સ્કંદ પુરાણ · શ્લોક 7.42-2

॥ પ્રહ્લાદ ઉવાચ ॥ ॥
વૃષોત્સર્ગં કરિષ્યંતિ વૈશાખ્યાં ચૈવ કાર્તિકે ॥
દ્વારકાયાં પિશાચત્વં મુક્ત્વા યાંતિ પિતામહાઃ

બ્રહ્મહત્યા સુરાપાનં સ્તેયં ગુર્વંગનાગમઃ ॥
એવંવિધાનિ પાપાનિ કૃત્વા ચૈવ ગુરૂણ્યપિ

સ્નાનમાત્રેણ ગોમત્યાં શ્રીકૃષ્ણસ્ય ચ દર્શનાત્ ॥
વિલયં યાતિ દૈત્યેન્દ્ર કલ્પકોટિકૃતાન્યપિ

રુક્મિણીં યે પ્રપશ્યંતિ ભક્તિયુક્તાઃ કલૌ નરાઃ ॥
પુરીં પ્રદક્ષિણાં કૃત્વા જપ્ત્વા નામસહસ્રકમ્

પ્રદક્ષિણીકૃતં સર્વં બ્રહ્માંડં નાત્ર સંશયઃ ॥
મહાદાનૈસ્તુ ચાન્યત્ર યત્ફલં પરિકીર્તિતમ્॥
દ્વારકાયાં તુ રુક્મિણ્યાં દૃષ્ટાયાં જાયતે તદા

દ્વાદશીવાસરે પ્રાપ્તે માહાત્મ્યં દ્વારકાભવમ્ ॥
પઠતે સંનિધૌ વિષ્ણોઃ શૃણુ વક્ષ્યામિ તત્ફલમ્

સર્વેષુ ચૈવ લોકેષુ કામચારી વિરાજતે ॥
પદ્મવર્ણેન યાનેન કિંકિણીજાલમાલિના

દિવ્યશ્વેતાશ્વયુક્તેન કામગેન યથાસુખમ્ ॥
આભૂતસંપ્લવં યાવત્ક્રીડતેઽપ્સરસાં ગણૈઃ

કૃતકૃત્યશ્ચ ભવતિ કલ્પકોટિસમન્વિતઃ ॥
યથા નિર્મથનાદગ્નિઃ સર્વકાષ્ઠેષુ દૃશ્યતે ॥
તથા ચ દૃશ્યતે ધર્મો દ્વાદશીસેવનાન્નરે

અતઃ પરં પ્રવક્ષ્યામિ પિતૃભિઃ પરિકીર્તિતમ્ ॥
અપિ સ્યાત્સ કુલેઽસ્માકં ગોમત્યાં શ્રદ્ધયા નરઃ ॥
સ્નાત્વા સંપૂજ્ય કૃષ્ણં ચ શ્રાદ્ધં કુર્યાત્સપિણ્ડકમ્

અપિ સ્યાત્સ કુલેઽસ્માકં ગોમત્યુદધિસંગમે ॥
સ્નાત્વા પશ્યતિ યઃ કૃષ્ણમસ્માકં તારણાય વૈ

અપિસ્યાત્સ કુલઽસ્માકં યઃ શ્રુત્વા બ્રાહ્મણાનનાત્ ॥
દ્વારકામાહાત્મ્યમિદં પૂજયિષ્યતિ ભક્તિતઃ

ભવિષ્યતિ કુલેઽસ્માકં યો ગચ્છેદ્દ્વારકાં પુરીમ્ ॥
સંપ્રાપ્ય દ્વાદશીં શુદ્ધાં યઃ કરિષ્યતિ જાગરમ્

ભવિષ્યતિ કુલેઽસ્માકં પુત્રો વા દુહિતા તથા ॥
સ્તુવન્નામસહસ્રં તુ કૃષ્ણસ્યાગ્રે પઠિષ્યતિ

અપિ સ્યાત્સ કુલેઽસ્માકં ભવિષ્યતિ ધૃતવ્રતઃ ॥
ગોપીચન્દનદાનેન યસ્તોષયતિ વૈષ્ણવાન્॥

અપિ સ્યાત્સ કુલેઽસ્માકં વૈષ્ણવાનાં તુ સન્નિધૌ ॥
દ્વારકાયાશ્ચ માહાત્મ્યં પઠિષ્યતિ જિતેન્દ્રિયઃ

