સ્કંદ પુરાણ · અધ્યાય 7.276

॥ ઈશ્વર ઉવાચ ॥ ॥
તતો ગચ્છેન્મહાદેવિ ઋષિતીર્થસ્ય સન્નિધૌ ॥
કામિકં હિ પરં ક્ષેત્રં દેવિકાનામ નામતઃ

મહાસિદ્ધિવનં તત્ર ઋષિસિદ્ધસમાવૃતમ્ ॥
નાનાદ્રુમલતાકીર્ણં પર્વતૈરુપશોભિતમ્

ચંપકૈર્બકુલૈર્દિવ્યૈરશોકૈઃ સ્તબકૈઃ પરૈઃ ॥
પુન્નાગૈઃ કિંકિરાતૈશ્ચ સુગન્ધૈર્નાગકેસરૈઃ

મલ્લિકોત્પલપુષ્પૈશ્ચ પાટલાપારિજાતકૈઃ ॥
ચૂતચંપકપિત્થૈશ્ચ શ્રીફલૈઃ પનસૈસ્તથા

ખર્જૂરૈર્બદરૈશ્ચાન્યૈર્માતુલિંગૈઃ સદાડિમૈઃ ॥
જંબીરૈશ્ચૈવ દિવ્યૈશ્ચ નારંગૈરુપ શોભિતમ્

શિખિભિઃ કોકિલાભિશ્ચ ગીયમાનં તુ ષટ્પદૈઃ ॥
મૃગૈરૃક્ષૈર્વરાહૈશ્ચ સિંહૈર્વ્યાઘ્રૈસ્તથા પરૈઃ

શ્વાપદૈર્વિવિધાકારૈઃ કન્દરૈ ર્ગહ્વરૈસ્તથા ॥
સુરાસુરગણૈઃ સિદ્ધૈર્યક્ષગન્ધર્વપન્નગૈઃ

અપ્સરોરગનાગૈશ્ચ બહુભિસ્તુ સમાકુલમ્ ॥
કેચિત્સ્તુવંતિ ઈશં તુ કેચિન્નૃત્યંતિ ચાગ્રતઃ

પુષ્પૈર્વૃષ્ટિં તુ મુઞ્ચંતિ મુખવાદ્યાનિ ચાપરે ॥
હસંતિ ચાપરે હૃષ્ટા ગર્જંતિ ચ તથાપરે

ઊર્દ્ધ્વબાહવસ્તથા ચાન્યે અન્યે ધ્યાયંતિ તદ્ગતાઃ ॥
તસ્મિન્સ્થાનં મહાદેવિ દેવિકાયાસ્તટે શુભે

ઉમાપતીશ્વરો નામ તત્રાહં સંસ્થિતઃ સદા ॥
યુગેયુગે સદા પૂર્ણે કલ્પે મન્વન્તરે તથા

ન ત્યજામિ સદા દેવિ દેવિકાયાસ્તટં શુભમ્ ॥
દુર્લ્લભં સર્વલોકેઽસ્મિન્પવિત્રં સુપ્રિયં હિ મે

ત્વયા સહ સ્થિતશ્ચાહં તસ્મિ ન્સ્થાને વરાનને ॥
ઉમયા યુક્તદેહત્વાત્તેન ખ્યાતં ઉમાપતિઃ

પુષ્યમાસે ત્વમાવસ્યાં દદ્યાચ્છ્રાદ્ધં સમાહિતઃ ॥
ન પશ્યામિ ક્ષયં તસ્ય તસ્મિન્દત્તસ્ય પાર્વતિ

બ્રહ્મહત્યાસહસ્રં તુ તસ્ય દર્શનતો વ્રજેત્ ॥
ગોભૂહિરણ્યવાસાંસિ તત્ર દદ્યાદ્વિચક્ષણઃ

સ એકઃ પરમઃ પુત્રો યો ગત્વા તત્ર સુન્દરિ ॥
દદેચ્છ્રાદ્ધં પિતૄણાં ચ તસ્યાંતો નૈવ વિદ્યતે

દેવૈઃ સર્વૈઃ સમાહૂતા સ્નાનાર્થં સા સરિદ્વરા ॥
દેવિકેતિ સમાખ્યાતા તેન સા પાપનાશિની

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે દેવિકાયામુમાપતિમાહાત્મ્યવર્ણનંનામ ષટ્સપ્તત્યુત્તરદ્વિશતતમોઽધ્યાયઃ