Skanda Purana · Chapter 5.73

// śrīhara uvāca // //
trisaptatīśvaraṃ viddhi karabheśaṃ varānane //
yasya darśanamātreṇa kuyonirnaiva labhyate

vīraketurabhūddhīmānayodhyāyā mahīpatiḥ //
vidyāvinayasaubhāgyalāvaṇyāmṛta pūritaḥ

sa samyakpālayāmāsa prajāḥ putrānivaurasān //
atītānāgatajñānapariniṣṭhitamānasaḥ

athaikasmindine rājā jagāma gahanaṃ vanam//
mṛgasiṃhagajākīrṇaṃ vyāghrasaṃbarasaṃkulam

sa tatra vividhānvanyānvivyādha paravīrahā //
mṛgāṃśca mahiṣāṃścaiva varāhāṃśca sahasraśaḥ

loḍitaṃ tadvanaṃ sarvaṃ paśupakṣimṛgākulam //
rahitaṃ śvāpadaiḥ sarvaiḥ kṛtaṃ tena mahībhṛtā

yadā na śvāpadāstasmindṛśyate gahane vane //
tadā viddhastu karabho bāṇenānataparvaṇā

sa cāpi karabho devi bāṇamādāya satvaram //
viddho'pi niḥsṛto'tyarthaṃ rājñastasyaiva paśyataḥ //
sa ca rājā balī tūrṇaṃ sasāra karabhaṃ prati

tato nimnasthalaṃ caiva sa coṣṭro'dravadāśugaḥ //
muhūrtena tato devi yojanāni bahūnyapi

tataḥ sa rājā tāruṇyā daurasena balena ca //
sasāra bāṇāsanadhṛksakhaḍgaḥ sahayo nṛpaḥ

tato nadānnadīścaiva palvalāni vanāni ca //
atikramyānatikramya sasāraiva vanecaram

sa cāpi karabho devi āsādyāsādya taṃ nṛpam //
punarapyeti javano javena mahatā tataḥ

sa tasya bāṇairbahubhiḥ karabho vihvalīkṛtaḥ //
pṛṣṭhataḥ pārśvataścaiva punarabhyeti cāṃtikam //
punaśca javamāsyāya pārśve cāgre ca dṛśyate

athāraṇyaṃ mahāraudraṃ praviṣṭaḥ karabhastadā //
antardhānaṃ jagāmāśu sa ca rājā vane'viśat

praviśya ca mahāraṇyaṃ tāpasānāmathāśramam //
āsasāda tato rājā śrāṃtāśvopā viśatpunaḥ

taṃ kārmukakaraṃ dṛṣṭvā śramārttaṃ kṣudhitaṃ tadā //
samabhyetyarṣayastasmai pūjāṃ cakuryathāvidhi

sa pūjāmṛṣibhirdattāṃ pratigṛhya yathāvidhi //
apṛcchattāpasānsarvāṃstapaso vṛddhimuttamām

te tasya rājño vacanaṃ pratigṛhya tapodhanāḥ //
ṛṣayo rājaśārdūlaṃ papracchusta tprayojanam

kena bhadra sukhārthena saṃprāpto'si tapovanam //
padātirbaddhanistriṃśo dhanvī bāṇī nareśvara

etadicchāmahe śrotuṃ kutaḥ prāpto'si mānada //
kasminkule ca jātastvaṃ kiṃ nāmā brūhi pārthiva

tataḥ sa rājā sarvebhyo dvijebhyaḥ puruṣarṣabhaḥ //
ācakhyau tadyathā nyāyaṃ kulaṃ gotraṃ ca tattvataḥ

ikṣvākūṇāṃ kule jāto vīraketurdvijarṣabhāḥ //
carāmi mṛgayūthāni nighnanbāṇaiḥ sahasraśaḥ

balena mahatā yuktaḥ sāmātyaḥ saparicchadaḥ //
yadā na labdho gahane mṛgo vā sūkaro'pi vā

mahiṣaścittalo vāpi śaśo vā śaṃbaro vane //
tadā me karabho viddho bāṇenānataparvaṇā

sa praṇaṣṭaḥ kṣaṇenaiva sabāṇo mama paśyataḥ //
taṃ dravaṃtamanuprāpto vanametadyadṛcchayā

bhavatsakāśaṃ naṣṭaśrīrhatāśaḥ śramakarśitaḥ //
bhavatāṃ viditaṃ sarvaṃ sarvajñā hi tapodhanāḥ //
bhavaṃtaḥ sumahābhāgāstasmātpṛcchābhi saṃśayam

kva gataḥ karabho viddho mayā bāṇena sāṃpratam //
kva ca prāpsyāmi sahasā brūta tatsusamāhitāḥ

tatasteṣāṃ samastānāmṛṣīṇāmṛṣisattamaḥ //
ṛṣabho devi karabhaṃ smarannidamathābravīt

gataḥ sa karabho bhūpa mahākālavane śubhe //
gaccha tvaṃ ca mahārāja mahākālavane śubhe

yatra devo mahādevaḥ kārabhaṃ rūpamāsthitaḥ //
vinodārthaṃ ca devānāṃ liṃgamūrttirabhūtpurā

paścime kṣetrapālasya kailāsasya mahīpate //
samīpe tasya vighneśo modaka priyasaṃjñakaḥ

brahmaṇā pūjito rājandevānāmarthasiddhaye //
sa ca dharmadhvajo rājā haihayānāṃ kulodvahaḥ

