Skanda Purana · Chapter 6.279

sūta uvāca // //
etatpurāṇamakhilaṃ purā skandenabhāṣitam //
bhṛgave brahmaputrāya tasmāllebhe tathāṃgirāḥ

tataśca cyavanaḥ prāpa sa ṛcīkastato muniḥ //
evaṃ paraṃparāprāptaṃ sarveṣu bhuvaneṣvapi

skāṃdaṃ purāṇametacca kumāreṇa puroddhṛtam //
yaḥ śṛṇoti satāṃ madhye naraḥ pāpātpramucyate

idaṃ purāṇamāyuṣyaṃ varṇānāṃ ca sukhāvaham //
nirmitaṃ ṣaṇmukheneha niyataṃ sumahātmanā

evametatpurā khyātamākhyānaṃ bhadramastu vaḥ

hāṭakeśvarakṣetrasya māhātmyaṃ śṛṇute naraḥ //
na tasya puṇyasaṃkhyānaṃ kartuṃ śakyeta kenacit

ya idaṃ dharmamāhātmyaṃ brāhmaṇāya prayacchati //
svargaloke vasettāvadyāvadakṣarasaṃkhyayā

yathā hi varṣato dhārā yathā vā divi tārakāḥ //
gaṃgāyāṃ sikatā yadvattadvatsaṃkhyā na vidyate

yo naraḥ śṛṇuyādbhaktyā dināni ca kiyaṃti vai //
sarvārthasiddho bhavati ya imāṃ paṭhate kathām / ९ //
putrārthī labhate putrāndhanārthī labhate dhanam //
labhate patikāmā yā patiṃ kanyā manoramam

samāgamaṃ labhaṃte ca vāṃdhavāśca pravāsibhiḥ //
skāṃdaṃ purāṇaṃ śrutvā tu pumānā pnoti vāṃchitam

śṛṇvataḥ paṭhataścaiva sarvakāmapradaṃ nṛṇām //
mahīṃ vijayate rājā śatrūṃścāpyadhitiṣṭhati

puṇyaṃ śrutvā purāṇaṃ vai dīrghamā yuśca viṃdati //
vedavicca bhavedvipraḥ kṣatriyo rājyamāpnuyāt

dhanaṃ dhānyaṃ tathā vaiśyaḥ śūdraḥ sukhamavāpnuyāt //
yaḥ ślokapādaṃ śṛṇuyādviṣṇulokaṃ sa gacchati

śrutvā purāṇametaddhi vācakaṃ yastu pūjayet //
tena brahmā ca viṣṇuśca rudraścaiva prapūjitaḥ

ekamapyakṣaraṃ yastu guruḥ śiṣye nivedayet//
pṛthivyā nāsti taddravyaṃ yaddattvā hyanṛṇī bhavet

ataḥ saṃpūjanīyastu vyāsaḥ śāstropadeśakaḥ //
gobhūhiraṇyavastrādyairbhojanaiḥ sārva kāmikaiḥ

ya evaṃ bhaktiyuktastu śrutvā śāstramanutamam //
pūjayedupadeṣṭāraṃ sa śaivaṃ padamāpnuyāt

purāṇaśravaṇādeva anekabhavasaṃcitam //
pāpaṃ praśamamāyāti sarvatīrthaphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye purāṇaśravaṇamāhātmyavarṇanaṃnāmaikonāśītyuttaradviśatatamo'dhyāyaḥ

//
iti śrīskāṃde mahāpurāṇe ṣaṣṭhaṃ nāgarakhaṇḍaṃ samāptam