Skanda Purana · Chapter 5.80

// īśvara uvāca //
āśītikaṃ vijānīhi devaṃ svapneśvaraṃ priye //
yasya darśanamātreṇa duḥsvapnaṃ naśyati dhruvam

kalmāṣapādeti khyāto loke rājā babhūva ha //
ikṣvākuvaṃśajo devi tejasā sūryavadbhuvi

sa kadācidvane rājā vaśiṣṭhasutamaurasam //
śaktiṃ paramadharmajñaṃ dadarśa vijiteṃdriyam //
mārgasthitaṃ taponiṣṭhamapagaccheti cābravīt

amuṃcaṃtaṃ tu paṃthānaṃ tamṛṣiṃ nṛpasattamaḥ //
jaghāna kaśayā mohāttadā rākṣasavanmunim

kaśāprahārābhihatastataḥ sa munipuṃgavaḥ //
taṃ śaśāpa ruṣāviṣṭo vāśiṣṭhaḥ krodhamūrchitaḥ

haṃsi rākṣasavadyasmādrājāpasada tāpasam //
tasmāttvamadyaprabhṛti puruṣādo bhaviṣyati

satataṃ piśitāsaktaścariṣyasi mahīmimām//
sa tu śaptastadā tena tatkṣaṇādvai nṛpottamaḥ

jagāma śaraṇaṃ śaktiṃ prasādayituma rhayat//
yadā na tuṣṭo viprarṣiḥ śaktiḥ paramakopanaḥ //
prasādyamāno bhūpena tadā tenāpi bhakṣitaḥ

śaktiṃ taṃ bhakṣayitvā tu vaśiṣṭhasyāparāntu tān //
bhakṣayāmāsa sahasā siṃhaḥ kṣudramṛgāniva

tadāprabhṛti saṃjātaḥ puruṣādo nṛpottamaḥ //
rātrau paśyati duḥsvapnānpāpasaṃghena mohitaḥ //

dṛṣṭvā bhayānakānsvapnānsa rājā paryyatapyata //
paścāttāpena saṃyukto vilalāpa suduḥkhitaḥ

athāpyuktamamātyaiśca kiṃ karoṣi mahīpate //
kasmātte niṣprabhā kāṃtirvivarṇo hariṇaḥ kṛśaḥ

sa rājā kathayāmāsa duḥsvapnānanupūrvaśaḥ //
svapne'haṃ sāgaraṃ śuṣkaṃ candraṃ ca patitaṃ bhuvi

uparuddhāṃ ca jagatīṃ ghanena tamasā vṛtām//
ātmānaṃ cāhamadrākṣaṃ malinaṃ muktamūrddhajam

pataṃtamadriśikharātkaluṣe gomaye hrade //
pibannaṃjalinā tailaṃ hasanniva muhurmuhuḥ

tailenābhyaktasarvāṃgastailamevāvagāhayan //
pīṭhe kārṣṇāyase caiva niṣaṇṇo'hamadho mukhaḥ

gāyaṃti pramadā raktā raktamālyānulepanāḥ //
kṛṣṇāṃbaradharāścānyāḥ kṛṣṇamālyānulepanāḥ

tābhirākṛṣyamāṇo'pi nīto'haṃ dakṣiṇāṃ diśam //
baddhvā rajjvā suvarṇasya lohasya rajatasya ca

pāṃsukardamayormadhye magnohaṃ lohayaṃtritaḥ //
kapotaistudyamāno'haṃ gṛdhraiḥ kākaiśca dāruṇaiḥ

sṛgālairbhakṣyamāṇaśca sthito madguramastake //
ṛkṣavānarayānastho gato'haṃ dakṣiṇāṃ diśam

nadīṃ nimagno niśceṣṭo jalahīnāṃ mahīsamām//
daṃtairvidārito rātrau rāsabhenāhamardditaḥ

tāḍito hadayetyarthaṃ caraṇairvajrasaṃnibhaiḥ //
dṛṣṭiśca hanyate'tyarthaṃ vetālairlohaśaṃ kubhiḥ

karālaiḥ kaṃṭakaiḥ kṛṣṇaiḥ puruṣairudyatāyudhaiḥ//
svapnehaṃ tāḍitotyarthamapramāṇaiḥ śitaiḥ śaraiḥ

