanaḥ

rukmiṇīprāṇanāthaśca satyabhāmāpatiḥ svayam / bhaktapakṣī bhaktivaśyo hyakrūramaṇidāyakaḥ

śatadhanvāprāṇahārī ṛkṣarājasutāpriyaḥ / satrājittanayākānto mitravindāpahārakaḥ

satyāpatirlakṣmaṇājitpūjyo bhadrāpriyaṅkaraḥ / narakāsuraghātī ca līlākanyāharo jayī

murārirmadaneśo'pi dharitrīduḥkhanāśanaḥ / vainateyī svargagāmī aditya kuṇḍalapradaḥ

indrārcito ramākānto vajribhāryāprapūjitaḥ / pārijātāpahārī ca śakramānāpahārakaḥ

pradyumnajanakaḥ sāmbatāto bahusuto vidhuḥ / gargācāryaḥ satyagatirdharmādhāro dharādharaḥ

dvārakāmaṇḍanaḥ ślokyaḥ suśloko nigamālayaḥ / pauṇḍrakaprāṇahārī ca kāśīrājaśiroharaḥ

avaiṣṇavavipradāhī sudakṣiṇabhayāvahaḥ / jarāsandhavidārī ca dharmanandanayajñakṛt

śiśupālaśiraśchedī dantavaktravināśanaḥ / vidūrathāntakaḥ śrīśaḥ śrīdo dvividanāśanaḥ

rukmiṇīmānahārī ca rukmiṇīmānavarddhanaḥ / devarṣiśāpahartā ca draupadīvākyapālakaḥ

durvāsobhayahārī ca pāñcālīsmaraṇāgataḥ / pārthadūtaḥ pārthamantrī pārthaduḥkhaughanāśanaḥ

pārthamānāpahārī ca pārthajīvanadāyakaḥ / pāñcālīvastradātā ca viśvapālakapālakaḥ

śvetāśvasārathiḥ satyaḥ satyasādhyo bhayāpahaḥ / satyasandhaḥ satyaratiḥ satyapriya udāradhīḥ

mahāsenajayī caiva śivasainyavināśanaḥ / bāṇāsurabhujacchettā bāṇabāhuvarapradaḥ

tārkṣyamānāpahārī ca tārkṣyatejovivarddhanaḥ / rāmasvarūpadhārī ca satyabhāmāmudāvahaḥ

ratnākarajalakrīḍo vrajalīlāpradarśakaḥ / svapratijñāparidhvaṃsī bhīṣmājñāparipālakaḥ

vīrāyudhaharaḥ kālaḥ kālikeśo mahābalaḥ / varvarīṣaśirohārī varvarīṣaśiraḥpradaḥ

dharmaputrajayī śūraduryodhanamadāntakaḥ / gopikāprītinirbandhanityakrīḍo vrajeśvaraḥ

rādhākuṇḍaratirdhanyaḥ sadāndolasamāśritaḥ / sadāmadhuvanānandī sadāvṛndāvanapriyaḥ

aśokavanasannaddhaḥ sadātilakasaṅgataḥ / sadāgovarddhanaratiḥ sadā gokulavallabhaḥ

bhāṇḍīravaṭasaṃvāsī nityaṃ vaṃśīvaṭasthitaḥ / nandagrāmakṛtāvāso vṛṣabhānugrahapriyaḥ

gṛhītakāminīrūpo nityaṃ rāsavilāsakṛt / vallavījanasaṅgoptā vallavījanavallabhaḥ

devaśarmakṛpākartā kalpapādapasaṃsthitaḥ / śilānugandhanilayaḥ pādacārī ghanacchaviḥ

atasīkusumaprakhyaḥ sadā lakṣmīkṛpākaraḥ / tripurāripriyakaro hyugradhanvāparājitaḥ

ṣaḍdhuradhvaṃsakartā ca nikumbhaprāṇahārakaḥ / vajranābhapuradhvaṃsī pauṇḍrakaprāṇahārakaḥ

bahulāśvaprītikartā dvijavaryapriyaṅkaraḥ / śivasaṅkaṭahārī ca vṛkāsuravināśanaḥ

bhṛgusatkārakārī ca śivasāttvikatāpradaḥ / gokarṇapūjakaḥ sāmbakuṣṭhavidhvaṃsakāraṇaḥ

vedastuto vedavettā yaduvaṃśavivarddhanaḥ / yaduvaṃśavināśī ca uddhavoddhārakārakaḥ

