Skanda Purana · Chapter 5.72

// īśvara uvāca // //
dvisaptatīśvaraṃ viddhi candrādityeśvaraṃ priye //
yasya darśanamātreṇa kṛtakṛtyo naro bhavet

śaṃbareṇa purā devi nirjitāḥ saṃgare surāḥ //
naṣṭā raṇaṃ parityajya prāṇatrāṇaparāyaṇāḥ

grastaṃ ca rāhuṇā dṛṣṭvā śaśāṃkaṃ bhayavihvalam //
vinatāyāḥ suto jyeṣṭhaḥ proktaḥ sūryeṇa sārathiḥ

vahāruṇa rathaṃ śīghraṃ yatra yuddhaṃ na vidyate //
śrūyate candrasūryau tau daityānāṃ balavattarau

rāhurdaṃṣṭrākarālastu sa tṛtīyo bhayaṃkaraḥ //
na jñāyate raṇe candro mṛto naṣṭo'thavā punaḥ

sa ca na jñāyate śakraḥ kva gato varuṇo raṇe//
yamo na jñāyate kutra dhanadasya ca kā kathā

evamukto'ruṇo rugṇo raviṇā raṇamadhyataḥ//
rathaṃ saṃprerayāmāsa yatra yuddhaṃ na vidyate

etasminnaṃtare candraḥ samāyātastu tatkṣaṇāt //
rāhugrahagṛhīto'pi yatra devo divaspatiḥ

saṃtrastaḥ sa vilolākṣaḥ kṣaṇamātramacetanaḥ //
babhūva sahasā candro dṛṣṭvā devaṃ divākaram

śaṃbareṇa raṇe ruddhā rudrāśca bhayavidrutāḥ //
jagmurdiśo daśa bhayādasurendravibhīṣitāḥ

sādhyāḥ sarve bhayatrastā gatā yatra na dānavāḥ //
teṣu bhagneṣu deveṣu hataśiṣṭeṣu saṃgare

vyadhamatsarvagātrāṇi varmāṇi ca janakṣaye //
palāyamānadevānāmasuro balavaccharaiḥ

pṛṣṭhato nijaghānātha nikṛttāśca sahasraśaḥ //
ahaṃ naṣṭacchalenaiva vyagrībhūte 'sure tadā

āsuraṃ rūpamāsthāya prāṇatrāṇaparāyaṇaḥ //
śīghraṃ ca gamyate tāvadyāvannāyāti śaṃbaraḥ

ityuktaṃ niśināthena bhayabhītena pārvati //
candrādityau kṣaṇānnītāvaruṇena rathena vai

yatra devo jagannātho garuḍastho janārdanaḥ //
surasaṃghātasaṃketakiṃnarākīrṇakaṃdare //

maṃdare suranārīṇāṃ naṃdane varacandane //
dṛṣṭvā tatra jagannāthaṃ śaṃkhacakragadādharam //
stutiṃ tau cakraturdevau candrasūryau yaśasvini

namo lokatrayādhyakṣa svaprabhājitabhāskara //
namo viṣṇo namo jiṣṇo namaste kaiṭabhāṃtaka

namaḥ sarvakriyākartre jagattrātre ca te namaḥ //
namaścakrāyudhādhṛṣya namo dānavaghātine

namaḥ kramatrayākrāṃtatrailokyāṃtarhitodbhava //
namaḥ pracaṃḍadaityeṃdrakulakāla mahābala //

namo nābhihradodbhūtapadmagarbhamahāprabho //
janitāśeṣalokeśaviraṃcāya mahādyute

amarārivināśāya mahāsamaraśāline //
namaste vibudhādhīśa śaraṇaṃ bhava naḥ prabho

candrasūryakṛtaṃ stotraṃ śrutvā devo janārdanaḥ //
āśvāsya stutipūrveṇa prāha devo hyadhokṣajaḥ

//
// viṣṇuruvāca // //
svāgataṃ candrasūryau bho bhavaṃtau stutibhājanau //
kiṃ kāraṇamiha prāptau tadbrūtāṃ vigatajvarau

nārāyaṇenaivamuktau procatuścaṃdrabhāskarau //
samare nirjitā devāḥ śaṃbareṇa durātmanā

na jñātāḥ ktra gatāste ca āvāṃ naṣṭau prayatnataḥ //
aruṇena ihānītau dṛṣṭastvaṃ deva daivataḥ

śaṃbareṇa jitā devāḥ sa ca sarvatra dṛśyate //
sthale caiva jale caiva śaṃbaraḥ krūrapauruṣaḥ

naśyatāṃ tridaśeṃdrāṇāṃ pṛṣṭhataḥ śaravṛṣṭibhiḥ //
ciccheda naravarmāṇi cchatrāṇi ca dhanūṃṣi ca

varmāṇi ca vicitrāṇi mukuṭāni mahāṃti ca //
pṛthūni cāpi cāpāni carmāṇi vividhāni ca

gajāśca madasaṃbhinnakapolāḥ koṭiśaḥ surāḥ //
vājinaścāmarāpīḍā ratnaparyāṇabhūṣaṇāḥ

vibudhā dhvastasannāhā vigajā vipadātinaḥ //
vipadāmākarākārā babhūva suravāhinī

tato daityādhipo mānī parivṛtto mahāraṇāt //
nirjitārirmahātejā jvālāvāniva pāvakaḥ

vaṃdyamāno munigaṇaiḥ stūyamāno maharṣibhiḥ //
ānaṃdito jayāśīrbhiḥ pravarairdaityapuṃgavaiḥ

