સ્કંદ પુરાણ · શ્લોક 7.60-2

॥ ઈશ્વર ઉવાચ ॥ ॥
પ્રભાસક્ષેત્રદૂતીનાં ત્રિતયં વરવર્ણિનિ ॥
અથ તે સંપ્રવક્ષ્યામિ શૃણુ હ્યેકમનાઃ પ્રિયે

પ્રથમા મંગલા દેવી વિશાલાક્ષી દ્વિતીયિકા ॥
તથા ચત્વરદેવી તુ તૃતીયા પરિકીર્તિતા

યથાનુક્રમતઃ પૂજ્યાઃ શક્તયસ્તા વરાનને ॥
પ્રભાસક્ષેત્રયાત્રાયાઃ ફલપ્રેપ્સુર્નરો યદિ

॥ દેવ્યુવાચ ॥ ॥
કસ્મિન્સ્થાને સ્થિતા દેવ દૂત્યસ્તાઃ ક્ષેત્રરક્ષિકાઃ ॥
કસ્ય તાઃ કથમારાધ્યાઃ કથં પૂજ્યા જગત્પતે

॥
॥ ઈશ્વર ઉવાચ ॥ ॥
બ્રાહ્મી તુ મંગલા પ્રોક્તા વિશાલાક્ષી તુ વૈષ્ણવી ॥
રૌદ્રીશક્તિઃ સમાખ્યાતા દેવી સા ચત્વરપ્રિયા

મંગલા પ્રથમં પૂજ્યા અજાદેવ્યુત્તરે સ્થિતા ॥
રાહ્વીશાદ્દક્ષિણેભાગે નાતિદૂરે વરાનને

સોમેશ્વરપ્રતિષ્ઠાપ્ય પ્રારબ્ધે યજ્ઞકર્મણિ ॥
સોમેન તત્ર દેવાનામાગતા સા દિદૃક્ષયા

બ્રહ્માદીનાં ચ સા યસ્માન્માંગલ્યં કૃતવત્યુમે ॥
તસ્માત્સા મંગલા પ્રોક્તા સર્વમાંગલ્યદાયિની

તૃતીયાયાં તુ યા નારી નરો વા પૂજયિષ્યતિ ॥
તસ્યાઽમંગલ્યદુઃખાનિ નાશં યાસ્યંતિ કૃત્સ્નશઃ

દમ્પતીભોજનં તત્ર ફલદાનં સકઞ્ચુકમ્ ॥
પ્રશસ્તં પૃષદાજ્યસ્ય પ્રાશનં પાપનાશનમ્

ઇતિ સંક્ષેપતઃ પ્રોક્તં મહાભાગ્યં મહોદયમ્ ॥
મંગલાયાશ્ચ માહાત્મ્યં સર્વપાતકનાશનમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે મઙ્ગલામાહાત્મ્યવર્ણનંનામ ષષ્ટિતમોઽધ્યાયઃ