Skanda Purana · Verses 7.42-3

// īśvara uvāca // //
tato gacchenmahādevi caṇḍīśaṃ devamuttamam //
someśādīśadigbhāge dhanuṣāṃ saptake sthitam

daṇḍapāṇestu bhavanāddakṣiṇe nātidūragam //
caṃḍyā pratiṣṭhitaṃ pūrvaṃ caṇḍenārādhitaṃ tataḥ

gaṇena mama deveśi tatkṛtvā duṣkaraṃ tapaḥ //
tena caṇḍeśvaraṃ liṃgaṃ prakhyātaṃ dharaṇītale

snāpayetpayasā pūrvaṃ dadhnā ghṛtayutena ca //
madhunekṣurasenaiva kuṃkumena vilepayet

karpūrośīramiśreṇa mṛganābhirasena ca //
candanena sugandhena puṣpaiḥ saṃpūjayettataḥ

dagdhvā dhūpaṃ puro devi tato devasya cāgurum //
vastraiḥ saṃpūjayetpaścādātmavittānusārataḥ

naivedyaṃ paramānnaṃ ca dattvā dīpasama nvitam //
tato dadyāddvijātibhyo yathāśaktyā tu dakṣiṇām

dakṣiṇāṃ diśamāsthāya yatkiṃcittatra dīyate//
caṇḍīśasya varārohe tatsarvaṃ cākṣayaṃ bhavet

yaḥ śrāddhaṃ kurute tatra caṇḍīśasya tu dakṣiṇe //
ākalpaṃ tṛptimāyāṃti pitarastasya bhāmini

ayane cottare prāpte yaḥ kuryādghṛta kambalam //
na sa bhūyo'tra saṃsāre janma prāpnoti dāruṇam

evaṃ kṛtvā naro bhaktyā yātrāṃ devasya śūlinaḥ //
nirmālyātikramodbhūtairajñānādbhakṣaṇodbhavaiḥ //
pāpaiḥ pramucyate jaṃtustathā'nyaiḥ karmasaṃbhavaiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathameprabhāsakṣetramāhātmye caṇḍīśamāhātmyavarṇanaṃnāmadvicatvāriṃśo'dhyāyaḥ