Skanda Purana · Chapter 7.232

// īśvara uvāca // //
tato gacchenmahādevi kūpaṃ trailokyapūjitam //
paścime tasya tīrthasya pāṃḍavānāṃ mahātmanām

yadā'raṇyamanuprāptāḥ pāṃḍavāḥ pṛthivītale //
bhramamāṇā mahādevi prabhāsaṃ kṣetramāgatāḥ

tataste nyavasaṃstatra kiṃcitkālaṃ samāhitāḥ //
gatvā kṣetraṃ mahāpuṇyaṃ tataḥ kṛṣṇā'bravīdidam

brāhmaṇānāṃ sahasrāṇi bhuṃjate bhavatāṃ gṛhe //
dūre jalāśrayaścaiva na tāvaṃtaśca kiṃkarāḥ

tasmājjalāśrayaḥ kāryaṃ āśramasya samīpataḥ //
yatra snānaṃ kariṣyāmi yuṣmākaṃ saṃprasādataḥ

tatastu pāṃḍavāḥ sarve sahitāste varānane //
akhanaṃstatra te kūpaṃ draupadīvākyapreritāḥ

athājagāma tatraiva bhagavāndevakīsutaḥ //
śrutvā samāgatānpārthāndvārāvatyāḥ sabāṃdhavaḥ

pradyumnena ca sāṃbena gadena niṣadhena ca //
yuyudhānena rāmeṇa cārudeṣṇena dhīmatā

anyaiḥ parivṛtaḥ śūrairyādavairyuddha durmadaiḥ //
te sametya yathānyāyaṃ samastā yadupuṃgavāḥ

tataḥ kathāvasāne ca kasmiṃścitkāraṇāṃtare //
vāsudevaḥ pāṃḍusutamidaṃ vacanamabravīt //

yudhiṣṭhira mahābāho kiṃ te kāmakaromyaham //
rājyaṃ dhānyaṃ dhanaṃ cāpi athavā ripunāśanam

// yudhiṣṭhira uvāca // //
śaktastvaṃ yādavaśreṣṭha sarvakarmasvasaṃśayaḥ //
pratijñātaṃ tvayā pūrvaṃ varṣairdvādaśabhiḥ priyam

tannāsti triṣu lokeṣu yanna siddhyati bhūtale //
tvayi tuṣṭe jagannātha sarvadevanamaskṛte

avaśyaṃ yadi tuṣṭo'si mama sarvajagatpate //
atra sāṃnidhyamāgaccha kūpe nityaṃ janārdana

atrāgatya naro yastu bhaktyā snānaṃ samācaret //
sa yātu vaiṣṇavaṃ sthānaṃ prasādāttava keśava

// īśvara uvāca // //
evaṃ bhaviṣyatītyuktvā tadā'mantrya yudhiṣṭhiram //
prayayau dvārakāṃ kṛṣṇaḥ sarvalokanamaskṛtaḥ

tasmiñchrāddhaṃ naraḥ kṛtvā vājimedhaphalaṃ labhet //
prasādāddevadevasya viṣṇoramitatejasaḥ

tadardhaṃ tarpaṇenaiva snānātpādamavāpnuyāt //
tasmātsarvaprayatnena tatra śrāddhaṃ samācaret

jyeṣṭhasya paurṇamāsyāṃ yaḥ snānaṃ śrāddhaṃ kariṣyati //
sāvitrīṃ caiva saṃpūjya sa yāsyati paramaṃ padam

godānaṃ tatra deyaṃ tu samyagyātrāphalepsubhiḥ

iti śrīskāṃde mahā purāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye pāṃḍavakūpamāhātmyavarṇanaṃnāma dvātriṃśaduttaradviśatatamo'dhyāyaḥ //