Skanda Purana · Chapter 7.183

// īśvara uvāca // //
tato gacchenmahādevi miśratīrthamanuttamam //
trisaṃgameti vikhyātaṃ sauraṃ tīrthamanuttamam

sarasvatī hiraṇyā ca samudraścaiva bhāmini //
trayāṇāṃ saṃgamo yatra duṣprāpyo daivatairapi

sarveṣāṃ tatra tīrthānāṃ pradhānaṃ tīrthamuttamam //
sūryaparvaṇi saṃprāpte kurukṣetrādviśiṣyate

snānaṃ dānaṃ japastatra sarvaṃ koṭiguṇaṃ bhavet

maṃkīśvarānmahādevi yāvalliṃgaṃ kṛtasmaram //
etasminnantare devi tīrthānāṃ daśakoṭayaḥ

kṛmikīṭapataṃgāśca śvapacā vā narādhamāḥ //
so'pi svargamavāpnoti kiṃ punarbhāvitātmavān

tatra pītāni vastrāṇi kāñcanaṃ surabhistathā //
brāhmaṇāya pradātavyā samyagyātrāphalepsubhiḥ

kṛṣṇapakṣe caturdaśyāṃ snātvā yastarpayetpitṝn //
tarpitāḥ pitarastena yāvaccandrārkatārakam

etattrisaṃgamaṃ devi mahāpātakanāśanam //
durlabhaṃ triṣu lokeṣu vaiśākhyāṃ tu viśeṣataḥ

vṛṣo tsargo viśeṣeṇa tatra kāryo narottamaiḥ //
sarvapāpavināśāya pitṝṇāṃ prītaye priye

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye trisaṃgamamāhātmyavarṇanaṃnāma tryaśītyuttaraśatatamo'dhyāyaḥ