સ્કંદ પુરાણ · અધ્યાય 7.248

॥ ઈશ્વર ઉવાચ ॥ ॥
તતો ગચ્છેન્મહાદેવિ પૂર્વોક્તં બ્રહ્મપૂજિતમ્ ॥
સરસ્વત્યાસ્તટે સંસ્થં પર્ણાદિત્યસ્ય પશ્ચિમે

તસ્યોત્પત્તિં પ્રવક્ષ્યામિ શૃણુષ્વૈકમનાઃ પ્રિયે ॥
સૃજતો બ્રહ્મણઃ પૂર્વં ભૂતગ્રામં ચતુર્વિધમ્

ઉત્પન્નાદ્ભુતરૂપાઢ્યા નારી કમલલોચના ॥
કંબુગ્રીવા સુકેશાંતા બિંબોષ્ઠી તનુમધ્યમા

ગંભીરનાભિઃ સુશ્રોણી પીનશ્રોણિપયોધરા ॥
પૂર્ણચન્દ્રમુખી સા તુ ગૂઢગુલ્ફા સિતાનના

ન દેવી ન ચ ગન્ધર્વી નાસુરી ન ચ પન્નગી ॥
યાદૃગ્રૂપા વરારોહા તાદૃશી સા વ્યજાયત

તાં દૃષ્ટ્વા રૂપસંપન્નાં બ્રહ્મા કામવશોઽભવત્ ॥
અથ તાં પ્રાર્થયામાસ રત્યર્થં વરવર્ણિનિ

અથ પ્રાર્થયતસ્તસ્ય ન્યપતત્પંચમં શિરઃ ॥
ખરરૂપં મહાદેવિ તેન પાપેન તત્ક્ષણાત્

તતો જ્ઞાત્વા મહત્પાપં દુહિતુઃ કામસંભવમ્ ॥
ઘૃણયા પરયા યુક્તઃ પ્રભાસં ક્ષેત્રમાગતઃ

ન કાયસ્ય યતઃ શુદ્ધિર્વિના તીર્થાવગાહનાત્ ॥
સ સ્નાતઃ સલિલે પુણ્યે સરસ્વત્યા વરાનને

લિંગં સંસ્થાપયામાસ દેવદેવસ્ય શૂલિનઃ ॥
તતો વિકલ્મષો ભૂત્વા જગામ સ્વગૃહં પુનઃ

સ્નાત્વા સારસ્વતે તોયે યસ્તલ્લિંગં પ્રપશ્યતિ ॥
સર્વપાપવિનિર્મુક્તો બ્રહ્મલોકે મહીયતે

ચૈત્રે શુક્લચતુર્દશ્યાં યસ્તં પશ્યતિ માનવઃ ॥
સ યાતિ પરમં સ્થાનં યત્ર દેવો મહેશ્વરઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે બ્રહ્મેશ્વરમાહાત્મ્યવર્ણનંનામાષ્ટચત્વારિંશદુત્તરદ્વિશતતમોઽધ્યાયઃ