tatra sarvarddhisaṃpūrṇamāsanaṃ hemabhūṣaṇam //
adhyatiṣṭhata daityeṃdrastatra maṃgalaveśmani //
tatropaviṣṭaḥ śuśubhe daityarājo mahāyaśāḥ

divyacaṃdanapuṣṭāṃgaḥ surapuṣpasamujjvalaḥ //
mukuṭākārajuṣṭāṃgaḥ sitacāmaravījitaḥ //
mṛtotthitaistathā daityairdaityādhīśairadhiṣṭhitaḥ

kratubhirmūrttimadbhiśca sevya māno mahābalaḥ //
sarvapuṣpotkarayutairnānāvihaganādibhiḥ

tatra śrīratulā loke tatra lakṣmīrnirargalā //
tatra kāṃtirdyutiḥ śobhā śaṃbaro yatra dānavaḥ

evaṃ sa daityanṛpatiḥ sabhṛtyastatra modate //
svayamiṃdrastu saṃjātaścaṃdrasūryau kṛtau svakau

tayoriti vacaḥ śrutvā sa devaḥ puruṣottamaḥ //
ciraṃ dhyātvā svamanasi tadāvocadidaṃ priye

caṃdrasūryau mayā jñātaṃ śaṃbarasya viceṣṭitam //
brahmaṇo varadānena bhoktavyaṃ tapasaḥ phalam

śaṃbarāya purā kṣiptaṃ vajraṃ kuliśapāṇinā //
hṛdaye nihataḥ so'pi tathāpi na mṛto'suraḥ

gamyatāṃ ca mayājñaptau mahākā lavanottame //
candrasūryau mamādeśāttatra siddhiṃ ca lapsyatha

tatrānaṃto mahākālo liṃgarūpo maheśvaraḥ //
tasya cottarato deśe liṃgaṃ kāmapradaṃ śivam

tasya darśanamātreṇa kṛtakṛtyau bhaviṣyathaḥ //
tasya jvālāsamūhena maraṇaṃ śaṃbarasya ca //
bhaviṣyati na saṃdehastasmāttatraiva gamya tām

ityuktau vāsudevena caṃdrasūryau yaśasvini //
satvaraṃ hṛṣṭaromāṇau mahākālavanaṃ gatau

tatra dṛṣṭvā mahādevaṃ tejaso rāśimavya yam //
stutaṃ ca vividhaiḥ stotraiḥ pūjitaṃ kusumaiḥ śubhaiḥ

etasminnaṃtare vāṇī liṃgamadhyātsamutthitā //
āśvāsayaṃtī tarasā candrasūryau himātmaje

hataḥ sa śaṃbaro daityo gatau tau candrabhāskarau //
daityānāṃ nirmitau duṣṭau pātālāṃtarasaṃsthitau

rāhuketū grahāṃte tu kṛtau samayapūrvakau //
sthāpitaḥ svapade śakro devaiḥ saha na saṃśayaḥ

svaṃ svaṃ sthānaṃ gatāḥ sarve lokapālā mudā yutāḥ //
kāṃtipratāpasaṃyuktau bhavantau bhuvanatraye

gagane grahanakṣatraiḥ sahitau vicariṣyathaḥ //
pūrvavatpuṇyapāpānāṃ sākṣibhūtau bhaviṣyathaḥ

ityuktau candrasūryau tu tayā vāṇyā varānane //
santuṣṭau kṛtakṛtyau tu saṃjātau liṃgadarśanāt

etasminnaṃtare devā vimānasthā samāgatāḥ //
yatra caṃdraśca sūryaśca mahākā lavane śubhau

jñātvā liṃgasya māhātmyaṃ nāma cakuḥ samāhitāḥ //
sevitaṃ caṃdrasūryābhyāṃ liṃgaṃ tejomayaṃ param

candrādityeśvaraṃnāma khyātiṃ yāsyati bhūtale //
liṃgasyāsya samutthena jvālāsaṃghena śaṃbaraḥ//
dagdho bhṛtyajanaiḥ sārddhaṃ candrasūryānusevanāt

ityuktvā tridaśāḥ saveṃ samīpe sarvataḥ sthitāḥ//
stuvanto vividhaiḥ stotraiścaṃdrādityeśvaraṃ śivam

candrādityau ca tatrasthau sthitau liṃgasamīpataḥ //
ārādhayantau deveśaṃ padaṃ prāptau ca pūrvavat

ye paśyaṃti narā bhaktyā candrādityecaraṃ śivam //
te yāṃti sūryalokaṃ tu candralokaṃ tathaiva ca

/
vimānaiḥ sūryasakāśaistathā caṃdraprabhaiḥ śubhaiḥ //
yāvaccandraśca sūryaśca tāvatteṣāṃ sukhaṃ bhavet

candrasūryoparāge tu caṃdrādityeśvaraṃ śivam //
ye paśyaṃti narā bhaktyā snātvā śiprāṃ ca pāvanīm

teṣāṃ kulaśataṃ yāvatpaitṛkaṃ mātṛkaṃ tathā //
loke caṃdrasya sūryasya modate śāśvatīḥ samāḥ//

amāsomasamāyoge ye paśyanti prasaṃgataḥ //
candrādityeśvaraṃ devaṃ na te yāṃti yamālayam

eṣa te kathito devi prabhāvaḥ pāpanāśanaḥ //
candrādityeśvareśasya śrūyatāṃ karabheśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśīti liṅgamāhātmya umāmaheśvarasaṃvāde cadrādityeśvaramāhātmyavarṇanaṃnāma dvisaptatitamo'dhyāyaḥ