સ્કંદ પુરાણ · અધ્યાય 7.198

॥ ઈશ્વર ઉવાચ ॥ ॥
તતો ગચ્છેન્મહાદેવિ મહાપ્રભાસમુત્તમમ્ ॥
જલપ્રભાસતો યામ્યે યમમાર્ગવિઘાતકમ્

શૃણુ તસ્યૈવ માહાત્મ્યં યથા જાતં ધરાતલે ॥

પૂર્વં ત્રેતાયુગે દેવિ સ્પર્શલિંગં તુ તત્સ્મૃતમ્ ॥
દિવ્યં તેજોમયં નૃણાં સ્પર્શનાન્મુક્તિદાયકમ્

અથ કાલે ચ કસ્મિંશ્ચિદ્વજ્રિણાચ્છાદિતં પ્રિયે ॥
ઇન્દ્રેણાગત્ય વસુધાં ભયાક્રાંતેન સુન્દરિ

ઉષ્મા તદુદ્ભવો દેવિ નિર્ગચ્છન્નવરોધિતઃ ॥
દશકોટિપ્રવિસ્તીર્ણં જ્વાલાગ્રં લિંગરૂપધૃક્

પ્રભાસક્ષેત્રમાસ્થાય ભિત્ત્વાઽઽવિર્ભાવમાસ્થિતમ્ ॥
વજ્રેણ રુંધિતે દેવિ ભિત્ત્વા ચૈવ વસુંધરામ્

ધૂમસંઘૈઃ સમેતં તુ વ્યાપયામાસ તજ્જગત્ ॥
તતસ્ત્રૈલોક્યમખિલં જ્વાલાભિર્વ્યાકુલીકૃતમ્

તતઃ સુરગણાઃ સર્વ ઋષયો વેદપારગાઃ ॥
અસ્તુવન્વિવિધૈઃ સૂક્તૈર્વેદોક્તૈઃ શશિશેખરમ્

સંહરસ્વ સુરશ્રેષ્ઠ તેજઃ સ્વદહનાત્મકમ્ ॥ ત્રૈ
લોક્યં વ્યાકુલીભૂતમેવં સર્વં ચરાચરમ્ ॥
ન યાવત્પ્રલયં યાતિ તાવદ્રક્ષ સુરેશ્વર

॥ ઈશ્વર ઉવાચ ॥ ॥
એવમાભાષમાણેષુ ત્રિદિવેષુ સુરેશ્વરિ ॥
તત્તેજઃ પઞ્ચધાવિષ્ટં વ્યાપ્યાશેષં જગત્ત્રયમ્ ॥

પઞ્ચપ્રભાસરૂપેણ ભિત્ત્વા તત્ર વસુન્ધરામ્॥
યેન માર્ગેણ નિષ્ક્રાન્તં તન્માર્ગે ચ મહન્મહઃ

તત્ર તૈઃ સ્થાપિતં દ્વારં સુપ્રદેશેઽશ્મજં પ્રિયે ॥
પિહિતેઽથ ચ રંધ્રેઽસ્મિન્ધૂમો નાશમુપેયિવાન્

સ્વસ્થાશ્ચૈવાભવઁલ્લોકાસ્તેજસ્તત્રૈવ સંસ્થિતમ્ ॥
એવં મયા પ્રેરિતાસ્તે લિંગં તત્ર સમાદધુઃ

તન્મહસ્તત્ર દેવેશિ વિશ્રામમકરોત્તદા ॥
તતો મહાપ્રભાસેતિ કીર્ત્યતે દેવદાનવૈઃ

યસ્તં પૂજયતે ભક્ત્યા લિંગં પુષ્પૈઃ પૃથગ્વિધૈઃ ॥
સ યાતિ પરમં સ્થાનં જરામરણવર્જિતમ્

દૃષ્ટેન તેન દેવેશિ મુચ્યતે પાતકૈર્નરઃ ॥
લભતે વાઞ્છિતાન્કામાન્મનસા ચેપ્સિતાન્પ્રિયે

હિરણ્યં તત્ર દાતવ્યં બ્રાહ્મણે શંસિતવ્રતે ॥
ગોદાનં વિધિવત્તત્ર દેયં ચૈવ દ્વિજન્મને

એવં કૃત્વા મહાદેવિ લભતે જન્મનઃ ફલમ્ ॥
રાજસૂયાશ્વમેધાનાં પ્રાપ્નુયાત્ફલમૂર્જિતમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્યે પઞ્ચમપ્રભાસક્ષેત્રમાહાત્મ્યવર્ણનંનામાષ્ટાનવત્યુત્તરશતતમોઽધ્યાયઃ