Skanda Purana · Chapter 7.246

// īśvara uvāca // ///
tato gacchenmahādevi piṃgalīṃ pāpanāśinīm //
ṛṣitīrthātpaścimato nadīṃ sāgaragāminīm

tasyāḥ saṃdarśanāddevi rūpavāñjāyate naraḥ //
purā maharṣayaḥ prāptāḥ someśvaradidṛkṣayā

prabhāsaṃ kṣetramāsādya nadītīre vyavasthitāḥ //
dākṣiṇātyā mahādevi kṛṣṇavarṇā virūpakāḥ

tatrāśramavare snātvā paśyanto rūpamātmanaḥ //
kāmena sadṛśaṃ sarve vismayaṃ paramaṃ gatāḥ

tataste sahitāḥ sarve vismayotphullalocanāḥ //
atra snātā vayaṃ sarve yataḥ piṃgatvamāgatāḥ //
ataḥ prabhṛti nāmāsyāstataḥ piṃgā bhaviṣyati

yetra snānaṃ kariṣyanti bhaktyā paramayā yutāḥ //
na teṣāmanvaye kaścidbhaviṣyati kurūpavān

darśanātpitṛmedhasya lapsyate mānavaḥ phalam //
snānena dviguṇaṃ puṇyaṃ tarpaṇena caturguṇam

asaṃkhyātaṃ phalaṃ tasya yo'tra śrāddhaṃ kariṣyati //
evamuktvā tataḥ sarva ṛṣayo varavarṇini

vyabhajaṃstannadītīraṃ sarve te munisattamāḥ //
yajñopavītamātrāṇi cakrustīrthāni sarvataḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye piṃgā nadīmāhātmyavarṇanaṃnāma ṣaṭcatvāriṃśaduttaradviśatatamo'dhyāyaḥ