સ્કંદ પુરાણ · શ્લોક 7.43-3

॥ ઈશ્વર ઉવાચ ॥ ॥
તતો ગચ્છેદ્વરારોહે લિંગં સૂર્યપ્રતિષ્ઠિતમ્ ॥
સોમેશાત્પશ્ચિમે ભાગે ધનુષાં સપ્તકે સ્થિતમ્॥
આદિત્યેશ્વરનામાનં સર્વપાતકનાશનમ્

ત્રેતાયુગે મહાદેવિ સમુદ્રેણ મહાત્મના ॥
રત્નૈઃ સંપૂજિતં લિંગં વર્ષાણામયુતં પ્રિયે

તેન રત્નેશ્વરંનામ સાંપ્રતં પ્રથિતં ક્ષિતૌ ॥
પંચામૃતેન સંસ્નાપ્ય પંચરત્નૈઃ પ્રપૂજયેત્

તતો રાજોપચારેણ પૂજયેદ્વિધિવન્નરઃ ॥
એવં કૃતે મહાદેવિ મેરુદાનફલં લભેત્

સર્વેષાં ચૈવ યજ્ઞાનાં દાનાનાં નાત્ર સંશયઃ

તીર્થાનાં ચાપિ સર્વેષાં યચ્ચાન્યત્સુકૃતં ભુવિ ॥
ઉદ્ધરેત્પિતૃવર્ગં ચ માતૃવર્ગં ચ માનવઃ

બાલ્યે વયસિ યત્પાપં વાર્દ્ધકે યૌવનેઽપિ વા ॥
ક્ષાલયેચ્ચૈવ તત્સર્વં દૃષ્ટ્વા રત્નેશ્વરં નરઃ

ધેનુદાનં પ્રશંસંતિ તસ્મિન્સ્થાને મહર્ષયઃ ॥
ધેનુદસ્તારયેન્નૂનં દશ પૂર્વાન્દશાપરાન્

દેવસ્ય દક્ષિણે ભાગે યો જપેચ્છતરુદ્રિયમ્ ॥
સંપૂજ્ય વિધિવલ્લિંગં ન સ ભૂયઃ પ્રજાયતે

એવં સંક્ષેપતઃ પ્રોક્તમાદિત્યેશમહોદયમ્ ॥
શ્રુત્વાઽવધાર્ય યત્નેન મુચ્યતે કર્મબંધનૈઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્ય આદિત્યેશ્વરમાહાત્મ્યવર્ણનંનામ ત્રિચત્વારિંશોઽધ્યાયઃ