Skanda Purana · Verses 7.43-3

// īśvara uvāca // //
tato gacchedvarārohe liṃgaṃ sūryapratiṣṭhitam //
someśātpaścime bhāge dhanuṣāṃ saptake sthitam//
ādityeśvaranāmānaṃ sarvapātakanāśanam

tretāyuge mahādevi samudreṇa mahātmanā //
ratnaiḥ saṃpūjitaṃ liṃgaṃ varṣāṇāmayutaṃ priye

tena ratneśvaraṃnāma sāṃprataṃ prathitaṃ kṣitau //
paṃcāmṛtena saṃsnāpya paṃcaratnaiḥ prapūjayet

tato rājopacāreṇa pūjayedvidhivannaraḥ //
evaṃ kṛte mahādevi merudānaphalaṃ labhet

sarveṣāṃ caiva yajñānāṃ dānānāṃ nātra saṃśayaḥ

tīrthānāṃ cāpi sarveṣāṃ yaccānyatsukṛtaṃ bhuvi //
uddharetpitṛvargaṃ ca mātṛvargaṃ ca mānavaḥ

bālye vayasi yatpāpaṃ vārddhake yauvane'pi vā //
kṣālayeccaiva tatsarvaṃ dṛṣṭvā ratneśvaraṃ naraḥ

dhenudānaṃ praśaṃsaṃti tasminsthāne maharṣayaḥ //
dhenudastārayennūnaṃ daśa pūrvāndaśāparān

devasya dakṣiṇe bhāge yo japecchatarudriyam //
saṃpūjya vidhivalliṃgaṃ na sa bhūyaḥ prajāyate

evaṃ saṃkṣepataḥ proktamādityeśamahodayam //
śrutvā'vadhārya yatnena mucyate karmabaṃdhanaiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya ādityeśvaramāhātmyavarṇanaṃnāma tricatvāriṃśo'dhyāyaḥ