સ્કંદ પુરાણ · અધ્યાય 7.70

॥ ઈશ્વર ઉવાચ ॥ ॥
તતો ગચ્છેન્મહાદેવિ વરુણેશ્વરમુત્તમમ્ ॥
ગૌરીતપોવનાગ્નેય્યાં ધનુષાં વિંશતૌ સ્થિતમ્ ॥
લિંગં મહાપ્રભાવં હિ વરુણેન પ્રતિષ્ઠિતમ્

પૂર્વં પીતો યદા દેવિ સમુદ્રઃ કુમ્ભજન્મના ॥
તદા કોપેન સન્તપ્તો વરુણઃ સરિતાં પતિઃ

કામિકં તુ સમાજ્ઞાય ક્ષેત્રં પ્રાભાસિકં તદા ॥
તત્રાતપદ્દેવિ તપઃ સ વૈ પરમદુશ્ચરમ્

પ્રતિષ્ઠાપ્ય મહાલિંગં સંપૂજયતિ ભક્તિતઃ ॥
વર્ષાણામયુતં સાગ્રં પૂજિતો વૃષભધ્વજઃ

તતઃ પ્રસન્નો દેવેશિ નિજગંગાજલેન તુ ॥
પૂરયામાસ તં રિક્તં સમુદ્રં યાદસાંપતિમ્

છંદયામાસ તં લિંગં વરદાનૈરનેકધા ॥
તત્પ્રભૃત્યેવ તે સર્વે સમુદ્રાઃ પરિપૂરિતાઃ

વરુણેશ્વરનામેતિ તલ્લિંગં તત્પ્રભૃત્યભૂત્

કો હ્યર્થો બહુભિર્લિંગૈર્દૃષ્ટૈર્વા સુરસુન્દરિ ॥
વરુણેશેન દૃષ્ટેન સર્વતીર્થફલં લભેત્

અષ્ટમ્યાં ચ ચતુર્દશ્યાં તદ્દધ્ના સ્નાપયેદ્યદિ ॥
સ બ્રાહ્મણશ્ચતુર્વેદો જાયતે નાત્ર સંશયઃ

બ્રાહ્મણાઃ ક્ષત્રિયા વૈશ્યાઃ શૂદ્રાશ્ચાન્યે વરાનને ॥
મૂકાંધબધિરા બાલાઃ સ્ત્રિયશ્ચૈવ નપુંસકાઃ

દૃષ્ટ્વા ગચ્છંતિ તે દેવિ સ્વર્ગં ધર્મપરાયણાઃ ॥
સ્નાનં જાપ્યં બલિં હોમં પૂજાં સ્તોત્રં ચ નર્તનમ્ ॥
તસ્મિન્સ્થાને તુ યઃ કુર્યાત્તત્સર્વં ચાક્ષયં ભવેત્

હૈમં પદ્મં મૌક્તિકં ચ દાનં તત્રૈવ દાપયેત્ ॥
સમ્યગ્યાત્રાફલાપેક્ષી સ્વર્ગાપેક્ષી તથા નરઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે વરુણેશ્વરમાહાત્મ્યવર્ણનંનામ સપ્તતિતમોઽધ્યાયઃ ॥