evametanmayā dṛṣṭamimāṃrātriṃ bhayāvahām//
saṃkhyāṃ kartuṃ na śakyeta duḥsvapnānaparānbahūn

imāṃ tu duḥsvapnagatiṃ nirīkṣya vai hyanekarūpāmaviciṃtitāṃ purā //
bhayaṃ mahanme hṛdayaṃ na śuddhyati pragṛhya bāhū vilapāmyanāthavat

nṛpasya vacanaṃ śrutvā amātyā bhṛśaduḥkhitāḥ //
paśyaṃto durnimittāśca ulkāpātādikāstadā

sauri sūryakujākrāṃtaṃ nagaraṃ dṛśyate'dhunā//
nāgaṃ catuṣpadaṃ viṣṭiṃ kiṃstughnaṃ śakuniṃ tathā

karaṇāni na śasyaṃte muhūrttā dāruṇābhavan //
viditvā nṛpabhaṃgaṃ tu deśabhaṃgakulakṣayam

āśvāsayaṃto rājānamidaṃ vacanamabruvan //
alaṃ śokena kākutstha satyāsatyā hi vibhramāḥ

dṛśyaṃte bhāvitāḥ puṃsi svapne dhātuvaśena hi //
tathā pitrādidevāṃśca pūjaya brāhmaṇāṃstathā

ebhistato mokṣyase tvaṃ mānasādadhivibhramāt //
yasmāddaivopaghātānāṃ daivameva hi rakṣaṇam

evamāśvāsito bhūpo hyamātyairdharmakovidaiḥ //
tatpāpaṃ kathayāmāsa guruputravadhādikam

vaśiṣṭhasya suto jyeṣṭhaḥ śakti rvai bhakṣito mayā //
nṛśaṃsena tathāmātyā ekonaṃ bhakṣitaṃ śatam

tena pāpena saṃtaptaḥ kathaṃ svastho bhavāmi vai //
ekāpi brahmahatyāyā sāpi daivātsuduṣkarā

mayā punarnṛśaṃsena sā tathā na tu varjitā //
kāṃstu lokāngamiṣyāmi kṛtvā karma sudāruṇam //
rākṣaso'hamanenaiva śarīreṇa kulāṃtakṛt

jātaḥ kule raghūṇāṃ vai pāpātmā pāpasaṃbhavaḥ //
so'hamatra mariṣyāmi sādhayitvā hutāśanam

iti tasya vacaḥ śrutvā saudāsasya suvismitāḥ //
amātyā vedatattvajñāḥ sarvaśāstraviśāradāḥ

aho pāpamidaṃ bhūri kṛtaṃ pāpena sarvathā //
prāyaścittaṃ na jānīmo vaśiṣṭhena vinā'dhunā

tasmādadyaiva gaṃtavyamasya bhūpasya kāraṇāt //
yatra tiṣṭhati viprarṣirvaśiṣṭho bhagavānmuniḥ

ityuktvā sahitāstena te'mātyā bhṛśaduḥkhitāḥ //
gatvā yatrāśrame vipro vaśiṣṭho bhagavānṛṣiḥ

adṛśyaṃtīṃ vadhūṃ dīnāṃ yatrāśvāsayati prabhuḥ //
adṛśyaṃtī tu taṃ dṛṣṭvā kūrakarmāṇamagrataḥ //
bhayasaṃvignayā vācā vaśiṣṭhamidamabravīt

asau mṛtyurivogreṇa daṇḍena vahugarvitaḥ //
pragṛhītena kāṣṭhena rākṣaso'bhyeti bhīṣaṇaḥ

tannivārayituṃ śakto nānyo vai bhuvi kaścana //
tvāmṛte'dya mahābhāga sarvavedavidāṃ vara

trāhi māṃ bhaga vanpāpādasmāddāruṇadarśanāt //
rākṣaso'yamihāgatya nūnamāvāṃ samīhate

