સ્કંદ પુરાણ · અધ્યાય 7.242

॥ ઈશ્વર ઉવાચ ॥ ॥
તતો ગચ્છેન્મહાદેવિ યત્ર દેવીકુમારિકા ॥
તસ્યૈવ પૂર્વદિગ્ભાગે સ્થિતા રક્ષાર્થમેવ હિ

પુરા રથંતરે કલ્પે રુરુર્નામ મહાસુરઃ ॥
ઉત્પન્નઃ સ મહાકાયઃ સર્વલોકભયાવહઃ

તેન દેવાઃ સગન્ધર્વાસ્ત્રાસિતાસ્ત્રિદશા લયાત્ ॥
તસ્ય ભીત્યા તતઃ સર્વે બ્રહ્મલોકમધિસ્થિતાઃ

તથા ભૂમિતલે વિપ્રાન્યજ્વનોઽથ તપસ્વિનઃ ॥
નિજઘાન સ દુષ્ટાત્મા યે ચાન્યે ધર્મચારિણઃ

નિઃસ્વાધ્યાયવષટ્કારં તદાઽઽસીદ્ધરણીતલમ્॥
નષ્ટયજ્ઞોત્સવં સર્વં રુરોર્ભયનિપીડિતમ્

તતઃ પ્રવ્યથિતા દેવાસ્તથા સર્વે મહર્ષયઃ ॥
સમેત્યામંત્રયન્મંત્રં વધાર્થં તસ્ય દુર્મતેઃ

તતઃ કાયોદ્ભવઃ સ્વેદઃ સર્વેષાં સમજાયત ॥
તેષાં ચિંતયતાં દેવિ નિરોધાજ્જગૃહુશ્ચ તમ્ ॥

તત્ર કન્યા સમુત્પન્ના દિવ્યા કમલલોચના ॥
વ્યાપયંતી દિશઃ સર્વાઃ સર્વેષાં પુરતઃ સ્થિતા

સર્વાન્દેવાંસ્તતઃ પ્રાહ કિમર્થં નિર્મિતાસ્મ્ય હમ્ ॥
તદ્વઃ કાર્યં કરિષ્યામિ શ્રુત્વા તસ્યાસ્તદા ગિરમ્

આચખ્યુઃ સંકટં તસ્યાસ્તે દેવા રુરુચેષ્ટિતમ્ ॥
શ્રુત્વા જહાસ સા દેવી દેવાનાં કાર્ય સિદ્ધયે

તસ્યા હસંત્યા નિશ્ચેરુર્વરાંગાઃ કન્યકાઃ પુનઃ ॥
પાશાંકુશધરાઃ સર્વાઃ પીનશ્રોણિપયોધરાઃ

ફેત્કારારાવમાત્રેણ ત્રાસ યંત્યશ્ચરાચરમ્ ॥
અન્વગાત્સા રુરુર્યત્ર તાભિઃ સાર્દ્ધં યશસ્વિની

અથાભૂત્તુમુલં તાસાં યુદ્ધં ઘોરં તુ તૈઃ સહ ॥
શસ્ત્રાસ્ત્રૈર્વિવિધૈર્ઘોરૈઃ શત્રુપક્ષ ક્ષયંકરૈઃ

તાભિસ્તદનુગાઃ સર્વે પ્રહારૈર્જર્જરીકૃતાઃ॥
પરાઙ્મુખાઃ ક્ષણેનૈવ જાતાઃ કેચિન્નિપાતિતાઃ

તતો હતં બલં દૃષ્ટ્વા રુરુર્માયામથાઽસૃજત્ ॥
તામસીંનામ દેવેશિ તયામુહ્યત નૈવ સા

તમોભૂતે તતસ્તત્ર દેવી દૈત્યં તદા રુરુમ્ ॥
શક્ત્યા બિભેદ હૃદયે તતો મૂર્છાં જગામ હ

મુહૂર્ત્તાલ્લબ્ધસંજ્ઞોઽથ જ્ઞાત્વા તસ્યાઃ પરાક્રમમ્ ॥
પલાયનકૃતોત્સાહઃ સમુદ્રાભિમુખો યયૌ