ભવિષ્યતિ કુલેઽસ્માકં માહાત્મ્યં દ્વારકાભવમ્ ॥
લિખિત્વા કૃષ્ણતુષ્ટ્યર્થં સ્વગૃહે ધારયિષ્યતિ

સ્વર્ણદાનં ચ ગોદાનં ભૂમિદાનં તથૈવ ચ ॥
યાવજ્જીવં ભવેદ્દત્તં યેનેદં ધારિતં કલૌ

તપ્તકૃચ્છ્રં મહાકૃચ્છ્રં માસોપોષણમેવ ચ ॥
યાવજ્જીવં કૃતં તેન યેનેદં શ્રાવિતં કલૌ

પ્રાયશ્ચિત્તાનિ ચીર્ણાનિ પાપાનાં નાશનાય ? ॥
દ્વારકાયાશ્ચ માહાત્મ્યં યેન વિસ્તારિતં કલૌ

તાવત્તિષ્ઠંતિ પુરુષે બ્રહ્મહત્યાદિકાનિ ચ ॥
યાવન્ન લિખતે જંતુર્માહાત્મ્યં દ્વારકાભવમ્

દાનૈઃ સર્વૈશ્ચ કિં તસ્ય સર્વતીર્થાવગાહનૈઃ ॥
દ્વારકાયાશ્ચ માહાત્મ્યં યેનેદં લિખિતં ગૃહે

સર્વ દુઃખપ્રશમનં સર્વકાર્ય્યપ્રસાધનમ્॥
ચતુર્વર્ગપ્રદં નિત્યં હરિભક્તિવિવર્દ્ધનમ્

ન ચાધિર્ભવતે નૂનં યામ્યં તસ્ય ભયં નહિ ॥
માહાત્મ્યં પઠતે યત્ર દ્વારકાયાઃ સમુદ્ભવમ્

લિખિતં તિષ્ઠતે યસ્ય ગૃહે તત્તીર્થમેવ ચ ॥
બલાચ્છુણુષ્વ માહાત્મ્યં દ્વારકાયાઃ સમુદ્ભવમ્

વિધિ મન્ત્રક્રિયાહીનાં પૂજાં ગૃહ્ણાતિ કેશવઃ ॥
માહાત્મ્યં તિષ્ઠતે નિત્યં લિખિતં યસ્ય વેશ્મનિ ॥
ન તસ્યાગઃસહસ્રૈસ્તુ કૃતૈર્લિપ્યતિ માનવઃ

યઃ પઠેચ્છૃણુતે વાપિ માહાત્મ્યં દ્વારકાભવમ્ ॥
ન ભવેદ્ભૂતવૈકલ્યં ધર્મવૈકલ્યમેવ ચ

યઃ સ્મરેત્પ્રાતરુત્થાય માહાત્મ્યં દ્વારકાભવમ્ ॥
દ્વાદશીનાં ચ સર્વાસાં યચ્ચોક્તં લભતે ફલમ્

ત્રિદશૈઃ પૂજ્યતે નિત્યં વન્દ્યતે સિદ્ધચારણૈઃ ॥
માહાત્મ્યં પઠતે યો વૈ દ્વારકાયાઃ સમુદ્ભવમ્

દ્વારકા વસતે યત્ર તત્ર વિષ્ણુઃ સનાતનઃ ॥
તત્ર તીર્થાનિ સર્વાણિ સર્વે દેવાઃ સવાસવાઃ ॥
યજ્ઞા વેદાશ્ચ ઋષયસ્ત્રૈલોક્યં સચરા ચરમ્

શક્તો હિ દ્વારકાં ગંતું માનવો ન હિ પુત્રક ॥
કૃષ્ણદર્શનજં પુણ્યં માહાત્મ્યં પઠતો ભવેત્

સત્યં શૌચં શ્રુતં વિત્તં સુશીલં ચ ક્ષમાઽઽર્જવમ્ ॥
સર્વં ચ નિષ્ફલં તસ્ય માહાત્મ્યં ન શૃણોતિ યઃ

ષણ્માસે ચ ભવેત્પુત્રો લક્ષ્મીશ્ચૈવ વિવર્દ્ધતે ॥
તસ્ય યઃ શૃણુતે ભક્ત્યા માહાત્મ્યં દ્વારકાભવમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે ચતુર્થે દ્વારકામાહાત્મ્યે દ્વારકાક્ષેત્રે વૃષોત્સર્ગાદિક્રિયાકરણ દ્વારકામાહાત્મ્યશ્રવણાદિફલવર્ણનંનામ દ્વિચત્વારિંશત્તમોઽધ્યાયઃ