rādhā ca rādhikā caiva ānandā vṛṣabhānujā / vṛndāvaneśvarī puṇyā kṛṣṇamānasahāriṇī

pragalbhā caturā kāmā kāminī harimohinī / lalitā madhurā mādhvī kiśorī kanakaprabhā

jitacandrā jitamṛgā jitasiṃhā jitadvipā / jitarambhā jitapikā govindahṛdayodbhavā

jitabimbā jitaśukā jitapadmā kumārikā / śrīkṛṣṇākarṣaṇā devī nityaṃ yugmasvarūpiṇī

nityaṃ vihāriṇī kāntā rasikā kṛṣṇavallabhā / āmodinī modavatī nandanandanabhūṣitā

divyāmbarā divyahārā muktāmaṇivibhūṣitā / kuñjapriyā kuñjavāsā kuñjanāyakanāyikā

cārurūpā cāruvaktrā cāruhemāṅgadā śubhā / śrīkṛṣṇaveṇusaṅgītā muralīhāriṇī śivā

bhadrā bhagavatī śāntā kumudā sundarī priyā / kṛṣṇakrīḍā kṛṣṇaratiḥ śrīkṛṣṇasahacāriṇī

vaṃśīvaṭapriyasthānā yugmāyugmasvarūpiṇī / bhāṇḍīravāsinī śubhrā gopīnāthapriyā sakhī

śrutiniḥśvasitā divyā govindarasadāyinī / śrīkṛṣṇaprārthanīśānā mahānandapradāyinī

vaikuṇṭhajanasaṃsevyā koṭilakṣmīsukhāvahā / koṭikandarpalāvaṇyā ratikoṭiratipradā

bhaktigrāhyā bhaktirūpā lāvaṇyasarasī umā / brahmarudrādisaṃrādhyā nityaṃ kautūhalānvitā

nityalīlā nityakāmā nityaśṛṅgārabhūṣitā / nityavṛndāvanarasā nandanandanasaṃyutā

gopikāmaṇḍalīyuktā nityaṃ gopālasaṅgatā / gorasakṣepaṇī śūrā sānandānandadāyinī

mahālīlā prakṛṣṭā ca nāgarī nagacāriṇī / nityamāghūrṇitā pūrṇā kastūrītilakānvitā

padmā śyāmā mṛgākṣī ca siddhirūpā rasāvahā / koṭicandrānanā gaurī koṭikokilasusvarā

śīlasaundaryanilayā nandanandanalālitā / aśokavanasaṃvāsā bhāṇḍīravanasaṅgatā

kalpadrumatalāviṣṭā kṛṣṇā viśvā haripriyā / ajāgamyā bhavāgamyā govarddhanakṛtālayā

yamunātīranilayā śaśvadgovindajalpinī / śaśvanmānavatī snigdhā śrīkṛṣṇaparivanditā

kṛṣṇastutā kṛṣṇavṛtā śrīkṛṣṇahṛdayālayā / devadrumaphalā sevyā vṛndāvanarasālayā

koṭitīrthamayī satyā koṭitīrthaphalapradā / koṭiyogasuduṣprāpyā koṭiyajñadurāśrayā

manasā śaśilekhā ca śrīkoṭisubhagā'naghā / koṭimuktasukhā saumyā lakṣmīkoṭivilāsinī

tilottamā trikālasthā trikālajñāpyadhīśvarī / trivedajñā trilokajñā turīyāntanivāsinī

durgārādhyā ramārādhyā viśvārādhyā cidātmikā / devārādhyā parārādhyā brahmārādhyā parātmikā

śivārādhyā premasādhyā bhaktārādhyā rasātmikā / kṛṣṇaprāṇārpiṇī bhāmā śuddhapremavilāsinī

kṛṣṇārādhyā bhaktisādhyā bhaktavṛndaniṣevitā / viśvādhārā kṛpādhārā jīvadhārātināyikā

śuddhapremamayī lajjā nityasiddhā śiromaṇiḥ / divyarūpā divyabhogā divyaveṣā mudānvitā

divyāṅganāvṛndasārā nityanūtanayauvanā / parabrahmāvṛtā dhyeyā mahārūpā mahojjvalā

koṭisūryaprabhā koṭicandrabimbādhikacchaviḥ / komalāmṛtavāgādyā vedādyā vedadurlabhā

kṛṣṇāsaktā kṛṣṇabhaktā candrāvaliniṣevitā / kalāṣoḍaśasampūrṇā kṛṣṇadehārddhadhāriṇī

kṛṣṇabuddhiḥ kṛṣṇasārā kṛṣṇarūpavihāriṇī / kṛṣṇakāntā kṛṣṇadhanā kṛṣṇamohanakāriṇī

kṛṣṇadṛṣṭiḥ kṛṣṇagotrī kṛṣṇadevī kulodvahā / sarvabhūtasthitāvātmā sarvalokanamaskṛtā

kṛṣṇadātrī premadhātrī svarṇagātrī manoramā / nagadhātrī yaśodātrī mahādevī śubhaṅkarī

