Skanda Purana · Verses 7.42-2

// prahlāda uvāca // //
vṛṣotsargaṃ kariṣyaṃti vaiśākhyāṃ caiva kārtike //
dvārakāyāṃ piśācatvaṃ muktvā yāṃti pitāmahāḥ

brahmahatyā surāpānaṃ steyaṃ gurvaṃganāgamaḥ //
evaṃvidhāni pāpāni kṛtvā caiva gurūṇyapi

snānamātreṇa gomatyāṃ śrīkṛṣṇasya ca darśanāt //
vilayaṃ yāti daityendra kalpakoṭikṛtānyapi

rukmiṇīṃ ye prapaśyaṃti bhaktiyuktāḥ kalau narāḥ //
purīṃ pradakṣiṇāṃ kṛtvā japtvā nāmasahasrakam

pradakṣiṇīkṛtaṃ sarvaṃ brahmāṃḍaṃ nātra saṃśayaḥ //
mahādānaistu cānyatra yatphalaṃ parikīrtitam//
dvārakāyāṃ tu rukmiṇyāṃ dṛṣṭāyāṃ jāyate tadā

dvādaśīvāsare prāpte māhātmyaṃ dvārakābhavam //
paṭhate saṃnidhau viṣṇoḥ śṛṇu vakṣyāmi tatphalam

sarveṣu caiva lokeṣu kāmacārī virājate //
padmavarṇena yānena kiṃkiṇījālamālinā

divyaśvetāśvayuktena kāmagena yathāsukham //
ābhūtasaṃplavaṃ yāvatkrīḍate'psarasāṃ gaṇaiḥ

kṛtakṛtyaśca bhavati kalpakoṭisamanvitaḥ //
yathā nirmathanādagniḥ sarvakāṣṭheṣu dṛśyate //
tathā ca dṛśyate dharmo dvādaśīsevanānnare

ataḥ paraṃ pravakṣyāmi pitṛbhiḥ parikīrtitam //
api syātsa kule'smākaṃ gomatyāṃ śraddhayā naraḥ //
snātvā saṃpūjya kṛṣṇaṃ ca śrāddhaṃ kuryātsapiṇḍakam

api syātsa kule'smākaṃ gomatyudadhisaṃgame //
snātvā paśyati yaḥ kṛṣṇamasmākaṃ tāraṇāya vai

apisyātsa kula'smākaṃ yaḥ śrutvā brāhmaṇānanāt //
dvārakāmāhātmyamidaṃ pūjayiṣyati bhaktitaḥ

bhaviṣyati kule'smākaṃ yo gaccheddvārakāṃ purīm //
saṃprāpya dvādaśīṃ śuddhāṃ yaḥ kariṣyati jāgaram

bhaviṣyati kule'smākaṃ putro vā duhitā tathā //
stuvannāmasahasraṃ tu kṛṣṇasyāgre paṭhiṣyati

api syātsa kule'smākaṃ bhaviṣyati dhṛtavrataḥ //
gopīcandanadānena yastoṣayati vaiṣṇavān//

api syātsa kule'smākaṃ vaiṣṇavānāṃ tu sannidhau //
dvārakāyāśca māhātmyaṃ paṭhiṣyati jitendriyaḥ

bhaviṣyati kule'smākaṃ māhātmyaṃ dvārakābhavam //
likhitvā kṛṣṇatuṣṭyarthaṃ svagṛhe dhārayiṣyati

svarṇadānaṃ ca godānaṃ bhūmidānaṃ tathaiva ca //
yāvajjīvaṃ bhaveddattaṃ yenedaṃ dhāritaṃ kalau

taptakṛcchraṃ mahākṛcchraṃ māsopoṣaṇameva ca //
yāvajjīvaṃ kṛtaṃ tena yenedaṃ śrāvitaṃ kalau

prāyaścittāni cīrṇāni pāpānāṃ nāśanāya ? //
dvārakāyāśca māhātmyaṃ yena vistāritaṃ kalau

tāvattiṣṭhaṃti puruṣe brahmahatyādikāni ca //
yāvanna likhate jaṃturmāhātmyaṃ dvārakābhavam

dānaiḥ sarvaiśca kiṃ tasya sarvatīrthāvagāhanaiḥ //
dvārakāyāśca māhātmyaṃ yenedaṃ likhitaṃ gṛhe

sarva duḥkhapraśamanaṃ sarvakāryyaprasādhanam//
caturvargapradaṃ nityaṃ haribhaktivivarddhanam

na cādhirbhavate nūnaṃ yāmyaṃ tasya bhayaṃ nahi //
māhātmyaṃ paṭhate yatra dvārakāyāḥ samudbhavam

likhitaṃ tiṣṭhate yasya gṛhe tattīrthameva ca //
balācchuṇuṣva māhātmyaṃ dvārakāyāḥ samudbhavam

vidhi mantrakriyāhīnāṃ pūjāṃ gṛhṇāti keśavaḥ //
māhātmyaṃ tiṣṭhate nityaṃ likhitaṃ yasya veśmani //
na tasyāgaḥsahasraistu kṛtairlipyati mānavaḥ

yaḥ paṭhecchṛṇute vāpi māhātmyaṃ dvārakābhavam //
na bhavedbhūtavaikalyaṃ dharmavaikalyameva ca

yaḥ smaretprātarutthāya māhātmyaṃ dvārakābhavam //
dvādaśīnāṃ ca sarvāsāṃ yaccoktaṃ labhate phalam

tridaśaiḥ pūjyate nityaṃ vandyate siddhacāraṇaiḥ //
māhātmyaṃ paṭhate yo vai dvārakāyāḥ samudbhavam

dvārakā vasate yatra tatra viṣṇuḥ sanātanaḥ //
tatra tīrthāni sarvāṇi sarve devāḥ savāsavāḥ //
yajñā vedāśca ṛṣayastrailokyaṃ sacarā caram

śakto hi dvārakāṃ gaṃtuṃ mānavo na hi putraka //
kṛṣṇadarśanajaṃ puṇyaṃ māhātmyaṃ paṭhato bhavet

satyaṃ śaucaṃ śrutaṃ vittaṃ suśīlaṃ ca kṣamā''rjavam //
sarvaṃ ca niṣphalaṃ tasya māhātmyaṃ na śṛṇoti yaḥ

ṣaṇmāse ca bhavetputro lakṣmīścaiva vivarddhate //
tasya yaḥ śṛṇute bhaktyā māhātmyaṃ dvārakābhavam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye dvārakākṣetre vṛṣotsargādikriyākaraṇa dvārakāmāhātmyaśravaṇādiphalavarṇanaṃnāma dvicatvāriṃśattamo'dhyāyaḥ