સ્કંદ પુરાણ · અધ્યાય 7.123

॥ ઈશ્વર ઉવાચ ॥ ॥
તતો ગચ્છેન્મહાદેવિ રાવણેશ્વરમુત્તમમ્ ॥
તસ્માદ્દક્ષિણનૈરૃત્યે ધનુષાં ષોડશે સ્થિતમ્

પ્રતિષ્ઠિતં દશાસ્યેન સર્વપાતકનાશનમ્ ॥
પૌલસ્ત્યો રાવણો દેવિ રાક્ષસસ્તુ સુદારુણઃ

ત્રૈલોક્યવિજયાકાઙ્ક્ષી પુષ્પકેણ ચચાર હ ॥
કસ્યચિત્ત્વથ કાલસ્ય વિમાનં તસ્ય પુષ્પકમ્

।
વ્રજદ્વૈ વ્યોમમાર્ગેણ નિશ્ચલં સહસાઽભવત્ ॥
સ્તંભિતં પુષ્પકં દૃષ્ટ્વા રાવણો વિસ્મયાન્વિતઃ

પ્રહસ્તં પ્રેષયામાસ કિમિદં વ્રજ મેદિનીમ્ ॥
અહતાઽસ્ય ગતિર્યસ્માત્ત્રૈલોક્યે સચરાચરે

તત્કસ્માન્નિશ્ચલં જાતં વિમાનં પુષ્પકં મમ ॥
અથાઽસૌ સત્વરો દેવિ જગામ વસુધાતલે

અપશ્યદ્દેવદેવેશં શ્રીસોમેશં મહાપ્રભમ્ ॥
સ્તૂયમાનં સુરગણૈઃ શતશોઽથ સહસ્રશઃ

તં દૃષ્ટ્વા રાક્ષસે ન્દ્રાય તત્સર્વં વિસ્તરાત્પ્રિયે ॥
પ્રહસ્તઃ કથયામાસ યદ્દૃષ્ટં ક્ષેત્રમધ્યતઃ

॥ પ્રહસ્ત ઉવાચ ॥ ॥
રાક્ષસેશ મહાબાહો શિવક્ષેત્રં નિજં પ્રભો ॥
પ્રભાસેતિ સમાખ્યાતં ગણગન્ધર્વસેવિતમ્

તત્ર સોમેશ્વરો દેવઃ સ્વયં તિષ્ઠતિ શઙ્કરઃ ॥
અબ્ભક્ષૈર્વાયુભક્ષૈશ્ચ દંતોલૂખલિભિસ્તથા ॥
ઋષિભિર્વાલખિલ્યૈશ્ચ પૂજ્યમાનઃ સમંતતઃ

પ્રભાવાત્તસ્ય દેવસ્ય નેદં ગચ્છતિ પુષ્પકમ્ ॥
ન સ પ્રાલંઘ્યતે દેવો હ્યલંઘ્યો યઃ સુરાસુરૈઃ

॥ ઈશ્વર ઉવાચ ॥ ॥
તસ્ય તદ્વચનં શ્રુત્વા વિસ્મયોત્ફુલ્લલોચનઃ ॥
અવતીર્ય ધરાપૃષ્ઠં સોમેશં સમપશ્યત

પૂજયામાસ દેવેશિ ભક્ત્યા પરમયા યુતઃ ॥
રત્નૈર્બહુવિધૈર્વસ્ત્રૈર્ગન્ધપુષ્પાનુલેપનૈઃ

અથ પૌરજના દૃષ્ટ્વા રાવણં રાક્ષસેશ્વરમ્ ॥
સર્વદિક્ષુ વરારોહે ભયાદ્ભીતાઃ પ્રદુદ્રુવુઃ

શૂન્યં સમભવત્સર્વં તત્ર દેવો વ્યવસ્થિતઃ ॥
એતસ્મિન્નેવ કાલે તુ વાગુવાચાશરીરિણી

દશગ્રીવ મહાબાહો અયને ચોત્તરે તથા ॥
યાત્રાકાલે તુ દેવસ્ય સર્વપાપપ્રણાશને

દૂરતઃ સમનુપ્રાપ્તા ભૂરિલોકા દ્વિજાતયઃ ॥
રાક્ષસાનાં ભયાદ્ભીતાઃ પ્રયાંતિ હિ દિશો દશ

ભયાન્મા ત્વં રાક્ષસેન્દ્ર યાત્રાવિઘ્નકરો ભવ ॥
બાલ્યે વયસિ યત્પાપં વાર્દ્ધક્યે યૌવનેઽપિ ચ ॥
તત્સર્વં ક્ષાલયેન્મર્ત્યો દૃષ્ટ્વા સોમેશ્વરં પ્રભુમ્

તતોઽસૌ રાક્ષસેન્દ્રસ્તુ ગત્વૈકાન્તે સુગહ્વરે ॥
લિંગં ચ સ્થાપયામાસ ભક્ત્યા પરમયા યુતઃ

તતસ્તન્નિરતો ભૂત્વા સર્વૈસ્તૈ રાક્ષસેશ્વરઃ ॥
પૂજયામાસ દેવેશિ ઉપવાસપરાયણઃ

ચકાર પુરતસ્તસ્ય ગીતવાદ્યેન જાગરમ્ ॥
તતોઽર્ધરાત્રસમયે વાગુવાચાશરીરિણી

દશગ્રીવ મહાબાહો પરિતુષ્ટોઽસ્મિ તેઽનઘ ॥
મમ પ્રસાદાત્ત્રૈલોક્યં વશગં તે ભવિષ્યતિ ॥
અત્ર સંનિહિતો નિત્યં સ્થાસ્યામ્યહમસંશયમ્ ॥

યે ચૈતત્પૂજયિષ્યંતિ લિંગં ભક્તિયુતા નરાઃ ॥
અજેયાસ્તે ભવિષ્યંતિ શત્રૂણાં રાક્ષસેશ્વર

યાસ્યંતિ પરમાં સિદ્ધિં મત્પ્રસાદાદસંશયમ્ ॥
એવમુક્ત્વા વરારોહે વિરરામ વૃષધ્વજઃ

રાવણોઽપિ સ સંતુષ્ટો ભૂયોભૂયો મહેશ્વરમ્ ॥
પૂજયિત્વા ચ તલ્લિંગં સમારુહ્ય ચ પુષ્પકમ્ ॥
ત્રૈલોક્યવિજયાકાંક્ષી ઇષ્ટં દેશં જગામ હ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે રાવણેશ્વરમાહાત્મ્યવર્ણનંનામ ત્રયોર્વિશત્યુત્તરશતતમોઽધ્યાયઃ