સ્કંદ પુરાણ · શ્લોક 7.57-2

॥ ઈશ્વર ઉવાચ ॥ ॥
પંચૈવં સિદ્ધલિંગાનિ કથિતાનિ તવ પ્રિયે ॥
યશ્ચૈનં વેદ સંકેતં ક્ષેત્રવાસી સ ઉચ્યતે

અથ શક્તિત્રયાણાં તે રૌદ્રીણાં વચ્મિ વિસ્તરમ્ ॥
ઇચ્છા ક્રિયાજ્ઞાનશક્ત્યસ્તિસ્રસ્તાઃ પરિકીર્ત્તિતાઃ

પુનસ્તાસાં પૂજનાયાનુક્રમં ક્રમતઃ શૃણુ ॥
ચતુર્દશ તથા પંચ પૂર્વમુક્તાનિ યાનિ તુ

॥
ચત્વારિ ત્રીણિ ચૈકં વા યથાશક્ત્યાભિપૂજ્ય ચ ॥
લિંગાનિ તાનિ સંપૂજ્ય શક્તીસ્તિસ્રસ્તતોઽર્ચયેત્

સોમેશાદીશદિગ્ભાગે વરારોહેતિ યા સ્મૃતા ॥
અમા કલા સા સોમસ્ય ઉમા પશ્ચાત્પ્રકીર્ત્તિતા

ઇચ્છાશક્તિસ્તુ સા જ્ઞેયાપ્રભાસક્ષેત્રસંસ્થિતા ॥
તત્ર દેવિ હિતાર્થાય સર્વેષાં પ્રાણિનાં ભુવિ

તસ્યા માહાત્મ્યમખિલં કથયામિ તવાધુના ॥
પુરા સોમેન ત્યક્તાભિર્ભાર્યાભિસ્તુ વરાનને

ષડ્વિંશદ્ભિસ્તપસ્તપ્તં ક્ષેત્રે પ્રાભાસિકે શુભે ॥
ગૌરી સાઽઽરાધ્યમાનાથ દિવ્યવર્ષગણાન્બહૂન્

તાસાં પ્રત્યક્ષતાં પ્રાપ્તા પાર્વતી પરમેશ્વરી ॥
ઉવાચ વરદા બ્રૂત યદ્વો મનસિ સંસ્થિતમ્

અથ તાશ્ચાબ્રુવન્દેવિ યદિ તુષ્ટાસિ પાર્વતિ ॥
સૌભાગ્યં દેહિ નો ભૂરિ લાવણ્યં પરમં તથા

ત્યક્તાઃ સર્વા વયં દેવિ નિર્દોષાઃ સ્વામિના શુભે ॥
દૌર્ભાગ્યદોષસંદગ્ધા દૌર્ભાગ્યેણ તુ પીડિતાઃ

॥ ગૌર્યુવાચ ॥ ॥
અદ્યપ્રભૃતિ સર્વા વઃ સમં દ્રક્ષ્યતિ રાત્રિપઃ ॥
પ્રસાદાન્મમ ચાર્વંગ્યો નૈતન્મિથ્યા ભવિષ્યતિ

વરદા ચેતિ મન્નામ વરદાનાદ્ભવિષ્યતિ ॥
ઇહાગત્ય તુ યા નારી પૂજયિષ્યતિ માં શુભામ્

ન દૌર્ભાગ્યં કુલે તસ્યાઃ ક્વચિત્પ્રાપ્સ્યંતિ યોષિતઃ ॥
માઘમાસે તૃતીયાયામુપવાસપરાયણા

યા માં દ્રક્ષ્યતિ સુશ્રોણી મત્તુલ્યા સા ભવિ ષ્યતિ ॥
દમ્પતી ષોડશૈવાત્ર પરિધાપ્ય પ્રયત્નતઃ

ફલાનિ ભક્ષ્યભોજ્યં ચ પક્વાન્નાનિ ચ ષોડશ ॥
યા પ્રદાસ્યતિ વૈ નારી સા તૂમૈવ ભવિષ્યતિ

એતદ્ગૌરીવ્રતંનામ તૃતીયાયાં તુ કારયેત્ ॥
અપ્રસૂતા ચ યા નારી યા નારી દુર્ભગા ભવેત્

પુમાનસકૃદપ્યૈવં કૃત્વા પ્રાપ્સ્યત્યભીપ્સિતમ્ ॥
એવમુક્ત્વા સ્થિતા તત્ર સા દેવી ચારુલોચના

પશ્યતે રાત્રિનાથશ્ચ સર્વાસ્તા રોહિણીં યથા ॥
અન્યાપિ દુઃખસંદગ્ધા દૌર્ભાગ્યેણ તુ પીડિતા

અપૂજયદુમાં દેવીં સુભગા સાઽભવત્તતઃ ॥
ઇતિ સંક્ષેપતઃ પ્રોક્તં માહાત્મ્યં શક્તિસંભવમ્

સોમેશ્વરે વરારોહા નામેતિ કથિતં તવ ॥
સર્વપાપક્ષયકરં સર્વદારિદ્ર્યનાશનમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે વરારોહામાહાત્મ્યવર્ણનંનામ સપ્તપંચાશોઽધ્યાયઃ