સાઽપિ દેવી જગામાથ પૃષ્ઠતોઽસ્ય દુરાત્મનઃ ॥
સ્તૂયમાના સુરગણૈઃ કિંનરૈઃ સમહોરગૈઃ

તતઃ પ્રવિશ્ય જલધિં તં દૃષ્ટ્વા દાનવં રુષા ॥
ખઙ્ગાગ્રેણ શિરશ્છિત્ત્વા ચર્મમુણ્ડધરા તતઃ

નિશ્ચક્રામ પુનસ્તસ્માત્પ્રભાસં ક્ષેત્રમાગતા ॥
કન્યા સૈન્યેન સંયુક્તા બહુરૂપેણ ભાસ્વતા

દેવૈઃ સુવિસ્મિતૈર્દૃષ્ટા ચર્મમુણ્ડધરા વરા ॥
તતો દેવાઃ સ્તુતિં ચક્રુઃ કૃતાંજલિપુટાઃ સ્થિતાઃ

॥ દેવા ઊચુઃ ॥ ॥
જય ત્વં દેવિ ચામુંડે જય ભૂતાપહારિણિ ॥
જય સર્વગતે દેવિ કાલરાત્રિ નમોઽસ્તુ તે

ભીમરૂપે શિવે વિદ્યે મહામાયે મહોદયે ॥
મહાભાગે જયે જૃમ્ભે ભીમાક્ષિ ભીમદર્શને

મહામાયે વિચિત્રાંગિ ગેયનૃત્યપ્રિયે શુભે ॥
વિકરાલિ મહાકાલિ કાલિકે કાલરૂપિણિ

પ્રાસહસ્તે દણ્ડહસ્તે ભીમહસ્તે ભયાનને ॥
ચામુણ્ડે જ્વલમાનાસ્યે તીક્ષ્ણદંષ્ટ્રે મહાબલે ॥
શવયાનસ્થિતે દેવિ પ્રેતસંઘનિષેવિતે

એવં સ્તુતા તદા દેવી સર્વૈઃ શક્રપુરોગમૈઃ ॥
પ્રહૃષ્ટવદના ભૂત્વા વાક્યમેતદુવાચ હ

વરં વૃણુધ્વં ભદ્રં વો નિત્યં યન્મનસિ સ્થિતમ્ ॥
અહં દાસ્યામિ તત્સર્વં યદ્યપિ સ્યાત્સુદુર્લ્લભમ્

॥ દેવા ઊચુઃ ॥ ॥
કૃતકૃત્યાસ્ત્વયા ભદ્રે દાનવસ્ય નિષૂદનાત્

સ્તોત્રેણાનેન યો દેવિ ત્વાં વૈ સ્તૌતિ વરાનને ॥
તસ્ય ત્વં વરદા દેવિ ભવ સર્વગતા સતી

યશ્ચેદં શૃણુયાદ્ભક્ત્યા તવ દેવિ સમુદ્ભવમ્ ॥
સર્વપાપવિનિર્મુક્તઃ સ પ્રાપ્નોતુ પરાં ગતિમ્

અસ્મિન્ક્ષેત્રે ત્વયા દેવિ સ્થિતિઃ કાર્યા સદા શુભે

અત્ર ત્વાં પૂજયેદ્યસ્તુ શુક્લપક્ષે સમાહિતઃ ॥
નવમ્યામાશ્વિને માસિ તસ્ય કાર્યં સદા શુભમ્

॥
॥ ઈશ્વર ઉવાચ ॥ ॥
એવમુક્તા મહાદેવી તત્રૈવ નિરતાઽભવત્ ॥
દેવાસ્ત્રિવિષ્ટપં જગ્મુઃ પ્રહૃષ્ટા હતશત્રવઃ

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્યે કુમારીમાહાત્મ્યવર્ણનંનામ દ્વિચત્વારિંશદુત્તરદ્વિશતતમોઽધ્યાયઃ