સ્કંદ પુરાણ · અધ્યાય 7.234

॥ ઈશ્વર ઉવાચ ॥ ॥
તતો ગચ્છેન્મહાદેવિ તીર્થં ત્રૈલોક્યવિશ્રુતમ્ ॥
દશાશ્વમેધિકંનામ મહાપાતકનાશનમ્

વાજિમેધઃ પુરા ચેષ્ટં દશભિસ્તત્ર ભામિનિ ॥
ભરતેન સમાગત્ય મત્વા ક્ષેત્રમનુત્તમમ્

તત્ર તૃપ્તઃ સહસ્રાક્ષઃ સોમનાથેન ભામિનિ ॥
કૃપણાઃ ખાનપાનૈશ્ચ દક્ષિણાભિર્દ્વિજાતયઃ

અથોચુસ્ત્રિદશાઃ સર્વે સુપ્રીતા ભરતં નૃપમ્ ॥
તુષ્ટાસ્તવ મહાબાહો યજ્ઞૈઃ સંતર્પિતા વયમ્ ॥
વરં વૃણીષ્વ રાજેંદ્ર યત્તે મનસિ વર્ત્તતે ॥ ૪. ॥
॥ રાજોવાચ ॥ ॥
અત્રાગત્ય નરો ભક્ત્યા યઃ સ્નાનં કુરુતે નરઃ ॥
દશાનામશ્વમેધાનાં સ પ્રાપ્નોતુ ફલં શુભમ્ ॥. ૫ ॥
॥ દેવા ઊચુઃ ॥ ॥
દશાનામશ્વમેધાનાં શ્રદ્ધયા ફલમાપ્સ્યતિ ॥
દશાશ્વમેધિકંનામ તીર્થમેતન્મહીતલે ॥
ખ્યાતિં યાસ્યતિ રાજેંદ્ર નાત્ર કાર્યા વિચારણા

॥ ઈશ્વર ઉવાચ ॥ ॥
તતઃ પ્રભૃતિ તત્તીર્થં પ્રખ્યાતં ધરણીતલે ॥
દશાશ્વમેધિકમિતિ સર્વપાપપ્રણાશનમ્

ઐંદ્રવારુણમાશ્રિત્ય ગોમુખાદાઽઽશ્વમેધિકમ્ ॥
અત્રાંતરે મહાદેવિ શિવક્ષેત્રં વિદુર્બુધાઃ

સર્વપાપહરં દિવ્યં સ્વર્ગસોપાનસંનિભમ્ ॥
સપાદકોટિતીર્થાનાં સ્થાનં તત્પરિકીર્તિતમ

પ્રાણત્યાગે કૃતે તત્ર શિવલોકે ચ મોદતે ॥
તિર્યગ્યોનિગતાઃ પાપા કીટપક્ષિમૃગાદયઃ

તેઽપિ યાંતિ પરં સ્થાનં યત્ર દેવો મહેશ્વરઃ ॥
તિલોદકપ્રદાનેન માતૃકાઃ પૈતૃકાસ્તથા

પિતરસ્તસ્ય તૃપ્યંતિ યાવદાભૂતસંપ્લવમ્ ॥
તત્રેષ્ટા બ્રહ્મણા પૂર્વમસંખ્યાતા મખોત્તમાઃ

શક્રશ્ચ દેવરાજત્વે તત્રેષ્ટ્વા સમવાપ્તવાન્ ॥
કાર્ત્તવીર્યેણ તત્રૈવ કૃતં યજ્ઞશતં પુરા

એવં તત્પ્રવરં સ્થાનં ક્ષેત્રગર્ભાંતિકં પ્રિયે ॥
મૃતાનાં તત્ર જંતૂનામપુનર્ભવદાયકમ્

વૃષોત્સર્ગં તુ યસ્તત્ર કુર્યાદ્વૈ ભાવિતાત્મવાન્ ॥
યાવંતિ વૃષરોમાણિ તાવત્સ્વર્ગે મહીયતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્ર માહાત્મ્યે દશાશ્વમેધમાહત્મ્યવર્ણનંનામ ચતુસ્ત્રિંશદુત્તરદ્વિશતતમોઽધ્યાયઃ