Skanda Purana · Chapter 7.242

// īśvara uvāca // //
tato gacchenmahādevi yatra devīkumārikā //
tasyaiva pūrvadigbhāge sthitā rakṣārthameva hi

purā rathaṃtare kalpe rururnāma mahāsuraḥ //
utpannaḥ sa mahākāyaḥ sarvalokabhayāvahaḥ

tena devāḥ sagandharvāstrāsitāstridaśā layāt //
tasya bhītyā tataḥ sarve brahmalokamadhisthitāḥ

tathā bhūmitale viprānyajvano'tha tapasvinaḥ //
nijaghāna sa duṣṭātmā ye cānye dharmacāriṇaḥ

niḥsvādhyāyavaṣaṭkāraṃ tadā''sīddharaṇītalam//
naṣṭayajñotsavaṃ sarvaṃ rurorbhayanipīḍitam

tataḥ pravyathitā devāstathā sarve maharṣayaḥ //
sametyāmaṃtrayanmaṃtraṃ vadhārthaṃ tasya durmateḥ

tataḥ kāyodbhavaḥ svedaḥ sarveṣāṃ samajāyata //
teṣāṃ ciṃtayatāṃ devi nirodhājjagṛhuśca tam //

tatra kanyā samutpannā divyā kamalalocanā //
vyāpayaṃtī diśaḥ sarvāḥ sarveṣāṃ purataḥ sthitā

sarvāndevāṃstataḥ prāha kimarthaṃ nirmitāsmya ham //
tadvaḥ kāryaṃ kariṣyāmi śrutvā tasyāstadā giram

ācakhyuḥ saṃkaṭaṃ tasyāste devā ruruceṣṭitam //
śrutvā jahāsa sā devī devānāṃ kārya siddhaye

tasyā hasaṃtyā niścerurvarāṃgāḥ kanyakāḥ punaḥ //
pāśāṃkuśadharāḥ sarvāḥ pīnaśroṇipayodharāḥ

phetkārārāvamātreṇa trāsa yaṃtyaścarācaram //
anvagātsā rururyatra tābhiḥ sārddhaṃ yaśasvinī

athābhūttumulaṃ tāsāṃ yuddhaṃ ghoraṃ tu taiḥ saha //
śastrāstrairvividhairghoraiḥ śatrupakṣa kṣayaṃkaraiḥ

tābhistadanugāḥ sarve prahārairjarjarīkṛtāḥ//
parāṅmukhāḥ kṣaṇenaiva jātāḥ kecinnipātitāḥ

tato hataṃ balaṃ dṛṣṭvā rururmāyāmathā'sṛjat //
tāmasīṃnāma deveśi tayāmuhyata naiva sā

tamobhūte tatastatra devī daityaṃ tadā rurum //
śaktyā bibheda hṛdaye tato mūrchāṃ jagāma ha

muhūrttāllabdhasaṃjño'tha jñātvā tasyāḥ parākramam //
palāyanakṛtotsāhaḥ samudrābhimukho yayau

sā'pi devī jagāmātha pṛṣṭhato'sya durātmanaḥ //
stūyamānā suragaṇaiḥ kiṃnaraiḥ samahoragaiḥ

tataḥ praviśya jaladhiṃ taṃ dṛṣṭvā dānavaṃ ruṣā //
khaṅgāgreṇa śiraśchittvā carmamuṇḍadharā tataḥ

niścakrāma punastasmātprabhāsaṃ kṣetramāgatā //
kanyā sainyena saṃyuktā bahurūpeṇa bhāsvatā

devaiḥ suvismitairdṛṣṭā carmamuṇḍadharā varā //
tato devāḥ stutiṃ cakruḥ kṛtāṃjalipuṭāḥ sthitāḥ

// devā ūcuḥ // //
jaya tvaṃ devi cāmuṃḍe jaya bhūtāpahāriṇi //
jaya sarvagate devi kālarātri namo'stu te

bhīmarūpe śive vidye mahāmāye mahodaye //
mahābhāge jaye jṛmbhe bhīmākṣi bhīmadarśane

mahāmāye vicitrāṃgi geyanṛtyapriye śubhe //
vikarāli mahākāli kālike kālarūpiṇi

prāsahaste daṇḍahaste bhīmahaste bhayānane //
cāmuṇḍe jvalamānāsye tīkṣṇadaṃṣṭre mahābale //
śavayānasthite devi pretasaṃghaniṣevite

evaṃ stutā tadā devī sarvaiḥ śakrapurogamaiḥ //
prahṛṣṭavadanā bhūtvā vākyametaduvāca ha

varaṃ vṛṇudhvaṃ bhadraṃ vo nityaṃ yanmanasi sthitam //
ahaṃ dāsyāmi tatsarvaṃ yadyapi syātsudurllabham

// devā ūcuḥ // //
kṛtakṛtyāstvayā bhadre dānavasya niṣūdanāt

stotreṇānena yo devi tvāṃ vai stauti varānane //
tasya tvaṃ varadā devi bhava sarvagatā satī

yaścedaṃ śṛṇuyādbhaktyā tava devi samudbhavam //
sarvapāpavinirmuktaḥ sa prāpnotu parāṃ gatim

asminkṣetre tvayā devi sthitiḥ kāryā sadā śubhe

atra tvāṃ pūjayedyastu śuklapakṣe samāhitaḥ //
navamyāmāśvine māsi tasya kāryaṃ sadā śubham

//
// īśvara uvāca // //
evamuktā mahādevī tatraiva niratā'bhavat //
devāstriviṣṭapaṃ jagmuḥ prahṛṣṭā hataśatravaḥ

iti śrīskāṃde mahāpurāṇa ekāśīti sāhasryāṃ sahitāyāṃ saptame prabhāsakhaṃḍe prathame prabhāsakṣetramāhātmye kumārīmāhātmyavarṇanaṃnāma dvicatvāriṃśaduttaradviśatatamo'dhyāyaḥ