સ્કંદ પુરાણ · અધ્યાય 7.154

॥ ઈશ્વર ઉવાચ ॥ ॥
તતો ગચ્છેન્મહાદેવિ લિંગં પાપવિમોચનમ્ ॥
હિરણ્યેશ્વરવાયવ્યે ધનુષાં ત્રિતયે સ્થિતમ્

પાપઘ્નં સર્વજંતૂનાં દર્શનાત્સ્પર્શનાદપિ ॥
આદ્યં લિંગં મહાદેવિ ગાયત્ર્યા સંપ્રતિષ્ઠિતમ્

તલ્લિંગં સમનુપ્રાપ્ય ગાયત્રીં જપતે તુ યઃ ॥
બ્રાહ્મણસ્તુ શુચિર્ભૂત્વા મુચ્યતે દુષ્પ્રતિગ્રહાત્

જ્યેષ્ઠસ્ય પૂર્ણિમાયાં તુ દંપતી યસ્તુ ભોજયેત્ ॥
પરિધાપ્ય યથાશક્ત્યા દૌર્ભાગ્યૈર્મુચ્યતે નરઃ

ગંધપુષ્પોપહારૈશ્ચ પૌર્ણમાસ્યાં તુ યોઽર્ચયેત્ ॥
બ્રાહ્મણ્યં જાયતે તસ્ય સપ્ત જન્માનિ સુંદરિ

ઇત્યેવં કથિતં દેવિ માહાત્મ્યં પાપનાશનમ્ ॥
બ્રહ્મકુણ્ડપ્રસાદેન સારાત્સારતરં પ્રિયે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે બ્રહ્મકુણ્ડમાહાત્મ્યે ગાયત્રીશ્વરમાહાત્મ્યવર્ણનંનામ ચતુઃપઞ્ચાશદુત્તરશતતમોઽધ્યાયઃ