Skanda Purana · Chapter 7.198

// īśvara uvāca // //
tato gacchenmahādevi mahāprabhāsamuttamam //
jalaprabhāsato yāmye yamamārgavighātakam

śṛṇu tasyaiva māhātmyaṃ yathā jātaṃ dharātale //

pūrvaṃ tretāyuge devi sparśaliṃgaṃ tu tatsmṛtam //
divyaṃ tejomayaṃ nṛṇāṃ sparśanānmuktidāyakam

atha kāle ca kasmiṃścidvajriṇācchāditaṃ priye //
indreṇāgatya vasudhāṃ bhayākrāṃtena sundari

uṣmā tadudbhavo devi nirgacchannavarodhitaḥ //
daśakoṭipravistīrṇaṃ jvālāgraṃ liṃgarūpadhṛk

prabhāsakṣetramāsthāya bhittvā''virbhāvamāsthitam //
vajreṇa ruṃdhite devi bhittvā caiva vasuṃdharām

dhūmasaṃghaiḥ sametaṃ tu vyāpayāmāsa tajjagat //
tatastrailokyamakhilaṃ jvālābhirvyākulīkṛtam

tataḥ suragaṇāḥ sarva ṛṣayo vedapāragāḥ //
astuvanvividhaiḥ sūktairvedoktaiḥ śaśiśekharam

saṃharasva suraśreṣṭha tejaḥ svadahanātmakam // trai
lokyaṃ vyākulībhūtamevaṃ sarvaṃ carācaram //
na yāvatpralayaṃ yāti tāvadrakṣa sureśvara

// īśvara uvāca // //
evamābhāṣamāṇeṣu tridiveṣu sureśvari //
tattejaḥ pañcadhāviṣṭaṃ vyāpyāśeṣaṃ jagattrayam //

pañcaprabhāsarūpeṇa bhittvā tatra vasundharām//
yena mārgeṇa niṣkrāntaṃ tanmārge ca mahanmahaḥ

tatra taiḥ sthāpitaṃ dvāraṃ supradeśe'śmajaṃ priye //
pihite'tha ca raṃdhre'smindhūmo nāśamupeyivān

svasthāścaivābhavam̐llokāstejastatraiva saṃsthitam //
evaṃ mayā preritāste liṃgaṃ tatra samādadhuḥ

tanmahastatra deveśi viśrāmamakarottadā //
tato mahāprabhāseti kīrtyate devadānavaiḥ

yastaṃ pūjayate bhaktyā liṃgaṃ puṣpaiḥ pṛthagvidhaiḥ //
sa yāti paramaṃ sthānaṃ jarāmaraṇavarjitam

dṛṣṭena tena deveśi mucyate pātakairnaraḥ //
labhate vāñchitānkāmānmanasā cepsitānpriye

hiraṇyaṃ tatra dātavyaṃ brāhmaṇe śaṃsitavrate //
godānaṃ vidhivattatra deyaṃ caiva dvijanmane

evaṃ kṛtvā mahādevi labhate janmanaḥ phalam //
rājasūyāśvamedhānāṃ prāpnuyātphalamūrjitam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye pañcamaprabhāsakṣetramāhātmyavarṇanaṃnāmāṣṭānavatyuttaraśatatamo'dhyāyaḥ