Skanda Purana · Chapter 7.123

// īśvara uvāca // //
tato gacchenmahādevi rāvaṇeśvaramuttamam //
tasmāddakṣiṇanairṛtye dhanuṣāṃ ṣoḍaśe sthitam

pratiṣṭhitaṃ daśāsyena sarvapātakanāśanam //
paulastyo rāvaṇo devi rākṣasastu sudāruṇaḥ

trailokyavijayākāṅkṣī puṣpakeṇa cacāra ha //
kasyacittvatha kālasya vimānaṃ tasya puṣpakam

/
vrajadvai vyomamārgeṇa niścalaṃ sahasā'bhavat //
staṃbhitaṃ puṣpakaṃ dṛṣṭvā rāvaṇo vismayānvitaḥ

prahastaṃ preṣayāmāsa kimidaṃ vraja medinīm //
ahatā'sya gatiryasmāttrailokye sacarācare

tatkasmānniścalaṃ jātaṃ vimānaṃ puṣpakaṃ mama //
athā'sau satvaro devi jagāma vasudhātale

apaśyaddevadeveśaṃ śrīsomeśaṃ mahāprabham //
stūyamānaṃ suragaṇaiḥ śataśo'tha sahasraśaḥ

taṃ dṛṣṭvā rākṣase ndrāya tatsarvaṃ vistarātpriye //
prahastaḥ kathayāmāsa yaddṛṣṭaṃ kṣetramadhyataḥ

// prahasta uvāca // //
rākṣaseśa mahābāho śivakṣetraṃ nijaṃ prabho //
prabhāseti samākhyātaṃ gaṇagandharvasevitam

tatra someśvaro devaḥ svayaṃ tiṣṭhati śaṅkaraḥ //
abbhakṣairvāyubhakṣaiśca daṃtolūkhalibhistathā //
ṛṣibhirvālakhilyaiśca pūjyamānaḥ samaṃtataḥ

prabhāvāttasya devasya nedaṃ gacchati puṣpakam //
na sa prālaṃghyate devo hyalaṃghyo yaḥ surāsuraiḥ

// īśvara uvāca // //
tasya tadvacanaṃ śrutvā vismayotphullalocanaḥ //
avatīrya dharāpṛṣṭhaṃ someśaṃ samapaśyata

pūjayāmāsa deveśi bhaktyā paramayā yutaḥ //
ratnairbahuvidhairvastrairgandhapuṣpānulepanaiḥ

atha paurajanā dṛṣṭvā rāvaṇaṃ rākṣaseśvaram //
sarvadikṣu varārohe bhayādbhītāḥ pradudruvuḥ

śūnyaṃ samabhavatsarvaṃ tatra devo vyavasthitaḥ //
etasminneva kāle tu vāguvācāśarīriṇī

daśagrīva mahābāho ayane cottare tathā //
yātrākāle tu devasya sarvapāpapraṇāśane

dūrataḥ samanuprāptā bhūrilokā dvijātayaḥ //
rākṣasānāṃ bhayādbhītāḥ prayāṃti hi diśo daśa

bhayānmā tvaṃ rākṣasendra yātrāvighnakaro bhava //
bālye vayasi yatpāpaṃ vārddhakye yauvane'pi ca //
tatsarvaṃ kṣālayenmartyo dṛṣṭvā someśvaraṃ prabhum

tato'sau rākṣasendrastu gatvaikānte sugahvare //
liṃgaṃ ca sthāpayāmāsa bhaktyā paramayā yutaḥ

tatastannirato bhūtvā sarvaistai rākṣaseśvaraḥ //
pūjayāmāsa deveśi upavāsaparāyaṇaḥ

cakāra puratastasya gītavādyena jāgaram //
tato'rdharātrasamaye vāguvācāśarīriṇī

daśagrīva mahābāho parituṣṭo'smi te'nagha //
mama prasādāttrailokyaṃ vaśagaṃ te bhaviṣyati //
atra saṃnihito nityaṃ sthāsyāmyahamasaṃśayam //

ye caitatpūjayiṣyaṃti liṃgaṃ bhaktiyutā narāḥ //
ajeyāste bhaviṣyaṃti śatrūṇāṃ rākṣaseśvara

yāsyaṃti paramāṃ siddhiṃ matprasādādasaṃśayam //
evamuktvā varārohe virarāma vṛṣadhvajaḥ

rāvaṇo'pi sa saṃtuṣṭo bhūyobhūyo maheśvaram //
pūjayitvā ca talliṃgaṃ samāruhya ca puṣpakam //
trailokyavijayākāṃkṣī iṣṭaṃ deśaṃ jagāma ha

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye rāvaṇeśvaramāhātmyavarṇanaṃnāma trayorviśatyuttaraśatatamo'dhyāyaḥ