śrīśeṣadevajananī avatāragaṇaprasūḥ / utpalāṅkāravindāṅkā prasādāṅkā dvitīyakā

rathāṅkā kuñjarāṅkā ca kuṇḍalāṅkapadasthitā / chatrāṅkā vidyudaṅkā ca puṣpamālāṅkitāpi ca

daṇḍāṅkā mukuṭāṅkā ca pūrṇacandrā śukāṅkitā / kṛṣṇānnāhārapākā ca vṛndākuñjavihāriṇī

kṛṣṇaprabodhanakarī kṛṣṇaśeṣānnabhojinī / padmakesaramadhyasthā saṅgītāgamavedinī

koṭikalpāntabhrūbhaṅgā aprāptapralayācyutā / sarvasattvanidhiḥ padmaśaṅkhādinidhisevitā

aṇimādiguṇaiśvaryā devavṛndavimohinī / sarvānandapradā sarvā suvarṇalatikākṛtiḥ

kṛṣṇābhisārasaṅketā mālinī nṛtyapaṇḍitā / gopīsindhusakāśāhvā gopamaṇḍapaśobhinī

śrīkṛṣṇaprītidā bhītā pratyaṅgapulakāñcitā / śrīkṛṣṇāliṅganaratā govindavirahākṣamā

anantaguṇasampannā kṛṣṇakīrtanalālasā / bījatrayamayī mūrtiḥ kṛṣṇānugrahavāñchitā

vimalādiniṣevyā ca lalitādyarcitā satī / padmavṛndasthitā hṛṣṭā tripurāparisevitā

vṛntāvatyarcitā śraddhā durjñeyā bhaktavallabhā / durlabhā sāndrasaukhyātmā śreyohetuḥ subhogadā

sāraṅgā śāradā bodhā sadvṛndāvanacāriṇī / brahmānandā cidānandā dhyānānandārddhamātrikā

gandharvā suratajñā ca govindaprāṇasaṅgamā / kṛṣṇāṅgabhūṣaṇā ratnabhūṣaṇā svarṇabhūṣitā

śrīkṛṣṇahṛdayāvāsamuktākanakanāli(orsi)kā / sadratnakaṅkaṇayutā śrīmannīlagiristhitā

svarṇanūpurasampannā svarṇakiṅkiṇimaṇḍitā / aśoṣarāsakutukā rambhorūstanumadhyamā

parākṛtiḥ parānandā parasvargavihāriṇī / prasūnakabarī citrā mahāsindūrasundarī

kaiśoravayasā bālā pramadākulaśekharā / kṛṣṇādharasudhāsvādā śyāmapremavinodinī

śikhipicchalasaccūḍā svarṇacampakabhūṣitā / kuṅkumālaktakastūrīmaṇḍitā cāparājitā

hemahārānvitā puṣpāhārāḍhyā rasavatyapi / mādhuryyamadhurā padmā padmahastā suviśrutā

bhrūbhaṅgābhaṅgakodaṇḍakaṭākṣaśarasandhinī / śeṣadevā śirasthā ca nityasthalavihāriṇī

kāruṇyajalamadhyasthā nityamattādhirohiṇī / aṣṭabhāṣavatī cāṣṭanāyikā lakṣaṇānvitā

sunītijñā śrutijñā ca sarvajñā duḥkhahāriṇī / rajoguṇeśvarī caiva śaraccandranibhānanā

ketakīkusumābhāsā sadā sindhuvanasthitā / hemapuṣpādhikakarā pañcaśaktimayī hitā

stanakumbhī narāḍhyā ca kṣīṇāpuṇyā yaśasvinī / vairājasūyajananī śrīśā bhuvanamohinī

mahāśobhā mahāmāyā mahākāntirmahāsmṛtiḥ / mahāmohā mahāvidyā mahākīrtirmahāratiḥ

mahādhairyā mahāvīryā mahāśaktirmahādyutiḥ / mahāgaurī mahāsampanmahābhogavilāsinī

samayā bhaktidāśokā vātsalyarasadāyinī / suhṛdbhaktipradā svacchā mādhuryarasavarṣiṇī