// vaśiṣṭha uvāca // //
mā bhaiḥ putri na bhetavyaṃ rākṣasātte kathaṃcana //
naitadrakṣo bhayaṃ yasmātpaśyasi tvamupasthitam//
rājā kalmāṣapādo'yamamātyaiḥ sahito vibhuḥ

sa eṣo'sminvanoddeśe samā yāto mamāṃtikam //
tamāyāṃtamathālakṣya vaśiṣṭho bhagavānṛṣiḥ //
vārayāmāsa tejasvī huṃkāreṇa nṛpottamam

mantrapūtena ca tataḥ samabhyukṣya ca vāriṇā //
mokṣayāmāsa vai bhāvādrākṣasādrājasattamam

pratilabhya tataḥ saṃjñāmabhivādya kṛtāṃjaliḥ//
uvāca nṛpatiḥ kāle vaśiṣṭhamṛṣisatta mam

saudāso'haṃ mahābhāga dāso'haṃ tava suvrata //
asminkāle yadiṣṭaṃ te brūhi kiṃ karavāṇi te

tasya tadvacanaṃ śrutvā nṛpasya dvijasattamaḥ //
jñātvā tapobalenaiva viśvāmitrasya ceṣṭitam //
rājānaṃ pratyuvācedaṃ vinayāvanataṃ tathā

jñātameva yathākālaṃ gaccha rājankuśa sthalīm//
mahākālasamīpe tu liṃgaṃ duḥsvapnanāśanam

rājasaṃpatkaraṃ divyaṃ putrapautravivarddhanam //
brahmahatyāsahasrāṇāṃ sphoṭanaṃ pāpanāśa nam //
tasya darśanamātreṇa vipāpmā ca bhaviṣyasi

duḥsvapnajaṃ bhayaṃ ghoraṃ vinaṃkṣyati na saṃśayaḥ //
grahāśca sānukūlāste bhaviṣyanti nṛpo ttama

ityukto guruṇā bhūyo vaśiṣṭhena mahātmanā //
jagāma tvarito devi mahākālavanaṃ śubham //
dadarśa tatra talliṃgaṃ duṣṭaduḥsvapnanāśanam

naṣṭāḥ sarvepi duḥsvapnāḥ susvapnāścābhavaṃstadā //
rājā niṣkalmaṣo bhūtvā punaḥ prāpnonnijaṃ padam //
ayodhyāyāṃ gato rājyaṃ cakāra muditastadā //

tadāprabhṛti devo'yaṃ susvapneśvarasaṃjñakaḥ //
babhūva bhuvane khyātaḥ sarvaduḥsvapnanāśanaḥ

aṣṭamyāṃ ca caturdaśyāṃ devaṃ svapneśvaraṃ śivam //
darśanaṃ ye kariṣyaṃti snātvā śiprājale śubhe//
ājanmaprabhavaṃ teṣāṃ duḥsvapnaṃ ca vinaśyati

sa eva sarvadā pūjya iha loke paratra ca //
yaḥ paśyati naro bhaktyā devaṃ svapneśvaraṃ śivam

yaṃ yaṃ kāmamabhidhyāya manasābhimataṃ naraḥ //
taṃ taṃ durllabhamāpnoti susvapneśvaradarśanāt

niyamena prapaśyaṃti devaṃ svapneśvaraṃ sadā //
te prayāṃti tanuṃ tyaktvā madīyaṃ bhavanaṃ priye

bhaktihīnaḥ kriyāhīno yaḥ paśyati prasaṃgataḥ //
supuṇyāṃ gatimāpnoti yogigamyāṃ yaśasvini

ye ca puṣpairvicitraiśca pūjayanti ca parvasu //
te sarvakāmasaṃpannāḥ śrībalārogyasaṃyutāḥ //
dīrghāyuṣaḥ śubhācārā jāyante dehino'malāḥ

ete ca brahmaviṣṇviṃdrakuberadahanādayaḥ //
susvapnaṃ paramaṃ prāptāḥ śrīsvapneśvaradarśanāt

eṣa te kathito devi prabhāvaḥ pāpanāśanaḥ //
svapneśvarasya devasya śṛṇu liṃgacatuṣṭayam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe umāmaheśvarasaṃvāde svapneśvaramāhātmyavarṇanaṃ nāmāśītitamo'dhyāyaḥ