Skanda Purana · Chapter 7.248

// īśvara uvāca // //
tato gacchenmahādevi pūrvoktaṃ brahmapūjitam //
sarasvatyāstaṭe saṃsthaṃ parṇādityasya paścime

tasyotpattiṃ pravakṣyāmi śṛṇuṣvaikamanāḥ priye //
sṛjato brahmaṇaḥ pūrvaṃ bhūtagrāmaṃ caturvidham

utpannādbhutarūpāḍhyā nārī kamalalocanā //
kaṃbugrīvā sukeśāṃtā biṃboṣṭhī tanumadhyamā

gaṃbhīranābhiḥ suśroṇī pīnaśroṇipayodharā //
pūrṇacandramukhī sā tu gūḍhagulphā sitānanā

na devī na ca gandharvī nāsurī na ca pannagī //
yādṛgrūpā varārohā tādṛśī sā vyajāyata

tāṃ dṛṣṭvā rūpasaṃpannāṃ brahmā kāmavaśo'bhavat //
atha tāṃ prārthayāmāsa ratyarthaṃ varavarṇini

atha prārthayatastasya nyapatatpaṃcamaṃ śiraḥ //
khararūpaṃ mahādevi tena pāpena tatkṣaṇāt

tato jñātvā mahatpāpaṃ duhituḥ kāmasaṃbhavam //
ghṛṇayā parayā yuktaḥ prabhāsaṃ kṣetramāgataḥ

na kāyasya yataḥ śuddhirvinā tīrthāvagāhanāt //
sa snātaḥ salile puṇye sarasvatyā varānane

liṃgaṃ saṃsthāpayāmāsa devadevasya śūlinaḥ //
tato vikalmaṣo bhūtvā jagāma svagṛhaṃ punaḥ

snātvā sārasvate toye yastalliṃgaṃ prapaśyati //
sarvapāpavinirmukto brahmaloke mahīyate

caitre śuklacaturdaśyāṃ yastaṃ paśyati mānavaḥ //
sa yāti paramaṃ sthānaṃ yatra devo maheśvaraḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye brahmeśvaramāhātmyavarṇanaṃnāmāṣṭacatvāriṃśaduttaradviśatatamo'dhyāyaḥ