turageṇa kadācittu nīto badarikāśramam //
prasiddhaṃ triṣu lokeṣu naranārāyaṇāśramam

tatra vīrājinadharaṃ kṛśaṃ vipraṃ dadarśa ha //
śarīramapi rājeṃdra na kenāpi samaṃ tadā //
dṛṣṭvā ca hasito viprastena rājñā pramādataḥ

yasmāddhasasi māṃ dṛṣṭvā tasmāduṣṭro bhaviṣyasi //
laṃboṣṭho laṃbadaṃtaśca visvaro vikṛtā kṛtiḥ

ityuktastena vipreṇa śaptopi nṛpasattamaḥ //
taṃ vipraṃ prārthayāmāsa sa ca tuṣṭobravīdidam

na me vāganṛtā bhūpa kadā cidapi vidyate //
avaśyaṃ karabho bhūtvā paścānmuktimavāpsyasi

yadā tvaṃ karabho jāto viddho vai vīraketunā //
ayodhyādhipabhūpena gamiṣyasi śarāhataḥ

mahākālavanaṃ divyaṃ tatra tvaṃ liṃgadarśanāt //
gamiṣyasi paraṃ sthānaṃ yatra devo maheśvaraḥ

sa cekṣvākukuladbhūto vīraketurmahābalaḥ //
liṃgadarśanato bhūpa cakravartitvamāpsyati

ityukto nṛpa bhūpālaḥ karabhatvaṃ samāgataḥ //
sa tvayābhihato bhūpa bāṇenānataparvaṇā //
drakṣyasi tvaṃ vimānasthaṃ vimuktaṃ liṃgadarśanāt

ityukto nṛpatistena ṛṣabheṇa dvijena tu //
ājagāma tvarāyukto mahākālavanaṃ śubham

dadarśa tatra talliṃgaṃ pūjitaṃ tridaśaiḥ sadā //
etasminnaṃtare vāṇī śrutā tena mahībhṛtā //

vimānasthena yā proktā tūṣṭreṇa madhurasvarā //
bhobho rājeṃdra māṃ paśya vimāne coddhṛte śubhe

darśanādasya liṃgasya prāptā me paramā gatiḥ //
tvayā hato'haṃ bāṇena tenāhaṃ tvāgato vane //
samīpamasya liṃgasya tvaṃ me baṃdhuḥ paro yataḥ

ityuktvā sa nṛpaṃ devi vacaḥ samadhurākṣaram//
gatastu paramaṃ sthānaṃ nityamavyayamakṣayam

tato devagaṇā vyomni sakiṃnaramahoragāḥ //
yakṣarākṣasagaṃdharvāḥ sapiśācāpsarogaṇāḥ

brahmeṃdraharimukhyāśca vimānairdevi saṃsthitāḥ //
ājagmurmuditāstatra draṣṭuṃ kautukamānasāḥ

vilokya karabhaṃ muktaṃ vimānasthaṃ virājitam //
liṃgadarśanamātreṇa saṃstutaṃ vividhaiḥ stavaiḥ

accharatnasamūhena mukuṭenojvalatviṣā //
bhāsaṃtaṃ ravikoṭīnāṃ jagadānaṃdakārakam

nāma cakrustato devā dṛṣṭvā māhātmyamuttamam //
darśanādasya liṃgasya mukto'yaṃ karabho yataḥ

tasmāttriṣvapi lokeṣu vikhyātaḥ karabheśvaraḥ //
bhaviṣyati na saṃdehaḥ paśuyonivimocakaḥ

ityuktvā tridaśāḥ sarve gatāḥ svaṃ dhiṣṇyamuttamam //
ayodhyādhipatirvīro vīraketuḥ svamālayam//
samṛddhaṃ niḥsapatnaṃ ca tato rājyaṃ cakāra saḥ

yaḥ paśyati naro devi karabheśvarasaṃjñakam //
sa prayātyakṣayām̐llokānpūjyamāno gaṇādhipaḥ

yadā kālādihāyāto rājarājeśvaro mahān //
pṛthivyāmekarāḍbhūtvā kramānmokṣamavāpnuyāt //

na duḥkhaṃ jāyate tasya vyādhiśokabhayaṃ tathā //
ye paśyaṃti prasaṃgena talliṃgaṃ karabheśvaram

sarvamedheṣu yatpuṇyaṃ sarvadāneṣu yatphalam //
tatphalaṃ tvadhikaṃ devi karabheśvaradarśanāt

vyādhayo nopajāyaṃte dāridryaṃ na kadācana//
aiśvaryaṃ cātulaṃ teṣāṃ jāyate darśanātsadā

paśuyonigatā ye ca pitaro duḥkhitāstu ye//
tiṣṭhaṃti cāṃbare te tu ciṃtayaṃtaḥ svagotrajam

āgamiṣyati naḥ putro naptā vā saṃtatāviha//
kadā paśyati deveśaṃ karabheśvaramīśvaram//
tena darśanamātreṇa muktirno bhavitā dhruvam

yo yamuddiśya vai kāmaṃ darśanaṃ tu kariṣyati//
tasya tajjāyate sarvaṃ mṛtasya paramā gatiḥ

eṣa te kathito devi prabhāvaḥ pāpanāśanaḥ //
karabheśasya devasya śṛṇu rājasthaleśvaram

/
iti śrīskāṃdemahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmya umāmaheśvarasaṃvāde karabheśvaramāhātmya varṇanaṃnāma trisaptatitamo'dhyāyaḥ