સ્કંદ પુરાણ · અધ્યાય 7.195

॥ ઈશ્વર ઉવાચ ॥ ॥
તતો વૃદ્ધપ્રભાસં તુ ગચ્છેચ્ચ નિયતાત્મવાન્ ॥
આદિપ્રભાસાદ્દક્ષિણતો નાતિદૂરે વ્યવસ્થિતમ્

ચતુર્મુખં મહાલિંગં દર્શનાત્પાપનાશનમ્

॥ શ્રીદેવ્યુવાચ ॥ ॥
કથં વૃદ્ધપ્રભાસં તુ નામ તસ્યાભવત્પ્રભો ॥
તસ્મિન્દૃષ્ટે ફલં કિં સ્યાત્સ્તુતે સંપૂજિતે તથા

એતત્કથય મે દેવ સંક્ષેપાન્નાતિવિસ્તરાત્

॥ ઈશ્વર ઉવાચ ॥ ॥
આદૌ સ્વાયંભુવે દેવિ પૂર્વમન્વન્તરે પુરા ॥
ત્રેતાયુગે ચતુર્થે તુ પ્રભાસે ક્ષેત્ર ઉત્તમે

તસ્મિન્કાલે મહાદેવિ પૂર્વમન્વંતરે પુરા ॥
ત્રેતાયુગે ચતુર્થે તુ ઋષયસ્તત્ર સંગતાઃ

દર્શનાર્થં પ્રભાસસ્ય ઉત્તરાપથગામિનઃ ॥
તં દૃષ્ટ્વાઽઽચ્છાદિતં દેવં વજ્રેણ તુ મહેશ્વરિ

વિષાદં પરમં જગ્મુર્વાક્યં ચેદમથાબુવન્ ॥
અદૃષ્ટ્વા શાંકરં લિગં ન યાસ્યામો વયં ગૃહમ્

સ્વર્ગાર્થિનો વયં પ્રાપ્તા મહદધ્વાનમેવ હિ ॥
તસ્માદત્રૈવ તિષ્ઠામો યાવલ્લિંગસ્ય દર્શનમ્

એવં તે નિશ્ચયં કૃત્વા પરસ્મિંસ્તપસિ સ્થિતાઃ ॥
વર્ષાસ્વાકાશગા ભૂત્વા હેમંતે સલિલાશ્રયાઃ

પઞ્ચાગ્નિસાધના ગ્રીષ્મે નિયતા બ્રહ્મચારિણઃ ॥
બહૂન્વર્ષગણાન્વિપ્રા જરાગ્રસ્તાસ્તદાઽભવન્

એવં વૃદ્ધત્વમાપન્ના યદા તે વરવર્ણિનિ ॥
છન્દ્યમાના વરૈસ્તે તુ શંકરેણ મહાત્મના

લિંગસ્ય દર્શનં મુક્ત્વા ન તેઽન્યં વવ્રિરે વરમ્

તેષાં તુ નિશ્ચયં જ્ઞાત્વા સર્વેષાં વૃષભધ્વજઃ ॥
અનુકમ્પાપરો ભૂત્વા સ્વલિંગં તાનદર્શયત્

એતસ્મિન્નેવ કાલે તુ ભિત્ત્વા ચૈવ વસુન્ધરામ્ ॥
ઉત્થિતં સહસા લિંગં તદેવ વરવર્ણિનિ

ઋષયસ્તે ચ તં દૃષ્ટ્વા સર્વે ચ ત્રિદિવં ગતાઃ ॥
અથ તેષુ પ્રયાતેષુ શક્રસ્તપ્તમના હ્યભૂત્

તમપિ ચ્છાદયામાસ વજ્રેણ શતપર્વણા

વૃદ્ધભાવે યતસ્તેષામૃષીણાં દર્શનં ગતઃ ॥
અતો વૃદ્ધપ્રભાસં તત્કીર્ત્યતે વસુધાતલે

!
તસ્મિન્દૃષ્ટે વરારોહે અદ્યાપિ લભતે ફલમ્ ॥
રાજસૂયાશ્વમેધાનાં નરો ભક્તિસમન્વિતઃ

એવં તત્ર સમુત્પન્નં પ્રભાસં વૃદ્ધસંજ્ઞકમ્ ॥
તત્રોક્ષા બ્રાહ્મણે દેયઃ સમ્યગ્યાત્રાફલેપ્સુભિઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે વૃદ્ધપ્રભાસમાહાત્મ્યવર્ણનંનામ પઞ્ચનવત્યુત્તરશતતમોઽધ્યાયઃ