સ્કંદ પુરાણ · અધ્યાય 7.232

॥ ઈશ્વર ઉવાચ ॥ ॥
તતો ગચ્છેન્મહાદેવિ કૂપં ત્રૈલોક્યપૂજિતમ્ ॥
પશ્ચિમે તસ્ય તીર્થસ્ય પાંડવાનાં મહાત્મનામ્

યદાઽરણ્યમનુપ્રાપ્તાઃ પાંડવાઃ પૃથિવીતલે ॥
ભ્રમમાણા મહાદેવિ પ્રભાસં ક્ષેત્રમાગતાઃ

તતસ્તે ન્યવસંસ્તત્ર કિંચિત્કાલં સમાહિતાઃ ॥
ગત્વા ક્ષેત્રં મહાપુણ્યં તતઃ કૃષ્ણાઽબ્રવીદિદમ્

બ્રાહ્મણાનાં સહસ્રાણિ ભુંજતે ભવતાં ગૃહે ॥
દૂરે જલાશ્રયશ્ચૈવ ન તાવંતશ્ચ કિંકરાઃ

તસ્માજ્જલાશ્રયઃ કાર્યં આશ્રમસ્ય સમીપતઃ ॥
યત્ર સ્નાનં કરિષ્યામિ યુષ્માકં સંપ્રસાદતઃ

તતસ્તુ પાંડવાઃ સર્વે સહિતાસ્તે વરાનને ॥
અખનંસ્તત્ર તે કૂપં દ્રૌપદીવાક્યપ્રેરિતાઃ

અથાજગામ તત્રૈવ ભગવાન્દેવકીસુતઃ ॥
શ્રુત્વા સમાગતાન્પાર્થાન્દ્વારાવત્યાઃ સબાંધવઃ

પ્રદ્યુમ્નેન ચ સાંબેન ગદેન નિષધેન ચ ॥
યુયુધાનેન રામેણ ચારુદેષ્ણેન ધીમતા

અન્યૈઃ પરિવૃતઃ શૂરૈર્યાદવૈર્યુદ્ધ દુર્મદૈઃ ॥
તે સમેત્ય યથાન્યાયં સમસ્તા યદુપુંગવાઃ

તતઃ કથાવસાને ચ કસ્મિંશ્ચિત્કારણાંતરે ॥
વાસુદેવઃ પાંડુસુતમિદં વચનમબ્રવીત્ ॥

યુધિષ્ઠિર મહાબાહો કિં તે કામકરોમ્યહમ્ ॥
રાજ્યં ધાન્યં ધનં ચાપિ અથવા રિપુનાશનમ્

॥ યુધિષ્ઠિર ઉવાચ ॥ ॥
શક્તસ્ત્વં યાદવશ્રેષ્ઠ સર્વકર્મસ્વસંશયઃ ॥
પ્રતિજ્ઞાતં ત્વયા પૂર્વં વર્ષૈર્દ્વાદશભિઃ પ્રિયમ્

તન્નાસ્તિ ત્રિષુ લોકેષુ યન્ન સિદ્ધ્યતિ ભૂતલે ॥
ત્વયિ તુષ્ટે જગન્નાથ સર્વદેવનમસ્કૃતે

અવશ્યં યદિ તુષ્ટોઽસિ મમ સર્વજગત્પતે ॥
અત્ર સાંનિધ્યમાગચ્છ કૂપે નિત્યં જનાર્દન

અત્રાગત્ય નરો યસ્તુ ભક્ત્યા સ્નાનં સમાચરેત્ ॥
સ યાતુ વૈષ્ણવં સ્થાનં પ્રસાદાત્તવ કેશવ

॥ ઈશ્વર ઉવાચ ॥ ॥
એવં ભવિષ્યતીત્યુક્ત્વા તદાઽમન્ત્ર્ય યુધિષ્ઠિરમ્ ॥
પ્રયયૌ દ્વારકાં કૃષ્ણઃ સર્વલોકનમસ્કૃતઃ

તસ્મિઞ્છ્રાદ્ધં નરઃ કૃત્વા વાજિમેધફલં લભેત્ ॥
પ્રસાદાદ્દેવદેવસ્ય વિષ્ણોરમિતતેજસઃ

તદર્ધં તર્પણેનૈવ સ્નાનાત્પાદમવાપ્નુયાત્ ॥
તસ્માત્સર્વપ્રયત્નેન તત્ર શ્રાદ્ધં સમાચરેત્

જ્યેષ્ઠસ્ય પૌર્ણમાસ્યાં યઃ સ્નાનં શ્રાદ્ધં કરિષ્યતિ ॥
સાવિત્રીં ચૈવ સંપૂજ્ય સ યાસ્યતિ પરમં પદમ્

ગોદાનં તત્ર દેયં તુ સમ્યગ્યાત્રાફલેપ્સુભિઃ

ઇતિ શ્રીસ્કાંદે મહા પુરાણ એકાશીતિસાહસ્ર્યાં સહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે પાંડવકૂપમાહાત્મ્યવર્ણનંનામ દ્વાત્રિંશદુત્તરદ્વિશતતમોઽધ્યાયઃ ॥