bhāvabhaktipradā śuddhapremabhaktividhāyinī / goparāmābhirāmā ca krīḍārāmā pareśvarī

nityarāmā cātmarāmā kṛṣṇarāmā rameśvarī / ekānekajagadvyāptā viśvalīlāprakāśinī

sarasvatīśā durgeśā jagadīśā jagadvidhiḥ / viṣṇuvaṃśanivāsā ca viṣṇuvaṃśasamudbhavā

viṣṇuvaṃśastutā kartrī viṣṇuvaṃśāvanī sadā / ārāmasthā vanasthā ca sūryyaputryavagāhinī

prītisthā nityayantrasthā golokasthā vibhūtidā / svānubhūtisthitā vyaktā sarvalokanivāsinī

amṛtā hyadbhutā śrīmannārāyaṇasamīḍitā / akṣarāpi ca kūṭasthā mahāpuruṣasambhavā

audāryabhāvasādhyā ca sthūlasūkṣmātirūpiṇī / śirīṣapuṣpamṛdulā gāṅgeyamukuraprabhā

nīlotpalajitākṣī ca sadratnakavarānvitā / premaparyaṅkanilayā tejomaṇḍalamadhyagā

kṛṣṇāṅgagopanā'bhedā līlāvaraṇanāyikā / sudhāsindhusamullāsāmṛtāsyandavidhāyinī

kṛṣṇacittā rāsacittā premacittā haripriyā / acintanaguṇagrāmā kṛṣṇalīlā malāpahā

rāsasindhuśaśāṅkā ca rāsamaṇḍalamaṇḍinī / natavratā siṃharīcchā sumūrtiḥ suravanditā

gopīcūḍāmaṇirgopī gaṇeḍyā virajādhikā / gopapreṣṭhā gopakanyā gopanārī sugopikā

gopadhāmā sudāmāmbā gopālī gopamohinī / gopabhūṣā kṛṣṇabhūṣā śrīvṛndāvanacandrikā

vīṇādighoṣaniratā rāsotsavavikāsinī / kṛṣṇaceṣṭā parijñātā koṭikandarpamohinī

śrīkṛṣṇaguṇanāgāḍhyā devasundarimohinī / kṛṣṇacandramanojñā ca kṛṣṇadevasahodarī

kṛṣṇābhilāṣiṇī kṛṣṇapremānugrahavāṃchitā / kṣemā ca madhurālāpā bhruvomāyā subhadrikā

prakṛtiḥ paramānandā nīpadrumatalasthitā / kṛpākaṭākṣā bimboṣṭhī rambhā cārunitambinī

smarakelinidhānā ca gaṇḍatāṭaṅkamaṇḍitā / hemādrikāntirucirā premādyā madamantharā

kṛṣṇacintā premacintā raticintā ca kṛṣṇadā / rāsacintā bhāvacintā śuddhacintā mahārasā

kṛṣṇādṛṣṭitruṭiyugā dṛṣṭipakṣmivinindinī / kandarpajananī mukhyā vaikuṇṭhagatidāyinī

rāsabhāvā priyāśliṣṭā preṣṭhā prathamanāyikā / śuddhā sudhādehinī ca śrīrāmā rasamañjarī

suprabhāvā śubhācārā svarṇadī narmadāmbikā / gomatī candrabhāgeḍyā sarayūstāmraparṇisūḥ

niṣkalaṅkacaritrā ca nirguṇā ca nirañjanā / etannāmasahasraṃ tu yugmarūpasya nārada

paṭhanīyaṃ prayatnena vṛndāvanarasāvahe / mahāpāpapraśamanaṃ vandhyātvavinivartakam

dāridryaśamanaṃ roganāśanaṃ kāmadaṃ mahat / pāpāpahaṃ vairiharaṃ rādhāmādhavabhaktidam

namastasmai bhagavate kṛṣṇāyākuṇṭhamedhase / rādhāsaṅgasudhāsindhau namo nityavihāriṇe

rādhādevī jagatkartrī jagatpālanatatparā / jagallayavidhātrī ca sarveśī sarvasūtikā

tasyā nāmasahasraṃ vai mayā proktaṃ munīśvara / bhuktimuktipradaṃ divyaṃ kiṃ bhūyaḥ śrotumicchasi

// iti śrībṛhannāradīyapurāṇe pūrvabhāge bṛhadupākhyāne tṛtīyapāde rādhākṛṣṇasahasranāmakathanaṃ nāma dvyaśītitamo'dhyāyaḥ //