Skanda Purana · Verses 7.45-2

// īśvara uvāca // //
tato gacchenmahādevi aṃgāreśvaramuttamam //
sthāpitaṃ bhūmiputreṇa someśādīśa gocare

tripuraṃ dagdhukāmasya purā mama varānane //
krodhādaśru viniṣkrāṃtaṃ locanatritayena tu

tacca bhūmau nipatitaṃ tato bhūbhisuto'bhavat //
sa prabhāsaṃ tato gatvā bālyātprabhṛti śaṃkaram

tapasā''rādhayāmāsa bahūnvarṣagaṇānpriye //
tasya tuṣṭo mahādevaḥ suprītātmā varaṃ dadau

so'bravīdyadi me deva tuṣṭosi vṛṣabhadhvaja //
grahatvaṃ dehi sarveśa na cānyaṃ varamutsahe

sa tatheti pratijñāya punastaṃ vākyamabravīt //
ihāgatya naro yo māṃ pūjayiṣyati bhaktitaḥ

na bhaviṣyati vai pīḍā tāvakī tasya kutracit //
puṣpāṇi raktavarṇāni madhvājyāktāni bhūriśaḥ

homayiṣyati yo bhaktyā lakṣamekaṃ tadagrataḥ //
paṃcopacāravidhinā tvāṃ tu saṃpūjya yatnataḥ

tasya janmāvadhirnaiva tava pīḍā bhaviṣyati ///
tathā vidrumadānena lapsyate phalamīpsitam

evamuktvā sa bhagavānatraivāṃtaradhīyana //
bhaumo'pi grahamadhyastho vimānena virājate

evaṃ saṃkṣepataḥ proktaṃ bhaumamāhātmyamuttamam//
śrutaṃ harati pāpāni tathārogyaṃ prayacchati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmyeṃ'gāreśvaramāhātmyavarṇanaṃnāma pañcacatvāriṃśodhyāyaḥ